Ẹdara Nditọete Emi Ẹdide Inan!

IKỌT Abasi mfịn ẹdi akamba ubon emi ọkọtọn̄ọde toto ke eyo mme Samuel, David, Samson, Rahab, Moses, Abraham, Sarah, Noah, ye Abel. Ndusụk mme anam-akpanikọ asan̄autom Jehovah emi ẹdi inan. Ke uwụtn̄kpọ, akpa owo iba oro ẹkedide Mme Ntiense Jehovah ke Mongolia ẹkedi ebe ye n̄wan emi ẹdide inan. N̄ko nsọn̄ọnda nditọete nnyịn emi ẹdide inan ke Russia ama anam ikpe etebe nnyịn ke Esopikpe Mbon Europe Emi Esede Aban̄a Unen Owo.

Mfịn, “ofụn emi anamde akpanikọ onyụn̄ enyenede ọniọn̄” osion̄o mme n̄wed ke usem idiọn̄ọ, onyụn̄ anam ẹnịm mbono esop, ọkọrọ ye n̄kpri ye ikpọ mbono ke mme usem idiọn̄ọ. (Matt. 24:45) Kpukpru emi ẹnen̄ede ẹn̄wam mme inan. * Edi ndi akanam emekere nte ekesisọn̄de mme inan ndikpep n̄kpọ mban̄a Jehovah nnyụn̄ nnam n̄kọri ke ini owo mîkanamke kan̄a ndutịm emi? Ndi akanam emekere se akpanamde man an̄wam inan emi odude ke edem mbufo?

Ke Ini Owo Mîkanamke Kan̄a Ndutịm Emi

Ekere ke nso ke mme inan emi ẹdude ke esop ẹbịghi ẹditịn̄ ẹnọ fi edieke obụpde se iketịbede ke ini mmọ ẹkebọde akpanikọ? Mmọ ẹkeme nditịn̄ nte ẹketiede mmimọ ke idem ke ini ẹkesiande mmọ ke Abasi enyene enyịn̄, ye nte oro okokpụhọrede uwem mmimọ, anam isọn̄ọ idu ke esop tutu ẹtọn̄ọ ndision̄o mme vidio emi an̄wamde mmimọ ikpep akpanikọ ke usem idiọn̄ọ. Mmọ ẹkeme nditịn̄ nte ekesitiede mmimọ ke idem ke ini owo mîkesinịmke mbono esop ke usem idiọn̄ọ, m̀mê ndikabade se ẹtịn̄de nnọ mmimọ. Edi ke owo oro ekesitiede ekpere mmimọ ekesiwet se ẹtịn̄de ke babru ọnọ mmimọ man ifiọk se ẹkpepde. Ntem ke eyenete kiet emi edide inan ekekpep Bible ke ofụri isua itiaba mbemiso enye edikụt owo emi ekemede ndikabade se ẹtịn̄de nnọ enye.

N̄kani asuanetop emi ẹdide inan ẹtịn̄ nte ekesisọn̄de ndikwọrọ ikọ nnọ mbon emi mîdịghe inan. Eyenete emi edide inan ama esiwet se enye oyomde ndineme ye enyeneufọk ke ekpri kad akama ke ubọk kiet, akama mbufa Enyọn̄-Ukpeme ye Awake! ke ubọk enye eken. N̄ko, ama esisọn̄ mmọ ndikama n̄wed n̄kpep inan en̄wen Bible, sia se ẹwetde ikakam in̄wan̄ake andikpep man akan̄wan̄a eyen ukpepn̄kpọ. N̄kani asuanetop emi ẹdide inan ẹtịn̄ nte ẹkesitiede mmimọ ke idem ke ini mmimọ mîkekemeke aba ndikwọrọ ikọ sia se iketịn̄de ikesin̄wan̄ake mme owo. Mmọ ẹdiọn̄ọ n̄ko nte esitiede owo ke idem edieke enye enen̄erede ama Jehovah edi ifiọkke se akpanamde sia mîfiọkke m̀mê se iyomde ndinam enen.

