Mbet Jehovah Ama Adat Enye Esịt

ALBERT D. SCHROEDER, owo Otu Ukara eke Mme Ntiense Jehovah, ama okụre utom esie ke isọn̄ ke Wednesday, March 8, 2006. Enye ekedi isua 94, ama onyụn̄ ada se iwakde ibe isua 73 anam utom uyọhọ ini.

Brọda Schroeder akamana ke 1911 ke Saginaw ke Michigan, ke United States of America. * Eka eka esie ama ekpep enye ekese n̄kpọ ke Bible ke ini enye ekedide eyenọwọn̄, onyụn̄ anam enye ama ndikot Ikọ Jehovah. Enye ama ekpep usem Latin, German, onyụn̄ ekpep n̄kpọ aban̄a ikan̄ ilektrik ke Ufọkn̄wed Ntaifiọk Michigan. Edi nte enye eketịmde-tịm ama Ikọ Abasi, enye ama etre ukpep oro enye ọkọbọde ke ufọkn̄wed ntaifiọk onyụn̄ ọtọn̄ọ utom ukwọrọikọ uyọhọ ini. Enye ama akabade edi owo ubon Bethel Brooklyn ke New York, ke 1932.

Ke ini Brọda Schroeder ekedide isua 26 ke 1937, ẹma ẹmek enye ete ese enyịn ke utom Mme Ntiense Jehovah ke Britain. Ifịk oro enye ekenyenede ke utom ukwọrọikọ ama anam ediwak owo ke Britain ẹdụk utom uyọhọ ini. Akparawa kiet oro enye ekesidụkde nsan̄a ke Bethel London ekedi John E. Barr. Ke ukperedem, mmọ mbiba ẹma ẹdinam utom ọtọkiet ke ediwak isua nte mbon Otu Ukara.

Ẹma ẹnen̄ede ẹkụt utom oro Brọda Schroeder akanamde ke ibuot Mme Ntiense Jehovah ke mme isua oro ekọn̄ akan̄wanade. Ẹma ẹdọhọ enye ọkpọn̄ Britain ke August 1942. Enye ama edisịm Brooklyn ke September 1942, ke ẹma ẹkewat ẹbe Inyan̄ibom Atlantic ke enyene-ndịk ini ekọn̄ oro.

Ke ini oro, mme asan̄autom Jehovah ẹma ẹfọfiọk ke oyoyom ẹnam akwa utom ke ọyọhọ ekọn̄ ererimbot iba ama okokụre. Ama akpa Brọda Schroeder idem onyụn̄ enem enye esịt ke ini ẹkenọde enye utom en̄wen—ndin̄wam ntịm mme n̄kpọ oro ẹdisikpepde ke Ufọkn̄wed Enyọn̄-Ukpeme Ukpep Bible eke Gilead. Enye ama edi andikpep ke ufọkn̄wed Gilead ke ediwak isua, ọnọde mme isụn̄utom ukpep. Nditọ ufọkn̄wed oro enye ekekpepde n̄kpọ ke Gilead ndien ekem ke Ufọkn̄wed Utom Obio Ubọn̄ ifreke ukpep oro enye ọkọnọde mmọ. Enye ama esikop idatesịt ndinam nditọ ukpepn̄kpọ esie ẹma ibet Abasi esinyụn̄ ọsọn̄ọ etịn̄ ufọn edifiọk Jehovah.

Brọda Schroeder ama ọdọ Charlotte Bowin ke 1956, ndien Judah Ben, akpan mmọ, ama amana ke 1958. Brọda Schroeder ekedi eti ebendọ ye ete. Enye ọkọtọn̄ọ ndinam utom nte owo Otu Ukara ke 1974, ndien ẹma ẹnen̄ede ẹma ikike esie. Enye ekedi eren oro ọkọfọnde ido onyụn̄ osụhọrede idem; ndien ke akande kpukpru, emi ọkọnọde akwa enyịn̄ Abasi ubọn̄. Nnyịn imenen̄ede inịm ke Brọda Schroeder ọbọ utịp esie ke heaven nte Christian oro ẹyetde aran, emi ‘mbet Jehovah ekenen̄erede adat enye esịt.’—Psalm 1:2.

[Ikọ idakisọn̄]