Mme Mbụme Ẹtode Mme Andikot

Nso ke ikọ apostle Paul ọkọwọrọ ke ini enye ọkọdọhọde ke iban ẹkpenyene ‘ndidu ke ndopuyo ke esop’?

Paul ekewet esop Christian ke Corinth ete: “Nte edide ke kpukpru esop ndisana owo, yak iban ẹdu ke ndopuyo ke esop, koro owo inyịmeke mmọ ẹtịn̄ ikọ.” (1 Corinth 14:33, 34) Man itịm ifiọk se emi ọwọrọde, ọkpọfọn ikere ibana se ikanamde Paul ọnọ item emi.

Nneme Paul ke 1 Corinth ibuot 14 akaban̄a mme mbono esop Christian. Enye ama etịn̄ aban̄a se ẹkpenemede ke mme utọ mbono esop oro onyụn̄ ọnọ ekikere aban̄a nte ẹkpenịmde mmọ. (1 Corinth 14:1-6, 26-34) Adianade do, enye ama ọsọn̄ọ owụt ke uduak mbono esop Christian edi ‘ndibọp esop nnam ọkọri.’—1 Corinth 14:4, 5, 12, 26.

Item oro Paul ọnọde ete ‘ẹdop uyo’ odu utịm ikata ke 1 Corinth ibuot 14. Paul ọkọnọ nsio nsio otu ita ke esop item emi, man “kpukpru n̄kpọ ẹda itie ke ido nte eyede ye ke ndutịm.”—1 Corinth 14:40.

Akpa, Paul ọkọdọhọ ete: “Edieke owo etịn̄de ikọ ke usem, yak etre ke owo iba m̀mê ita ke n̄wak-n̄kaha, n̄ko yak edi ke adiana ke adiana; ndien yak owo akabade se ẹtịn̄de. Edi edieke akabadeikọ mîdụhe, yak enye odop uyo ke esop onyụn̄ etịn̄ ọnọ idemesie ye Abasi.” (1 Corinth 14:27, 28) Oro ikọwọrọke ke owo oro ikenyeneke ndisioro uyo ke mme mbono esop, edi ọkọwọrọ ke ama odu ini oro enye ekenyenede ndidop uyo. Kamse, edieke enye etịn̄de ikọ emi mîn̄wan̄ake owo ndomokiet, oro idibọpke esop inam ọkọri.

Udiana, Paul ọkọdọhọ ete: “Yak prọfet iba m̀mê ita ẹtịn̄ ikọ, yak mmọ eken ẹnyụn̄ ẹdụn̄ọde ẹfiọk se ọwọrọde. Edi edieke ẹnọde owo en̄wen ediyarade ke adan̄aemi osụk etiede do, yak akpa owo odop uyo.” Oro ikọwọrọke ke akpa prọfet emi ikenyeneke ndisioro uyo ke mme mbono esop, edi ọkọwọrọ ke enye ekenyene ndidop uyo  ndusụk ini. Ntem prọfet emi enyenede utịbe utịbe ediyarade ekeme nditịn̄ ikọ nnọ esop, ndien mbono esop ‘ọyọnọ kpukpru owo nsịnudọn̄.’—1 Corinth 14:26, 29-31.

Ọyọhọ ita, Paul ọkọdọhọ Christian iban kpọt, ete: “Yak iban ẹdu ke ndopuyo ke esop, koro owo inyịmeke mmọ ẹtịn̄ ikọ, edi yak mmọ ẹdu ke nsụkibuot.” (1 Corinth 14:34) Ntak emi Paul ọkọnọde Christian iban ewụhọ emi-e? Man n̄kpọ asan̄a ke nde ke nde ke esop. Enye ọdọhọ ete: “Edieke mmọ ẹyomde ndikpep n̄kpọ, yak mmọ ẹbụp mme ebe mmọ ke ufọk, koro edi n̄kpọ esuene n̄wan nditịn̄ ikọ ke esop.”—1 Corinth 14:35.

Anaedi ndusụk nditọete iban ẹma ẹsineni se ẹkesitịn̄de ke esop. Item Paul ama an̄wam nditọete iban ẹsọn utọ etịme etịme edu oro ẹnyụn̄ ẹsụhọde idem ẹnyịme ndutịm itieibuot oro Jehovah anamde, akpan akpan ndifiọk ke mme ebe ẹdi ibuot mmọ. (1 Corinth 11:3) Adianade do, nditọete iban ndidop uyo ke esop owụt ke mmọ inyeneke udọn̄ ndidi mme andikpep ke esop. Ke ini Paul ekewetde n̄wed ọnọ ẹsọk Timothy, enye ama owụt ke ikpodotke n̄wan edi andikpep ke esop: “Nyomke n̄wan ọnọ ukpep, m̀mê akara erenowo, edi odu ke ndopuyo.”—1 Timothy 2:12.

Ndi oro ọwọrọ ke Christian an̄wan ikpedehedei isioro uyo ke mbono esop? Baba. Ke eyo Paul, ekeme ndidi ama odu ini oro edisana spirit ekesinụkde Christian iban ẹbọn̄ akam m̀mê ẹtịn̄ ntịn̄nnịm ikọ ke esop. Ke mme utọ idaha ntre, mmọ ẹma ẹsiyara n̄kpọ ke ibuot man ẹwụt ke mmimọ imọdiọn̄ọ itie oro ẹnịmde mmimọ. * (1 Corinth 11:5) Adianade do, nte ekedide ke eyo Paul, ẹsịn udọn̄ ẹnọ nditọete iban ye iren mfịn ẹte ẹtan̄a idotenyịn mmọ an̄wan̄wa. (Mme Hebrew 10:23-25) Ke ẹsiode edinam emi ke an̄wautom ẹfep, nditọete iban ẹsitan̄a idotenyịn mmọ ẹnyụn̄ ẹsịn udọn̄ ẹnọ mbon efen ke mme mbono esop, ebe ke ndinọ mme ibọrọ oro ẹbọpde-bọp ke ini ẹbụpde mmọ mbụme ye ke ini ẹnamde mme nnamn̄wụt ke Esoputom m̀mê ẹnamde n̄kpọ ke Ufọkn̄wed Utom Ukara Abasi.

Ntem, Christian iban “ẹdu ke ndopuyo” ke nditre ndinam mme n̄kpọ oro irenowo ẹkpenamde nnyụn̄ nnọ esop ukpep. Ke uwụtn̄kpọ, mmọ isibụpke ntaha ntaha mbụme ndiwụt ke se mbiowo ẹkpepde inenke. Ke ndinam nnennen utom mmọ ke esop, nditọete iban ẹnen̄ede ẹtịp ẹsịn ke ndinam emem odu ke esop man “kpukpru n̄kpọ [ke mme mbono esop] ẹda itie ke usụn̄ oro ọbọpde-bọp owo anam ọkọri.”—1 Corinth 14:26, 33.

[Ikọ idakisọn̄]