Ndikpeme Se Ẹdade Ẹdiọn̄ọ Nnyịn nte Mme Christian

“Jehovah ọdọhọ, ete, Mbufo ẹdi ntiense mi.”—ISAIAH 43:10.

1. Nso orụk owo ke Jehovah odụri ada?

 KE INI odude ke Ufọkmbono Obio Ubọn̄, nen̄ede se kpukpru owo ke ufọkmbono oro. Mmanie ke okụt do? Ekeme ndidi omokụt nte ifịk ifịk n̄kparawa owo ẹnọde ọyọhọ n̄kpan̄utọn̄ man ẹfiọk N̄wed Abasi. (Psalm 148:12, 13) Eyedi afo omonyụn̄ okụt mme ibuot ufọk oro ẹdomode ndidat Abasi esịt okposụkedi mmọ ẹdụn̄de ke ererimbot oro mîbatke uwem ubon ke n̄kpọ. Ekeme ndidi omokụt n̄ko ndima n̄kani owo oro ẹsọn̄ọde ẹda ẹdu uwem ekekem ye uyakidem oro mmọ ẹkeyakde ẹnọ Jehovah, kpa ye mme udọn̄ọ oro ẹsan̄ade ye usọn̄. (Mme N̄ke 16:31) Kpukpru mmọ ẹnen̄ede ẹma Jehovah. Ndien enye okụt ke odot ndidụri mmọ nda. Eyen Abasi ama ọsọn̄ọ emi ke ndidọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.”—John 6:37, 44, 65.

2, 3. Ntak emi mîmemke utom ndinen̄ede ndu uwem nte mme Christian?

² Ndi esịt inemke fi ndidi kiet ke otu mbon oro Jehovah enyịmede onyụn̄ ọdiọn̄de? Nte ededi, imemke utom ndidu uwem nte Christian ke “ndiọkeyo” emi. (2 Timothy 3:1) Emi enen̄ede edi ntre akpan akpan ye mme uyen oro ẹkemanade-mana ẹdụk ubon  Christian. Uyen kiet ọkọdọhọ ete: ‘Okposụkedi n̄kesidụkde mme mbono esop Christian, n̄kenen̄ekede nnyene mme utịtmbuba eke spirit, n̄ko ke nditịn̄ akpanikọ, n̄kenen̄ekede nnyene udọn̄ ndinam n̄kpọ Jehovah.’

³ Udọn̄ editie nte ubọkn̄ka, odudu ererimbot, ye ndiọi udọn̄ ẹkeme ndiwọn̄ọde ntịn̄enyịn ndusụk owo oro ẹnen̄erede ẹyom ndinam n̄kpọ Jehovah. Ke ini idude ke ọkpọsọn̄ mfịghe, oro ekeme ndinam nnyịn itọn̄ọ ndifre sụn̄sụn̄ ke nnyịn idi Christian. Ke uwụtn̄kpọ, ediwak owo mfịn ke ererimbot ẹda mme edumbet Bible ẹban̄ade ido uwem nte ido eyo oko m̀mê se mîkemke ye ido eyo mbịn. (1 Peter 4:4) Ndusụk owo ẹkere ke ufọn idụhe ndituak ibuot nnọ Abasi nte enye etemede. (John 4:24) Ke leta oro enye ekewetde ọnọ ẹsọk mbon Ephesus, Paul ọkọdọhọ ke odu “spirit,” m̀mê akpan edu oro ererimbot enyenede. Edu emi anam mme owo ẹkere n̄kpọ nte mbon oro mîfiọkke Jehovah.

