Kûyat Edisana Spirit Jehovah Esịt
Kûyat Edisana Spirit Jehovah Esịt
“Ẹkûyat edisana spirit Abasi esịt, emi ẹkedade ẹfịk mbufo idiọn̄ọ.”—EPH. 4:30.
1. Nso ke Jehovah anam ọnọ ediwak miliọn owo, ndien nso ke ana mmọ n̄ko ẹnam?
JEHOVAH anam ata akwa n̄kpọ ọnọ ediwak miliọn owo emi ẹdude ke idiọk ererimbot emi. Enye ada ikpọn̄-ikpọn̄ edibon Eyen esie, Jesus Christ, anam mme owo ẹkeme ndisan̄a n̄kpere imọ. (John 6:44) Afo esịne ke otu emi edieke edide ama ayak idem ọnọ Abasi onyụn̄ anam se ọkọn̄wọn̄ọde ke ini akayakde idem ọnọ Abasi. Ndien sia akanade baptism ke enyịn̄ edisana spirit, ana etiene ndausụn̄ spirit emi.—Matt. 28:19.
2. Mbụme ewe ke idibọrọ ke ibuotikọ emi?
2 Nnyịn emi ‘itọde inọ spirit’ imemen obufa owo isịne. (Gal. 6:8; Eph. 4:17-24) Ndien apostle Paul ama odụri nnyịn utọn̄ ete ikûyat edisana spirit Abasi esịt. (Kot Ephesus 4:25-32.) Yak inen̄ede idụn̄ọde item apostle emi ise. Paul ọdọhọ ke itien̄wed oro ete ikûyat spirit Abasi esịt. Nso ke ikọ esie ọwọrọ? Didie ke owo emi ama akayak idem ọnọ Jehovah ekeme ndinam utọ n̄kpọ oro? Ndien nso ke ikpanam mbak nnyịn idiyat spirit Jehovah esịt?
Se Ikọ Paul Ọkọwọrọde
3. Didie ke akpanam Ephesus 4:30 an̄wan̄a?
3 Akpa kan̄a, se se enye eketịn̄de ke Ephesus 4:30. Enye ọkọdọhọ ete: “Ẹkûyat edisana spirit Abasi esịt, emi ẹkedade ẹfịk mbufo idiọn̄ọ ẹnịm ẹnọ usen eke ẹdisiode mbufo ke ufụn ebe ke ufak.” Paul ikoyomke ndima nditọete esie ẹbiat eti idaha mmọ ke iso Abasi. Ẹkeda spirit Jehovah ‘ẹfịk mmọ idiọn̄ọ ẹnịm ẹnọ usen emi ẹdidade ufak Christ ẹsio mmọ ke ufụn.’ Edisana spirit Abasi ke ẹkeda ẹfịk akpa mme Christian idiọn̄ọ, kpa enye ke ẹda ẹfịk mme anam-akpanikọ Christian oro ẹyetde aran “idiọn̄ọ n̄kpọ eke edidide.” (2 Cor. 1:22) Idiọn̄ọ emi owụt ke mmọ ẹdi inyene Abasi ndien ke mmọ ẹdidu ke heaven. Owo 144,000 ke ẹdifịk idiọn̄ọ.—Edi. 7:2-4.
4. Ntak emi nnyịn mîkpayatke edisana spirit Jehovah esịt?
4 Ndiyat edisana spirit Abasi esịt ekeme ndinam spirit emi ọkpọn̄ nnyịn. Ikụt emi ke akam emi David ọkọbọn̄de ke enye ama ekesịn efịbe ye Bath-sheba. David ama akabade esịt onyụn̄ ekpe Jehovah ubọk ete: “Kûmen mi ke iso fo uduọk; kûnyụn̄ ubọ mi edisana spirit fo.” (Ps. 51:11) Sụk mme Christian oro ẹyetde aran, emi ‘ẹnamde akpanikọ tutu ẹsịm n̄kpa,’ ẹdibọ “anyanya” uwem emi mîkemeke ndikpa ke heaven. (Edi. 2:10; 1 Cor. 15:53) Ana mbon emi ẹdoride enyịn ndidu uwem ke isọn̄ ẹnyene edisana spirit man mmọ ẹkpekeme ndinam akpanikọ nnọ Abasi nnyụn̄ nnyene uwem ke ndibuọt idem ke uwa ufak Christ. (John 3:36; Rome 5:8; 6:23) Ntre, ikpanaha owo nnyịn ndomokiet ededei ayat edisana spirit Jehovah esịt.
