Mme Uyen Se Mbufo Ẹnamde Ẹsitụk Ete ye Eka Mbufo

APOSTLE JOHN emi ekedide akanieren ekewet ete: “Nnyeneke ntak eke okponde akan emi ndiwụt esịtekọm, nte ndikop ke nditọ mi ke ẹsasan̄a ke akpanikọ.” (3 John 4) Okposụkedi nditọ oro ẹtịn̄de ẹban̄a ke ufan̄ikọ emi ẹdide mme Christian, ikọ John emi ekeme ndisọsọp n̄n̄wan̄a ete m̀mê eka oro abakde Abasi. Kpa nte ete ye eka ẹkemede ndinam nditọ mmọ ẹkop inemesịt m̀mê ẹfụhọ, nditọ n̄ko ẹkeme ndinam mme ete ye eka mmọ ẹnen̄ede ẹkop inemesịt m̀mê ẹfụhọ.

Edidem Solomon ama ọfiọk adan̄a nte edinam nditọ ẹkemede nditụk mme ete ye eka mmọ. Enye ekewet ete: “Enyene-ibuot eyen adat ete esịt: edi ndisịme eyen edi mfụhọ eka esie.” (Mme N̄ke 10:1) Ntre, kpukpru nditọ—idem mbon oro ẹma ẹkekponi ẹwọrọ owo—ẹkpenyene ndikere nte edinam mmimọ editụkde ete ye eka mmimọ. Ntak emi edide akpan n̄kpọ?

Kere ban̄a adan̄a ima oro ete ye eka fo oro ẹbakde Abasi ẹkedade ẹbọk fi! Mmọ ẹma ẹtọn̄ọ ndikere nnyụn̄ mbọn̄ akam mban̄a fi anyan ini mbemiso afo amanade. Ke afo ama akamana, ete ye eka fo ẹma ẹnen̄ede ẹma fi ẹnyụn̄ ẹkọm Abasi ke utịbe utịbe ifet edinyene fi. Afo ekedi ekpri nsekeyen oro ẹkenọde mmọ ndise mban̄a, ndien nte mme andituak ibuot nnọ Jehovah, mmọ ẹma ẹda utom emi ke akpan n̄kpọ.

Sia ete ye eka fo ẹdide mme ata Christian, mmọ ẹma ẹkot Bible ye mme n̄wed eken oro ẹkọn̄ọde ke Bible ẹyom eti ndausụn̄, ẹnyụn̄ ẹyom item ẹto mbon oro ẹma ẹkebọbọk nditọ. Mmọ ẹma ẹka iso n̄ko nditịn̄ mfịna mmọ nnọ Abasi ke akam. (Judges 13:8) Nte afo ọkọkọride okpon, ete ye eka fo ẹma ẹfiọk nti edu ye mme ndudue fo. (Job 1:5) Mme isua uyen ẹma ẹda mbufa n̄kpọ-ata ẹdi. Ekeme ndidi afo ama esisọn̄ ibuot ndusụk ini, ndien ete ye eka fo ẹma ẹtetịm ẹbọn̄ akam, ẹtetịm ẹkot n̄wed, ẹnyụn̄ ẹtetịm ẹkere nte ikpan̄wamde fi aka iso atuak ibuot ọnọ Ete fo eke heaven, kpa Jehovah.

Ete ye eka fo ifreke fi enyịn. Mmọ ke ẹsese ẹban̄a fi ke n̄kan̄ eke obụk, ekikere, ntụk ye eke spirit, idem ke afo ama ọkọkọri okpon. Nte ededi, kpa ye ofụri se mmọ ẹkenamde oro, mmọ ẹti ke afo emekeme ndimek se afo amade, ye nte ke mmimọ  ifiọkke se afo edikabarede edi ke ini iso. Ke akpatre, afo enyene ndibiere nte edidude uwem fo.

Nte iwụtke ifiọk ndidọhọ ke edieke esinemde mme ete ye eka ndikop ke nditọ mmimọ ke “ẹsasan̄a ke akpanikọ,” ke eyenen̄ede abiak mmọ edieke mmọ ẹkopde ke nditọ mmimọ ẹkpọn̄ akpanikọ? Ke akpanikọ, nditọ oro ẹnamde n̄kpọ ndisịme ndisịme ẹsinam ete ye eka mmọ ẹfụhọ. Solomon ọkọdọhọ ete: “Ndisịme eyen edi se iyatde ete esie, onyụn̄ odoro ye andiman enye.” (Mme N̄ke 17:25) Ete ye eka ẹsinen̄ede ẹfụhọ ke ini eyen mmọ etrede ndituak ibuot nnọ ata Abasi.

Nte an̄wan̄ade, edinam fo oyotụk mbonubon mbufo ye mbon an̄wa ke ndusụk udomo. Edu uwem fo esinen̄ede otụk ete ye eka fo. Edieke afo ọkpọn̄de Abasi onyụn̄ esịnde mme edumbet esie, ete ye eka fo ẹyefụhọ. Nte ededi, edieke afo anamde akpanikọ onyụn̄ okopde uyo ọnọ Jehovah, ete ye eka fo ẹyekop idatesịt. Biere ndidat ete ye eka fo esịt! Idụhe ọsọn̄urua n̄kpọ en̄wen oro ekemede ndinọ mbon emi ẹkebọkde, ẹkpemede, ẹnyụn̄ ẹmade fi, akan ndinam oro.