4. Didie ke Jesus okowụt ntak emi anade itịm ikpeme se ẹdade ẹdiọn̄ọ nnyịn nte mme Christian?

⁴ Nte ededi, sia nnyịn idide mme asan̄autom Jehovah oro iyakde idem inọ, nnyịn imọfiọk ke edinen̄ede edi ata n̄kpọ mbọm edieke owo nnyịn ekededi—akwa owo m̀mê eyenọwọn̄—atabade se ẹdade ẹdiọn̄ọ nnyịn nte mme Christian. Nditiene mme edumbet Jehovah nnyụn̄ nnam se enye oyomde oto nnyịn ẹdinam ẹnen̄ede ẹdiọn̄ọ ke idi Christian. Emi edi akpanikọ koro ẹkebot nnyịn ke mbiet Abasi. (Genesis 1:26; Micah 6:8) Bible ada se ẹdade ẹdiọn̄ọ nnyịn nte mme Christian odomo ye ekụra oro owo esịnede. Jesus ama odụri owo utọn̄ aban̄a eyo nnyịn ete: “Sese! Ami mmọn̄ ndi nte inọ. Inemesịt edi eke owo emi odude ke edidemede onyụn̄ ekpemede ekụra esie, mbak enye edisan̄a iferi ndien mme owo ẹkụt mbubiam esie.” * (Ediyarade 16:15) Nnyịn iyomke ndikpọnọde mme edu Christian ye mme edumbet nnyịn nnịm n̄kan̄ kiet nnyụn̄ nyak ererimbot Satan anam nnyịn idu uwem nte mmọ. Edieke iyakde oro etịbe, nnyịn ikpataba “ekụra” nnyịn. Utọ n̄kpọ oro ọkpọdiọk etieti onyụn̄ anam owo bụt.

5, 6. Ntak emi ọfọnde ndinyene iwụk ke n̄kan̄ eke spirit?

⁵ Owo ndinen̄ede ndiọn̄ọ ke imọ idi Christian eyenen̄ede otụk nte enye odude uwem. Didie? Edieke andituak ibuot nnọ Jehovah mîfiọkke owo emi enye enen̄erede edi, enye ekeme ndinana iwụk, inyụn̄ inyeneke mme akpan utịtmbuba. Bible odụri nnyịn utọn̄ ediwak ini ete ikûnana iwụk ntre. Mbet oro James, eketeme ete: “Owo eke eyịkde ebiet mbufịt inyan̄ emi ofụm eberide emen otop ọduọk. Ke akpanikọ, yak owo oro okûkere ete imọ iyọbọ n̄kpọ ndomokiet ito Jehovah; enye edi owo esịt iba, isọn̄ọke ida ke kpukpru usụn̄ esie.”—James 1:6-8; Ephesus 4:14; Mme Hebrew 13:9.

⁶ Didie ke nnyịn ikeme ndikpeme se ẹdade ẹdiọn̄ọ nnyịn nte mme Christian? Nso ikeme ndin̄wam nnyịn inen̄ede ifiọk akwa ifet oro inyenede nte mme andituak ibuot nnọ Ata  Edikon̄? Mbọk ẹyak ikere iban̄a mme usụn̄ oro ẹtienede mi.

Nen̄ede Wụt ke Edi Christian

7. Ntak emi ọfọnde ndikpe Jehovah ubọk ite odụn̄ọde nnyịn?

⁷ Ka iso sọn̄ọ itie ebuana fo ye Jehovah. Mfọnn̄kan n̄kpọ oro Christian enyenede edi ọkpọkpọ itie ebuana ye Abasi. (Psalm 25:14; Mme N̄ke 3:32) Edieke nnyịn itọn̄ọde ndiyịk m̀mê ke idedi Christian, nnyịn ikpenyene ndinen̄ede ndụn̄ọde nte itie ebuana nnyịn ye Abasi etiede. Andiwet psalm ama ekpe Abasi ubọk ete: “O Jehovah, domo mi, nyụn̄ se mi; [dụn̄ọde] ekpụt mi ye esịt mi.” (Psalm 26:2) Ntak emi utọ ndụn̄ọde oro ọfọnde? Koro nnyịn ikemeke nditịm ndụn̄ọde se isịnede nnyịn ke esịt ye ke ekikere. Jehovah ikpọn̄-ikpọn̄ ekeme ndifiọk se nnyịn idide ke esịtidem—se nnyịn iduakde, se ikerede, ye nte etiede nnyịn ke idem.—Jeremiah 17:9, 10.

8. (a) Didie ke Jehovah ndidomo nnyịn nse ekeme ndinọ nnyịn ufọn? (b) Nso un̄wam ke afo ọbọ man ọkọri nte Christian?

