Nte Jesus Owụtde Edinen Ido Abasi

“Abasi okosio [Christ] enịm nte uwa ndida nsio isop ebe ke edibuọt idem ke iyịp esie. Emi ekedi man ẹwụt edinen ido esie.”—ROME 3:25.

1, 2. (a) Nso ke Bible ekpep aban̄a idaha ubonowo? (b) Mme mbụme ewe ke idibọrọ ke ibuotikọ emi?

IMENEN̄EDE imehe ye mbụk Bible oro aban̄ade nsọn̄ibuot ke In̄wan̄ Eden. Kpukpru nnyịn ke ibọ ufen idiọkn̄kpọ Adam nte Rome 5:12 owụtde. Itien̄wed emi ọdọhọ ete: “Idiọkn̄kpọ [okoto] owo kiet odụk ke ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru owo ẹma ẹnam idiọkn̄kpọ.” Ntem, kpa ye ofụri ukeme emi isisịnde ndinam eti n̄kpọ, isisụk idedue Abasi inyụn̄ iyom enye efen ọnọ nnyịn. Apostle Paul ama eseme ete: “Eti n̄kpọ oro nyomde ndinam ami nnamke, edi idiọkn̄kpọ oro mmenyomke ndinam kpa oro ke n̄ka iso nnam. Mbọm mi owo nditaha!”—Rome 7:19, 24.

² Sia kpukpru nnyịn ikadade-da idiọkn̄kpọ imana, ọkpọfọn ibụp idem nnyịn mme akpan mbụme emi: Jesus eyen Nazareth akasan̄a didie amana nte mfọnmma owo, ndien ntak emi enye akanade baptism? Didie ke Jesus okowụt edinen ido Jehovah ke nte enye okodude uwem? Ata akpan mbụme en̄wen edi, Nso ufọn ke n̄kpa Jesus ekenyene?

Ẹneni Ẹban̄a Edinen Ido Abasi

3. Satan akasan̄a didie abian̄a Eve?

³ Adam ye Eve, akpa ete ke eka nnyịn, ẹma ẹsịme ndisịme ẹsịn ukara Abasi ẹkabade ẹmek “akani urụkikọt, enye emi ẹkotde Devil ye Satan,” ẹte akara mmimọ. (Edi. 12:9) Se nte mfịna emi ọkọtọn̄ọde mi. Satan ama obụp Eve mbụme emi okowụtde ke ukara Jehovah Abasi inenke. Enye okobụp Eve ete: “Nte Abasi ọkọdọhọ ete, Mbufo ẹkûdia baba eto in̄wan̄ emi kiet?” Eve ama ọdọhọ enye ke Abasi ọkọdọhọ mmimọ ikûtụk mfri eto kiet kpọt mbak mmimọ idikpan̄a. Satan ama ọdọhọ enye ke Abasi ababian̄a mmọ. Enye ọkọdọhọ Eve ke ‘mmọ idikpaha.’ Enye ama osu nsu en̄wen ọnọ Eve ete ke enyene eti n̄kpọ emi Abasi edịpde mmọ, ke edieke enye adiade mfri eto oro Abasi akakpande, ke enye editie nte Abasi, ekeme ndibiere ke idemesie se idide eti ye idiọk.—Gen. 3:1-5.

4. Satan akasan̄a didie ọtọn̄ọ ndikara ubonowo?

⁴ Ikọ Satan ọkọwọrọ ke mme owo ẹyenen̄ede ẹkop inemesịt ndikara idemmọ ẹkan Abasi ndikara mmọ. Utu ke Adam ndikowụt ke ukara Abasi enen, enye ama okop uyo an̄wan esie, etiene adia mfri emi Abasi akakpande. Ntre, Adam ikedịghe aba mfọnmma ke iso Jehovah, enye ama onyụn̄ anyam nnyịn esịn ke ufen idiọkn̄kpọ ye n̄kpa. Ntre ke Satan emi edide “abasi eyo emi” ọkọtọn̄ọ ndikara ubonowo.—2 Cor. 4:4, Edisana Ŋwed Abasi Ibom; Rome 7:14.

5. (a) Didie ke Jehovah akanam se enye eketịn̄de? (b) Nso ke Abasi ọkọn̄wọn̄ọ ọnọ nditọ Adam ye Eve?

