Mme Mbụme Ẹtode Mme Andikot

Ndi ọkpọfọn eyenete an̄wan ọbọbọ ọfọn̄ibuot ke ini akabarede utịn̄ikọ esịn ke usem idiọn̄ọ ke mbono esop, ye ke n̄kpri m̀mê ikpọ mbono?

Kpukpru owo ẹfiọk ke akpana eyenete an̄wan ọbọbọ ọfọn̄ibuot ke ini enye anamde n̄kpọ oro akpanade ebe esie m̀mê eyenete eren anam. Emi ekekem ye se apostle Paul ọkọdọhọde ke “n̄wan ekededi eke ọbọn̄de akam m̀mê etịn̄de ntịn̄nnịm ikọ ye ibuot in̄wan̄ esuene enye emi edide ibuot ọnọ enye” koro erenowo “edi ibuot ọnọ n̄wan.” (1 Cor. 11:3-10) Ke ini eyenete an̄wan ọbọbọde ukeuke ediye ọfọn̄ibuot ke mme utọ idaha oro, oro owụt ke enye osụk ibuot ọnọ ndutịm ukara Abasi.—1 Tim. 2:11, 12. *

Edi ndi akpana eyenete an̄wan ọbọbọ ọfọn̄ibuot edieke enye akabarede utịn̄ikọ esịn ke usem idiọn̄ọ? Imọfiọk ke idịghe enye ọnọ utịn̄ikọ oro, ke enye akabade se owo en̄wen etịn̄de. Oro edi, ke idịghe enye ekpep esop n̄kpọ, edi eyenete oro enye akabarede ikọ ọnọ ekpep. Edi nte ẹkabarede usem idiọn̄ọ enen̄ede okpụhọde ye nte ẹkabarede usem oro ẹtịn̄de-tịn̄ ke uyo. Kaban̄a usem oro ẹtịn̄de ke uyo, otuowo ẹkeme ndise etịn̄ikọ, edi ke ẹkop se andikabade etịn̄de. Ke adianade do, nditọete iban oro ẹkabarede usem oro ẹtịn̄de-tịn̄ isinen̄ekede iwọrọ ida nte eke usem idiọn̄ọ. Ndusụk mmọ ẹsikam ẹtetie ẹnam emi, ndien ndusụk oro ẹdade-da isisehe otuowo, edi ẹsikam ẹse etịn̄ikọ. Mmọdo, ufọn idụhe ndidọhọ ke akpana eyenete an̄wan oro akabarede usem oro ẹtịn̄de-tịn̄ ke uyo ọbọbọ ọfọn̄ibuot.

 N̄ko-n̄ko, nte ifiọk ubotn̄kpọ eyomfịn anamde ẹnam usem idiọn̄ọ idahaemi ekeme ndinam mme owo ẹkam ẹnen̄ede ẹkụt andikabade ẹkan andinọ utịn̄ikọ. Ke ndusụk ebiet, ẹsinam ndise owo emi akabarede usem idiọn̄ọ enen̄ede okpon tutu owo ikam ikekwe aba andinọ utịn̄ikọ. Mmọdo, ke ikerede iban̄a kpukpru emi, ọkpọfọn eyenete an̄wan oro akabarede ikọ esịn ke usem idiọn̄ọ ọfiọk emi onyụn̄ ọbọbọ ọfọn̄ibuot.

Didie ke obufa ndausụn̄ emi editụk nte ẹkabarede usem idiọn̄ọ ke Ufọkn̄wed Utom Ukara Abasi, mme nnamn̄wụt, mme ibọrọ oro ẹnọde ke Ukpepn̄kpọ Bible Esop, Esoputom, ye ke Ukpepn̄kpọ Enyọn̄-Ukpeme? Ndi akpana eyenete an̄wan oro akabarede usem idiọn̄ọ ke mme ini emi ọbọbọ ọfọn̄ibuot? Odu ini oro ufọn mîdidụhe eyenete an̄wan ndibọbọ ọfọn̄ibuot sia kpukpru owo ẹkụt ke idịghe enye ekpep esop n̄kpọ, ke akakabade kpọt. Ke uwụtn̄kpọ, ididịghe tutu enye ọbọbọbọ ọfọn̄ibuot mbemiso akabarede ibọrọ oro owo ọnọde ke mbono esop, m̀mê utịn̄ikọ oro eyenete an̄wan ọnọde, m̀mê mme nnamn̄wụt. Edi akpana enye ọbọbọ ọfọn̄ibuot ke ini akabarede utịn̄ikọ nditọete iren, Ukpepn̄kpọ Enyọn̄-Ukpeme, Ukpepn̄kpọ Bible Esop, ye ke ini enye adade usụn̄ ke ikwọ usem idiọn̄ọ. Sia ekemede ndidi eyenete emi ayakabade se nditọete iren, iban, nditọwọn̄, ye mbiowo ẹnamde ke mbono esop, ọkpọfọn enye ọbọbọ ọfọn̄ibuot ke ofụri ini mbono esop emi.

[Ikọ Idakisọn̄]