Ndi ‘Ọmọdọn̄ N̄kam Onyụn̄ Ọsọn̄ọ Owụhọ ke Itiat Idakisọn̄’?

NDI akanam omokụt nte ọkpọsọn̄ oyobio enyen̄ede akwa eto, edi enye iduọhọ? Ntak-a? N̄kam emi enye ọdọn̄de ke isọn̄ omụm enye akama. Nnyịn imekeme nditie nte eto oro. Imekeme ndiyọ ikpọ afanikọn̄ oro eberide nnyịn nte oyobio edieke ‘idọn̄de n̄kam inyụn̄ isọn̄ọ iwụhọ ke itiat idakisọn̄’ emi ẹtịn̄de ẹban̄a ke Bible. (Eph. 3:14-17) Nso idi itiat idakisọn̄ emi?

Bible ọdọhọ ke “Christ Jesus ke idemesie [edi] itiat inụk” esop Christian. (Eph. 2:20; 1 Cor. 3:11) Ẹdọhọ nnyịn mme Christian ‘ika iso isan̄a ke ebuana ye enye, idọn̄ n̄kam inyụn̄ ibọp idem ikọri ke enye inyụn̄ isọn̄ọ ida ke mbuọtidem.’ Edieke inamde ntre, iyakan ke kpukpru en̄wan oro mme asua ẹn̄wanade ẹyom ndibiat mbuọtidem nnyịn, ndusụk ini, mmọ ẹsida “mbukpek abian̄a” ẹnam emi.—Col. 2:4-8.

“Ubom ye Uniọn̄ ye Ukon̄ ye Utụn̄ọ”

Idinam didie ‘idọn̄ n̄kam’ inyụn̄ ‘isọn̄ọ ida ke mbuọtidem’? Usụn̄ kiet oro ikemede ndinam emi edi ndinen̄ede n̄kpep Ikọ Abasi. Jehovah oyom ‘itiene kpukpru ndisana owo ifiọk ọyọhọ ọyọhọ se idide ubom ye uniọn̄ ye ukon̄ ye utụn̄ọ’ akpanikọ. (Eph. 3:18) Mmọdo, akpana kpukpru Christian ẹka iso ẹkpep Bible man ẹnen̄ede ẹfiọk akpanikọ, utu ke ndikere ke se ifiọkde ekem.—Heb. 5:12; 6:1; N̄ke 2:1-5.

Oro iwọrọke ke edieke owo enen̄erede ọfiọk Bible, ke enye ‘ọdọn̄ n̄kam onyụn̄ ọsọn̄ọ owụhọ’ ke akpanikọ, sia akam edi Satan ọfiọk Bible. Ntre, odu n̄kpọ en̄wen oro anade inam. Ana “[ifiọk] ima Christ emi akande ifiọk” owo. (Eph. 3:19) Ntre, edieke ikpepde Bible ke ntak emi imade Jehovah ye akpanikọ, emi ayanam inen̄ede ifiọk Ikọ Abasi, onyụn̄ ọsọn̄ọ mbuọtidem nnyịn.—Col. 2:2.

Domo Ifiọk Fo Se

Ntak emi mûdomoke idahaemi use m̀mê ọmọfiọk ndusụk  n̄kpọ oro Bible ekpepde? Emi ekeme ndinam enen̄ede esịn idem ekpep Bible. Ke uwụtn̄kpọ, kot Ephesus 1:3-10 (ke ekebe oro “Mbon Ephesus”). Ke ama okokot ama, bụp idemfo ete: ‘Ndi mme ikọ itie N̄wed Abasi oro ẹwetde ke sịghisịghi ubọkn̄wed ke ekebe emi enen̄ede an̄wana mi?’ Ẹyak ineme mmọ ke adiana ke adiana.

