Nte Afo Ada Ọnọ Ukara Jehovah?
Nte Afo Ada Ọnọ Ukara Jehovah?
“Mbufo ẹdọhọ ke otu mme idụt, ete, ke Jehovah edi edidem.”—PSALM 96:10.
1, 2. (a) Nso akpan n̄kpọ eketịbe ke n̄kpọ nte October isua 29 E.N.? (b) Nso ke emi ọkọwọrọ ọnọ Jesus?
ATA akpan n̄kpọntịbe oro akanam mîtịbeke ke isọn̄ ama etịbe ke n̄kpọ nte October isua 29 E.N. Matthew oro eketienede ewet Gospel ọdọhọ ete: “Ke Jesus ama akana baptism kpa idaha oro enye ọwọrọ ke mmọn̄ ọdọk; ndien, sese! enyọn̄ eberede, ndien [John Andinịm Owo Baptism] okụt spirit Abasi osụhọrede nte ibiom edidoro [Jesus] ke idem. Sese! N̄ko, uyo oto ke enyọn̄ ọdọhọ ete: ‘Emi edi edima Eyen mi, emi ami nnyịmede.’” Emi ekedi kiet ke otu n̄kpọntịbe ifan̄ oro mme andiwet Gospel mbinan̄ ẹkewetde ẹban̄a.—Matthew 3:16, 17; Mark 1:9-11; Luke 3:21, 22; John 1:32-34.
2 Ndikan̄wan̄a edisana spirit nduọk Jesus ke idem okowụt ke enye edi Enye Emi Ẹyetde Aran, emi ọwọrọde Messiah, m̀mê Christ. (John 1:33) Mfri oro ẹken̄wọn̄ọde ama ọwọrọ owụt idem do ndien ke akpatre! Mfri emi Satan edidịghide nditịn̄ ikpat akada oro ke iso John Andinịm Owo Baptism, enye edinuak Satan ibuot, kpa akwa asua Jehovah emi asuade ukara Jehovah n̄ko. (Genesis 3:15) Toto ke ini oro, Jesus ama etịm ọfiọk ke imọ inyene ndinam uduak Jehovah. Uduak emi akaban̄a ukara ye Obio Ubọn̄ Jehovah.
3. Didie ke Jesus eketịm idem ọnọ se enye ekenyenede ndinam man owụt ke ida inọ ukara Jehovah?
3 “Jesus ọyọhọ ye edisana spirit, ọwọn̄ọde ọkpọn̄ Jordan, ndien spirit ada enye asan̄a ke wilderness” man eketịm enye idem ọnọ utom oro ẹkedọn̄de enye. (Luke 4:1; Mark 1:12) Jesus ama ada usen 40 etie ke Wilderness enen̄ede ekere aban̄a eneni oro Satan ekedemerede aban̄a ukara Jehovah onyụn̄ ekere n̄ko aban̄a se anade imọ inam man iwụt ke Jehovah odot ndikara. Eneni oro abuana kpukpru mme angel ke heaven ye mme owo ke isọn̄. Ntre akpana nnyịn ikere iban̄a nsọn̄ọnda Jesus inyụn̄ ise se ikpanamde man iwụt ke nnyịn n̄ko iyom ndida nnọ ukara Jehovah.—Job 1:6-12; 2:2-6.
Ẹneni m̀mê Anie Odot Ndikara
4. Nso ke Satan akanam oro owụtde ke enye eneni aban̄a owo emi odotde ndikara?
4 Ke akpanikọ, Satan ama ọfiọk kpukpru emi. Ye unana ubiatini, enye ama ọtọn̄ọ en̄wan ye akpan mfri “n̄wan” Abasi. (Genesis 3:15) Satan ama odomo Jesus utịm ikata, ọdọhọ enye anam n̄kpọ oro etiede nte ayada ufọn ọsọk Jesus, utu ke ndinam se Ete esie ọkọdọn̄de enye. Ọyọhọ idomo ita ekenen̄ede aban̄a enye emi odotde ndikara. Satan ama owụt Jesus “kpukpru mme obio ubọn̄ ererimbot ye ubọn̄ mmọ,” onyụn̄ ọsọn̄ enyịn ọdọhọ enye ete: “Nyọnọ fi kpukpru mme n̄kpọ emi edieke afo ọduọde ke isọn̄ atuak ibuot ọnọ mi.” Sia Jesus ama ekenen̄ede ọfiọk ke Devil akara “kpukpru mme obio ubọn̄ ererimbot,” Enye ama owụt ke ida inọ ukara Jehovah ke ndibọrọ ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’”—Matthew 4:8-10.
