Ẹkûfehe Ndịk—Jehovah Odu ye Mbufo!

IBỊGHIKE ke akpa bọmb nuclear ama okobomo ke se ikande isua 50 emi ẹkebede, Harold C. Urey, ataifiọk emi ọkọbọde Enọ Nobel, ama etịn̄ aban̄a ini iso ete: “Nnyịn ididia udia ke ndịk, ide idap ke ndịk, idu uwem ke ndịk inyụn̄ ikpa ke ndịk.” Emi idịghe n̄kpọ n̄kpaidem, koro mfịn ererimbot nnyịn ọyọhọ ye ndịk. Kpukpru usen, n̄wedmbụk n̄kpọntịbe esibụk enyene-ndịk mbụk ẹban̄ade edinam oyomonsia, afai afai ubiatibet, ye mme udọn̄ọ oro ẹyan̄ade owo ifiọk.

Sia idide mme Christian, nnyịn imọfiọk se mme utọ n̄kpọ emi ẹwọrọde. Mmọ ẹwụt ke nnyịn idu ke “mme akpatre usen” eke idiọk editịm n̄kpọ emi Bible ekebemde iso etịn̄ ke ẹdidiọn̄ọ nte “ndiọkeyo.” (2 Timothy 3:1) Emi ọsọn̄ọ mbuọtidem nnyịn nte ke ibịghike, Jehovah Abasi ayada obufa ererimbot emi edinen ido edidụn̄de edi. (2 Peter 3:13) Nte emi ọwọrọ ke inaha nnyịn ikop ndịk?

Nte Mme Asan̄autom Abasi Ẹsede Ndịk

Jacob, David, ye Elijah ẹkedi ndusụk ke otu mme asan̄autom Jehovah oro ẹkekopde ndịk ke ini mmọ ẹkesobode afanikọn̄. (Genesis 32:6, 7; 1 Samuel 21:11, 12; 1 Ndidem 19:2, 3) Iren emi ikananake mbuọtidem. Utu ke oro, mmọ ẹma ẹnen̄ede ẹbuọt idem ke Jehovah. Kpa ye oro, Jacob, David, ye Elijah ẹma ẹkop ndịk sia mmọ ẹkedi owo. Mbet oro James ekewet ete: “Elijah ekedi owo emi enyenede ntụk nte nnyịn.”—James 5:17.

Nnyịn imekeme n̄ko ndikop ndịk ke ini ikerede iban̄a ubiọn̄ọ oro isobode idahaemi m̀mê enye oro idisobode ke ini iso. An̄wan̄a ntak emi ikopde utọ ndịk emi. Kamse, Bible ọdọhọ ke Satan kpa Devil ebiere “ndin̄wana ekọn̄” ye mbon oro “ẹnịmde ibet Abasi ẹnyụn̄ ẹnyenede utom ẹditie ntiense nnọ Jesus.” (Ediyarade 12:17) Okposụkedi ikọ emi aban̄ade mme Christian oro ẹyetde aran akpan akpan, Paul ekewet ete: “Kpukpru owo eke ẹyomde ndidu uwem uten̄e Abasi ke ebuana ye Christ Jesus ẹyesobo ukọbọ n̄ko.” (2 Timothy 3:12) Kpa ye oro, nnyịn ikpokopke ndịk ke ini isobode mme mfịna. Ntak-a?

“Abasi Emi Anyan̄ade Nnyịn”

David andiwet psalm ekewet ete, “Abasi edi Abasi emi anyan̄ade nnyịn.” (Psalm 68:20) Jehovah esiwak ndiwụt ke imọ imenyene ukeme ndinyan̄a ikọt imọ, edide ke ndinyan̄a mmọ nsio ke mme idaha oro ẹnyenede ndịk m̀mê ke ndinọ mmọ ukeme ndiyọ. (Psalm 34:17; Daniel 6:22; 1 Corinth 10:13) Etienede se afo ekpepde ke Bible, mme edinam ‘edinyan̄a’ ifan̄ ke ekeme nditi?

Ntak mûdaha Watch Tower Publications Index * udụn̄ọde mme n̄kpọ oro ẹkenen̄erede ẹtịbe, utọ nte Ukwọ ofụri ererimbot ke eyo Noah, ẹdinyan̄a Lot ye nditọiban esie nsio ke Sodom ye Gomorrah, Israel ndiwọrọ ke Egypt nnyụn̄ nsan̄a ke Ididuot Inyan̄ mbe, m̀mê ẹdibiat odu oro Haman okodụkde ndisobo mme Jew mfep? Ndikot nnyụn̄ ntie n̄kere mme aduai-owo-idem mbụk emi ẹyesọn̄ọ mbuọtidem fo nte ke Jehovah edi Abasi emi anyan̄ade nnyịn. Ndien emi ayan̄wam fi ọyọ mme idomo mbuọtidem fo ye unana ndịk.

