N̄kpa—Enyene-Ndịk Unọmọ!

“TOTO ke emana, ẹnen̄ede ẹfiọk ke owo ekeme ndikpa ini ekededi,” ntre ke Arnold Toynbee, ewet mbụkeset eyen Britain ekewet. Enye ama adian do ete: “Onyụn̄ edi akpanikọ ke kpukpru owo ẹyekpan̄a.” Nnyịn isifụhọ didie ntem ke ini n̄kpa adade owo ke ubon m̀mê ata n̄kpet n̄kpet ufan!

N̄kpa ọmọnọmọ ubonowo ke ediwak tọsịn isua idahaemi. Nnyịn isifiọkke se ikpanamde ke ini ata edima owo nnyịn akpade. N̄kpa isatke-sat owo. Enye isioho owo eto. Eren kiet ekewet ntem ke ọyọhọ isua ikie 19: “Mfụhọ esinam nnyịn ikabade itie nte nditọwọn̄—idụhe akan-owo ke mbufiọk. Ataifiọk ifiọkke baba n̄kpọ kiet.” Nnyịn isikabade itie nte nditọwọn̄ koro mîfiọkke se ikpanamde mînyụn̄ ikemeke ndikpụhọ se itịbede. Inyene m̀mê odudu ikemeke ndinam akpan̄kpa adaha ada. Mme ọfiọkn̄kpọ owo ye ntaifiọk ikemeke nditre n̄kpa. Mbonuko ẹsitua kpa nte mbon eken.

Edidem David eke Israel eset ama okop orụk mfụhọ oro ke ini Absalom eyen esie akakpade. Ke ini okokopde ke eyen esie akpa, David ama atua onyụn̄ eseme ete: “Eyen mi Absalom! eyen mi, eyen mi, Absalom! ami n̄kpakam n̄kpa ke ibuot fo, O Absalom, eyen mi, eyen mi.” (2 Samuel 18:33) Okopodudu edidem emi akakande mme okopodudu asua esie ikekemeke ndinam baba n̄kpọ kiet ke mîbọhọke ndidọhọ ke “akpatre asua” emi akpakam ada imọ, ọkpọn̄ eyen imọ.—1 Corinth 15:26.

Ndi odu se ikemede nditre n̄kpa? Ke edide ntre, nso idotenyịn idu inọ mme akpan̄kpa? Ndi tutu amama nnyịn iyafiak ikụt mbonima nnyịn. Ibuotikọ oro etienede ọyọbọrọ mme mbụme emi nte ekemde ye N̄wed Abasi.