5. Ewe ọkpọsọn̄ utom ke Jesus ekenyene ndinam?
5 Usụn̄ oro Jesus okodude uwem ama enen̄ede owụt ke se ikenen̄erede ibehe enye ekedi ndiwụt ke Jehovah odot ndikara. Jesus ama etịm ọfiọk ke imọ inyene ndisọn̄ọ nda tutu Satan owot imọ—kpa nte ẹkebemde iso ẹtịn̄ ẹte ke ẹyenuak mfri n̄wan nditịn̄ ikpat—man enye owụt ke Abasi odot ndikara. (Matthew 16:21; 17:12) Enye n̄ko ekenyene ndinam mme owo ẹfiọk ke Obio Ubọn̄ Abasi edi ndutịm oro Jehovah edidade osobo Satan onyụn̄ anam kpukpru edibotn̄kpọ Esie ẹfiak ẹnyene emem ye ifụre. (Matthew 6:9, 10) Nso ke Jesus akanam man ekeme ndinam ọkpọsọn̄ utom emi?
‘Obio Ubọn̄ Abasi Asan̄a Ekpere’
6. Didie ke Jesus okowụt ke Abasi edida Obio Ubọn̄ Esie “abiat mme utom Devil”?
6 Akpa kan̄a, “Jesus [ama] odụk ke Galilee, ọkọkwọrọ eti mbụk Abasi onyụn̄ ọdọhọ ete: ‘Edimek ini emekem, obio ubọn̄ Abasi onyụn̄ asan̄a ekpere.’” (Mark 1:14, 15) Enye ama onyụn̄ ọdọhọ ete: “Ana ntan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:18-21, 43) Jesus ama asan̄a ke kpukpru itụn̄ ye inụk Galilee, “ọkwọrọ onyụn̄ atan̄a eti mbụk obio ubọn̄ Abasi.” (Luke 8:1) Enye n̄ko ama anam n̄kpọsọn̄ utom—ọnọ otuowo udia, anam mbufịt inyan̄ odobo, ọkọk mbon udọn̄ọ, onyụn̄ anam mme akpan̄kpa ẹset. Mme utịben̄kpọ oro Jesus akanamde ẹma ẹwụt ke Abasi ekeme nditre kpukpru afanikọn̄ ye ndutụhọ oro ubonowo ẹsobode ke ntak nsọn̄ibuot eke Eden, onyụn̄ “abiat mme utom Devil.”—1 John 3:8.
7. Nso ke Jesus ọkọdọhọ mme anditiene enye ẹnam, ndien nso ikedi utịp?
7 Man ẹkeme ndinen̄ede ntan̄a eti mbụk Obio Ubọn̄, Jesus ama ekpep mme anditiene enye oro ẹkenamde akpanikọ nte ẹdinamde utom emi. Akpa, enye ama ọdọn̄ apostle esie 12 ete “ẹkekwọrọ obio ubọn̄ Abasi.” (Luke 9:1, 2) Ekem enye osio owo 70 en̄wen ọdọn̄ ẹkekwọrọ ẹte: “Obio ubọn̄ Abasi amasan̄a ekpere mbufo.” (Luke 10:1, 8, 9) Ke mme mbet emi ẹma ẹkenyọn̄ ẹdisian Jesus se mmimọ ikanamde ke an̄wautom, enye ama ọbọrọ mmọ ete: “Mma n̄kụt Satan otode ke heaven ọduọ nte emịnen̄mịnen̄.”—Luke 10:17, 18.