⁵ Sia Jehovah mîkemeke ndisu nsu, enye ama ebiere n̄kpa ọnọ Adam ye Eve. (Gen. 3:16-19) Edi emi iwọrọke ke uduak Abasi ama okpu. Uduak Abasi ikemeke-keme ndikpu! Ke ini Jehovah ekebierede ikpe Adam ye Eve, enye ama etịn̄ ikọ emi ọnọde nditọ mmọ utịbe  utịbe idotenyịn. Enye ama ọn̄wọn̄ọ ke iyọnọ mfri emi Satan edinuakde nditịn̄ikpat. Ndien ke unan Mfri un̄wọn̄ọ oro ama akpa, ke enye ‘ayanuak Satan ibuot.’ (Gen. 3:15) Akpa John 3:8 enen̄ede anam un̄wọn̄ọ emi an̄wan̄a ke nditịn̄ ntem mban̄a Jesus Christ: “Ẹkeyarade Eyen Abasi kaban̄a uduak emi, oro edi, man abiat mme utom Devil.” Edi didie ke ido Jesus ye n̄kpa esie ẹwụt edinen ido Abasi?

Se Baptism Jesus Ọkọwọrọde

6. Isan̄a didie ifiọk ke Jesus ikadaha idiọkn̄kpọ Adam imana?

⁶ Akana Jesus ọfọn ama nte Adam ọkọfọnde ama mbemiso enye akanamde idiọkn̄kpọ. (Rome 5:14; 1 Cor. 15:45) Ntre, akana enye ọfọn ama toto ke emana. Emi edisan̄a didie itịbe? Angel Gabriel ama anam n̄kpọ emi an̄wan̄a Mary eka Jesus. Enye ọkọdọhọ Mary ete: “Edisana spirit oyodoro fi ke idem, odudu Ata Edikon̄ oyonyụn̄ ofụk fi. Ke ntak oro n̄ko se idimanade edikere edisana, Eyen Abasi.” (Luke 1:35) Ekeme ndidi Mary ama etịn̄ ọnọ Jesus ke ini enye ekedide eyenọwọn̄ nte enye akasan̄ade amana. Ntem, isan̄ kiet, ke ini Mary ye Joseph ebeeka esie ẹkekade ẹkekụt enye ke temple, ekpri eyen emi ama obụp mmọ ete: “Nte mbufo ikọfiọkke ite nnyene ndidu ke ufọk Ete mi?” (Luke 2:49) Emi owụt ke Jesus ọkọtọn̄ọ ke ekpri ọdiọn̄ọ ke imọ idi Eyen Abasi. Ntak edi oro enye ekenen̄erede oyom ndiwụt edinen ido Abasi.

7. Ewe ọsọn̄urua n̄kpọ ke Jesus ekenyene?

⁷ Jesus ama esidụk mboho utuakibuot kpukpru ini, ndien emi owụt ke enye ama enen̄ede ama n̄kpọ Abasi. Sia enye ekedide mfọnmma owo, anaedi kpukpru se enye okokopde onyụn̄ okotde ke N̄wed Abasi Usem Hebrew ama an̄wan̄a enye. (Luke 4:16) Enye ama enyene ata ọsọn̄urua n̄kpọ en̄wen—oro edi, mfọnmma idem emi ẹkemede ndiwa nda nnyan̄a ubonowo. Jesus ama ọbọn̄ akam ke ini ẹkenịmde enye baptism. Ekeme ndidi enye ama ekere n̄ko aban̄a ntịn̄nnịm ikọ emi odude ke Psalm 40:6-8.—Luke 3:21; kot Mme Hebrew 10:5-10. *

8. Ntak emi John Andinịm Owo Baptism mîkoyomke ndinịm Jesus baptism?

⁸ John Andinịm Owo Baptism ikoyomke ndinịm Jesus baptism. Ntak-a? Sia enye ekenịm mme Jew baptism ndiwụt ke mmọ ẹkabade esịt ke ndikabiat Ibet. John ekedi  iman Jesus, ntre anaedi enye ama ọfiọk ke Jesus ekedi edinen owo, ikonyụn̄ inamke idiọkn̄kpọ emi okpoyomde enye akabade esịt. Jesus ama anam John ọdiọn̄ọ ke enen̄ede odot ina baptism. Enye ọkọdọhọ ete: “Koro ntem ke odot nnyịn ndinam kpukpru se inende.”—Matt. 3:15.

