Nsinsi Enọ Oro Andibot Ọnọde

NDI ikpaha fi idem ndifiọk ke ẹwet m̀mê ẹtịn̄ ubak ubak ẹban̄a se ntaifiọk ẹnịmde nte se inamde uwem ekeme ndidu ke ekondo ekededi ke akpa ibuot Genesis? Nso idi mme n̄kpọ emi?

Nte ẹtịn̄de ke Genesis 1:2, ana ekese mmọn̄ odu man uwem aka iso odu. Man mmọn̄ aka iso odu ke isọn̄, inaha eyo ebịt m̀mê ofiop akaha. Emi ọwọrọ ke ana isọn̄ oyom usụn̄ ọkpọn̄ utịn ke nnennen idaha. Genesis etịn̄ ndien ndien aban̄a utịn ye ufọn esie ke isọn̄.

Ana ofụm oro abuahade ke nnennen udomo odu man mme owo ẹkeme ndidụn̄ ke ekondo. Ẹtịn̄ ẹban̄a emi ke Genesis 1:6-8. Eto ndikọri ke isọn̄, nte ẹtịn̄de ẹban̄a ke Genesis 1:11, 12, anam ofụm oro ẹkotde oxygen odu ke isọn̄. Ana ekondo oro nsio nsio orụk unam ẹkemede ndidu enyene ikpọ ubak nti isọn̄ nte ẹtịn̄de ẹban̄a ke Genesis 1:9-12. Ke akpatre, mbak eyo edibịt onyụn̄ ofiop akaha, ana ekondo otụhọ onyụn̄ ọsọn̄ọ ada ke nnennen itie esie—amaedi ke isọn̄, odudu ọfiọn̄ oro odụride n̄kpọ aka isọn̄ anam enye ọsọn̄ọ ada ke nnennen itie esie. Ẹtịn̄ ẹban̄a ọfiọn̄ ye ndusụk ufọn esie ke Genesis 1:14, 16.

Moses emi mîkenyeneke ifiọk ntaifiọk eyomfịn akasan̄a didie ọfiọk kpukpru se inemede emi? Ndi Moses ama enyene san̄asan̄a ukeme ndifiọk mme ufọn mmọ ke ini mbon eyo esie mîkenyeneke? Ibọrọ edi ke Andibot enyọn̄ ye isọn̄ ọkọnọ Moses odudu ndida n̄wed mmọ. Ibọrọ emi enen, akpan akpan ke ini ikerede iban̄a nte mbụk Genesis ekemde ye ifiọk ntaifiọk.

Bible ọsọn̄ọ ke ẹkebot utịbe utịbe ekondo nnyịn ye akpan uduak. Psalm 115:16 ọdọhọ ete: “Enyọn̄ edi heaven Jehovah, edi enye ada isọn̄ ọnọ nditọ owo.” Psalm efen ọdọhọ ete: “Enye odori isọn̄ ke itie esie, idisehekede ke nsinsi nsinsi.” (Psalm 104:5) Edieke edide Andibot okobot ekondo ye ediye isọn̄ nnyịn, owụt ifiọk ndinịm ke enye ekeme ndise mban̄a mmọ nte ọfọnde. Oro ọwọrọ ke afo emekeme ndinen̄ede ndori enyịn ndikụt ini emi n̄wọrọnda un̄wọn̄ọ emi edisude: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ke akpanikọ, Abasi ‘ikobotke isọn̄ ke ikpîkpu,’ edi okobot enye man mbon oro ẹwụtde esịtekọm ẹban̄a mme edinam esie ‘ẹdụn̄ ke esịt’ ke nsinsi.—Isaiah 45:18.

Nte N̄wed Abasi ọdọhọde, Jesus ekedi isọn̄ ndikpep nnyịn mban̄a Abasi ye uduak Esie ndinọ okopitem ubonowo nsinsi uwem. (John 3:16) Nnyịn imenịm ke Abasi ọyọsọp ‘ndisobo mmọ emi ẹsobode isọn̄,’ onyụn̄ anyan̄a mme ama emem emi ẹtode kpukpru idụt, emi ẹdarade edinyan̄a esie. (Ediyarade 7:9, 14; 11:18) Uwem edinem didie ntem ke ini mme owo ẹdikade iso ndikpep mban̄a nnyụn̄ ndara mme enyene-ndyọ edibotn̄kpọ Abasi ke nsinsi!—Ecclesiastes 3:11; Rome 8:21.

[Ebiet Ẹdade Ndise Ẹto ke page 8]

Foto NASA