Mme Mbụme Ẹtode Mme Andikot

Edieke mme demon ẹfịnade owo, nso ke enye akpanam man ọbọhọ?

Ikọ Abasi owụt ke mbon oro mme demon ẹtụhọrede ẹkeme ndibọhọ. Akpan n̄kpọ oro ekemede ndinyan̄a mmọ edi akam. (Mark 9:25-29) Edi ekeme ndiyom owo oro mme demon ẹtụhọrede anam mme n̄kpọ efen. Se mme Christian akpa isua ikie ẹkenamde owụt n̄kpọ efen oro utọ mbon oro ẹkemede ndinam.

Ndusụk owo ke Ephesus eset ẹma ẹsituak ibuot ẹnọ mme demon mbemiso ẹkekabarede ẹdi mme anditiene Christ. Nte ededi, ke mmọ ẹma ẹkebiere ndinam n̄kpọ Abasi, “mmọ emi ẹkesibrede idiọn̄ [ẹma] ẹtan̄ n̄wed mmọ ẹbon ọtọkiet ẹnyụn̄ ẹdifọp mmọ ke iso kpukpru owo.” (Utom 19:19) Ke ndikọfọp mme n̄wed idiọn̄ mmọ, mbufa mme andinịm ke akpanikọ oro ke Ephesus ẹma ẹnịm uwụtn̄kpọ ẹnọ owo ekededi oro mîyomke demon afịna enye mfịn. Enen̄ede oyom utọ mbon oro ẹduọn̄ọ kpukpru n̄kpọ oro ẹnyenede ebuana ye ubụpekpo. Emi esịne mme n̄wed, mme magazine, mme vidio, mme n̄kpọ ẹtode Intanet, mme ikwọ ndem, ọkọrọ ye mme n̄kpọ n̄kpemeidem.—Deuteronomy 7:25, 26; 1 Corinth 10:21.

Ke ediwak isua ẹma ẹkebe tọn̄ọ mme Christian oro ke Ephesus ẹkefọp mme n̄wed idiọn̄ mmọ, apostle Paul ama ewet ete: “Nnyịn imenyene en̄wan ndin̄wan̄a . . . ye odudu ndiọi spirit.” (Ephesus 6:12) Paul ama esịn udọn̄ ọnọ mme Christian ete: “Ẹmen ofụri n̄kpọekọn̄ Abasi ẹsịne man mbufo ẹkpekeme ndisọn̄ọ nda n̄n̄wana ye n̄kari Devil.” (Ephesus 6:11) Item oro osụk enyenyene ufọn. Ana mme Christian ẹnen̄ede ẹnam n̄kpọ ẹsọn̄ọ idaha eke spirit mmọ man ẹkeme ndin̄wana mbiọn̄ọ ndiọi spirit. Paul ama ọsọn̄ọ etịn̄ ete: “Ke akande kpukpru n̄kpọ, ẹda mbuọtidem nte akwa otuekọn̄, emi mbufo ẹdikemede ndida nnịme kpukpru enyịmikan̄ andidiọk.” (Ephesus 6:16) Ukpepn̄kpọ Bible ekeme ndinam mbuọtidem owo ọsọn̄. (Rome 10:17; Colossae 2:6, 7) Mmọdo, ndikpep Bible kpukpru ini anam nnyịn inyene mbuọtidem oro etiede nte otuekọn̄, emi ekpemede nnyịn ọbiọn̄ọ ndiọi spirit.—Psalm 91:4; 1 John 5:5.

Ama enyene akpan n̄kpọ efen emi mme Christian oro ke Ephesus ẹkenyenede ndinam. Paul ọkọdọhọ mmọ ete: “[Ẹka] iso ẹda kpukpru orụk akam ye n̄kpeubọk ẹbọn̄ akam kpukpru ini ke spirit.” (Ephesus 6:18) Ih, ndinen̄ede mbọn̄ akam mben̄e ukpeme Jehovah eyenen̄ede an̄wam mbon oro ẹyomde ndibọhọ ndutụhọ mme demon mfịn. (Mme N̄ke 18:10; Matthew 6:13; 1 John 5:18, 19) Bible etịn̄ nte odotde ete: “Ẹsụk idem, ke ntre, ẹnọ Abasi; edi ẹbiọn̄ọ Devil, ndien enye eyefehe ọkpọn̄ mbufo.”—James. 4:7.

Ke adan̄aemi owo oro demon otụhọrede ekpenyenede ndinen̄ede mbọn̄ akam nyom un̄wam, ata mme Christian eken ẹkeme n̄ko ndibọn̄ akam ke ibuot utọ owo oro enen̄erede oyom ndinam n̄kpọ Jehovah mi, oro onyụn̄ enen̄erede esịn ukeme ndibiọn̄ọ ndiọi spirit. Mmọ ẹkeme ndiben̄e Abasi ọnọ owo oro mme demon ẹtụhọrede do ukeme ke n̄kan̄ eke spirit ndibiọn̄ọ ndiọi spirit. Sia Ikọ Abasi ọdọhọde ke “n̄kpeubọk edinen owo, ke ini odude ke edinam, enyene odudu etieti,” mmọdo, akam oro mme asan̄autom Abasi ẹbọn̄de eyenen̄ede enyene ufọn ọnọ mbon oro mme demon ẹtụhọrede, emi ẹnen̄erede ẹsịn ukeme ‘ndibiọn̄ọ Devil.’—James 5:16.

[Ndise ke page 31]

Mbon oro ẹkenịmde ke akpanikọ ke Ephesus ẹma ẹfọp mme n̄wed idiọn̄ mmọ