Ọyọhọ Otu 124 Ẹkụre Ukpep ke Gilead

Ẹda Mme Isụn̄utom Ẹdomo ye N̄kukun̄kpọyọriyọ

UFỌKN̄WED Enyọn̄-Ukpeme Ukpep Bible eke Gilead esinam edinam ukụre ukpep kpukpru ọfiọn̄ itiokiet, ndien ẹsikot ofụri ubon Bethel ke United States ẹdidụk. Ke March 8, 2008, isenowo emi ẹketode se ibede idụt 30 ẹma ẹtiene ubon Bethel ẹdụk edinam ukụre ukpep ọyọhọ otu 124 eke Ufọkn̄wed Gilead. Kpukpru owo 6,411 oro ẹkedụkde edinam emi ẹma ẹtiene nditọ ufọkn̄wed emi ẹdara ke san̄asan̄a usen mmọ emi.

Etieibuot okpokoro edinam emi, Stephen Lett, emi edide owo Otu Ukara ekeberede edinam emi ye utịn̄ikọ emi ibuotikọ ọdọhọde, “Ẹbe Ẹka ye Ndamban̄a N̄kukun̄kpọyọriyọ Jehovah.” Ediyarade 9:1-4 emen ekpri otu mme Christian oro ẹyetde aran emi ẹkefiakde ẹtọn̄ọ utom ke 1919 odomo ye udịm n̄kukun̄kpọyọriyọ emi ẹtọn̄ọde utom inikiet inikiet. Ẹma ẹti nditọ ufọkn̄wed oro ẹte sia mmọ ẹtienede ẹdi “mme erọn̄ en̄wen,” ke mmọ ẹdian idem ye ndamban̄a udịm n̄kukun̄kpọyọriyọ emi.—John 10:16.

Lon Schilling, emi edide andibuana ke Kọmiti N̄kọk Itieutom United States, ọkọnọ udiana utịn̄ikọ emi ibuotikọ edide, “Ẹdi Nsan̄a.” Ẹkeda enye ẹto uwụtn̄kpọ Aquila ye Priscilla (m̀mê Prisca)—n̄wan ye ebe emi ẹkedide Christian ke akpa isua ikie—emi odude ke Bible. (Rome 16:3, 4) Ebe ye n̄wan 28 ẹkenam otu Gilead emi. Ẹma ẹsian mmọ ke mmọ ẹnyene ndinam mbọbọ ndọ mmọ aka iso ọsọn̄ edieke mmọ ẹyomde ndidi mme isụn̄utom emi ẹkụtde unen. Akananam Bible itịn̄ke n̄kpọ iban̄a Aquila edi isiakke Priscilla n̄wan esie. Ntem, apostle Paul ye esop ẹkeda mmọ nte nsan̄a. Kpasụk ntre, mme isụn̄utom emi ẹdide ebe ye n̄wan ẹkpenyene ndisinam n̄kpọ ọtọkiet, ẹtuak ibuot ọtọkiet, ẹnyụn̄ ẹse ẹban̄a mme mfịna edinam utom ke esenidụt ọtọkiet, ntem ke mmọ ẹdinam kiet eken ekem.—Gen. 2:18.

Guy Pierce, emi edide owo Otu Ukara, ọkọnọ utịn̄ikọ en̄wen emi ibuotikọ edide, “Ẹnyene Eti Ido ke Ntak Eti Ido Jehovah.” Brọda Pierce ama anam an̄wan̄a ke owo ndinyene eti ido idịghe nditre ndinam idiọk kpọt. Eti owo esinam eti n̄kpọ ke ufọn mbon en̄wen. Jehovah Abasi ọfọn ama ke kpukpru usụn̄. (Zech. 9:16, 17) Eti ido ye ima Abasi ẹkeme ndinen̄ede nsịn udọn̄ nnọ nnyịn inam nti n̄kpọ inọ mbon en̄wen. Brọda Pierce ama otoro nditọ ufọkn̄wed oro ke ndiberi ete: “Mbufo ẹmesinam nti n̄kpọ. Nnyịn imenen̄ede inịm ke mbufo ẹyeka iso ẹnam nti n̄kpọ ke ntak eti ido Abasi ebe ke ndinam eti n̄kpọ ke se ededi utom oro Jehovah Abasi edinọde mbufo ke ini iso.”

Ekem, Michael Burnett, akani isụn̄utom emi ẹnọde ke ndondo emi ekedi andikpep ke Gilead, ama ọnọ utịn̄ikọ emi ibuotikọ ọdọhọde, “Kpaha Enye ke Ufọt Enyịn Fo nte Fronlet.” Nditọ Israel ẹkenyene nditi nte Jehovah akanyan̄ade mmọ ke utịbe utịbe usụn̄ ke Egypt nte n̄kpọ eke mmọ ẹkpahade “frontlet” ke ufọt  enyịn mmọ. (Ex. 13:16) Ẹma ẹteme nditọ ufọkn̄wed emi ẹte ẹti mme n̄kpọ oro mmọ ẹkekpepde ke Ufọkn̄wed Gilead nte n̄kpọ eke mmọ ẹkpahade enye ke ufọt enyịn mmọ nte frontlet. Brọda Burnett ama ọsọn̄ọ etịn̄ nte ọfọnde ndisụhọde idem nnyụn̄ nda mme edumbet Bible nsịn ke edinam ke ini ẹbierede ndutan̄uyo ekededi ye ekemmọ isụn̄utom m̀mê ye mbon en̄wen.—Matt. 5:23, 24.

