Uwem Fo Ekeme Ndinyene Uduak!

EDIWAK owo ẹda ofụri uwem mmọ ẹyom okụk ye se enye ekemede ndidep. Ndusụk owo ẹda ofụri uwem mmọ ẹyom enyịn̄ ke ererimbot. Mbon eken ẹda ofụri uwem mmọ ẹfori ukeme mmọ ke utomusọ. Onyụn̄ odu mbon oro ẹdade ofụri uwem mmọ ẹn̄wam mbon en̄wen. Edi ediwak owo ifiọkke ntak oro mmọ ẹdude uwem.

Nso kaban̄a fi? Nte emenen̄ede ekere aban̄a ntak oro afo odude uwem? Ntak mûkereke uban̄a ndusụk utịtmbuba oro mme owo ẹbịnede man ese m̀mê mmọ ẹnen̄ede ẹnam owo okop uyụhọ ye inemesịt? Nso inam uwem owo enyene uduak?

Okụk ye Inemesịt Ẹnyene Ufọn

Bible ọdọhọ ke Ecclesiastes 7:12, ete: “Koro eti ibuot edide se ikpemede, inyene onyụn̄ edi se ikpemede, edi ata ifiọk ye eti ibuot ẹyenam mme andinyene enye ẹdu uwem.” Ke akpanikọ, okụk enyene ufọn. Afo omoyom okụk man odu uwem, akpan akpan edieke enyenede ubon ndinọ mme n̄kpọ udu uwem.—1 Timothy 5:8.

 Mmọn̄ọ, ndi uwem ekpenem edieke ẹkpesiode mme n̄kpọ inemesịt oro ẹkemede ndida okụk ndep ẹfep? Okposụkedi Jesus Christ, Anditọn̄ọ Ido Ukpono Christ, ọkọdọhọde ke imọ ikenyeneke ebiet eke inịmde ibuot, enye ama esidia ata nti udia onyụn̄ ọn̄wọn̄ nti wine ke ini ke ini. Akan oro, enye ama esịne ọsọn̄urua ọfọn̄idem.—Matthew 8:20; John 2:1-11; 19:23, 24.

Edi Jesus ikayakke ofụri uwem esie isịn ke ndiyom inemesịt. Enye ama enịm mme ebeiso n̄kpọ akpa. Jesus ọkọdọhọ ete: “Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” Ekem enye ama etịn̄ aban̄a owo inyene oro ekenyenede in̄wan̄ emi ọkọfọnde n̄kpọ etieti, emi okonyụn̄ ekerede se edinamde ke esịt esie ete: “Ndinam nso, ke emi mmenyeneke ebiet eke mbonde mfri mi? . . . Nyowụri mme ufọk ubonn̄kpọ mi nnyụn̄ mbọp se ikponde ikan, ndien do ke nditan̄ kpukpru mfri mi ye ofụri nti n̄kpọ mi mbon; ndien nyọdọhọ ukpọn̄ mi nte: ‘Ukpọn̄, afo emenyene ediwak nti n̄kpọ emi obonde ọnọ ediwak isua; duọk odudu, dia, n̄wọn̄, kop inemesịt.’” Nso ikọdiọk ke ekikere ọbọn̄ emi? Jesus aka iso ke n̄ke oro ete: “Abasi ọdọhọ [owo inyene oro] ete, ‘Afo anana-ibuot owo, ẹyekpak ukpọn̄ fo ke ubọk fo ke okoneyo emi. Anie, ndien, edinyene mme n̄kpọ eke afo ọkọkọde obon?’” Idem edieke ọbọn̄ oro okpokobonde mfri esie, enye ikpekekemeke ndidia inyene oro enye ọkọkọde ke enye ama akakpa. Jesus ama ada ikọ esie ekeberi ke ndinọ otuowo esie ukpepn̄kpọ emi: “Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.”—Luke 12:13-21.