Didie ke Christian Ekeme Ndiyat Edisana Spirit Esịt?
5, 6. Didie ke Christian ekeme ndiyat spirit Jehovah esịt?
5 Nnyịn emi ima ikayak idem inọ Abasi imekeme nditre ndiyat edisana spirit esịt. Idikeme ndinam emi edieke ‘ikade iso isan̄a inyụn̄ itiene ndausụn̄ spirit Abasi,’ koro emi ayanam ikeme ndikara ndiọi udọn̄ nnyịn, ikûnyụn̄ udu idiọk uwem. (Gal. 5:16, 25, 26) Edi imekeme ndikpụhọde, inyụn̄ iyat spirit Abasi esịt edieke itọn̄ọde ndinam n̄kpọ emi Bible, kpa N̄wed emi ẹkedade spirit Abasi ẹwet, akpande.
6 Esịt ayayat edisana spirit onyụn̄ ayat Jehovah, kpa andinyene spirit emi edieke ikade iso inam n̄kpọ emi ọbiọn̄ọde ndausụn̄ spirit emi. Ndidụn̄ọde Ephesus 4:25-32 ayanam ifiọk nte ikpodude uwem, emi n̄ko ekeme ndin̄wam nnyịn ikûyat spirit Abasi esịt.
Se Ikpanamde Mbak Idiyat Spirit Abasi Esịt
7, 8. Ntak emi ikpesitịn̄de akpanikọ?
7 Ana isitịn̄ akpanikọ. Paul ekewet ke Ephesus 4:25 ete: “Ke emi mbufo ẹma ẹkeduọn̄ọ nsu, yak owo mbufo kiet kiet etịn̄ akpanikọ ọnọ mbọhọidụn̄ esie, koro nnyịn idi ndido idem kiet eken.” Sia kpukpru nnyịn idide “ndido idem kiet eken,” ikpanaha itie n̄kari n̄kari m̀mê ikokoi itụn nditọete nnyịn usụn̄, koro ndinam emi onyụn̄ etie nte ndisu nsu nnọ mmọ. Edieke owo enyenede utọ uwem emi, ọwọrọ enye iyomke ndidi ama ye Abasi.—Kot N̄ke 3:32.
8 Nsu ye n̄kari n̄kari uwem ẹkeme ndisuan esop. Ke ntre, ẹyak itie nte prọfet Daniel emi owo mîkekemeke ndikụt idiọkido ndomokiet ke idem esie. (Dan. 6:4) N̄ko, akpana iti item emi Paul ọkọnọde mme Christian emi ẹdoride enyịn ndika heaven nte ke akpana mmọ ẹnen̄ede ẹdiana kiet sia kpukpru mmọ ẹdide mbak “idem Christ.” (Eph. 4:11, 12) Edieke nnyịn iyomde ndidu nsinsi uwem mi ke isọn̄, ana isitịn̄ akpanikọ man edidianakiet odu ke otu nnyịn ke ofụri ererimbot.
9. Ntak emi ọfọnde inam se idude ke Ephesus 4:26, 27?
9 Ana ibiọn̄ọ Devil mbak enye idikụt ufan̄ idian̄ade nnyịn ikpọn̄ Abasi. (Jas. 4:7) Edisana spirit esinam ikeme ndibiọn̄ọ Satan. Ke uwụtn̄kpọ, enye idiyakke iyat esịt kpukpru ini. Paul ọkọdọhọ ete: “Ẹyat esịt, edi ẹkûnam idiọkn̄kpọ; ẹkûyak utịn osụhọde edisịm mbufo ke idaha iyatesịt.” (Eph. 4:26, 27) Edieke n̄kpọ anamde iyat esịt, ndisọsọp mbọn̄ akam ke esịt ayanam inyene “sụn̄-sụn̄ esịt,” inyụn̄ imụm idem ikama, utu ke ndinam n̄kpọ emi ediyatde spirit Abasi. (N̄ke 17:27) Ntre, ikpanaha iyat esịt tutu inọ Satan ufan̄ anam nnyịn idue Abasi. (Ps. 37:8, 9) Edieke nnyịn mîyomke ndinọ Satan ufan̄, ana isọsọp ikọk mfịna nnyịn nte Jesus eketemede.—Matt. 5:23, 24; 18:15-17.