8. Nso ke usụn̄ uwem Jesus ekenen̄ede owụt?
8 Jesus ama enen̄ede esịn ifịk, onyụn̄ ada kpukpru ifet ọkwọrọ etop Obio Ubọn̄. Enye ama esịn ifịk anam utom okoneyo ye uwemeyo, inyụn̄ idọn̄ke enyịn ke mme n̄kpọ oro ẹkemede ndinam uwem enem. Enye ọkọdọhọ ete: “Mme ebua ikọt ẹnyene ndudu, mme inuen enyọn̄ ẹnyụn̄ ẹnyene mme efọk, edi Eyen owo inyeneke ebiet eke enịmde ibuot esie.” (Luke 9:58; Mark 6:31; John 4:31-34) Esisịt ini mbemiso ẹwotde Jesus, enye ama ọdọhọ Pontius Pilate uko uko ete: “N̄konyụn̄ ndi ke ererimbot kaban̄a emi, man n̄kpetie ntiense nnọ akpanikọ.” (John 18:37) Nte Jesus okodude uwem ama owụt ke imọ ikedịghe man ẹdifiọk imọ n̄kukụre nte akwa andikpep m̀mê anam utịben̄kpọ, m̀mê Andinyan̄a oro awade idem ọnọ mbon en̄wen, edi ekedi ndinam uduak Jehovah, kpa Andikara, nnyụn̄ n̄wụt ke Jehovah ayada Obio Ubọn̄ Esie anam kpukpru se Enye aduakde.—John 14:6.
“Okụre!”
9. Didie ke Satan akanuak mfri n̄wan Abasi nditịn̄ ikpat?
9 Asua oro, Satan kpa Devil ikenemke esịt iban̄a kpukpru se Jesus akanamde aban̄a Obio Ubọn̄. Satan ama esiwak ndida mfri esie eke isọn̄—oro esịnede ukara ye ido ukpono—ndomo ndiwot mfri n̄wan Abasi. Satan ye isụn̄utom esie ẹma ẹsikọbọ Jesus ke ofụri eyouwem esie ke isọn̄. Ke ini utọ eke isua 33 E.N., ini ama edikem ndiyak Eyen owo nsịn Asua ke ubọk man anuak enye nditịn̄ ikpat. (Matthew 20:18, 19; Luke 18:31-33) Mme Gospel ẹnen̄ede ẹwụt nte Satan akadade mme owo—ẹsịnede Judas Iscariot, mbọn̄ oku, mme ewetn̄wed, mme Pharisee, ye mbon Rome—obiom Jesus ikpe, otụhọde onyụn̄ owot enye ke eto ndutụhọ.—Utom 2:22, 23.
10. Nso ikedi ata akpan n̄kpọ oro Jesus akanamde ke ndikakpa ke eto ndutụhọ?
10 Esitie fi didie ke idem ke ini ekerede nte Jesus ọkọkọn̄ọde ke eto ndutụhọ okop ubiak tutu enye edikpa ke akpatre? Ekeme ndidi emeti uwa ufak oro Jesus ọkọnọde anamidiọk ubonowo ke ofụri esịt. (Matthew 20:28; John 15:13) Idem ekeme ndikpa fi mban̄a akwa ima oro Jehovah akamade ubonowo ke ndinọ uwa oro. (John 3:16) Ekeme nditie fi ke idem nte eketiede akwa owoekọn̄ Rome oro ọkọdọhọde ete: “Ke akpanikọ owo emi ekedi Eyen Abasi.” (Matthew 27:54) Idiọkke ndinyene utọ ekikere emi. N̄ko n̄ko, ti akpatre ikọ oro Jesus eketịn̄de ke eto ndutụhọ ete: “Okụre!” (John 19:30) Nso ikokụre? Okposụkedi Jesus akanamde ekese ke eyouwem esie, n̄kpa esie okonyụn̄ enen̄erede enyene ufọn, ata akpan ntak oro enye ekedide isọn̄ ekedi ndiwụt ke Jehovah odot ndikara. N̄ko, ndi owo ikebemke iso itịn̄ ite ke mfri n̄wan Abasi eyenen̄ede okụt ndutụhọ ke ubọk Satan man anam enyịn̄ Jehovah asana? (Isaiah 53:3-7) Okposụkedi emi mîkememke utom, Jesus ama okụre utom esie. Nso akwa n̄kpọ ke emi ekedi ntem!
