Nso Idin̄wam Fi Aka Iso Ọkwọrọ Ikọ?

NDI akanam idem emem fi tutu etie nte ekpetetre ukwọrọikọ? Ọkpọsọn̄ ubiọn̄ọ, editịmede esịt, udọn̄ọ, ndiyom nditie nte ubọkn̄ka, m̀mê unana udọn̄ ke an̄wautom, ekeme ndinam ukwọrọikọ ọtọn̄ọ ndidorode fi. Kere ban̄a nte Jesus akanamde n̄kpọ. Enye ama ọyọ idomo oro akanam mîsịmke owo ndomokiet “ke ntak idatesịt oro ẹkenịmde enye ke iso.” (Heb. 12:2) Enye ama ọfiọk ke Jehovah ayadat esịt ke ini inamde mme owo ẹfiọk ke kpukpru ikọ oro ẹkedoride Enye ẹdi nsu.—N̄ke 27:11.

Edieke akade iso ọkwọrọ ikọ, afo n̄ko ayanam esịt Jehovah adat. Edi nso ke akpanam edieke ubiọn̄ọ oro osobode anamde ukwọrọikọ ọtọn̄ọ ndidorode fi? Akanian̄wan kiet emi ekerede Krystyna emi mînen̄ekede ikop nsọn̄idem ọdọhọ ete: “Idem esiwak ndimem mi, esịt esinyụn̄ ọduọ mi. Mme mfịna eyo usọn̄ emi, utọ nte unana nsọn̄idem ye editịmede esịt eke usen ke usen, ẹsinam idem emem mi ndusụk ini.” Nso idin̄wam fi aka iso ọkwọrọ ikọ kpa ye mme utọ afanikọn̄ emi?

Kpebe Mme Prọfet Abasi

Edieke mme asuanetop Obio Ubọn̄ oro ẹnamde akpanikọ ẹsede n̄kpọ nte mme prọfet eset ẹkesisede, oro ekeme ndinọ mmọ odudu ndika iso n̄kwọrọ ikọ. Da Jeremiah ke uwụtn̄kpọ. Ke ini ẹkemekde enye prọfet, enye ikenyịmeke. Edi ọkpọsọn̄ mbuọtidem oro enye ekenyenede ke Abasi ama anam enye anam utom oro ebe isua 40.—Jer. 1:6; 20:7-11.

Uwụtn̄kpọ Jeremiah esinen̄ede ọsọn̄ọ Henryk idem. Enye ọdọhọ ete: “Mmọkwọrọ ikọ mbe isua 70 idahaemi, enyene ndusụk ini oro idem esimemde mi ke ntak emi mme owo mîsimaha ndikpan̄ utọn̄, mîdịghe ẹnam n̄kpọ nsọn̄ido nsọn̄ido. Mmesitie n̄kere uwụtn̄kpọ Jeremiah ke mme utọ idaha emi. Ima oro Jeremiah akamade Jehovah ye ọkpọsọn̄ mbuọtidem oro enye ekenyenede ke Jehovah, ẹken̄wam enye aka iso etịn̄ ntịn̄nnịm ikọ.” (Jer. 1:17) Uwụtn̄kpọ Jeremiah esinyụn̄ ọsọn̄ọ Rafał idem. Enye ọdọhọ ete: “Jeremiah ọkọbuọt idem ke Abasi utu ke enye ndikere mban̄a idemesie ye se enye akamade. Enye ama anam utom esie uko uko kpa ye oro ediwak owo ẹkesuade enye. Mmesidomo nditi uwụtn̄kpọ esie.”

Isaiah edi prọfet en̄wen oro uwụtn̄kpọ esie an̄wamde ediwak owo ẹka iso ẹkwọrọ ikọ. Abasi ama ọdọhọ enye ke mbio obio esie idikpan̄ke utọn̄ inọ enye. Jehovah ọkọdọhọ ete: “Nam esịt mbio emi odobi, nyụn̄ nam utọn̄ odobi mmọ.” Ndi emi ọkọwọrọ ke Isaiah idikwe unen? Abasi ikekereke ntre! Ke ini ẹkedọhọde ke Isaiah edidi prọfet, enye ọkọdọhọ ete: “Se mi, dọn̄ mi utom.” (Isa. 6:8-10) Isaiah ama ọsọn̄ọ ada anam utom esie. Ndi afo n̄ko emesisọn̄ọ ada anam utom ukwọrọikọ oro ọkọbọde ke ubọk Ọbọn̄?

