Yak Ikọ Abasi Ada Fi Usụn̄
Yak Ikọ Abasi Ada Fi Usụn̄
“Ikọ fo edi utuenikan̄ ukot mi, ye un̄wana usụn̄ mi.”—PSALM 119:105.
1, 2. Ntak emi ata ediwak owo mînyeneke ata emem ye inemesịt-e?
NTE emeti ini oro ọkọdọhọde owo owụt fi usụn̄? Ekeme ndidi ama ekpere ndisịm ebiet oro akakade edi utịmke ufiọk itie oro akpawahade. Mîdịghe, ekeme ndidi ama osop usụn̄ ndien akana asan̄a usụn̄ en̄wen. Ke idaha mbiba emi, nte ikpọfọnke nditiene ndausụn̄ owo oro ọfiọkde n̄kann̄kụk oro? Utọ owo oro ekeme ndin̄wam fi esịm ebiet oro afo akade.
2 Ke ediwak tọsịn isua idahaemi, ubonowo ke ofụri ofụri ke ẹdomo ndisan̄a ke usụn̄ idemmọ ye unana un̄wam Abasi. Nte ededi, sia mîdịghe Abasi ada mmọ usụn̄, mme anana-mfọnmma ubonowo ẹsop usụn̄! Mmọ ifiọkke usụn̄ oro adade esịm ata emem ye inemesịt. Ntak-a? Prọfet Jeremiah ama etịn̄ ke se ibede isua 2,500 ete: “Owo eke asan̄ade . . . ikemeke ndinen̄ede ikpat esiemmọ.” (Jeremiah 10:23) Owo ekededi oro odomode ndisan̄a ke idemesie ye unana un̄wam oyosop usụn̄. Ke akpanikọ, ubonowo ẹyom ndausụn̄!
3. Ntak emi Jehovah Abasi enen̄erede odot ndinọ ubonowo ndausụn̄, ndien nso ke enye ọn̄wọn̄ọ ndinam?
3 Jehovah Abasi enen̄ede odot ndinọ utọ ndausụn̄ oro. Ntak-a? Koro enye etịm ọfiọk nte ubonowo ẹtiede akan owo en̄wen ekededi. N̄ko, Enye enen̄ede ọfiọk nte ubonowo ẹkewahade ẹkpọn̄ usụn̄. Enye onyụn̄ ọfiọk se anade mmọ ẹnam man ẹfiak ẹkesan̄a ke nnennen usụn̄. N̄ko-n̄ko, nte Andibot, Jehovah ọfiọk se ifọnde ye nnyịn. (Isaiah 48:17) Ntre, nnyịn imekeme nditịm nnịm mme un̄wọn̄ọ esie oro ẹwetde ke Psalm 32:8 ẹte: “Nyeteme fi, nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.” Nnyịn imekeme nditịm nnịm nte ke Jehovah ọnọ ata eti ndausụn̄. Edi didie ke Jehovah ada nnyịn usụn̄?
4, 5. Didie ke ikọ Abasi ẹkeme ndida nnyịn usụn̄?
4 Andiwet psalm ọkọbọn̄ akam ọnọ Jehovah ete: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Ikọ ye item Abasi ẹdu ke Bible, ndien mmọ ẹkeme ndin̄wam nnyịn ikan ubiọn̄ọ oro isobode ke uwem. Ke nditịm ntịn̄, ke ini ikotde Bible inyụn̄ iyakde enye ada nnyịn usụn̄, ‘utọn̄ nnyịn oyokop uyo ke edem nnyịn, ete, “Emi edi ọkpọusụn̄, mbufo ẹsan̄a ke esịt.”’—Isaiah 30:21.