11. Nso ke Jesus edinam man se ẹkebemde iso ẹtịn̄ ke In̄wan̄ Eden osu ọyọhọ ọyọhọ?
11 Nsọn̄ọnda ye edinam akpanikọ Jesus ẹkenam Abasi anam enye eset nte “spirit emi ọnọde uwem,” idịghe nte owo. (1 Corinth 15:45; 1 Peter 3:18) Jehovah ama ọn̄wọn̄ọ ọnọ Eyen esie oro enye ọnọde ubọn̄ mi ete: “Tie mi ke ubọk nnasia, tutu nda mme asua fo nnịm fi ke udoriukot.” (Psalm 110:1) “Mme asua” emi ẹsịne Satan, kpa akwa abiatibet ye kpukpru mbon oro ẹnamde mfri esie. Jesus Christ, kpa Edidem Obio Ubọn̄ Messiah Jehovah, oyosobo kpukpru mbon nsọn̄ibuot ke ufụm enyọn̄ ye ke isọn̄. (Ediyarade 12:7-9; 19:11-16; 20:1-3, 10) Ini oro ndien ke ntịn̄nnịm ikọ eke Genesis 3:15 edisu ọyọhọ ọyọhọ. Ini oro n̄ko ke ẹdinen̄ede ẹbọrọ akam oro Jesus ekekpepde mme anditiene enye ete: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—Matthew 6:10; Philippi 2:8-11.
Uwụtn̄kpọ Oro Ikpetienede
12, 13. (a) Didie ke ẹnam n̄kpọ ẹban̄a eti mbụk Obio Ubọn̄ mfịn? (b) Mme mbụme ewe ke ikpobụp idem nnyịn edieke iyomde nditiene nde ikpat Christ?
12 Ke ẹkwọrọ eti mbụk Obio Ubọn̄ ke ediwak idụt mfịn, kpa nte Jesus ọkọdọhọde ke ẹyekwọrọ. (Matthew 24:14) Emi anam ediwak miliọn owo ẹyak idem mmọ ẹnọ Abasi. Mme edidiọn̄ oro Obio Ubọn̄ Abasi edidade edi ẹnen̄ede ẹnem mmọ. Mmọ ẹdori enyịn ndidu ke nsinsi ke Paradise isọn̄ oro emem ye ifụre ẹdidude, ndien mmọ ẹnem esịt nditan̄a idotenyịn mmọ nnọ mbon en̄wen. (Psalm 37:11; 2 Peter 3:13) Ndi afo edi kiet ke otu mme anditan̄a Obio Ubọn̄ emi? Ke edide ntre, omodot itoro. Nte ededi, odu n̄kpọ efen oro anade nnyịn owo kiet kiet ikere iban̄a.
13 Apostle Peter ekewet ete: “Christ ama akam okụt ukụt kaban̄a mbufo, ọkpọn̄de uwụtn̄kpọ enịm ọnọ mbufo man ẹtiene nde ikpat esie ketket.” (1 Peter 2:21) Tịm fiọk ete ke Peter iketịn̄ke mi iban̄a ifịk oro Jesus ekesịnde ọkwọrọ ikọ m̀mê usọ oro enye ekesidade ekpep mme owo n̄kpọ, edi eketịn̄ aban̄a ukụt oro Jesus okokụtde. Sia Peter okodude ye Jesus, enye ama okụt adan̄a nte Jesus ekenyịmede ndibọ ufen man osụk ibuot ọnọ ukara Jehovah onyụn̄ owụt ke Satan edi ata owo nsu. Didie ndien ke nnyịn ikeme nditiene nde ikpat Jesus? Ana ibụp idem nnyịn ite: ‘Ndi mmenen̄ede mben̄e idem ndibọ ufen man n̄wụt ke nda nnọ ukara Jehovah, ke mmonyụn̄ n̄kpono ukara esie? Ndi nte ami ndude uwem ye nte n̄kwọrọde ikọ ẹwụt ke nnen̄ede nda nnọ ukara Jehovah?’—Colossae 3:17.