Ẹma Ẹmemek “Mbemiso Editọn̄ọ Ererimbot”

Paul ọkọdọhọ ekemmọ mme andinịm ke akpanikọ ete: “[Abasi ekebem] iso emek nnyịn enịm ndida nnyene ke idemesie nte nditọ, ebe ke Jesus Christ.” Ke akpanikọ, Jehovah ama ebiere ndida ndusụk owo mi ke isọn̄ nsịn ke mfọnmma ubon esie eke heaven. Nditọ Abasi emi ẹyetiene Christ ẹkara ẹnyụn̄ ẹdi mme oku. (Rome 8:19-23; Edi. 5:9, 10) Ke ini Satan akamiade ata ye Jehovah, ikọ esie okowụt ke Abasi ikobotke owo ọfọn. Eye didie ntem Jehovah ndimek ndusụk ke otu mbon emi Satan ọkọdọhọde ke Jehovah ibotke ọfọn man ẹketiene ẹsio idiọkn̄kpọ ye ọbọn̄ idiọkn̄kpọ, oro edi, Satan kpa Devil, ẹfep! Edi Jehovah ikebemke iso ibiere m̀mê mmanie ke otu ubonowo ke idida inyene nte nditọ. Se enye ekebierede ekedi ke oyodu mbon emi ẹditienede Christ ikara ke heaven.—Edi. 14:3, 4.

Ewe “ererimbot” ke Paul eketịn̄ aban̄a ke ini enye ọkọdọhọde mme Christian ke ẹkemek mmimọ “mbemiso editọn̄ọ ererimbot”? Idịghe isọn̄ emi ke Paul eketịn̄ aban̄a. Edieke ekpedide ntre, oro  ọkpọwọrọ ke Jehovah ke idemesie akabiat n̄kpọ. Owo ikpọduọhọke Adam ye Eve ke se mmọ ẹkenamde edieke edide Abasi ama ebebiere ke mmọ ẹyesọn̄ ibuot ye imọ idem mbemiso enye okobotde mmọ. Ini ewe ndien ke Abasi ekebiere nte idikọkde mfịna emi eketịbede ke ini Adam ye Eve ẹketienede Satan ẹsịn ukara esie? Jehovah akanam emi ke Adam ye Eve ẹma ẹkesọn̄ ibuot, edi mbemiso mmọ ẹnyene nditọ oro ẹketọn̄ọde ererimbot emi Enye aduakde ndinyan̄a.

“Akpakịp Mfọnido Esie Oro Owo Mîdotke”

Ntak emi Paul ọkọdọhọde ke “akpakịp mfọnido [Abasi] oro owo mîdotke” akanam ẹnam ndutịm oro ẹtịn̄de ẹban̄a ke ntọn̄ọ ntọn̄ọ n̄wed Ephesus? Enye okoyom ndiwụt ke Jehovah ekebiere ke idemesie ndinyan̄a nnyịn, idịghe nte ke nnyịn imodot se ẹnyan̄ade.

Owo nnyịn ndomokiet idotke se ẹkpenyan̄ade. Ima emi Jehovah amade nnyịn anam enye anam ndutịm man anyan̄a nnyịn. Abasi ndinam ndutịm man anyan̄a nnyịn emi idide mme anamidiọk edi mfọnido oro owo mîdotke nte Paul eketịn̄de.

Edisana Ndịben̄kpọ Uduak Abasi

Ke ntọn̄ọ ntọn̄ọ, Abasi ikayarakede nte imọ idisan̄ade ikọk mfịna emi Satan ọkọtọn̄ọde. Emi ekedi “edisana ndịben̄kpọ.” (Eph. 3:4, 5) Edi ke ẹma ẹketọn̄ọ esop Christian, Jehovah ama ayarade nte imọ idisan̄ade inam se ikaduakde inọ owo ye isọn̄. Paul ọkọdọhọ ke “adan̄aemi edimek ini ekemde ọyọhọ ọyọhọ” ke Abasi ‘ayanam ndutịm’ nditan̄ kpukpru nditọ esie ke enyọn̄ ye ke isọn̄ ndian kiet.

