Ibak Ibak Ererimbot Mfịn

MARÍA ekedi owo isua 64 emi okodụn̄de ikpọn̄. Ẹma ẹda urụk ikan̄ ilektrik ẹmia ẹnyụn̄ ẹyịri enye ẹwot ẹnịm ke ufọk esie.

Otu mbon ntịme ẹma ẹmia bodisi ita ke ntak emi ẹkedọhọde ke mmọ ẹyịp n̄kpri nditọwọn̄ iba. Mbon ntịme oro ẹma ẹduọk iba ke otu bodisi oro aranuwat ẹnyụn̄ ẹkịm ikan̄ ẹta mmọ ẹwot. Ọyọhọ bodisi ita ọkọbọhọ ke ikwa ifụhi.

Owo emi mîkasiakke enyịn̄ esie ke urụk ukopikọ ama anam ẹyararede ata enyene-ndịk n̄kpọ. Ẹma ẹbụhọrede okpo iren inan̄ emi ẹkekade isan̄ nduọkodudu ke ebiet unọ idem inemesịt. Ẹkebọbọp mmọ enyịn ye ubọk mbiba. Ndụn̄ọde oro ẹkenamde man ẹfiọk se ikowotde mmọ ama owụt ke ẹkebụk mmọ ndisi.

Utọ ibak emi idịghe mbụk ndise senima emi ẹwụtde ibak ibak ye afai afai ndise oro ẹsimụmde owo mbọribọ. Kpukpru n̄kpọ emi ẹma ẹnen̄ede ẹtịbe ke idụt kiet ke Edem Usụk America, ẹkenyụn̄ ẹdi mme akpan ibuotikọ mbụk n̄kpọntịbe; ndien ibịghike mmọ ẹketịbe. Edi idịghe idụt oro kpọt ke mme orụk n̄kpọ oro ẹsitịbe ke ererimbot mfịn.

Ibak edi ọsọ n̄kpọ mfịn. Emi esịne editop mme bọmb, mme edinam oyomonsia, uwotowo, imia, utopikan̄, ye edidan̄ owo ke n̄kanubọk. Ndutịm usuanetop ẹsitọt ẹnyụn̄ ẹsosio edinam afai ẹwụt ndien ndien tutu inamke aba ediwak owo ndịk ndise m̀mê ndikop mme utọ ibak oro.

Afo ke idemfo emekeme ndikere ete: ‘Ntak emi ererimbot ọdiọkde ntem? Nte owo ikemeke aba ndikere mban̄a mbon en̄wen m̀mê ndiwụt ukpono nnọ uwem owo?’ Nso inam nnyịn idu uwem ke utọ ererimbot emi?

Idahaemi kere ban̄a Harry, owo isua 69 emi ọdọn̄ọde kansa. N̄wan esie ọdọn̄ọ awak-n̄kukọhọ udọn̄ọ mfre, edi mme mbọhọidụn̄ ye mme ufan ẹsidi ẹdin̄wam mmọ. Harry ọdọhọ ete: “Mfiọkke se ikpanamde edieke mmọ mîkpodụhe.” Ke Canada emi enye odụn̄de, ndụn̄ọde oro ẹkenamde owụt ke se ibede mbahade iba ke otu mbon oro ẹsede ẹban̄a n̄kani owo ẹn̄wam mbon oro mîbuanake n̄kpọ ye mmọ. Anaedi afo ọmọfiọk mme owo emi ẹsifọnde ido ẹnyụn̄ ẹtiede ufan ufan. Ih, owo ekeme nditua owo mbọm nnyụn̄ mfọn ido, utu ke nditie ibak ibak.

Ntak, ndien, emi mme owo ẹbakde ibak ntem? Nso isinam mme owo ẹbak ibak? Nte mbon oro ẹsibakde ibak ẹkeme ndikpụhọde? Ndi ibak eyetre tutu amama? Edieke edide eyetre, didie, ndien ini ewe?

[Ebiet Ẹdade Ndise Ẹto ke page 3]

Tren: CORDON PRESS