14, 15. (a) Didie ke Jesus akanam n̄kpọ ke ini Peter ọkọdọhọde enye atua idemesie mbọm ye ini ẹkeyomde ndinam enye edidem, ndien ntak-a? (b) Nso ke akpana ikere iban̄a kpukpru ini? (Tịn̄ n̄ko se idude ke ekebe oro “Sọn̄ọ Da Nọ Ukara Jehovah.”)
14 Kpukpru usen, nnyịn imesisobo idomo ye mme n̄kpọ oro anade ibiere, ẹdide n̄kpri m̀mê ikpọ. Didie ke ikpebiere se ikpanamde? Ke uwụtn̄kpọ, ke ini isobode idomo ndinam n̄kpọ oro edibiatde idaha nnyịn nte mme Christian, didie ke ikpanam n̄kpọ? Jesus akanam n̄kpọ didie ini Peter ọkọdọhọde enye atua idem esie mbọm? Jesus ọkọbọrọ ete: “Daha mi ke iso, Satan! Afo ukereke ekikere Abasi, edi ekere eke owo.” (Matthew 16:21-23) Mîdịghe, ke ini ẹnọde nnyịn utom oro edinamde inyene ediwak okụk m̀mê ifori ubọkọkọ nnyịn edi oro mîdiyakke ise iban̄a mme n̄kpọ eke spirit, nte iyanam n̄kpọ nte Jesus akanamde? Ke ini Jesus ọkọfiọkde ke mbon oro ẹkekụtde mme utịben̄kpọ imọ “ẹyom ndimụm imọ nnịm ke edidem,” enye ama ọsọsọp adaha ọkpọn̄ mmọ.—John 6:15.
15 Ntak emi Jesus akanamde n̄kpọ ntem ediwak ini-e? Koro enye ama okụt in̄wan̄-in̄wan̄ nte ke se ibuanade ke n̄kpọ emi akan imọ ndidu ke ifụre m̀mê n̄kpọ ndifọn ye imọ. Enye okoyom ndinam uduak Ete esie nnyụn̄ n̄wụt ke ida inọ ukara Jehovah, inamke n̄kpọ m̀mê nso iditịbe. (Matthew 26:50-54) Ntem edieke nnyịn mîkereke kpukpru ini iban̄a eneni oro abuanade ukara Jehovah nte Jesus ekekerede, imekeme ndinam ukwan̄ ubiere. Ntak-a? Koro nnyịn imekeme ndisọsọp nduọ ndụk afia Satan emi enen̄erede ọfiọk ndinam etie nte idiọkn̄kpọ ọfọn, nte enye akanamde ke ini okodomode Eve.—2 Corinth 11:14; 1 Timothy 2:14.
16. Nso ikpedi utịtmbuba nnyịn ke ini in̄wamde mbon en̄wen?
16 Nnyịn imesidomo ndineme se ibehede mme owo inyụn̄ iwụt se Bible etịn̄de aban̄a emi ke ini ikwọrọde ikọ. Emi edi eti usụn̄ ndidemede mmọ udọn̄ man ẹkpep Bible. Nte ededi, utịtmbuba nnyịn idịghe sụk ndin̄wam mme owo ẹfiọk se Bible etịn̄de m̀mê mme edidiọn̄ oro Obio Ubọn̄ Abasi edidade edi. Nnyịn inyene ndin̄wam mmọ ẹdiọn̄ọ eneni oro aban̄ade ukara Jehovah. Ndi mmọ ẹyema ndidi mme ata Christian, ẹnyịme ndimen “eto ndutụhọ” mmọ nnyụn̄ mbọ ufen ke ntak Obio Ubọn̄? (Mark 8:34) Ndi mmọ ẹben̄e idem ndidiana ye mbon oro ẹdade ẹnọ ukara Jehovah nnyụn̄ n̄wụt ke Satan edi osu nsu ye ọdọk-edidọk? (Mme N̄ke 27:11) Edi n̄kpọ ukpono ndida nnọ ukara Jehovah nnyụn̄ n̄n̄wam mbon en̄wen ẹnam ntre.—1 Timothy 4:16.
Ke Ini Abasi Edikabarede Edi “Kpukpru N̄kpọ Ọnọ Kpukpru Owo”
17, 18. Nso eti ini ke idori enyịn ndikụt edieke iwụtde ke ida inọ ukara Jehovah?