⁸ Ke ini iben̄ede Jehovah ite odụn̄ọde nnyịn, nnyịn iyom enye odomo nnyịn ese. Enye ekeme ndiyak ndusụk n̄kpọ ẹtịbe oro ẹdiwụtde se nnyịn inen̄erede idi ye se isịnede nnyịn ke esịt. (Mme Hebrew 4:12, 13; James 1:22-25) Nnyịn ikpenyene ndidara utọ udomo oro koro mmọ ẹnọde nnyịn ifet ndiwụt adan̄a nte imade Jehovah. Mme utọ udomo oro ẹwụt m̀mê nnyịn ‘imọyọhọ ikem inyụn̄ ifọn ke kpukpru nde, inanake baba n̄kpọ kiet.’ (James 1:2-4) Ndien oro ayanam nnyịn ikọri ke n̄kan̄ eke spirit.—Ephesus 4:22-24.

9. Ndi owo ekpenyene ndinen̄ede n̄kpep Bible n̄kukụre edieke enye amade? Nam an̄wan̄a.

⁹ Nen̄ede kpep n̄kpọ man ọfiọk akpanikọ Bible. Mbuọtidem oro nnyịn inyenede nte mme asan̄autom Jehovah ekeme ndimem edieke nnyịn mîtịmke ifiọk N̄wed Abasi. (Philippi 1:9, 10) Kpukpru Christian—n̄kpri ye ikpọ—ẹnyene nditịm n̄kpep n̄kpọ man ẹfiọk ke se mmimọ inịmde enen̄ede edi akpanikọ oro odude ke Bible. Paul ama esịn udọn̄ ọnọ ekemmọ mme andinịm ke akpanikọ ete: “Ẹdụn̄ọde kpukpru n̄kpọ ẹfiọk; ẹsọn̄ọ ẹmụm se ifọnde ẹkama.” (1 Thessalonica 5:21) N̄kparawa Christian ke ubon oro ẹten̄ede Abasi ẹkpenyene ndifiọk ke idịghe mbuọtidem ete ye eka mmimọ edinam mmimọ idi Christian. David, ete Solomon ama ọnọ Solomon item ete: ‘Fiọk Abasi usọ, nyụn̄ nam n̄kpọ esie ke ofụri esịt.’ (1 Chronicles 28:9) Ikanaha Solomon ekere ke ete imọ ndinyene mbuọtidem ke Jehovah ayanam imọ inyene n̄ko. Enye ekenyene ndifiọk Jehovah ke idemesie, ndien se enye akanamde edi oro. Enye ama ekpe Abasi ubọk ete: “Kam nọ mi eti ibuot ye ifiọk, man n̄wọrọ ke iso mbio emi, nnyụn̄ ndụk.”—2 Chronicles 1:10.

10. Ntak emi mîdiọkke ndida esịt akpanikọ mbụp nti mbụme?

¹⁰ Ọkpọsọn̄ mbuọtidem ọkọn̄ọ ke ifiọk. Paul ọkọdọhọ ete: “Mbuọtidem oto ke n̄kpọ oro ẹkopde.” (Rome 10:17) Nso ke ikọ esie ọkọwọrọ? Enye ọkọwọrọ ke edieke nnyịn ikpepde Ikọ Abasi, oro ọyọsọn̄ọ mbuọtidem oro inyenede ke Jehovah, ke mme un̄wọn̄ọ esie, ye ke esop esie. Ndibụp nti mbụme mban̄a se Bible etịn̄de ekeme ndinam nnyịn inyene mme ibọrọ oro ẹsọn̄ọde nnyịn idem. Ke adianade do, nnyịn imọdiọn̄ọ item oro Paul ọkọnọde ke Rome 12: 2 ete: “[Ẹdomo] ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” Edi didie ke ikeme ndinam oro? Ebe ke ndinyene “nnennen ifiọk akpanikọ.” (Titus 1:1) Spirit Jehovah ekeme ndin̄wam nnyịn ifiọk idem mme n̄kpọ oro ẹsọn̄de ndifiọk. (1 Corinth 2:11, 12) Nnyịn ikpenyene ndibọn̄ akam mben̄e Abasi an̄wam nnyịn ke ini n̄kpọ mîn̄wan̄ake nnyịn. (Psalm 119:10, 11, 27) Jehovah oyom nnyịn ifiọk Ikọ esie, inịm enye ke akpanikọ, inyụn̄ inam enye. Enye amama nti mbụme oro ẹdade esịt akpanikọ ẹbụp.

Biere Ndidat Abasi Esịt

11. (a) Ewe ndammana udọn̄ ikeme ndikọk afia nnọ nnyịn? (b) Didie ke nnyịn ikeme ndisọn̄ọ nda mbiọn̄ọ udọn̄ edibiet ubọkn̄ka?