5 Tịm fiọk ke Psalm 119:105 owụt akpan ufọn iba oro Ikọ Abasi enyenede. Akpa, enye edi utuenikan̄ ukot nnyịn. Ke ini isobode mme mfịna ke usen ke usen, mme edumbet oro ẹdude ke Bible ẹkpenyene ndida nnyịn usụn̄ man inam nti ubiere inyụn̄ ifep mme afia ye n̄kpọ iduọ ererimbot emi. Ọyọhọ iba, mme n̄kpọ oro Abasi etide nnyịn ẹdi un̄wana usụn̄ nnyịn, mmọ ẹn̄wam nnyịn inam ubiere oro ekemde ye idotenyịn nnyịn ndidụn̄ ke Paradise oro Abasi ọn̄wọn̄ọde ke nsinsi. Sia un̄wana odude ke usụn̄ nnyịn, nnyịn iyọfiọk eti m̀mê idiọk utịp oro edisan̄a ke usụn̄ ekededi ekemede ndida nsọk nnyịn. (Rome 14:21; 1 Timothy 6:9; Ediyarade 22:12) Ẹyak idụn̄ọde ọyọhọ ọyọhọ nte ikọ Abasi oro odude ke Bible ekemede ndidi utuenikan̄ ukot nnyịn ye un̄wana usụn̄ nnyịn.
“Utuenikan̄ Ukot Mi”
6. Ke mme idaha ewe ke ikọ Abasi ekeme ndidi utuenikan̄ ukot nnyịn?
6 Nnyịn imesinam ubiere kpukpru usen. Ndusụk ubiere ẹkeme nditie nte ẹdi ata n̄kpri, edi ndusụk ini nnyịn imekeme ndisobo mme idaha oro ẹdomode eti ido uwem, edinam akpanikọ, ye edida san̄asan̄a nnyịn. Man ikan mme utọ idaha emi, ana ‘inọ ukeme ufiọk n̄kpọ nnyịn ukpep man idiọn̄ọ se inende ye se idiọkde.’ (Mme Hebrew 5:14) Ndinyene nnennen ifiọk Ikọ Abasi ye mme edumbet esie ayanam ikpep ubieresịt nnyịn ndinam mme ubiere oro ẹnemde Jehovah esịt.—Mme N̄ke 3:21.
7. Nso ikeme ndinam Christian odụk nsan̄a ye mme nsan̄autom oro mîdịghe mme andinịm ke akpanikọ?
7 Kere ban̄a uwụtn̄kpọ emi. Ndi edi akwa owo oro esịnde ofụri ukeme ndidat Jehovah esịt? (Mme N̄ke 27:11) Ke edide ntre, imotoro fi. Edi yak idọhọ ke mme nsan̄autom fo ẹnọ fi tiket nditiene mmọ n̄ka edinam mbre mbuba. Mmọ ẹma ndinam utom ye afo ndien ẹkpenyụn̄ ẹma ndidu ye afo ke mme itie en̄wen. Afo emekeme ndinen̄ede n̄kere ke mmọ idịghe ndiọi owo. Mmọ ẹkam ẹkeme ndinyene nti edu uwem. Nso ke edinam? Ndi mfịna ndomokiet oyodu edieke etienede mmọ aka? Didie ke Ikọ Abasi ekeme ndin̄wam fi anam eti ubiere ke n̄kpọ emi?
8. Ewe edumbet Bible an̄wam nnyịn ikere iban̄a nsan̄a oro ikpodụkde?
8 Kere ban̄a edumbet ifan̄ ke Bible. Akpa edumbet oro ikemede nditi odu ke 1 Corinth 15:33, emi ọdọhọde ete: “Idiọk nsan̄a ababiat eti ido.” Ndi ndinam item emi ọwọrọ ke ana ọsọn mbon oro mînịmke ke akpanikọ ofụri ofụri? Ikọ Abasi idọhọke ntre. Kamse, apostle Paul ke idemesie ama enen̄ede ekere aban̄a “kpukpru orụk owo,” esịnede mbon oro mînịmke ke akpanikọ. (1 Corinth 9:22) Oyom nnyịn emi idide mme Christian ikere iban̄a mbon en̄wen, esịnede mbon oro mîdịghe mme andinịm ke akpanikọ. (Rome 10:13-15) Ke nditịm ntịn̄, didie ke nnyịn ikpanam “se ifọnde inọ kpukpru owo” edieke nnyịn mîsan̄ake ikpere mbon oro akpanade in̄wam?—Galatia 6:10.
