Mme Mbụme Ẹtode Mme Andikot

Ke ini ẹkekopde ke Peter emi ẹkesịnde ke ufọk-n̄kpọkọbi mmọdo ada ke enyịnusụn̄, ntak emi mme mbet ẹkedọhọde ẹte: “Edi angel esie”?—Utom 12:15.

Ekeme ndidi mme mbet ẹkedue ẹkere ke angel oro edide isụn̄utom, emi akadade ke ibuot Peter, akada ke inuaotop. Kere ise ban̄a se ẹwetde ke itien̄wed emi.

Herod ama omụm Peter esịn ke ufọk-n̄kpọkọbi, ndien edi kpa Herod emi okowot James. Ntre mme mbet ẹma ẹnyene eti ntak ndinịm ke ẹyewot Peter n̄ko. Ẹma ẹsịn Peter ke ebuka ndien otu mbonekọn̄ inan̄ emi otu kiet kiet esịnede mbonekọn̄ inan̄ ẹma ẹkpeme enye ke adiana ke adiana. Edi ke okoneyo kiet, angel ama edikpọhọde enye ke utịbe utịbe usụn̄ onyụn̄ ada enye ọwọrọ ke ufọk-n̄kpọkọbi. Ke ini Peter ekedide edifiọk se iketịbede, enye ama ọdọhọ ete: “Ke emi mmọfiọk ke akpanikọ nte ke Jehovah ama osio angel esie ọdọn̄ onyụn̄ anyan̄a mi osio ke ubọk Herod.”—Utom 12:1-11.

Peter ama ọsọsọp aka ufọk Mary eka John Mark, emi ediwak mbet ẹkesopde idem. Ke ini enye ọkọkọn̄de usụn̄ inuaotop, ofụn an̄wan kiet emi ekekerede Rhoda ama ọwọrọ edi. Ke ini ọdiọn̄ọde uyo Peter, enye ama efehe aka ndiketịn̄ nnọ mbon efen ye unana ndikam mberede usụn̄ nnọ enye odụk ufọk! Ke akpa, mme mbet ikenịmke ke edi Peter ada oro ke inuaotop. Utu ke oro, mmọ ẹma ẹdue ẹdọhọ ẹte: “Edi angel esie.”—Utom 12:12-15.

Ndi mme mbet ẹkenịm ke ẹma ẹwowot Peter ndien ke spirit esie emi ọwọrọde ọkpọn̄ ikpọkidem akada oro ke inuaotop? Ikemeke ndidi ntre sia mme anditiene Jesus ẹma ẹfiọk akpanikọ N̄wed Abasi oro aban̄ade mme akpan̄kpa—nte ke mmọ “ifiọkke baba n̄kpọ kiet.” (Ecclesiastes 9:5, 10) Do, nso ke ikọ mme mbet emi ọkọwọrọ ke ini mmọ ẹkedọhọde ẹte: “Edi angel esie”?

Mme mbet Jesus ẹma ẹfiọk ke toto ke eset mme angel ẹma ẹsinọ ikọt Abasi ọkpọkpọ un̄wam. Ke uwụtn̄kpọ, Jacob ama etịn̄ aban̄a ‘angel emi akafakde imọ osio ke kpukpru idiọk-n̄kpọ.’ (Genesis 48:16) Ndien ke etịn̄de aban̄a ekpri eyen emi okodude ke otu mmọ, Jesus ama ọdọhọ mme anditiene enye ete: “Ẹkụt ẹte mbufo isịnke kiet ke otu n̄kpri owo emi ke ndek; koro ndọhọ mbufo nte mme angel mmọ ke heaven ẹsikụt iso Ete mi emi odude ke heaven kpukpru ini.”—Matthew 18:10.

Nte enemde, Young’s Literal Translation of the Holy Bible okot ikọ Greek emi agʹge·los (“angel”), “isụn̄utom.” Etie nte ndusụk mme Jew ẹma ẹnịm ke asan̄autom Abasi kiet kiet enyene angel esiemmọ—oro edi, “angel ukpeme.” Edi akpanikọ ke Ikọ Abasi ikpepke utọ ukpepn̄kpọ emi. Kpa ye oro, ekeme ndidi ke ini mme mbet oro ẹkedọhọde ẹte, “Edi angel esie,” mmọ ẹkekere ke isụn̄utom emi edide angel, oro akadade ke ibuot Peter, akada ke inuaotop.