10, 11. Ntak emi nnyịn mîkpeyịpke inọ, inyụn̄ ibian̄a abian̄a?
10 Inaha iyịp n̄kpọ m̀mê ibian̄a abian̄a. Se se Paul ekewetde mi aban̄a uyịp inọ: “Yak eyịp inọ okûyịp aba, edi utu ke oro yak enye anam ọkpọsọn̄ utom, ada ubọk esie anam eti utom, man enye ekpenyene n̄kpọ ndideme nnọ owo eke odude ke unana.” (Eph. 4:28) Edieke Christian emi ama akayak idem ọnọ Abasi eyịpde n̄kpọ, ọwọrọ ke enye ‘esuene enyịn̄ Abasi.’ (N̄ke 30:7-9) Ndidi ubuene inọhọ owo unen ndiyịp n̄kpọ owo. Mbon emi ẹmade Abasi ye mbọhọidụn̄ mmọ ẹfiọk ke idụhe se ikpanamde uyịp inọ ọfọn.—Mark 12:28-31.
11 Paul iketịn̄ke se nnyịn mîkpanamke kpọt, edi ama etịn̄ se ikpanamde n̄ko. Edieke isan̄ade ke spirit inyụn̄ itienede ndausụn̄ esie, iyesịn ukeme inam utom man ikeme ndise mban̄a ubon nnyịn, inyụn̄ inyene “n̄kpọ ndideme nnọ owo eke odude ke unana.” (1 Tim. 5:8) Jesus ye mme apostle esie ẹma ẹsinịm okụk man ẹkpeda ẹn̄wam mme ubuene, edi Judas Iscariot ama esiyịp okụk oro. (John 12:4-6) Imọfiọk ke edisana spirit ikadaha enye usụn̄. Nnyịn emi spirit Abasi adade usụn̄ ‘imesinam akpanikọ ke kpukpru n̄kpọ,’ ukem nte Paul ekesinamde. (Heb. 13:18) Ndien emi anam ikûyat edisana spirit Jehovah esịt.
N̄kpọ En̄wen Emi Ikpanamde Mbak Idiyat Spirit Abasi Esịt
12, 13. (a) Ephesus 4:29 ọdọhọ ke nso utọ ikọ ke nnyịn mîkpetịn̄ke? (b) Ikọ nnyịn ekpesitie didie?
12 Ana ikpeme edeme nnyịn. Paul ọkọdọhọ ete: “Ẹkûyak mbumbu ikọ ọwọrọ mbufo ke inua, edi ẹtịn̄ se ededi oro ọfọnde ndibọp owo nnam ọkọri nte oyomde, man emi ọkpọnọ mme andikop se inọde ufọn.” (Eph. 4:29) Apostle emi afiak etịn̄ se ikpanamde ye se nnyịn mîkpanamke. Enye ọdọhọ ke spirit Abasi ayanam ‘isitịn̄ nti ikọ, emi enyenede ufọn ọnọ mbon emi itịn̄de inọ.’ N̄ko, ke ikpanaha iyak “mbumbu ikọ” ọwọrọ nnyịn ke inua. Ikọ Greek oro ẹkabarede “mbumbu” edi ikọ emi ẹsitịn̄de ke ini owo oyomde ndidọhọ ke mfri abiara, ke iyak ebe inyan̄, m̀mê ke unam obu. Kpa nte utọ n̄kpọ emi ẹsitekde owo esịt, ntre n̄ko ke ikọ emi Jehovah asuade okponyụn̄ etek nnyịn esịt.
13 Akpana isitịn̄ nti ikọ, ikọ emi ọfọnde onyụn̄ ẹnemde “nte n̄kpọ eke ẹsịnde inụn̄.” (Col. 3:8-10; 4:6) Akpana se itịn̄de anam mme owo ẹfiọk ke nnyịn itiehe nte mbon ererimbot. Ntre akpana isitịn̄ ikọ emi “ọfọnde ndibọp owo nnam ọkọri.” Yak onyụn̄ etie nnyịn ke idem nte eketiede andiwet Psalm emi ọkọkwọde ete: “Ikọ inua mi, ye ekikere esịt mi ẹyenem fi esịt, O Jehovah, akwa itiat mi, ye andifak mi.”—Ps. 19:14.