Edieke itrede nditie n̄kere mme ini oro owo mîkakpan̄ke utọn̄ inọ nnyịn ke an̄wautom, oro ayanam nnyịn ika iso ikwọrọ ikọ nte Isaiah ọkọkwọrọde. Rafał etịn̄ se imọ isinamde man idem okûmem imọ. Enye ọdọhọ ete: “Nsimaha nditie n̄kere ndiọi ikọ oro mme owo ẹtịn̄de. Mbon oro nsikwọrọde ikọ nnọ ẹnyene unen ndibiere m̀mê iyakpan̄ utọn̄ m̀mê idikpan̄ke.” Anna ọdọhọ n̄ko ete: “Nsimaha nditie n̄kere idiọk ikọ oro owo eketịn̄de m̀mê mme n̄kpọ oro ẹkemede ndinam idem emem mi. Se isin̄wamde mi edi akam ye edikot itie N̄wed Abasi usen oro mbemiso ndahade ukwọrọikọ. Emi isiyakke ntie n̄kere ntaha n̄kpọ.”

Ezekiel akanam utom prọfet esie ke otu mme ọsọn̄ibuot nditọ Jew oro ẹketan̄de ẹka Babylon.  (Ezek. 2:6) Edieke enye ekpeketrede ndisian mme owo se Abasi eketịn̄de, n̄ko edieke idiọkowo akpakakpade ke ini enye mîkokopke etop Abasi, iyịp esie ọkpọkọkọbọ Ezekiel. Jehovah ọkọdọhọ Ezekiel ete: “Nyakpak iyịp esie ke ubọk fo.”—Ezek. 3:17, 18.

Henryk esidomo ndinam ukem se Ezekiel akanamde. Enye ọdọhọ ete: “Nyomke iyịp owo ndomokiet ọkọbọ mi. Ata ediwak owo ẹkeme nditaba nsinsi uwem.” (Utom 20:26, 27) Zbigniew esịn ke uyo oro ete: “Ezekiel ama aka iso ke utom esie, idọn̄ke utọn̄ ke se mme owo ẹketịn̄de. Emi esinam mi nda utom ukwọrọikọ nte Andibot adade.”

Mbon En̄wen Ẹtiene Fi Ẹnam Utom Emi

Afo unamke utom ukwọrọikọ emi ikpọn̄. Imekeme nditiene apostle Paul ndọhọ nte: “Nnyịn idi nsan̄autom Abasi.” (1 Cor. 3:9) Krystyna emi ọkọdọhọde ke idem esimem imọ ndusụk ini ọdọhọ ete: “Ntak edi oro nsiben̄ede Jehovah ọnọ mi ukeme. Enye esinọ mi ukeme ini ekededi oro mben̄ede enye.” Ke akpanikọ, nnyịn imoyom spirit Abasi an̄wam nnyịn inam utom emi!—Zech. 4:6.

Ke ini idude ke an̄wautom, edisana spirit esinam nnyịn inyene mme edu emi ẹdide ubak “mbun̄wụm spirit.” (Gal. 5:22, 23) Mme edu emi ẹsin̄wam nnyịn ika iso ikwọrọ ikọ inamke n̄kpọ m̀mê mme owo ẹnam n̄kpọ didie. Henryk ọdọhọ ete: “Utom ukwọrọikọ anam mi nnyene nti edu. Mmekpep ndinyene ime ye mme owo, n̄kere mban̄a mbon en̄wen, nnyụn̄ nsọpke nduọk idotenyịn.” Edieke ikade iso ikwọrọ ikọ kpa ye ubiọn̄ọ, nnyịn imekeme ndinen̄ede nnyene mme edu emi ẹdide ubak mbun̄wụm spirit akan nte ikenyenede.

Jehovah ada mme angel esie ọnọ ndausụn̄ ke utom emi. (Edi. 14:6) Bible ọdọhọ ke mme angel emi ẹwak ẹsịm “tọsịn duop ke itie tọsịn duop ye mme tọsịn ke mme itie tọsịn.” (Edi. 5:11) Jesus ọnọ mme angel emi ndausụn̄, mme angel n̄ko ẹnọ mme asan̄autom Abasi emi ẹdude ke isọn̄ ndausụn̄. Ndi afo emesikere aban̄a emi ke ini odude ke an̄wautom?

Anna ọdọhọ ete: “Ke ini ntide ke mme angel ẹsan̄a ye nnyịn ke an̄wautom, oro esinọ mi odudu. Mmenen̄ede mma nte Jehovah ye Jesus Eyen esie ẹdade mme angel ẹn̄wam nnyịn.” Nso ukpono ke edi ntem ndinam utom ye mme anam-akpanikọ angel!

Didie ke ndisan̄a ye nditọete nnyịn ke an̄wautom ekeme ndin̄wam nnyịn ika iso ikwọrọ ikọ? Abasi enen̄ede ọdiọn̄ nnyịn ndinam nnyịn imehe ye ata ediwak mme anam-akpanikọ Ntiense eken. Anaedi afo emenịm ke se n̄ke Bible emi etịn̄de edi akpanikọ: “Ukwak aban ukwak ọsọp: owo onyụn̄ anam iso ufan esie ọsọn̄.”—N̄ke 27:17.

