Se Isinamde Owo Okop Inemesịt

KPUKPRU owo ẹnyene unen “ndiyom Inemesịt.” Se mme andikewet Uwetn̄kpọ Ukaraidem United States of America ẹkekerede edi oro. Edi ndiyom n̄kpọ idịghe ukem ye ndinyene enye. Okposụkedi ediwak uyen ẹyomde ndinam unọ owo inemesịt ye mbre mbuba ẹdi ubọkọkọ mmọ, owo ifan̄ ke afo ọdiọn̄ọ emi ẹdide se mmọ ẹkenen̄erede ẹyom ndidi? “N̄kereke ke eyedi se oyomde,” se ọwọrọetop ọkwọikwọ kiet emi ọfiọkde ukeme oro owo enyenede ndisịn man edi ọkwọikwọ eketịn̄de edi oro.

Edieke afo n̄ko ekerede ke udukemeke ndikop inemesịt, kûyak idem emem fi. Edieke oyomde inemesịt ke nnennen usụn̄, udutreke ndikop inemesịt. Ntak idọhọde ntre? Akpa ibuotikọ ama etịn̄ aban̄a “Abasi inemesịt,” kpa Jehovah. (1 Timothy 1:11) Abasi ọnọ ndausụn̄ ke Bible man inemesịt oro afo oyomde okûda ekesịm edikpu. Jehovah ekeme ndin̄wam fi akan mme n̄kpọ oro ẹsidade mfụhọ ẹdi. Ke uwụtn̄kpọ, kere ban̄a ndọn̄esịt oro enye ọnọde fi ke ini owo oro afo amade akpade.

Ke Ini Owo Ima Akpade

Nte ẹkeme nditịn̄ eti n̄kpọ ndomokiet mban̄a n̄kpa? N̄kpa esidianade mme ete ye eka ọkpọn̄ nditọ onyụn̄ adianade nditọ ọkpọn̄ mme ete ye eka. Enye esidianade mme n̄kpet n̄kpet ufan onyụn̄ anam mme obio oro ẹnen̄erede ẹkpere kiet eken ẹnana ifụre. N̄kpa ekeme ndinam ubon oro ẹsitiede inem inem ẹnen̄ede ẹfụhọ.

Afo ke idemfo emetịm ọfiọk ke n̄kpa edi unọmọ. Nte ededi, ndusụk owo inyịmeke ke n̄kpa edi unọmọ, edi ẹkam ẹnam etie nte ke n̄kpa edi edidiọn̄. Kere ban̄a se iketịbede ke Oyobio Katrina ama akabiat n̄kpọ ke Itụn̄ Inyan̄ibom Mexico ke August 2005. Ke itie  n̄kpa owo kiet oro oyobio emi okowotde, ọkwọrọ ederi kiet ọkọdọhọ ete: “Idịghe Katrina okowot enye, Abasi akada enye ọnyọn̄ heaven.” Ke idaha efen, ewetn̄wed kiet ke ufọkibọk oro okoyomde ndidọn̄ eyenan̄wan kiet esịt ama ọdọhọ enye okûfịna idem, ke Abasi akada eka esie aka heaven. Eyenan̄wan oro ama atua ete: “Ntak-a, ntak emi enye ekemende enye ọkpọn̄ mi-e?”

Nte an̄wan̄ade, ata ediwak ini, utọ ukwan̄ ekikere oro aban̄ade n̄kpa mi isidọn̄ke mbon emi owo mmọ akpade esịt. Ntak-a? Koro mme ekikere emi idịghe akpanikọ iban̄a n̄kpa. Ke ọdiọkde-diọk akan oro, mme ekikere emi ẹnam etie nte ke Abasi edi inọ emi esiwabarede mbonima osio ke ubọk mbonubon ye mme ufan mmọ ke ata idiọk ye ubiak ubiak usụn̄. Utu ke ndiwụt ke Abasi edi andinọ ndọn̄esịt, mme utọ ekikere emi ẹkam ẹnam etie nte ke enye edi idiọkowo oro esiwotde owo. Edi Ikọ Abasi etịn̄ se idide akpanikọ iban̄a n̄kpa.