Edi akpanikọ ke nnyịn imoyom okụk, onyụn̄ ọfọn isikop inemesịt. Edi okụk m̀mê inemesịt idịghe ata akpan n̄kpọ ke uwem. Ndinyene inyene ke n̄kan̄ Abasi, oro edi, ndidu uwem oro Abasi amade, akam enen̄ede edi ata akpan n̄kpọ.

Ndi Ndinam Enyịn̄ Nnọ Idem Edi Akpan N̄kpọ?

Ediwak owo ẹda ofụri uwem mmọ ẹnam enyịn̄ ẹnọ idemmọ. Ndinam enyịn̄ nnọ idemfo—oro edi, ndiyom mbon en̄wen ẹti fi ikam idiọkke. Bible ọdọhọ ete: “Eti enyịn̄ ọfọn akan eti aran; kpa ntre ke usen n̄kpa owo [ọfọn] akan usen emana owo.”—Ecclesiastes 7:1.

Esitie nte ẹsifiọk ofụri se owo akanamde ke usen n̄kpa esie. Edieke enye akanamde nti n̄kpọ, usen n̄kpa esie enen̄ede ọfọn akan usen emana, emi owo mîkọfiọkke n̄kpọ ndomokiet iban̄a enye.

Edidem Solomon ekewet n̄wed Ecclesiastes. Absalom eyenete Solomon, emi ọkọsọn̄ọde Solomon, ama oyom ndinam enyịn̄ nnọ idem. Edi, etie nte nditọ esie ita emi ẹkpekenamde mme emana ini iso ẹti enyịn̄ esie ẹma ẹkpan̄a nsek. Ntre, nso ke Absalom akanam? Ikọ Abasi ọdọhọ ete: “Absalom . . . akada adaha emi odude ke ebeden̄ edidem, enịm ọnọ idemesie, ke eyo uwem esie: koro enye ọkọdọhọde ete, Ami nnyeneke eyen-eren eke edinamde ẹti enyịn̄ mi: enye onyụn̄ ada enyịn̄ esie osio adaha oro.” (2 Samuel 14:27; 18:18) Mme adaha oro idụhe aba idahaemi. Amaedi Absalom, nditọ ukpepn̄kpọ Bible ẹfiọk ke enye ekedi ata owo usọn̄enyịn emi okoyomde ndibọ David ete esie ebekpo ubọn̄.

 Mfịn, ediwak owo ẹsiyom ẹda se mmimọ inamde ẹti mmimọ. Mmọ ẹsiyom ubọn̄ ẹto mbon oro mînyeneke iwụk. Edi nso isitịbe inọ utọ uwọrọiso oro? Christopher Lasch ekewet ke n̄wed esie oro ẹkotde Culture of Narcissism, ete: “Ke eyo nnyịn emi ẹdade nte owo esehede, eyede, onyụn̄ ọwọrọde etop ẹbiere adan̄a nte enye okụtde unen mi, ubọn̄ isibịghike, ndien mbon oro ẹnọde ubọn̄ ẹsinen̄ede ẹtịmerede esịt ẹkere m̀mê mmimọ iyaka iso inyene ubọn̄ oro.” Oro anam ediwak mbon oro ẹwọrọde etop ẹsida n̄kpọsọn̄ ibọk ye mmịn, ndien emi esinam mmọ ẹkpa nsek. Ke nditịm ntịn̄, uwọrọ etop iwọrọke n̄kpọ ndomokiet.

Anie ndien ke ikpoyom ọnọ nnyịn eti enyịn̄? Jehovah ama ada prọfet Isaiah etịn̄ aban̄a ndusụk mbon oro ẹkenịmde Ibet Esie ete: “Nyada n̄kpọ editi ye enyịn̄ . . . nnọ mmọ ke ufọk mi, ye ke esịt ibibene mi: nyọnọ mmọ nsinsi enyịn̄ eke mîdisịbeke ifep.” (Isaiah 56:4, 5) Sia mbon oro Abasi amade ẹsụkde ibuot ẹnọ enye, mmọ ẹyenyene “n̄kpọ editi ye enyịn̄.” Abasi eyeti enyịn̄ mmọ ke “nsinsi” mbak ẹdisịbe mmọ ẹfep. Orụk enyịn̄ oro ke Bible esịn udọn̄ ọnọ nnyịn ete inyene—oro edi, eti enyịn̄ ke iso Jehovah, kpa Andibot nnyịn.