Mme Uwụtn̄kpọ Eyomfịn

Ndi ọmọfiọk mme owo ke mbọhọ mbufo oro ẹyọde idomo ye unana ndịk? Ekeme ndidi owo oro ẹkesịnde ke ufọk-n̄kpọkọbi ke ntak nsọn̄ọnda esie. Afo emekeme ndifiọk Christian  oro ama ọkọsọn̄ emi anamde n̄kpọ Jehovah kpa ye unana nsọn̄idem. Mîdịghe kere ban̄a mme uyen oro ẹdade san̄asan̄a ẹkpọn̄ ererimbot kpa ye ọkpọsọn̄ mfịghe otode mme nsan̄a ufọkn̄wed. Odu n̄ko eka m̀mê ete emi ọbọkde nditọ ikpọn̄, m̀mê mbon oro mîdọhọ ndọ oro ẹnamde n̄kpọ Jehovah kpa ye oro ẹkopde ndobo. Nso ke ekpep oto utọ mbon emi? Ndikere mban̄a mbuọtidem mmọ ekeme ndinam fi aka iso ọyọ idomo ye unana ndịk inamke n̄kpọ m̀mê nso idomo ke osobo.

Ikpanaha nnyịn ikop ndịk ke ini isobode ubiọn̄ọ ye idomo ye ke ini itọn̄ọde ndikere ke Jehovah imaha nnyịn. Oyom nnyịn inyene mbuọtidem nte ke uwa Christ edi ke ufọn nnyịn owo kiet kiet. (Galatia 2:20) Ntem, nnyịn iyekeme ndinyene nneme ye Jehovah ye unana edikop ndịk. Edieke ikerede ke nnyịn idotke ndidi se Jehovah amade, imekeme nditie n̄kere se Jesus ọkọdọhọde mme anditiene enye, ete: “Nte owo inyamke akadan̄abasi iba ke ekpri okudọk? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”—Matthew 10:29-31.

Magazine Enyọn̄-Ukpeme ye Awake! ẹsibụk mme ifiọkutom ẹban̄ade Mme Ntiense Jehovah eyomfịn oro ẹkeyọde mme mfịna ye unana ndịk. Emi iwọrọke ke mmọ ikokopke mfụhọ iban̄a mme mfịna oro mmọ ẹkesobode. Edi mmọ ikayakke mme n̄kpọ emi ẹnam mmọ ẹtre ndinam n̄kpọ Jehovah. Mbụk mmọ ẹkeme ndin̄wam fi n̄ko ọyọ ye unana ndịk. Kere ban̄a uwụtn̄kpọ iba emi.

Unọmọ Ama Okpụhọde Uwem Esie

Nsiondi Awake! eke April 22, 2003, ama esịne ibuotikọ emi “How an Injury Changed My Life.” Ke ibuotikọ oro, Stanley Ombeva, kiet ke otu Mme Ntiense Jehovah ke Kenya, ama obụk mme mfịna oro enye okosobode ke ntak emi n̄kpọisan̄ oro ọkọsọpde uwat ọkọtọde enye. Sia idem esie okosụk akade iso ọdiọk, enye ama ataba utom esie ye kpukpru mme ufọn oro enye ekesibọde ke itieutom. Brọda Ombeva ọkọdọhọ ke mbụk esie ete: “Ke mma n̄kedifiọk nte idaha mi ọkọdiọkde, mma nsikere n̄kpọ etikwo etikwo, ntie ikpọn̄ ikpọn̄ nnyụn̄ nsọp iyatesịt. Ndusụk ini n̄kesinam n̄kpọ ikọ ikọ.” Kpa ye mme mfịna esie, eyenete oro ikokopke ndịk. Enye ikayakke n̄kpọ emi akan enye ubọk onyụn̄ anam enye akpa mba. Utu ke oro, enye ama ọbuọt idem ye Jehovah. Brọda Ombeva ọdọhọ ete: “Jehovah ama esin̄wam mi ke kpukpru se n̄kosobode, tutu bụt ama esinam mi ndusụk ini. Mma nnen̄ede mbiere ndikot nnyụn̄ ntie n̄kere mme itie N̄wed Abasi oro n̄kọfiọkde ke ọyọdọn̄ mi esịt ke utọ ini emi.”

In̄wan̄-in̄wan̄ ikọ Brọda Ombeva ama an̄wam ediwak owo ndiyọ mme idomo ye unana ndịk. Eyenete an̄wan kiet ekewet ete: “Mma ntua eyet ke ini n̄kokotde ibuotikọ emi. Mma nnịm ke Jehovah akada ibuotikọ emi owụt mi ima ima usụn̄ oro imọ ikerede iban̄a mi onyụn̄ ada ọdọn̄ mi esịt.” Ntiense efen ekewet ete: “Mme utọ ibuotikọ emi ẹsinen̄ede ẹsịn udọn̄ ẹnọ nnyịn oro isobode ukem mfịna emi, mînyụn̄ ikemeke nditịn̄ se iyọde.”