9. Ewe item Bible an̄wam nnyịn ndinyene itie ebuana oro adade ukem ukem ye mme nsan̄autom nnyịn?
9 Nte ededi, akwa ukpụhọde odu ke owo ndifọn ido ye nsan̄autom esie ye enye ndinen̄ede ndian idem ye owo oro. Mi ke oyom ikere iban̄a edumbet Bible en̄wen. Apostle Paul ama odụri mme Christian utọn̄ ete: “Ẹkûdian idem utịn̄e utịn̄e ye mmọ eke mînịmke ke akpanikọ.” (2 Corinth 6:14) Nso ke ikọ oro, “ẹkûdian idem utịn̄e utịn̄e” ọwọrọ? Ndusụk edikabade Bible ẹkot ẹte: “ẹkûdụk aku,” “ẹkûdomo ndidụk n̄ka,” m̀mê “ẹtre ndidian idem n̄kaha.” Ini ewe ke ẹkpedọhọ ke owo adian idem akaha ye nsan̄autom esie? Ini ewe ke enye ebe adan̄a onyụn̄ akabade edi edidian idem utịn̄e utịn̄e? Ikọ Abasi, kpa Bible ekeme ndida fi usụn̄ ke n̄kpọ emi.
10. (a) Didie ke Jesus ekemek nsan̄a esie? (b) Mme mbụme ewe ẹkeme ndin̄wam owo anam eti ubiere kaban̄a nsan̄a?
10 Kam kere ban̄a uwụtn̄kpọ Jesus, emi akamade ubonowo toto ke editọn̄ọ. (Mme N̄ke 8:31) Jesus ama enen̄ede ama mbet esie ke ini enye okodude ke isọn̄. (John 13:1) Enye ama akam “ama” owo oro mbon ido-ukpono ẹketụnde usụn̄. (Mark 10:17-22) Edi Jesus ikadaha kpukpru owo nte n̄kpet n̄kpet nsan̄a esie. Enye ikenen̄ekede idian idem ye mbon oro mîkenyeneke udọn̄ ndinam uduak Ete esie. Ini kiet, Jesus ama ọdọhọ ete: “Mbufo ẹdi mme ufan mi edieke mbufo ẹnamde se ami n̄wụkde mbufo.” (John 15:14) Edi akpanikọ ke afo emekeme nditịm mmehe ye nsan̄autom fo. Edi bụp idemfo ete: ‘Ndi owo emi eben̄e idem ndinam se Jesus ọdọhọde nnam? Ndi enye oyom ndikop n̄kpọ mban̄a Jehovah, enye emi Jesus ọkọdọhọde nnyịn ituak ibuot inọ? Ndi enye enyene ukem n̄kokon̄ idaha ido uwem oro ami nte Christian nnyenede?’ (Matthew 4:10) Nte afo enemede nneme ye nsan̄autom fo onyụn̄ ọsọn̄ọde etịn̄ aban̄a mme edumbet Bible, afo eyenyene ibọrọ ọnọ mme mbụme emi.
11. Siak mme idaha oro ikọ Abasi ekemede ndida nnyịn usụn̄.
11 Ediwak idaha en̄wen ẹdu oro ikọ Abasi ekemede ndidi utuenikan̄ ukot nnyịn. Ke uwụtn̄kpọ, Christian oro mînyeneke utom ekeme ndikụt utom oro ẹyomde owo usọp usọp. Nte ededi, utom oro ayada ofụri ini esie, ndien edieke enye enyịmede ndinam utom oro, enye eyesifiak ediwak mbono esop Christian idinyụn̄ inamke mme edinam eken oro ẹnyenede ebuana ye utuakibuot akpanikọ. (Psalm 37:25) Ekeme ndinen̄ede ndọn̄ Christian en̄wen ndise mme edinam unọ idem inemesịt oro mîkemke ye mme edumbet Bible. (Ephesus 4:17-19) Owo efen ekeme ndisọp nyat esịt ke ini ekemmọ mme andinịm ke akpanikọ ẹnamde enye idiọkn̄kpọ. (Colossae 3:13) Ke kpukpru utọ idaha oro, nnyịn ikpenyene ndiyak Ikọ Abasi edi utuenikan̄ ukot nnyịn. Ke akpanikọ, nditiene mme edumbet Bible ekeme ndin̄wam nnyịn iyọ mfịna ekededi. Ikọ Abasi “ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido.”—2 Timothy 3:16.