Isaiah eketịn̄ ntịn̄nnịm ikọ aban̄a ini emi mbon oro ẹnamde akpanikọ ẹdibọde nsinsi uwem ke Paradise ke isọn̄. “Nsinsi uwem” ke Paradise oro edi “ata uwem”—kpa orụk uwem oro Abasi akaduakde ọnọ owo ke ini emi enye okobotde mmọ. (1 Timothy 6:12, 19) Utu ke ndidu ibio ibio uwem emi mînyụn̄ inọhọ uyụhọ, nte nnyịn ikpakam inyanakede ibịne nsinsi uwem?

Ndinam Utomusọ m̀mê Ndifọn Mfọn Ikemke

Ediwak mme anamusọ ẹnyene udọn̄ ndinam n̄kọri ke utomusọ mmọ man ẹsịm se mmọ ẹdade nte mfọnmma utomusọ. Edi uwem idahaemi omụhọ akaha ndida nnam oro. Ke ini Hideo, anam utomusọ, oro iketịn̄de iban̄a ke akpa ibuotikọ, ekesịmde isua 90, enye ama enen̄ede esịn ukeme man ofori usọ esie. Idem edieke anam utomusọ esịmde idaha oro enye okopde inemesịt ke utom imọ ọfọn, ini oro, enye idikemeke aba ndinam utom nte enye ekesinamde ke ini ekedide akparawa. Edi nso ikpetịbe edieke enye okpodude uwem ke nsinsi? Kere ban̄a kpukpru ifet oro enye ekpenyenede ndinam utomusọ esie ọfọn ama!

Nso ke ẹkeme nditịn̄ mban̄a edifọn mfọn ye mme owo? Owo ndikere mban̄a mme ubuene nnyụn̄ nda inyene esie n̄n̄wam mmọ edi ata eti n̄kpọ. Bible ọdọhọ ete: “Inemesịt okpon ke ndinọnọ akan ke ndibọbọ.” (Utom 20:35) Ndikere mban̄a mfọnọn̄kpọ mbon en̄wen ekeme ndinen̄ede nnọ owo inemesịt. Edi owo kiet kpọt ekeme ndinam emi adan̄a didie, idem edieke enye adade ofụri uwem esie anam? Nnyịn ikemeke ndinen̄ede n̄kọk mfịna mbon en̄wen. Idụhe adan̄a n̄kpọ obụkidem oro inọde mbon en̄wen emi ekemede ndiyụhọ akpan udọn̄ oro ata ediwak owo ẹfụmide, emi akanam mmọ mînyụn̄ iyụhọke. Nso idi udọn̄ oro?

Ana Ẹyụhọ Ndammana Udọn̄

Ke Ukwọrọikọ esie Oro ke Obot, Jesus ama etịn̄ aban̄a ata ndammana udọn̄ ke ini enye ọkọdọhọde ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit, koro obio ubọn̄ heaven enyenede mmọ.” (Matthew 5:3) Do, nte Bible ọdọhọde, idịghe inyene, uwọrọetop, uforo ke utomusọ, m̀mê edifọn mfọn ọnọ owo ata inemesịt. Utu ke oro, se inọde ata inemesịt edi ndiyụhọ udọn̄ nnyịn ke n̄kan̄ eke spirit—kpa udọn̄ edituak ibuot nnọ Abasi.