14. Ephesus 4:30, 31 ọdọhọ ision̄o nso ifep ke idem nnyịn?
14 Ana ision̄o udu, iyatesịt, isụn̄i, ye kpukpru idiọkn̄kpọ ifep ke idem nnyịn. Ke Paul ama ọkọdọhọ ete ikûyat spirit Abasi esịt, enye ama adian do ete: “Ẹsion̄o kpukpru ndotndot udu ye iyatesịt ye ifụtesịt ye mfiori ye ikọ isụn̄i ẹfep ke otu mbufo ọkọrọ ye kpukpru idiọkn̄kpọ.” (Eph. 4:30, 31) Ana kpukpru nnyịn ikpeme se ikerede ye se inamde sia idide mme anana-mfọnmma owo. Iyanam esịt ayat spirit Abasi edieke isisọpde ‘iyat esịt inyụn̄ ifụt esịt.’ N̄kpọ en̄wen emi ekemede ndinam spirit Abasi ayat esịt edi ndisịn owo ke esịt, nditie utọk utọk, nnyụn̄ nsịn ndikpe emem ye owo emi eduede nnyịn. Edieke itọn̄ọde ndifụmi item Bible sụn̄sụn̄, imekeme nditọn̄ọ ndidu uwem emi edinamde ikanam idiọkn̄kpọ idian spirit Abasi, inyụn̄ ibọ ata ndiọi utịp.
15. Nso ke ikpanam edieke eyenete eduede nnyịn?
15 Ana ifọn ido, itua mme owo mbọm, isinyụn̄ ifen inọ mmọ. Paul ọkọdọhọ ete: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.” (Eph. 4:32) Idem ekpededi se owo anamde nnyịn enen̄erede abiak nnyịn, ana ifen inọ enye ukem nte Abasi esifende ọnọ nnyịn. (Luke 11:4) Nso ke ikpanam edieke eyenete etịn̄de idiọk ikọ aban̄a nnyịn? Imekeme ndika mbịne enye ikeneme n̄kpọ oro ye enye man ikọk mfịna oro. Ndien edieke enye ekpede ubọk ete ifen inọ imọ, ana ifen inọ enye. Edi ikụreke do. Leviticus 19:18 ọdọhọ ete: “Kûsio usiene, kûnyụn̄ ukọk nditọ obio mbufo ekikọhọ; edi ma mbọhọ-idụn̄ fo nte idem fo: ami ndi Jehovah.”
Oyom Inen̄ede Ikpeme
16. Nọ uwụtn̄kpọ emi owụtde ke ekeme ndiyom inam ukpụhọde ndusụk ini mbak nnyịn idiyat spirit Jehovah esịt.
16 Imekeme ndinam n̄kpọ emi Abasi mîmaha idem ke ndịbe. Ke uwụtn̄kpọ, eyenete ekeme ndima ndisibre ikwọ emi mîkpanaha Christian ebre. Ekem esịt ọtọn̄ọ ndimia enye ufen ke ntak emi enye ofụmide item N̄wed Abasi emi odude ke n̄wed “ofụn emi anamde akpanikọ onyụn̄ enyenede ọniọn̄.” (Matt. 24:45) Enye ekeme ndibọn̄ akam mban̄a n̄kpọ emi onyụn̄ eti ikọ Paul emi ke Ephesus 4:30. Ekem enye ebiere ke imọ idinamke aba n̄kpọ ndomokiet emi ediyatde spirit Abasi esịt, ke imọ idinyụn̄ ibreke aba utọ ikwọ oro. Jehovah ọyọdiọn̄ enye ke ntak eti ubiere emi. Ntre, ẹyak idomo nte ikpekekeme nditre ndiyat spirit Abasi esịt.