Ndiyọ Mfịghe eke Ntụk

Ifiọkutom efen oro otụkde owo ke idem edi eke Herbert Jennings emi ẹbụkde ke ibuotikọ emi, ‘Mbufo Ifiọkke Se Iditịbede N̄kpọn̄.’ *  Brọda Jennings ama ọyọ udọn̄ọ ibuot. Enye eti ini oro udọn̄ọ esie ọkọtọn̄ọde-tọn̄ọ ete: “Ekesidi ata en̄wan ndikam ndụk mme mbono esop Christian. Nte ededi, mma ntịm nnịm ke akpanikọ nte ke ebuana eke spirit enyene ufọn. Man n̄keme ndiyọ, n̄kesiwak ndidụk Ufọkmbono Obio Ubọn̄ ke otuowo ẹma ẹkebono ẹma nnyụn̄ n̄kpọn̄ esisịt ini mbemiso otuowo ẹtọn̄ọde ndisuana ke edinam okụrede.”

Ama ọsọn̄ n̄ko ndikwọrọ ikọ. Brọda Jennings obụk ete: “Ndusụk ini, idem ke mma n̄kesịm ufọkowo, n̄kesikam nnyeneke uko ndimia n̄kanika enyịnusụn̄. Nte ededi, ndifiakke edem koro mma mfiọk nte ke utom ukwọrọikọ nnyịn ọwọrọ edinyan̄a ọnọ nnyịn ye owo ekededi oro anamde n̄kpọ aban̄a nte odotde. (1 Timothy 4:16) Ke esisịt ini ebede, nyekeme ndikara mme ntụk mi, n̄ka enyịnusụn̄ efen, nnyụn̄ mfiak ndomo. Ebede ke ndika iso mbuana ke utom ukwọrọikọ, mma mmụm nsọn̄idem eke spirit n̄kama, ndien oro ama anam mi nnyene ukeme efen efen ndiyọ.”

In̄wan̄-in̄wan̄ mbụk Brọda Jennings ama an̄wam ediwak mme andikot ẹyọ mme mfịna mmọ ye unana ndịk. Ke uwụtn̄kpọ, eyenete an̄wan kiet ama ewet ete: “Isua 28 ẹdi emi n̄kọtọn̄ọ ndikot magazine Enyọn̄-Ukpeme ye Awake!, akananam inyeneke mbụk oro otụkde mi ntem! Mma ntre utom ukwọrọikọ uyọhọ ini ndien esịt ama enen̄ede obiom mi sia n̄kekere ke ekpedi mma nnen̄ede nnyene mbuọtidem ke n̄kpeketreke. Ke ini n̄kokotde nte Brọda Jennings ọkọkpọn̄de utom uyọhọ ini man ese aban̄a udọn̄ọ esie, emi ama an̄wam mi ndinyene ekikere oro adade ukem ukem mban̄a idaha mi. Ke akpanikọ emi ekedi ibọrọ akam mi!”

Eyenete eren kiet ekewet kpasụk ntre ete: “Ke mma n̄kanam utom nte ebiowo ke isua duop, mma nsana ifetutom emi nyak ke ntak udọn̄ọ ibuot oro n̄kenyenede. Mma nnen̄ede n̄kụt edikpu tutu esịt ikesinemke mi ndikot mme mbụk eyouwem emi ẹkesiwakde ndibụk mme n̄wọrọnda n̄kpọ oro ikọt Jehovah ẹnamde ke utom esie. Edi nsọn̄ọnda Brọda Jennings ama anam mfiak n̄kop odudu. Mmokot ibuotikọ oro ata ediwak ini.”

Ndisọn̄ọ Nda Nnam N̄kpọ Abasi

Ukem nte Brọda Ombeva ye Jennings, ediwak Mme Ntiense Jehovah ẹka iso ndituak ibuot nnọ Jehovah Abasi ye unana ndịk, kpa ye n̄kpọsọn̄ ubiọn̄ọ. Edieke afo edide kiet ke otu mmọ, amanam etieti. Nịm ete ke “Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie, ke emi mbufo ẹkesan̄ade utom ẹnọ ndisana owo ẹnyụn̄ ẹsụk ẹkade iso ẹsan̄a.”—Mme Hebrew 6:10.

Ukem nte Jehovah akan̄wamde mme anam-akpanikọ ikọt esie ke eset ẹkan mme asua mmọ, enye ekeme ndin̄wam fi akan ubiọn̄ọ ekededi oro afo edisobode. Ntem ti ikọ oro Jehovah akadade prọfet Isaiah etịn̄ mi ete: “Kûdịghe, koro ami ndude ye afo: kûnyek idem, koro ami ndide Abasi fo: nyọsọn̄ọ fi idem; nditreke ndinyan̄a fi; nditreke ndimụm fi n̄kama ke edinen ubọk nnasia mi.”—Isaiah 41:10.

[Mme Ikọ idakisọn̄]

[Ndise ke page 16]

Ediwak owo ẹnam n̄kpọ Jehovah ye unana ndịk ukem nte Stanley Ombeva (enyọn̄ enyọn̄) ye Herbert Jennings (nnasia)

[Ebiet Ẹdade Ndise Ẹto ke page 14]

Foto USAF