17 Nte inamde kpukpru se ikemede idahaemi ke an̄wautom ye ke edu uwem nnyịn ndiwụt ke ida inọ ukara Jehovah, nnyịn imekeme ndidori enyịn ndikụt ini emi Jesus Christ ediyakde “obio ubọn̄ ọnọ Abasi ye Ete esie.” Ini ewe ke emi editịbe? Apostle Paul aka iso etịn̄ ete: “Ke enye ama akanam kpukpru edikara ye kpukpru nsọn̄uyo ye odudu ẹkabade ẹdi ikpîkpu. Koro ana enye akara nte edidem tutu Abasi ada kpukpru mme asua esie enịm enye ke idak ikpat. . . . Adan̄aoro Eyen ke idemesie n̄ko oyosụk idem ọnọ Enye emi akanamde kpukpru n̄kpọ ẹdu enye ke idak, man Abasi ekpedi kpukpru n̄kpọ ọnọ kpukpru owo.”—1 Corinth 15:24, 25, 28.
18 N̄kpọ edifọn didie ntem ke ini Abasi edidide “kpukpru n̄kpọ ọnọ kpukpru owo”! Adan̄aoro Obio Ubọn̄ Abasi ayanam kpukpru uduak Abasi. Ẹyesobo kpukpru mbon oro ẹbiọn̄ọde ukara Jehovah. Ẹyefiak ẹnam emem ye edidianakiet ẹdu ke ofụri ekondo. Nte andiwet psalm eketịn̄de, kpukpru mme edibotn̄kpọ ẹyekwọ ẹte: “Ẹnọ Jehovah ubọn̄ enyịn̄ esie . . . Mbufo ẹdọhọ ke otu mme idụt ẹte, ke Jehovah edi edidem.”—Psalm 96:8, 10.
Nte Afo Emekeme Ndibọrọ?
• Didie ke Jesus okowụt ke se ikenen̄erede ibehe imọ ekedi ndiwụt ke Jehovah odot ndikara?
• Nso ikedi ata akpan n̄kpọ oro utom ukwọrọikọ Jesus ye n̄kpa esie ẹkenamde?
• Ke mme usụn̄ ewe ke nnyịn ikeme nditiene uwụtn̄kpọ Jesus nnyụn̄ n̄wụt ke ida inọ ukara Jehovah?
[Mme Mbụme Ukpepn̄kpọ]
[Ekebe/Mme ndise ke page 29]
SỌN̄Ọ DA NỌ UKARA JEHOVAH
Nte ediwak nditọete nnyịn ke Korea ye mme ebiet en̄wen ẹdiọn̄ọde, ke ini mme Christian ẹsobode n̄kpọsọn̄ idomo, esifọn ẹti ntak emi mmọ ẹsobode utọ idomo oro.
Owo kiet ke otu Mme Ntiense Jehovah emi ẹkesịnde ke ufọk-n̄kpọkọbi ke ini ukara Soviet Union ọkọdọhọ ete: “Se ikan̄wamde nnyịn iyọ ekedi nditịm mfiọk eneni oro ẹkenenide ke In̄wan̄ Eden—m̀mê Abasi odot ndikara. . . . Ima ifiọk ke imenyene ifet ndiwụt ke ida inọ ukara Jehovah. . . . Emi ama ọsọn̄ọ nnyịn idem onyụn̄ an̄wam nnyịn isọn̄ọ ida.”
Ntiense efen ama etịn̄ se ikan̄wamde imọ ye ekemmọ Mme Ntiense ke ufọk-n̄kpọkọbi ete: “Jehovah ama ada ye nnyịn. Kpa ye oro n̄kpọ ọkọsọn̄de, nnyịn ikefreke iban̄a idaha eke spirit nnyịn. Ima isisọn̄ọ kiet eken idem ke adan̄aemi itide ke imọsọn̄ọ ida inọ ukara Jehovah inyụn̄ iwụt ke enye odot ndikara ofụri ekondo.”
[Ndise ke page 26]
Didie ke Jesus akada ọnọ ukara Jehovah ke ini Satan okodomode enye?
[Ndise ke page 28]
Nso ke n̄kpa Jesus akanam?