Bible okot n̄kpa asua. Enye emen n̄kpa odomo ye edidem oro akarade ubonowo. (Rome 5:17; 1 Corinth 15:26) N̄kpa edi enyene-odudu asua emi owo ndomokiet mîkemeke ndibiọn̄ọ, ndien owo ima nnyịn kiet kiet oro akpade esịne ke otu anana-ibat owo oro n̄kpa ọnọmọde. Akpanikọ Bible emi enen̄ede owụt ntak oro isifụhọde mînyụn̄ ikemeke ndinyan̄a ke ini owo ima nnyịn akpade. Emi ọsọn̄ọ ke utọ ntụk oro esesịne owo ke idem. Edi, ndi Abasi esida n̄kpa emi edide asua emen mbonima nnyịn aka heaven? Yak Bible ọbọrọ mbụme oro.

Ecclesiastes 9:5, 10 ọdọhọ ete: “Ama edi mme akpa-n̄kpa, mmọ ifiọkke baba n̄kpọ kiet . . . Baba edinam, baba uduak, baba ifiọk, baba mbufiọk [idụhe] ke [“Sheol,” NW] emi afo akade do.” Nso idi Sheol? Enye edi udi ofụri ubonowo emi mme akpan̄kpa ẹsikade. Mme akpan̄kpa inamke n̄kpọ ndomokiet ke udi, inyịghekede idem, ikopke ubiak m̀mê inem, inyụn̄ ikereke n̄kpọ baba kiet. Mmọ ẹdu ke idaha emi ẹkemede ndimen ndomo ye ọkpọsọn̄ idap. * Ntre Bible anam an̄wan̄a ke Abasi imenke mbonima nnyịn oro ẹma ẹkekpan̄a ika heaven man ẹkedu ye enye. Mmọ ịdụhe uwem ke udi ke ẹma ẹkekpan̄a.

Jesus ama ọsọn̄ọ ke emi edi akpanikọ ini Lazarus ufan esie akakpade. Jesus ekemen n̄kpa odomo ye idap. Edieke Lazarus akpakakade heaven okodu ye Ata Ọkpọsọn̄ Abasi, ekpekedi ata ibak Jesus ndikanam enye eset afiak edidu ke isọn̄ ndien ekem afiak akpa. Mbụk emi ẹkedade odudu edisana spirit ẹwet mi ọdọhọ ke Jesus esịmde udi oro ẹkebụkde Lazarus, enye ama ofiori ke ọkpọsọn̄ uyo ete: “Lazarus, wọrọ di!” Bible aka iso ọdọhọ ete: “Owo oro akakpade mi ọwọrọ edi.” Lazarus ama afiak ọtọn̄ọ ndidu uwem. Jesus ama ọfiọk ke Lazarus ikedehedei ikpọn̄ isọn̄. Enye ikodụhe uwem ke udi.—John 11:11-14, 34, 38-44.

N̄kpọntịbe emi ẹwetde ke Bible mi an̄wam nnyịn ifiọk ke Abasi isidaha n̄kpa imen mme  owo ke isọn̄ ika heaven. Ntem nnyịn imekeme ndisan̄a n̄kpere Abasi sia ifiọkde ke idịghe enye edi ntak mfụhọ nnyịn. Nnyịn imekeme ndinịm n̄ko ke enye enen̄ede ọfiọk mfụhọ ye ubiak oro n̄kpa, emi edide asua, adade ọsọk nnyịn. Ndien akpanikọ Bible aban̄ade idaha mme akpan̄kpa owụt ke mme akpan̄kpa isibọhọ ndutụhọ ke hell ikan̄ m̀mê ke purgatory, edi ẹdu ke udi inyụn̄ idụhe uwem. Ke ntre, ini ekededi oro itide mbonima nnyịn, inaha itọhọ ye Abasi m̀mê ikop ndịk sia mîfiọkke ebiet oro mmọ ẹdude. Akan oro, Jehovah ọnọ nnyịn ndọn̄esịt efen ke Bible.

Idotenyịn Anam Inyene Inemesịt

Mme itie N̄wed Abasi oro ima ikeneneme ẹwụt ke idotenyịn edi akpan ntak kiet oro esinamde owo okop ata inemesịt. Ke Bible, ikọ oro “idotenyịn” ọwọrọ nditie uko uko mbet mfọnọn̄kpọ. Man ikụt nte idotenyịn ekemede ndinam inyene inemesịt idahaemi, ẹyak ifiak ineme mbụk aban̄ade Jesus ndinam Lazarus eset.