“Un̄wana Usụn̄ Mi”
12. Didie ke ikọ Abasi edi un̄wana usụn̄ nnyịn?
12 Psalm 119:105 etịn̄ n̄ko ete ke Ikọ Abasi edi un̄wana usụn̄ nnyịn, anamde ikụt se idude ke iso. Nnyịn imọfiọk se idude ke iso, koro Bible etịn̄ ntak oro ererimbot emi ọdiọkde ntem ye se iditịbede ke akpatre. Ke akpanikọ, nnyịn imọfiọk ke nnyịn idu ke “mme akpatre usen” eke idiọk editịm n̄kpọ emi. (2 Timothy 3:1-5) Ndifiọk se idude ke iso ekpenyene ndinam nnyịn inen̄ede ikere iban̄a nte idude uwem idahaemi. Apostle Peter ekewet ete: “Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido uwem ye ke mme edinam uten̄e Abasi, nte ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere.”—2 Peter 3:11, 12.
13. Didie ke ndifiọk ke ererimbot emi ọmọn̄ ọsọsọp ebe efep okpotụk ekikere ye usụn̄uwem nnyịn?
13 Ekikere ye usụn̄uwem nnyịn ẹkpenyene ndiwụt ke imenen̄ede inịm nte ke “ererimbot ke ebebe efep kpasụk ntre n̄ko ye mbumek esie.” (1 John 2:17) Nditiene ndausụn̄ Abasi ayan̄wam nnyịn inịm nti utịtmbuba. Ke uwụtn̄kpọ, Jesus ọkọdọhọ ete: “Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken ẹnọ mbufo.” (Matthew 6:33) Odot didie ntem ndikụt nte ediwak n̄kparawa owo ẹwụtde ke imenyene mbuọtidem ke mme ikọ Jesus oro ebe ke ndisịn idem ke utom uyọhọ-ini! Mbon eken—esịnede ofụri ubon—ẹsiwọrọ ẹka ebiet oro ẹnen̄erede ẹyom mme anditan̄a Obio Ubọn̄.
14. Didie ke ubon Christian kiet ẹketat utom ukwọrọikọ mmọ?
14 Kere ban̄a ubon Christian kiet oro ẹdide owo inan̄, emi ẹkekpọn̄de United States ẹka Dominican Republic man ẹken̄wam esop emi odude ke obio oro owo 50,000 ẹdude. Esop oro enyene n̄kpọ nte mme asuanetop Obio Ubọn̄ 130. Edi, ke April 12, 2006, n̄kpọ nte owo 1,300 ẹkedụk Editi n̄kpa Christ! ‘N̄kpọ ẹnen̄ede ẹdat se ẹkpen̄ede’ ke efakutom emi, oro anam ke ọfiọn̄ ition kpọt ẹma ẹkebe, ubon emi ẹma ẹnịm ukpepn̄kpọ Bible 30. (John 4:35) Ete ubon emi ọdọhọ ete: “Nditọete 30 ẹmeto ẹdi man ẹdin̄wam esop emi. N̄kpọ nte owo 20 ẹto United States, ndien mbon eken ẹto Bahamas, Canada, Italy, New Zealand, ye Spain. Mmọ ẹnen̄ede ẹnyene udọn̄ ndin̄wam ke an̄wautom ndien edidi mmọ enen̄ede esịn udọn̄ ọnọ nditọete ke esop oro.”
15. Mme edidiọn̄ ewe ke afo enyene ke ntak oro enịmde mme n̄kpọ Obio Ubọn̄ akpa?
15 Imọdiọn̄ọ ke idịghe kpukpru owo ẹkeme ndika obio en̄wen n̄kanam utom ke ebiet oro udọn̄ okponde akan. Edi mbon oro ẹkade, m̀mê oro ẹdikemede ndikpụhọde idaha mmọ man ẹtiene ẹka, ẹyenyene ekese edidiọn̄ ke ndibuana ke ikpehe utom ukwọrọikọ emi. Ndien inamke n̄kpọ m̀mê m̀mọ̀n̄ ke afo odu, kûtre ndikop idatesịt ke ini anamde utom Jehovah ye ofụri ukeme fo. Edieke enịmde mme n̄kpọ Obio Ubọn̄ akpa ke uwem fo, Jehovah ọn̄wọn̄ọ ‘ndin̄wan̄a nti n̄kpọ nnọ fi, tutu akaha.’—Malachi 3:10.