Apostle Paul ama esịn udọn̄ ọnọ mbon oro mîkọfiọkke Andibot ete ẹyom Enye. Paul ọkọdọhọ ete: “[Abasi] ama anam kpukpru idụt ubonowo ẹwọn̄ọ ẹto owo kiet, ẹdidụn̄ ke ofụri iso isọn̄, enye ama onyụn̄ enịm edimek ini ye adan̄a ebietidụn̄ owo, man mmọ ẹyom Abasi, m̀mê mmọ ẹyefiọn̄ọ ubọk ẹn̄wana ẹsịm enye ẹnyụn̄ ẹkụt enye, okposụkedi enye ke akpanikọ mîyomke usụn̄ ikpọn̄ owo nnyịn kiet kiet. Koro ebe ke enye ke nnyịn inyene uwem inyụn̄ isan̄a inyụn̄ idu uwem.”—Utom 17:26-28.

Ndiyụhọ udọn̄ oro inyenede ndituak ibuot nnọ ata Abasi edi ukpọhọde ata inemesịt. Ndiyụhọ  udọn̄ eke spirit anam nnyịn inyene n̄ko idotenyịn “ata uwem.” Kere ban̄a uwụtn̄kpọ Teresa, emi ọkọwọrọde etop ke edinam ekebe ndise ke idụt mmọ ke ini emi enye ekedide ata akpa obubịt owo ke America emi ekedide akpan owo ke edinam TV emi enye okosiode edi, emi ekesibịghide hour kiet. Nte ededi, ikebịghike enye ama ọkpọn̄ kpukpru oro. Ntak-a? Enye ọdọhọ ete: “Ami nnịm ke ndinam item Ikọ Abasi edi mfọnn̄kan usụn̄ ndidu uwem.” Teresa ikoyomke ndibiat itie ebuana esie ye Abasi ebe ke ndinam n̄kpọ ke edinam ekebe ndise oro ekesịnde udọn̄ ọnọ idan̄ ye afai. Enye ikedịghe aba akpan owo ke edinam ekebe ndise edi okodu uwem oro enen̄erede enyene uduak, koro enye akanam utom uyọhọ ini nte andikwọrọ eti mbụk Obio Ubọn̄ Abasi, odomo ndin̄wam mbon en̄wen ẹtiene ẹnyene eti itie ebuana ye Abasi.

Ke ini Teresa mîkanamke aba edinam ekebe ndise oro, ẹdọhọ ke akani nsan̄a Teresa eketịn̄ ntem aban̄a enye: “Mma nnen̄ede mfụhọ sia akabiakde mi ndikụt enye ọduọkde se n̄kadade nte ubọkọkọ oro enyenede uforo. Edi ke akpanikọ, enye enyene n̄kpọ en̄wen emi okokponde onyụn̄ ọfọnde akan.” Teresa ama akpa. Nte ededi, ke enye ama akakpa, akani nsan̄a esie oro ama ọdọhọ ete: “Enye ama okop inemesịt, ndien n̄kukụre se owo oyomde ke uwem edi oro. Nnyịn owo ifan̄ ikeme ndidọhọ ntre?” Mbon oro ẹdade itie ebuana mmọ ye Abasi nte ata akpan n̄kpọ ke uwem ẹnyene utịbe utịbe idotenyịn ediset ke n̄kpa ke idak ukara Obio Ubọn̄.—John 5:28, 29.

Andibot enyene uduak ọnọ isọn̄ ye ubonowo emi ẹdude ke enye. Enye oyom fi ọfiọk uduak emi onyụn̄ adara uwem nsinsi ke Paradise ke isọn̄. (Psalm 37:10, 11, 29) Ini edi emi ndinen̄ede n̄kpep n̄kpọ mban̄a Jehovah, kpa Andibot enyọn̄ ye isọn̄, ye se enye aduakde ọnọ fi. Mme Ntiense Jehovah ke edem mbufo ẹyekop inemesịt ndin̄wam fi ọfiọk mme n̄kpọ emi. Mbọk sobo ye mmọ, mîdịghe wet n̄wed nọ ẹsọk mme andisio magazine emi.

[Ndise ke page 5]

Nso ikọdiọk ke ekikere owo inyene oro ke n̄ke Jesus?

[Ndise ke page 7]

Nte afo akpama ndidara uwem nsinsi ke Paradise ke isọn̄?