Kpa ye ofụri emi, nditọete emi ẹkesụk ẹsọsọn̄ọ ẹda ẹnam n̄kpọ Abasi. (Job 2:3) Mmọ ẹma ẹtie ke ime ẹbet Jehovah. (Ps. 37:7) Ndien Jehovah enen̄ede ọdiọn̄ mmọ idahaemi akan nte ediwak mmọ ẹkekerede.

Kere ban̄a nte eyenete nnyịn kiet emi edide inan ekesịnde ifịk ekpep n̄wan ye nditọ esie n̄kpọ. Mbemiso ẹkesiode vidio  usem idiọn̄ọ, enye ama esinịm ukpepn̄kpọ ubon kpukpru ini. Eyen esie ọdọhọ ete: “Ama esisọn̄ ete mi ndinịm ukpepn̄kpọ ubon sia enye ekesikama n̄wed Ikọmbakara anam emi. Ekese se ẹkewetde ke n̄wed oro ikan̄wan̄ake enye. Ndien nnyịn n̄ko ima isinam uwem ọsọn̄ ye enye. Ikesitetie ibet enye anam ndudue man isak. Kpa ye kpukpru emi, ete mi okosụk esinenịm ukpepn̄kpọ ubon kpukpru ini. Enye ikayakke ndọk oro Ikọmbakara ọkọnọde enye akpan enye ndikpep nnyịn n̄kpọ mban̄a Jehovah, sia oro enen̄erede edi akpan n̄kpọ.

Kere ban̄a Richard, eyenete emi odụn̄de ke Brooklyn, ke New York, ke U.S.A. Enye ebe isua 70, onyụn̄ edi nnan ye inan. Ẹnen̄ede ẹdiọn̄ọ Richard nte owo emi esidụkde mbono esop kpukpru ini. Enye esidụk tren aka mbono esop, onyụn̄ abat mme itiembehe kiet kiet man ọfiọk ebiet emi enye ediwọrọde. Ke ini etuep, snow ye ọkpọsọn̄ oyobio ama anam ẹkpụhọ ini mbono esop. Edi owo iketịghi isian Richard. Ke nditọete ẹma ẹkediti ke owo ikasianke enye, mmọ ẹma ẹtọn̄ọ ndiyom enye, ndien mmọ ẹma ẹdikụt enye adade ke etehe Ufọkmbono Obio Ubọn̄ ebet ẹberede usụn̄. Ke ini ẹkebụpde Richard ntak emi enye ọkọwọrọde ke utọ ọkpọsọn̄ oyobio oro, enye ọkọdọhọ ete: “Sia mmama Jehovah.”

Nso ke Afo Akpanam?

Ndi inan ẹdu ke edem mbufo? Ndi emekeme ndikpep usem idiọn̄ọ man ekeme ndineme nneme ye mmọ? Inan ẹsinen̄ede ẹnyene ime ẹnyụn̄ ẹfọn ido ke ini ẹkpepde owo usem mmọ. Ekeme ndidi emesikụt mme inan ke ini akade n̄kpọ m̀mê ke ini ọkwọrọde ikọ ke efakutom mbufo. Nso ke akpanam? Domo ndinyene nneme ye mmọ. Emekeme ndinam idiọn̄ọ, ewet n̄kpọ ke n̄wed, mîdịghe owụt mmọ ndise. Idem edieke enye mînyeneke udọn̄ ke akpanikọ, nam eyenete emi edide inan, m̀mê enye oro ọdiọn̄ọde usem idiọn̄ọ ọfiọk aban̄a emi. Ekeme ndidi enye eyenen̄ede ama eti mbụk edieke ẹtịn̄de ẹnọ enye ke usem idiọn̄ọ.

Edieke ekpepde usem idiọn̄ọ, esinyụn̄ odụkde mbono esop ke esop emi ẹsemde usem idiọn̄ọ, nso ke akpanam man usem emi enen̄ede an̄wan̄a fi onyụn̄ ekeme ndisem enye udọn udọn? Okposụkedi emi mîdịghe kpukpru owo ke esop mbufo ẹdi inan, kûneme nneme ke uyo, neme ke usem idiọn̄ọ. Emi ayanam ọfiọk nte mme inan ẹsikerede n̄kpọ. Imọfiọk ke ndusụk ini, emekeme ndidue ntịn̄ ikọ ke uyo. Ti n̄ko ete ke udutreke ndinam ndudue ukem nte akpanamde ke ini ekpepde usem obio owo.