Ẹketọn̄ọ ndinam emi ke Pentecost 33 E.N. ke ini Jehovah ọkọtọn̄ọde ndimek mbon emi ẹdikarade ye Christ ke heaven. (Utom 1:13-15; 2:1-4) Ke oro ebede, ẹkenyene nditan̄ mbon en̄wen n̄ko mbok ọtọkiet, oro edi, mbon emi ẹdidude uwem ke Paradise mi ke isọn̄ ke ini ukara Messiah. (Edi. 7:14-17; 21:1-5) “Ndutịm” emi ẹtịn̄de ẹban̄a mi idịghe Obio Ubọn̄ Messiah, koro Obio Ubọn̄ Messiah ọkọtọn̄ọ ke 1914. Enye edi ndutịm emi Abasi anamde man kpukpru mme angel ye mme owo ẹfiak ẹdiana kiet.

“Ẹkọri Ẹsịm Ọyọhọ Idaha ke Ukeme Ufiọk N̄kpọ”

Ke ntre, ndikpep Bible kpukpru ini ayanam ọfiọk “ubom ye uniọn̄ ye ukon̄ ye utụn̄ọ” akpanikọ. Edi imọfiọk n̄ko ke mfen̄e uwem ekeme ndinam Satan anam nnyịn ikûkpep Bible nte ikpekpepde mîdịghe itre ndikpep Bible ofụri ofụri. Kûyak enye anam fi utọ n̄kpọ oro. Da ikike emi Abasi ọnọde fi ‘kọri sịm ọyọhọ idaha ke ukeme ufiọk n̄kpọ.’ (1 John 5:20; 1 Cor. 14:20) Kụt ete ke se enịmde ke akpanikọ an̄wan̄a fi, ye nte ke emekeme ndinam enye an̄wan̄a owo ekededi oro oyomde ndifiọk n̄ko.—1 Pet. 3:15.

Da nte ke okodu ke esop Ephesus usen emi ẹkekotde leta Paul. Ndi ikọ esie ikpakanamke ọdọn̄ fi ndinen̄ede nnyene “nnennen ifiọk [mban̄a] Eyen Abasi”? (Eph. 4:13, 14) Ke akpanikọ, akpakanam! Yak Ikọ Abasi oro Paul ekewetde mi anam fi enyene ukem udọn̄ oro idahaemi. Ndinen̄ede mma Jehovah nnyụn̄ nnyene nnennen ifiọk akpanikọ ayanam aka iso ‘ọdọn̄ n̄kam onyụn̄ ọsọn̄ọ owụhọ ke itiat idakisọn̄,’ emi edide Christ. Emi oyonyụn̄ anam ekeme ndiyọ idomo ekededi oro Satan adade ebịne fi mbemiso Abasi osobo idiọk ererimbot emi.—Ps. 1:1-3; Jer. 17:7, 8.

[Ekebe/Ndise ke page 27]

“Mbon Ephesus”

“Itoro enyene Abasi ye Ete Ọbọn̄ nnyịn Jesus Christ, koro enye akadade kpukpru edidiọn̄ eke spirit ke mme itie eke heaven ọdiọn̄ nnyịn ke ebuana ye Christ. Kpa nte enye ekemekde nnyịn ke ebuana ye enye mbemiso editọn̄ọ ererimbot, man nnyịn ikpasana inyụn̄ inana ndo ke iso esie ke ima. Koro enye ekebemde iso emek nnyịn enịm ndida nnyene ke idemesie nte nditọ, ebe ke Jesus Christ, nte asan̄ade ekekem ye se enye amade, man ẹtoro ubọn̄ ubọn̄ mfọnido esie oro owo mîdotke emi enye ọkọfọnde ye nnyịn ebe ke owo ima esie. Nnyịn inyene ubọhọ ufụn ke enye ebe ke ufak oto ke iyịp owo oro, kpa edifen mme idiọkn̄kpọ nnyịn, nte asan̄ade ekekem ye akpakịp mfọnido esie oro owo mîdotke. Enye anam emi awak ọnọ nnyịn ke kpukpru ọniọn̄ ye asian, ke emi edide enye ama anam nnyịn ifiọk edisana ndịben̄kpọ uduak esie. Ndịben̄kpọ emi asan̄a ekekem ye se itịmde inem enye, emi enye akaduakde ke idemesie ndinam ndutịm ke adan̄aemi edimek ini ekemde ọyọhọ ọyọhọ, oro edi, ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.”—Eph. 1:3-10.