Mark Noumair, emi ekpepde nditọ ufọkn̄wed Gilead n̄kpọ ke anyan ini, ọkọnọ utịn̄ikọ emi ọdọhọde, “Nso Ikwọ ke Ẹdikwọ Ẹban̄a Fi?” Ekedi ido ke eset ndisida ikwọ ndara edikan ke ekọn̄. Orụk ikwọ oro kiet ama anam ẹfiọk ke esien Reuben, Dan, ye Asher ẹkedi mbon ufep, ke adan̄aemi ẹtorode esien Zebulun ẹban̄a edu n̄waidem mmọ. (Judg. 5:16-18) Mbon en̄wen ẹsidi ẹdifiọk ofụri edinam Christian kiet kiet ukem nte ikọ ikwọ. Ifịk oro owo esịnde ke utom Abasi ye ndika iso nsọn̄ọ nda ye ndutịm ukara  Abasi ẹyenam owo enyene eti itie ebuana ye Jehovah onyụn̄ edi eti uwụtn̄kpọ ọnọ nditọete esie. Ke ini mbon en̄wen ke esop ẹkopde ndamban̄a ikwọ oro mme edinam nnyịn ẹwetde, emi anam mmọ ẹkpebe eti uwụtn̄kpọ nnyịn.

Ọyọhọ otu 124 ẹma ẹbiat n̄kpọ nte hour 3,000 ke utom ukwọrọikọ nte ubak ukpep oro mmọ ẹkebọde ke Gilead. Ke idak ibuotikọ oro, “Ẹtiene Ndausụn̄ Edisana Spirit,” nditọ ufọkn̄wed oro ẹma ẹneme ifiọkutom oro mmọ ẹkenyenede ke an̄wautom ẹnọ Sam Roberson emi anamde utom ke Itieutom Emi Esede Aban̄a Mme Ufọkn̄wed Ukara Abasi, ẹnyụn̄ ẹfiak ẹnam ndusụk ẹwụt. Ke ẹma ẹkenọ inem inem ifiọkutom emi ẹkụre, ẹma ẹnam mme ndụn̄ọde ye mme andikụre Gilead emi ẹnamde utom idahaemi ke nsio nsio idụt, ndien Patrick LaFranca emi edide andibuana ke Kọmiti N̄kọk Itieutom United States eketie ibuot ke ndụn̄ọde emi. Nditọ ufọkn̄wed emi ẹma ẹwụt esịtekọm ẹban̄a nti item oro nditọete emi ẹkenọde mmọ.

Anthony Morris emi edide owo Otu Ukara ọkọnọ akpatre utịn̄ikọ emi ọdọhọde, “Ẹti ke Mme N̄kpọ Oro Ẹkụtde ke Enyịn Ẹdi ke Ibio Ini.” N̄wed Abasi eteme nnyịn ete iwụk enyịn ke mme edidiọn̄ ini iso emi Jehovah enịmde ọnọ nnyịn utu ke ndiwụk ke ukụt ibio ini ekededi oro ikemede ndikụt idahaemi. (2 Cor. 4:16-18) Ọkpọikpọi ubuene, ukwan̄ikpe, ufịk, udọn̄ọ, ye n̄kpa ẹnen̄ede ẹdu mfịn. Mme isụn̄utom ẹkeme ndisobo ndusụk afanikọn̄ emi. Edi nditi ke mme n̄kpọ emi ẹdi ke ibio ini ayan̄wam nnyịn ika iso isọn̄ idem ke n̄kan̄ eke spirit inyụn̄ ika iso inyene idotenyịn.

Ẹkeda ndutịm emi ẹkeberi ye kpukpru mme andikụre ukpep emi nditie ke mbot utịn̄ikọ n̄kop akpatre ikọ Brọda Lett. Enye ekesịn udọn̄ ọnọ mmọ ete ẹkûkpa mba, ete: “Idụhe n̄kpọ ndomokiet oro edibiatde nsọn̄ọnda nnyịn edieke Jehovah adade ye nnyịn.” Enye ama esịn udọn̄ ọnọ mbufa isụn̄utom emi ete ẹtie nte n̄kukun̄kpọyọriyọ, ẹka iso iso ke utom Jehovah, ẹsịn ifịk, ẹsọn̄ọ ẹda, ẹnyụn̄ ẹkop uyo ke nsinsi.

[Ekebe ke page 30]

IDAHA OTU

Ibat idụt oro ẹtode: 7

Ibat idụt oro ẹnọde ẹka: 16

Ibat nditọ ufọkn̄wed: 56

Isua emana ke ẹbaharede ukem ukem: 33.8

Isua oro ẹdude ke akpanikọ ke ẹbaharede ukem ukem: 18.2

Isua oro ẹdude ke utom uyọhọ ini ke ẹbaharede ukem ukem: 13.8

[Ndise ke page 31]

Ọyọhọ Otu 124 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Ndise ke page 32]

Ufọkn̄wed Gilead odu ke Itie Unọ Ukpep Enyọn̄-Ukpeme