¹¹ Domo ndidat Abasi esịt, utu ke ndidat owo. Edi ndammana n̄kpọ mme owo ndidiọn̄ọ  nnyịn ke ntak nsan̄a oro idụkde. Idụhe owo oro mîyomke ufan, ndien esịt esidat nnyịn ke ini mme ufan ẹsịnde nnyịn ke otu mmọ. Ke ini ediwọrọ ndụk akwa owo—ye ke oro ebede—udọn̄ editie nte n̄ka esinen̄ede ọsọn̄ ubọk, anamde owo enen̄ede oyom ndidat mbon en̄wen esịt. Edi mme ufan ye mme ubọkn̄ka nnyịn isiwakke ndiyom ufọn nnyịn. Ndusụk ini, mmọ ẹsikam ẹyom owo emi editienede mmimọ inam idiọk. (Mme N̄ke 1:11-19) Ke ini Christian ayakde idem ọnọ idiọk etabi ubọkn̄ka, enye esiwak ndidịp se enye edide. (Psalm 26:4) Apostle Paul ama odụri owo utọn̄ ete: “Ẹkûkpebe edu uwem ererimbot emi.” (Rome 12:2, The Jerusalem Bible) Jehovah esinọ nnyịn ukeme ndin̄wana mbiọn̄ọ edu uwem ererimbot emi.—Mme Hebrew 13:6.

12. Ewe uwụtn̄kpọ ye edumbet ikeme ndinam nnyịn isọn̄ọ ida ke ini ẹdomode mbuọtidem nnyịn ke Abasi?

¹² Ke ini ererimbot odomode ndibiat idaha Christian nnyịn, nnyịn ikpenyene nditi ke ndisọn̄ọ nda ke n̄kan̄ Abasi enen̄ede edi akpan n̄kpọ akan editiene se ediwak owo ẹdọhọde ke enen. Eti edumbet oro ikpetienede odu ke Exodus 23:2, emi ọdọhọde ete: “Kûtiene ediwak owo edem uka [idiọk].” Ke ini ediwak nditọ Israel ẹkekerede ke Jehovah idikemeke ndisu mme un̄wọn̄ọ Esie, Caleb ikamaha nditiene mmọ edem. Enye ama enen̄ede enịm ke mme un̄wọn̄ọ Abasi ẹyesu, ndien enye ama ọbọ akamba utịp ke ntak oro. (Numbers 13:30; Joshua 14:6-11) Ndi afo n̄ko emenyịme ndibiọn̄ọ ekikere ediwak owo man ekpeme itie ebuana fo ye Abasi?

13. Ntak emi owụtde ifiọk ndinam mme owo ẹdiọn̄ọ ke nnyịn idi Christian?

¹³ Nam mme owo ẹfiọk ke afo edi Christian. Man isọn̄ọ ida nte mme Christian, ana idu ke mben̄eidem ndinam mbon en̄wen ẹfiọk se nnyịn idide. Ke ini mme asua ẹkedomode ndibiọn̄ọ mme anam-akpanikọ nditọ Israel ndinam uduak Jehovah ke eyo Ezra, nditọ Israel ẹma ẹdọhọ ẹte: “Nnyịn idi ikọt Abasi enyọn̄ ye isọn̄.” (Ezra 5:11) Edieke nnyịn itienede se mme asua ẹtịn̄de ye nsụkuyo mmọ, ndịk ekeme ndinam nnyịn. Edieke iyomde ndinem kpukpru owo esịt, nnyịn idikemeke ndinam n̄kpọ ndomokiet. Ntre, kûyak owo esịn fi ndịk ke idem. Ọfọn anam mme owo ẹnen̄ede ẹfiọk kpukpru ini nte ke imọ idi kiet ke otu Mme Ntiense Jehovah. Da ata edu ukpono sọn̄ọ tịn̄ nọ mbon en̄wen ban̄a mme edumbet oro afo adade odu uwem, se afo enịmde ke akpanikọ, ye idaha fo nte Christian. Nam mbon en̄wen ẹfiọk ke emebiere ndidu uwem ekekem ye n̄kokon̄ idaha ido uwem oro Jehovah enịmde. Nam mmọ ẹfiọk ke idụhe se ikemede ndinam fi okpụhọde idaha fo nte Christian. Wụt ke imọ imenen̄ede ima mme idaha ido uwem imọ. (Psalm 64:10) Ndiwọrọ nda san̄asan̄a nte Christian ekeme ndisọn̄ọ fi idem, ekpeme fi, onyụn̄ akam ekeme ndinam mbon en̄wen ẹtọn̄ọ ndikpep n̄kpọ mban̄a Jehovah ye ikọt esie.

