Mme Mbụme Ẹtode Mme Andikot

Ndi David ye ikọt esie ndikata uyo iso Abasi owụt ke ẹkeme ndibiat ibet Abasi ke ini owo odude ke idiọk idaha inyụn̄ ibọhọ ufen?—1 Samuel 21:1-6.

Leviticus 24:5-9 ọdọhọ ke mme oku kpọt ẹkenyene ndita uyo iso Abasi oro ẹkesikpụhọde kpukpru Sabbath. Edumbet oro akakarade edinam emi okowụt ke uyo oro ẹkedi edisana ndien ke mbon oro ẹkenamde utom Abasi kpọt—kpa mme oku—ẹkenyene ndita enye. Ama enen̄ede akwan̄a ndimen uyo oro nnọ owo ekededi m̀mê ndita enye ke inem. Nte ededi, Ahimelech oku ikanamke idiọk ndibuana edisana uyo emi ye David ye ikọt David.

Etie nte Edidem Saul ọkọdọn̄ David akpan utom. Biọn̄ ama ọdọn̄ David ye ikọt esie. Ahimelech ama okụt ke mmọ ẹsana nte ekemde ye Ibet. Edieke owo enende etiene ibet, ekeme nditie nte ke ama akwan̄a ndita uyo iso Abasi oro, edi ke nditịm ntịn̄, se mmọ ẹkenamde ikenen̄ekede ikwan̄a sia ẹkenịmde uyo oro ẹnọ mbon oro ẹnamde utom Abasi. Ke ekerede aban̄a akpan uduak oro ẹkenịmde uyo oro ẹnọ, Ahimelech ikamaha ndinen ntiene ibet ke afan̄ emi. Jesus Christ ke idemesie ama akam ada n̄kpọntịbe emi owụt ke akwan̄a ndinen ntiene ibet Sabbath ke usụn̄ oro mme Pharisee ẹkeyomde.—Matthew 12:1-8.

Nte ededi, emi iwọrọke ke owo ekeme ndibiat ibet Abasi ke ini enye odude ke idiọk idaha. Ke uwụtn̄kpọ, etie nte nditọ Israel ẹkedu ke ata idiọk idaha ke ini mmọ ẹken̄wanade ye mme Philistine. Edidem Saul ama ọdọhọ ete: “Idifọnke fọn inọ owo eke editade uyo tutu esịm mbubịteyo, man nsio usiene ye mme asua mi”! Bible ọdọhọ ete: “Ntre ke mmọ ẹsuan mme Philistine ke usen oro.” Mbonekọn̄ ẹma ẹkpa mba ye biọn̄, ‘ndien mmọ ẹma ẹtọn̄ọ ndiwot mme ufene nnyụn̄ nta mmọ ye iyịp.’ (1 Samuel 14:24, 31-33) Mmọ ẹma ẹdue Jehovah ke ndikabiat ibet esie kaban̄a iyịp. Se mmọ ẹkenamde ikekemke ye n̄kukụre usụn̄ oro Abasi ekenyịmede ẹsida iyịp ẹnam n̄kpọ, oro edi “ndisio isop” idiọkn̄kpọ. (Leviticus 17:10-12; Genesis 9:3, 4) Ke ntak mbọm, Jehovah ama ọbọ san̄asan̄a uwa oro ẹkewade ke ibuot mmọ.—1 Samuel 14:34, 35.

Ih, Jehovah oyom nnyịn inịm mbet esie ke kpukpru idaha. Apostle John ọkọdọhọ ete: “Emi edi se ndima Abasi ọwọrọde, ete nnyịn inịm ibet esie.”—1 John 5:3.

[Ndise ke page 30]

Ẹkesinịm uyo iso Abasi oro ẹkesikpụhọde kpukpru Sabbath, ke esịt ataya