Ndibọ Ufọn nto Ndausụn̄ Jehovah
16. Nso ufọn ke idinyene edieke iyakde ikọ Abasi ada nnyịn usụn̄?
16 Nte ima iketetịn̄, ikọ Jehovah ada nnyịn usụn̄ ke akpan usụn̄ iba. Enye edi utuenikan̄ ukot nnyịn emi an̄wamde nnyịn ndisan̄a n̄ka iso iso ke nnennen usụn̄, onyụn̄ ada nnyịn usụn̄ ke ini iyomde ndinam ubiere. Ikọ Abasi edi n̄ko un̄wana usụn̄ nnyịn, anamde ikeme ndikụt se inade ke iso. Enye n̄ko anam ida item Peter emi isịn ke edinam: “Ẹfak ọfọn̄ esịt ndinam utom, ẹkpeme ukeme ukeren̄kpọ mbufo ofụri ofụri, ẹkọn̄ idotenyịn mbufo ke mfọnido oro owo mîdotke eke ẹdidade ẹsọk mbufo ke ediyarade Jesus Christ.”—1 Peter 1:13.
17. Didie ke edikpep Bible edin̄wam nnyịn itiene ndausụn̄ Abasi?
17 Eyịghe idụhe nte ke Jehovah ke ada nnyịn usụn̄. Edi mbụme edi, Nte afo eyetiene ndausụn̄ oro? Man ọfiọk nte Jehovah adade nnyịn usụn̄, biere ndisikot itie Bible kiet kpukpru usen. Tie kere se okotde, domo ndifiọk se idide uduak Jehovah nyụn̄ kere ban̄a nsio nsio usụn̄ oro ekemede ndida se okotde nsịn ke edinam. (1 Timothy 4:15) Nyụn̄ da “ukeme ukere n̄kpọ” fo nam n̄kpọ ke ini anamde ọkpọkpọ ubiere.—Rome 12:1.
18. Mme edidiọn̄ ewe ke idinyene edieke iyakde Ikọ Abasi ada nnyịn usụn̄?
18 Edieke iyakde mme edumbet Bible ẹda nnyịn usụn̄, mmọ ẹyedi un̄wana usụn̄ nnyịn ẹnyụn̄ ẹnọ nnyịn ndausụn̄ oro iyomde ke ini iyomde ndimek nnennen usụn̄ oro ikpasan̄ade. Nnyịn imenen̄ede ifiọk ke Bible ‘esisian mme ọkọi.’ (Psalm 19:7) Ke ini iyakde Bible ada nnyịn usụn̄, nnyịn iyenyene eti ubieresịt inyụn̄ ikop uyụhọ ke ndinam esịt Jehovah adat. (1 Timothy 1:18, 19) Edieke iyakde ikọ Abasi ada nnyịn usụn̄ ke usen ke usen, Jehovah ọyọnọ nnyịn nsinsi uwem emi edide ata akwa enọ.—John 17:3.
Nte Afo Emeti?
• Ntak edide akpan n̄kpọ ndiyak Jehovah Abasi ada nnyịn usụn̄?
• Didie ke ikọ Abasi ekeme ndidi utuenikan̄ ukot nnyịn?
• Didie ke ikọ Abasi ekeme ndidi un̄wana usụn̄ nnyịn?
• Didie ke edikpep Bible edin̄wam nnyịn itiene ndausụn̄ Abasi?
[Mme Mbụme Ukpepn̄kpọ]
[Ndise ke page 15]
Ini ewe ke mîkpọfọnke idian idem ye mbon oro mînịmke ke akpanikọ?
[Ndise ke page 16]
Mme ufan Jesus ẹkedi mbon oro ẹnamde uduak Jehovah
[Mme ndise ke page 17]
Nte usụn̄uwem nnyịn owụt ke imenịm mme n̄kpọ Obio Ubọn̄ akpa?