14. Ndi ikpayak nsahi m̀mê ubiọn̄ọ anam idem emem nnyịn? Nam an̄wan̄a.

¹⁴ Ih, ndusụk owo ẹkeme ndisak nnyụn̄ mbiọn̄ọ fi. (Jude 18) Kûyak idem emem fi  edieke mme owo mîmaha ndikpan̄ utọn̄ ke ini oyomde ndinam mmọ ẹfiọk mme edumbet oro afo adade odu uwem. (Ezekiel 3:7, 8) Tịme nte etetịme, afo udukemeke ndinam mbon oro mîmaha akpanikọ ẹkabade esịt. N̄kọm emeti Pharaoh. Kpukpru ufen m̀mê mme utịben̄kpọ oro enye okokụtde—idem ke akpan esie ama akakpa—ikanamke enye enịm ke Moses eketịn̄ ikọ ke ibuot Jehovah. Ntre, kûyak ndịk anam fi etre ndinam se akpanamde. Ndibuọt idem ke Abasi ekeme ndin̄wam nnyịn ikan ndịk.—Mme N̄ke 3:5, 6; 29:25.

Kpep N̄kpọ to Eset, Tịm Idem Nọ Ini Iso

15, 16. (a) Nso idi inyene eke spirit nnyịn? (b) Nso ufọn ke ikeme ndinyene edieke idade Ikọ Abasi ikere iban̄a inyene eke spirit nnyịn?

¹⁵ Da inyene eke spirit fo ke ọsọn̄urua. Mme Christian ẹkeme ndibọ ufọn edieke mmọ ẹdade Ikọ Abasi ẹkere ẹban̄a akpakịp inyene eke spirit oro mmọ ẹnyenede. Inyene emi esịne akpanikọ oro ẹkụtde ke Ikọ Jehovah, idotenyịn nsinsi uwem, ye ukpono edida ke ibuot Abasi ntan̄a eti mbụk. Ndi afo emekeme ndikụt idaha fo ke otu Mme Ntiense esie, ke otu ikọt esie oro ẹnọde akwa ifet edinam utom ukwọrọikọ Obio Ubọn̄ emi ẹdidade ẹnyan̄a mme owo? Ti ete ke Jehovah edi enye emi ọdọhọde ete: “Mbufo ẹdi ntiense mi.”—Isaiah 43:10.

¹⁶ Afo emekeme ndibụp idemfo utọ mbụme nte: ‘Adan̄a didie ke nda inyene eke spirit emi ke ọsọn̄urua? Ndi mmenen̄ede nda enye ke ọsọn̄urua tutu nyak uduak Abasi edi ebeiso n̄kpọ ke uwem mi? Ndi mmenen̄ede mma  enye tutu n̄keme ndin̄wana mbiọn̄ọ idomo ekededi oro ekemede ndinam mi ntaba enye?’ Inyene eke spirit nnyịn ekeme n̄ko ndinọ nnyịn ata ukpeme eke spirit oro owo mîkwe ke ebiet ekededi ke mîbọhọke esop Jehovah. (Psalm 91:1, 2) Ndidụn̄ọde mme n̄wọrọnda n̄kpọ oro ẹtịbede ke esop Jehovah mfịn ẹkeme ndinam nnyịn itịm ifiọk ke idụhe owo m̀mê n̄kpọ ekededi oro ekemede ndisọhi ikọt Jehovah mfep ke isọn̄ emi.—Isaiah 54:17; Jeremiah 1:19.