Ke ini isan̄ade ye mbon en̄wen ke an̄wautom, nnyịn iyekpep mbufa nti usụn̄ oro ikemede ndida nnyene nneme ye mme owo. Elżbieta ọdọhọ ete: “Ndisan̄a ye nsio nsio nditọete esinọ mi ifet ndinam nditọete mi ye mbon oro n̄kwọrọde ikọ nnọ ẹdiọn̄ọ ke mmama mmimọ.” Domo ndisan̄a ye nsio nsio owo ke an̄wautom. Oro ayanam utom ukwọrọikọ enen̄ede enem fi.

Se Ban̄a Idem Fo

Se idin̄wamde nnyịn ika iso ikop inem ukwọrọikọ ẹdi ndinam eti ndutịm, n̄kpep Bible ke idem nnyịn, nnyụn̄ nsio ini nnịm nduọk odudu. Ke nditịn̄ ke usụn̄ efen, emi ọwọrọ ke ana ikere iban̄a itie ebuana nnyịn ye Jehovah inyụn̄ ise iban̄a idem nnyịn.

Bible ọdọhọ ete: “Ekikere mme ọsọp-ubọk ẹkọ uwak ikpọn̄-ikpọn̄.” (N̄ke 21:5) Zygmunt emi edide isua 88 idahaemi ọdọhọ ete: “Mmesida ini ntịm idem nnọ utom ukwọrọikọ, ndien emi esinam nnyene uforo. Mmesitịm mme n̄kpọ oro nnyenede ndinam ke nde ke nde man n̄keme ndidu mbịghi ke an̄wautom.”

Ndinen̄ede mfiọk se idude ke N̄wed Abasi esinam nnyịn ifiọk se ikpetịn̄de ke an̄wautom. Kpa nte isidiade udia man inyene ibifịk inam n̄kpọ, ana ikpep Ikọ Abasi kpukpru ini man inyene ibifịk ika iso ikwọrọ ikọ. Ndikpep Ikọ Abasi ke usen ke usen nnyụn̄ ndia ‘udia eke spirit oro ofụn oro anamde akpanikọ ọnọde ke  edikem ini’ ọyọnọ nnyịn odudu ndinam utom ukwọrọikọ.—Matt. 24:45-47.

Elżbieta ama etre ndinam ndusụk n̄kpọ oro enye ekesinamde man ekeme ndinen̄ede n̄kwọrọ ikọ. Enye ọdọhọ ete: “Mmada ekese ini oro n̄kesidade nse ekebe ndise ntịm idem nnọ an̄wautom. Ke ini nsikotde Bible kpukpru mbubreyo, mmesikere mban̄a mbon oro nsisobode ke an̄wautom. Mmesiyom mme itie N̄wed Abasi ye mme ibuotikọ magazine oro ẹkemede ndin̄wam mmọ.”

Ndinen̄ede nduọk odudu ọyọnọ fi odudu ye ukeme ndika iso n̄kwọrọ ikọ edifọn edifọn. Edi edieke onyụn̄ ọduọkde odudu akaha, udunyeneke ini utịm idem man ukwọrọikọ fo enyene uforo. Andrzej emi esikwọrọde ikọ ifịk ifịk ọdọhọ ete: “Unana nduọkodudu esinam owo akpa mba, ndien ntre ke mmemidem esitọn̄ọ. Mmesinam se n̄kemede mbak emi editịbe ọnọ mi.”—Eccl. 4:6.

Kpa ye ofụri ukeme emi isịnde, ibat ibat owo kpọt ẹsikpan̄ utọn̄ ẹnọ eti mbụk. Edi Jehovah idifreke utom nnyịn. (Heb. 6:10) Idem ọkpọkọm mme owo imaha ndikpan̄ utọn̄ nnọ nnyịn, mmọ ẹkeme ndidọhọ mme owo ke ima idi. Edinyụn̄ etie nte se Abasi ọkọdọhọde Ezekiel ete: Mme owo “iditreke ndifiọk ẹte ke prophet odu ke otu mmọ.” (Ezek. 2:5) Imọdiọn̄ọ ke utom ukwọrọikọ imemke utom, edi nnyịn imesibọ ufọn ito utom emi; mbon oro ẹkpan̄de utọn̄ ẹyenyụn̄ ẹbọ ufọn n̄ko.

Zygmunt ọdọhọ ete: “Utom ukwọrọikọ anam imen obufa owo isịne inyụn̄ iwụt ke imama Abasi ye mme mbọhọidụn̄ nnyịn.” Andrzej adian do ete: “Edi akwa ukpono nditiene nnam utom unyan̄a uwem emi. Idụhe ini en̄wen oro ẹdinamde utom emi ntem.” Afo n̄ko emekeme ndinyene ediwak edidiọn̄ edieke akade iso ọkwọrọ ikọ.—2 Cor. 4:1, 2.

[Mme ndise ke page 31]

Ndikere mban̄a itie ebuana nnyịn ye Jehovah nnyụn̄ nse mban̄a idem nnyịn ayan̄wam nnyịn ika iso ikwọrọ ikọ