Ke nsụhọde n̄kaha, ntak iba ẹdu emi ẹkenamde Jesus anam utịben̄kpọ oro. Ntak kiet ekedi nditre mfụhọ Martha, Mary, ye mme ufan mmọ. Mmọ ẹma ẹkop inemesịt ndifiak ndu ye owo ima mmọ. Edi Jesus ama asian Martha ọyọhọ ntak iba oro edide akpan n̄kpọ akan, ete: “Nte n̄kọdọhọke fi nte edieke enịmde ke akpanikọ oyokụt ubọn̄ Abasi?” (John 11:40) The New Testament in Modern English, eke J. B. Phillips akabarede utịt utịt ikọ emi nte “utịben̄kpọ emi Abasi ekemede ndinam.” Ke ndikanam Lazarus eset, Jesus akanam owụt se Jehovah Abasi ekemede edinyụn̄ inamde ke ini iso. Mme ntọt efen oro ẹtienede mi ẹwụt “utịben̄kpọ emi Abasi ekemede ndinam.”

Jesus ọkọdọhọ ke John 5:28, 29 ete: “Ẹkûyak idem akpa mbufo, koro ini ke edi eke kpukpru mme andidu ke udi editi ẹdikopde enye uyo ẹnyụn̄ ẹwọn̄ọ ẹdi.” Emi ọwọrọ ke kpukpru mme akpan̄kpa emi ẹdude ke Sheol, ẹsịnede mbonima nnyịn, ẹyefiak ẹdidu uwem. Utom 24:15 ayarade n̄kpọ efen aban̄a utịben̄kpọ emi ete: “Ndinen owo ye mme anam ukwan̄n̄kpọ ẹyeset ke n̄kpa.” Ntre, idem mme “anam ukwan̄n̄kpọ,” oro edi ediwak mbon oro mîkọfiọkke Jehovah mîkonyụn̄ inamke n̄kpọ esie, ẹyenyene ifet ke ini iso ndinyene mfọn Abasi.

Ediset ke n̄kpa emi editịbe ke m̀mọ̀n̄? Psalm 37:29 ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Kere ban̄a se oro ọwọrọde! Mme ubon ye mme ufan oro n̄kpa akadianarede ẹyefiak ẹsobo ye kiet eken mi ke isọn̄. Esịt ekpenyene ndinen̄ede nnem fi nte afo ekerede ndidara inem inem uwem ye mbon oro akamade ndidu ye mmọ ini kiet ko.

Jehovah Oyom Fi Okop Inemesịt

Nnyịn imeneme usụn̄ iba oro Jehovah ekemede ndinam fi enen̄ede okop inemesịt kpa ye mme mfịna. Akpa, enye ada Bible ọnọ fi ifiọk ye ndausụn̄ oro ẹdin̄wamde fi ọyọ mme mfịna uforo uforo. Ke ẹsiode ndin̄wam nnyịn iyọ mfụhọ oro n̄kpa adade edi ẹfep, item Bible ekeme n̄ko ndin̄wam nnyịn iyọ nsọn̄ọn̄kpọ ye unana nsọn̄idem. Enye ekeme ndinọ fi ukeme ndiyọ utụk ye ndutịme ukaraidem. Ndien edieke afo etienede ndausụn̄ oro, emi ayan̄wam fi ese aban̄a mme mfịna eken oro enyenede.

Ọyọhọ iba, ndikpep Bible ayanam fi enyene idotenyịn oro ọfọnde akan n̄kpọ ekededi oro n̄kaowo ẹn̄wọn̄ọde. Mbonima ye mme ufan nnyịn ndiset ke n̄kpa edi kiet ke otu idotenyịn oro Bible ọnọde. Ediyarade 21:3, 4 adian do ete: “Abasi ke idemesie oyonyụn̄ odu ye [ubonowo]. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” Emi ọwọrọ ke ibịghike ẹyesio n̄kpọ ekededi oro anamde fi ofụhọ ẹfep ke nsinsi. Se Bible ọn̄wọn̄ọde ẹyesu, ndien eyenem fi ndikụt nte mmọ ẹsude. Ndifiọk ke ini iso ọyọfọn akan emi ọnọ nnyịn ndọn̄esịt. Ndifiọk ke udubọhọ ndutụhọ ke nsinsi ke ini akpade ekpenyene ndinam fi okop inemesịt.