Ndisịn ukeme nsem usem idiọn̄ọ owụt ke imokpono inyụn̄ ima nditọete nnyịn emi ẹdide inan. Kere nte esitiede mmọ ke idem ke ntak emi mmọ mîkemeke  ndineme nneme m̀mê ndifiọk se mme owo ẹtịn̄de ke itieutom m̀mê ke ufọkn̄wed. Inan kiet ọkọdọhọ ete: “Idụhe owo emi mîsitịn̄ke ikọ ebiet ekededi oro ndụkde. Emi esinam etie nte ke ntieneke ndu ke ererimbot emi kpukpru owo ẹdude, esinyụn̄ ayat mi esịt. N̄kemeke nditịn̄ nte esitiede mi ke idem ndusụk ini.” Mmọdo, akpana inam nditọete oro ẹdide inan ẹkop inem ini ekededi oro mmọ ẹdide nditiene ndia udia eke spirit ke Ufọkmbono Obio Ubọn̄.—John 13:34, 35.

Akpana ikere n̄ko iban̄a n̄kpri otu oro ẹdide inan, emi ẹsitienede esop nnyịn ẹdụk mbono esop. Ẹsikakabade se ẹtịn̄de ẹnọ mmọ. Mmọ ẹsitie ke iso man ẹkeme ndinen̄ede mfiọk se ẹtịn̄de. Emi esinam mmọ ẹkeme ndinen̄ede n̄kụt etịn̄ikọ ye akabade ikọ. Mbon eken ke esop ẹsisọp ẹmehe ye ndutịm emi, isinyụn̄ itịmekede mbono esop. Ntre ke ekpedi ke n̄kpri ye ikpọ mbono oro ẹsikabarede ẹsịn ke usem idiọn̄ọ. Imọkọm kpukpru ndima nditọete iren ye iban emi ẹsikabarede ikọ ẹnọ mme inan ke mme mboho emi.

Ekeme ndidi odu ke esop emi ekpri otu oro ẹsemde usem idiọn̄ọ ẹdude, mîdịghe ẹsikakabade kpukpru se ẹnamde ẹnọ ibat ibat inan oro ẹdude. Nso ke akpanam man owụt ke amama mmọ? Sikot mmọ ufọk. Edieke ekemede, kpep n̄kpọ ifan̄ ke usem idiọn̄ọ. Kûkop ndịk sia mûdukemeke ndinyene nneme ye mmọ nte esinyenede ye mbon en̄wen. Emekeme nditịn̄ ekpri se onyụn̄ ọfiọkde, ndien mmọ idisọpke ifre utọ ima emi. (1 John 4:8) Nditọete nnyịn emi ẹdide inan ẹnen̄ede ẹnyene ufọn. Mmọ ẹsinen̄ede ẹfiọk nneme, ẹnyene ikike, ẹnyụn̄ ẹnen̄ede ẹnem itie. Eyenete kiet emi ete ye eka ẹdide inan ọdọhọ ete: “Mmodụn̄ ye mme inan toto ke edet iba, ndien mmọ ẹkpep mi ekese. Imekeme ndikpep ekese nto nditọete nnyịn emi ẹdide inan.”

Jehovah amama kpukpru mme anam-akpanikọ asan̄autom esie, esịnede mme inan. Mbuọtidem ye nsọn̄ọnda mmọ etiene anam esop emi enem. Mmọdo, ẹyak isidara nditọete nnyịn emi ẹdide inan.

[Ikọ Idakisọn̄]

[Ndise ke page 31]

Mme inan ẹkeme ndinen̄ede mma eti mbụk edieke ẹkwọrọde ẹnọ mmọ ke usem idiọn̄ọ

[Mme ndise ke page 32]

Akpana inam nditọete oro ẹdide inan ẹkop inem mbono esop inyụn̄ isịn udọn̄ inọ mmọ