17. Nso ikeme nditịbe edieke nnyịn mîkpemeke idem inyụn̄ ibọn̄ akam?
17 Edieke nnyịn mîkpemeke idem inyụn̄ ibọn̄ akam, imekeme ndisinam oburobụt ido emi ekemede ndiyat spirit Abasi esịt. Sia Jehovah esidade edisana spirit esie anam edisana uduak esie, spirit emi esinyụn̄ anam n̄kpọ ekekem ye orụk owo emi Jehovah edide, ntre, ndiyat enye esịt m̀mê ndinam enye ofụhọ, onyụn̄ etie nte ndinam Jehovah ofụhọ—ndien imọfiọk ke idụhe owo nnyịn ndomokiet emi akpamade ndinam Jehovah ofụhọ. (Eph. 4:30) Mme Jew emi ẹkedide mme ewetn̄wed ke eyo Jesus ẹma ẹnam akwa idiọkn̄kpọ ke ndikọdọhọ ke Jesus akada odudu Satan anam mme utịben̄kpọ. (Kot Mark 3:22-30.) Emi ekedi ‘ndisụn̄i edisana spirit,’ kpa idiọkn̄kpọ emi owo mîdifenke. Abasi akan utọ idiọkn̄kpọ oro!
18. Idisan̄a didie ifiọk ke nnyịn inamke idiọkn̄kpọ emi Abasi mîdifenke?
18 Akpana isiti ikọ Paul emi aban̄ade ndiyat spirit Abasi esịt kpukpru ini sia nnyịn iyomke-yom ndinam n̄kpọ ekededi emi Abasi mîdifenke inọ nnyịn. Nso iditịbe edieke edide imanam akwa idiọkn̄kpọ? Edieke ikabarede esịt, inyụn̄ iyak mbiowo ẹn̄wam nnyịn, imekeme ndidọhọ ke Abasi efen ọnọ nnyịn, ntre ke nnyịn inamke idiọkn̄kpọ idian edisana spirit. Abasi ekeme ndin̄wam nnyịn ikûfiak uyat edisana spirit esie esịt ke usụn̄ ndomokiet.
19, 20. (a) Nso ke nnyịn mîkpanamke? (b) Nso ke ikpebiere ndinam?
19 Abasi ada edisana spirit esie anam ima, idatesịt, ye edidianakiet odu ke otu ikọt esie. (Ps. 133:1-3) Ntre, ikpanaha isan̄a idọk edidọk m̀mê inam n̄kpọ usọn̄enyịn usọn̄enyịn ye mbiowo emi ẹkedade edisana spirit Abasi ẹmek mbak nnyịn idiyat edisana spirit esịt. (Utom 20:28; Jude 8) Ikpakam inanam mme owo ẹdiana kiet ẹnyụn̄ ẹkpono kiet eken ke esop. Ikponyụn̄ inaha isiak n̄ka ke otu ikọt Abasi. Paul ọkọdọhọ ete: “Mmada enyịn̄ Ọbọn̄ nnyịn Jesus Christ n̄kpe mbufo ubọk, nditọete, nte mbufo kpukpru ẹnyene ikọ inua kiet, ubahade okûnyụn̄ odu ke otu mbufo, edi nte mbufo ẹkpekam ẹdiana kiet ke ekikere kiet ye ke usụn̄ ukere n̄kpọ kiet.”—1 Cor. 1:10.
20 Jehovah iyomke iyat spirit esie esịt, enye onyụn̄ eben̄e idem ndin̄wam nnyịn mbak nnyịn idinam emi. Ẹyak ika iso iben̄e Abasi edisana spirit esie inyụn̄ ibiere ke nnyịn idiyatke enye esịt. Ẹyak ‘itọ inọ spirit,’ inyụn̄ inen̄ede isịn idem iyom ndausụn̄ spirit emi ke emi ye ke nsinsi nsinsi.
Didie ke Afo Ọkpọbọrọ?
• Nso ke ndiyat spirit Abasi esịt ọwọrọ?
• Didie ke owo emi ama akayak idem ọnọ Jehovah ekeme ndiyat spirit Esie esịt?
• Nso ke ikpanam mbak idiyat edisana spirit Abasi esịt?
[Mme Mbụme Ukpepn̄kpọ]
[Ndise ke page 30]
Sọsọp kọk mfịna
[Ndise ke page 31]
Ewe ke otu akpasa mfri iba emi ibiet ikọ fo?