 Ke uwụtn̄kpọ: Ediwak isua emi ẹkebede, Maria ama ese nte ebe esie akakpade ubiak ubiak n̄kpa ke ntak kansa. Ke adan̄aemi enye okosụk ofụhọde aban̄a n̄kpa ebe esie, ẹma ẹdọhọ enye ye nditọiban esie ita ẹkpọn̄ ufọk oro mmọ ẹkedụn̄de sia enye mîkekemeke ndikpe okụk ufọk oro. Ke isua iba ẹma ẹkebe, Maria ama edifiọk ke imenyene kansa. Enye aka akamba usiakidem utịm ikaba ndien enye ke ọyọ ọkpọsọn̄ ubiak kpukpru usen. Kpa ye mme mfịna emi, enye iduọkke idotenyịn ndien emi anam enye esịn udọn̄ ọnọ mbon en̄wen. Didie ke enye aka iso okop inemesịt?

Maria ọdọhọ ete: “Ke ini nnyenede mfịna, mmesidomo nditre ndinen̄ede n̄kere mban̄a mfịna oro. Nsibụpke mme mbụme nte: ‘Ntak emi etịbede ọnọ mi-e? Ntak mbọde ufen ntem-e? Ntak emi ndọn̄ọde?’ Etikwo etikwo ekikere esimemem owo idem. Utu ke nditie n̄kere n̄kpọ ntem, mmesikam nda odudu oro nnyenede nnam n̄kpọ Jehovah nnyụn̄ n̄n̄wam mbon en̄wen. Oro esinọ mi inemesịt.”

Didie ke idotenyịn an̄wam Maria? Maria odori enyịn ke ini iso emi Jehovah editrede udọn̄ọ ye mme mfịna eken oro ubonowo ẹnyenede. Ke ini enye esikade ufọkibọk ndikọbọ usọbọ, enye esibuana idotenyịn esie emi ye mbon eken oro ẹdọn̄ọde kansa, emi ekemede ndidi ẹduọk idotenyịn. Didie ke idotenyịn edi akpan n̄kpọ ọnọ Maria? Enye ọdọhọ ete: “Ediwak ini mmesikere se Bible etịn̄de ke Mme Hebrew 6:19, ebiet emi Paul ọdọhọde ke idotenyịn edi ukwak ubom ukpọn̄ nnyịn. Ke ukwak ubom oro mîdụhe, afo ọyọfiọrọ nte ubom emi oyobio otohorede. Edi edieke omụmde ukwak ubom oro akama, afo eyenyene ifụre kpa ye n̄kpọsọn̄ mfịna oro osobode.” “Idotenyịn nsinsi uwem eke Abasi, emi mîkemeke ndisu nsu, ọkọn̄wọn̄ọde,” an̄wam Maria aka iso okop inemesịt. Enye ekeme ndinam fi n̄ko okop inemesịt —Titus 1:2.

Ke ekpepde Bible, afo emekeme ndikop ata inemesịt kpa ye mme mfịna. Edi, afo emekeme ndiyịk m̀mê edikpep Bible ekeme ndinen̄ede n̄n̄wam fi. Mme Ntiense Jehovah ẹyedara ndiwụt fi mme ibọrọ Bible oro ẹdin̄wamde fi okop inemesịt. Nte afo etiede ebet ini emi idotenyịn oro Jehovah ọnọde fi edisude, afo emekeme ndisịne ke otu mbon oro ẹtịn̄de ẹban̄a mi ẹte: “Mbre ye idatesịt ẹyesịm mmọ, mfụhọ ye eseme ẹyefen̄e.”—Isaiah 35:10.

[Ikọ idakisọn̄]

[Ndise ke page 5]

Akpanikọ Bible kpọt ekeme ndisụhọde mfụhọ

[Mme ndise ke page 7]

Idotenyịn ediset ke n̄kpa oro Bible ọnọde ekeme ndinam fi okop inemesịt