17. Utu ke ndiberi edem ke inyene eke spirit nnyịn kpọt, nso en̄wen ke oyom inam?

¹⁷ Edi akpanikọ, nnyịn ikemeke ndiberi edem ke inyene eke spirit nnyịn kpọt. Ana nnyịn owo kiet kiet inyene ata n̄kpet n̄kpet itie ebuana ye Abasi. Ke Paul ama akanam ekese ndisọn̄ọ mbuọtidem mme Christian ke Philippi, enye ama ewet ete: “Mmọdo, ndima mi, kpa nte mbufo ẹkopde uyo mi kpukpru ini, idịghe ke ini ndude kpọt, edi akpan akpan ke ini mmendụhe, ẹka iso ẹsan̄a ke ndịk ye nyekidem ẹnam edinyan̄a mbufo ọwọrọ usụn̄.” (Philippi 2:12) Mbuọtidem owo en̄wen ikemeke ndinyan̄a nnyịn.

18. Didie ke mme edinam Christian ẹkeme ndiwụt ke idi Christian?

¹⁸ Nen̄ede sịn idem nte ekekeme ke mme edinam Christian. Ẹdọhọ ke “utom oro owo anamde esinen̄ede anam ẹfiọk se owo edide.” Ẹnọ mme Christian akpan utom edikwọrọ eti mbụk Obio Ubọn̄ Abasi oro ama ọkọtọn̄ọ ndikara. Paul akatan̄a ete: “Adan̄a nte ami, ke akpanikọ, ndide apostle nnọ mme idụt, mmokpono utom mi.” (Rome 11:13) Utom ukwọrọikọ nnyịn anam nnyịn idi isio ye ererimbot, ndien nnyịn ndisịn idem n̄kwọrọ ikọ anam nnyịn inen̄ede iwụt ke idi Christian. Ndinen̄ede nsịn idem ke mme edinam ukara Abasi eken, utọ nte edidụk mme mbono esop, edibọp mme itie utuakibuot, edisịn ukeme n̄n̄wam mbon oro ẹdude ke unana, ye ntre ntre eken, ẹkeme ndinen̄ede n̄wụt ke idi Christian.—Galatia 6:9, 10; Mme Hebrew 10:23, 24.

Ndinen̄ede N̄wụt ke Idi Christian Asan̄a ye Akwa Utịp

19, 20. (a) Nso ufọn ke afo ke idemfo ọbọ ke ntak emi edide Christian? (b) Anie ebiere se nnyịn inen̄erede idi?

¹⁹ Da esisịt ini tie kere ediwak ufọn oro ibọde ke ntak emi idide Christian. Nnyịn imenyene akwa ukpono ke emi Jehovah ke idemesie ọdiọn̄ọde nnyịn. Prọfet Malachi ọkọdọhọ ete: “Mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.” (Malachi 3:16) Abasi ekeme ndibat nnyịn nte mme ufan esie. (James 2:23) Uwem nnyịn enen̄ede enyene uduak, enyene se ọwọrọde, onyụn̄ ọyọhọ ye nti utịtmbuba oro ẹnyenede ufọn. Nnyịn imonyụn̄ inyene idotenyịn nsinsi uwem.—Psalm 37:9.

²⁰ Ti ete ke idịghe owo ebiere se afo enen̄erede edi, edi Abasi. Mme owo ẹkeme ndida unana mfọnmma mmọ ndọhọ ke nnyịn idi ntem m̀mê oko. Edi ima oro Abasi amade nnyịn ye ọkpọkpọ udọn̄ oro enye enyenede ke idem nnyịn ẹnen̄ede ẹnam nnyịn idi n̄kpọ—kpa inyene esie. (Matthew 10:29-31) N̄ko, ima oro nnyịn imade Abasi ekeme ndinam ẹnen̄ede ẹfiọk se nnyịn idide onyụn̄ anam uwem nnyịn enen̄ede enyene uduak. “Edieke owo ekededi amade Abasi, Enye ọfiọk owo emi.”—1 Corinth 8:3.

[Ikọ idakisọn̄]

Nte Afo Emeti?

• Ntak emi ọfọnde mme Christian ndikpeme idaha eke spirit mmọ?

• Didie ke nnyịn ikeme ndisọn̄ọ n̄wụt ke nnyịn idi Christian?

• Ke ini ikerede m̀mê anie ke ikpenem esịt, nso ikeme ndin̄wam nnyịn inam nnennen ubiere?

• Didie ke ndinen̄ede mfiọk se nnyịn idide ekeme nditụk ini iso nnyịn nte mme Christian?

[Mme Mbụme Ukpepn̄kpọ]

[Mme ndise ke page 21]

Ndisịn idem ofụri ofụri ke mme edinam Christian ekeme ndinen̄ede n̄wụt ke nnyịn idi Christian