Mme Owo Ẹyom nte Ẹkpemade N̄kpọ Eke Spirit

JESUS ọkọdọhọ ke ọwọrọetop Ukwọrọikọ esie Oro ke Obot, ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) Eyedi emenyịme ke ikọ emi edi akpanikọ. Mme owo ke kpukpru ebiet ẹfiọk ke oyom ima n̄kpọ eke spirit ẹnyụn̄ ẹkere ke iyokop inemesịt edieke inamde ntre. Edi nso ke ọwọrọ ndima n̄kpọ eke spirit?

N̄wed ukabade ikọ kiet ọdọhọ ke ndima n̄kpọ eke spirit ọwọrọ “owo ndifiọk ke imoyom m̀mê ndinen̄ede mma mme n̄kpọ ido ukpono,” onyụn̄ ọdọhọ ke ọwọrọ “adan̄a nte owo amade n̄kpọ Abasi.” Mmọdo, ikọ oro, “ndima n̄kpọ eke spirit,” “ndidi owo Abasi,” m̀mê “ndikere n̄kpọ eke spirit” ẹwọrọ ukem n̄kpọ. Man inam emi enen̄ede an̄wan̄a, kere ban̄a uwụtn̄kpọ emi: Ẹsidọhọ ke owo oro enen̄erede esịn idem ke mbubehe edi ama mbubehe. Kpasụk ntre, ẹsidọhọ ke owo emi enen̄erede esịn idem ke n̄kpọ eke spirit m̀mê n̄kpọ ido ukpono, ama n̄kpọ eke spirit.

Nso ndien ikeme ndin̄wam owo enen̄ede ama n̄kpọ eke spirit? Okposụkedi se ikperede ndidi kpukpru ido ukpono ẹdọhọde ke imọfiọk se owo akpanamde man enye enen̄ede ama n̄kpọ eke spirit, kpukpru mmọ ẹtịn̄ nsio nsio n̄kpọ. Mbon Protestant ẹdọhọ ke edidụk ekese edinam ufọkabasi ọnọ owo edinyan̄a. Mbon Catholic ẹkere ke Mass ekeme ndinam mmimọ isan̄a ikpere Abasi. Mbon ido ukpono Buddha ẹkere ke editie n̄kere n̄kpọ ekeme ndinọ owo ifiọk. Mbon Hindu ẹkere ke edieke itụkde idem, ke mmimọ iyọbọhọ udịm udịm edifiak mmana. Ndi kpukpru emi ẹkeme ndiwụt ke owo enen̄ede ama n̄kpọ eke spirit? Ndi odu ekededi ke otu emi oro ekemede ndiwụt ke owo ama n̄kpọ eke spirit?

Ediwak owo ẹkere ke idụhe. Mmọ ẹdọhọ ke ndima n̄kpọ eke spirit ọwọrọ “nditie ikpọn̄ nnịm n̄kpọ ke akpanikọ,” oro edi, ke owo ekeme ndinịm abasi ke akpanikọ ye unana edika ufọkabasi ekededi. Ndusụk owo ẹdọhọ ke ndima n̄kpọ eke spirit idịghe edidụk ido ukpono, edi ke edi edinyene ifụre nnyụn̄ mfiọk se uwem ọwọrọde. Mmọ ẹdọhọ ke ufọn idụhe mbon oro ẹyomde nte ẹkpemade n̄kpọ eke spirit ndidụk ido ukpono ekededi. Utu ke oro, ke akam oyom mmọ ẹfiọk se mmọ ke idemmọ ẹnen̄erede ẹdi. Ewet n̄wed kiet ọdọhọ ete: “Ndima n̄kpọ eke spirit odu owo ke esịt. Enye edi nte afo amade, enyịmede, onyụn̄ anamde n̄kpọ ke ererimbot ye nte esinamde n̄kpọ ye mme owo emi esikụtde. Owo ikemeke ndinyene kpukpru emi ke ufọkabasi m̀mê ke ndinịm akpan ukpepn̄kpọ ido ukpono.”

Ke akpanikọ, mme owo ẹnyene nsio nsio ekikere ẹban̄a se ndima n̄kpọ eke spirit ọwọrọde. Ata ediwak n̄wed ẹdọhọ ke imekeme ndinam owo ama n̄kpọ eke spirit, edi mme n̄wed emi isin̄wamke owo ẹkam ẹfiọk se ndima n̄kpọ eke spirit enen̄erede ọwọrọ. Edi odu n̄wed oro ọnọde ndausụn̄ ke mme n̄kpọ eke spirit. N̄wed emi owụt ke ẹkeda odudu spirit Abasi ẹwet imọ. (2 Timothy 3:16) Ẹyak ise se n̄wed oro, kpa Bible, etịn̄de aban̄a edima n̄kpọ eke spirit ye ufọn edinam ntre.

 [Ebiet ẹdade ndise ẹto ke page 2]

IKPAEDEM: Edem edem: © Mark Hamblin/​age fotostock