9. Nso ke baptism Jesus akada aban̄a?

⁹ Sia Jesus ekedide mfọnmma owo, enye ekpekekere ke sia imọ itiede nte Adam, ke imekeme ndinyene mfọnmma nditọ. Edi Jesus ikoyomke utọ n̄kpọ oro, sia idịghe se Jehovah okoyomde enye anam edi oro. Abasi ọkọdọn̄ enye edi isọn̄ man edidi Mfri oro imọ ikọn̄wọn̄ọde, m̀mê Messiah. Emi ama abuana Jesus ndiwa mfọnmma uwem esie. (Kot Isaiah 53:5, 6, 12.) Edi baptism Jesus ye eke nnyịn idịghe ukem. Jesus ikenyeneke ndiyak idemesie nnọ Jehovah sia enye akamana odụk idụt Israel emi ẹma ẹkeyayak idem ẹnọ Abasi. Baptism esie akakam owụt ke enye enyịme ndinam uduak Abasi emi ẹkewetde ke N̄wed Abasi ẹban̄a Messiah.

10. Nso ke Abasi okoyom Messiah anam, ndien eketie Jesus didie ke idem ndinam kpukpru emi?

¹⁰ Jehovah okoyom Jesus edikwọrọ eti mbụk Obio Ubọn̄ imọ, anam mme mbet, onyụn̄ etịm mme mbet emi idem man mmọ ẹkpenam mbufa mbet ke ini iso. Jesus ndinyịme ndinam uduak Abasi ama abuana enye ndinyịme ndiyọ ukọbọ ye ibak ibak n̄kpa man owụt ke ida inọ edinen ukara Jehovah Abasi. Ama enen̄ede enem Jesus ndinam uduak Abasi nnyụn̄ n̄wa uwem esie, koro enye ama ama Ete esie eke heaven etieti. (John 14:31) Ama enem enye n̄ko ndifiọk nte ke imọ imekeme ndinọ Abasi ekọmurua mfọnmma uwem imọ nte ufak man ẹnyan̄a ubonowo ẹsio ke ufụn idiọkn̄kpọ ye n̄kpa. Ndi Abasi ama ama nte Jesus ekenyịmede ndinam utọ ikpọ n̄kpọ emi? Ih, ama ama.

11. Didie ke Jehovah okowụt ke imenyịme Jesus nte Messiah m̀mê Christ emi ẹken̄wọn̄ọde?

¹¹ Owo inan̄ oro ẹkewetde Gospel ẹdọhọ ke Jehovah Abasi ama etịn̄ nte imade Jesus ke ini enye ọkọwọrọde ke Akpa Jordan. John Andinịm Owo Baptism ọdọhọ ete: “Mma n̄kụt spirit osụhọrede nte ibiom oto ke heaven, onyụn̄ edidoro [Jesus] . . . Mma n̄kụt, nnyụn̄ ntie ntiense nte ke enye edi Eyen Abasi.” (John 1:32-34) Ke adianade do, Jehovah ama ọdọhọ ke ini Jesus akanade baptism, ete: “Emi edi edima Eyen mi, emi ami nnyịmede.”—Matt. 3:17; Mark 1:11; Luke 3:22.

Anam Akpanikọ Tutu Esịm N̄kpa

12. Nso ke Jesus akanam ke isua ita ye ubak ke enye ama akana baptism?

¹² Ke isua ita ye ubak oro ẹketienede, Jesus ama esịn ifịk ekpep mme owo n̄kpọ aban̄a Ete esie onyụn̄ owụt nte ukara Esie enende. Ndisan̄a ke ukot n̄kanade ofụri Isọn̄ Un̄wọn̄ọ ama esinam Jesus akpa mba, edi idụhe se ikakpande enye ndinọ ọyọhọ ikọ ntiense mban̄a akpanikọ. (John 4:6, 34; 18:37) Jesus ama ekpep mme owo n̄kpọ aban̄a Obio Ubọn̄ Abasi. Enye ama esikọk mme owo udọn̄ọ ke utịbe utịbe usụn̄, ọnọ mbon emi biọn̄ ọdọn̄de udia, onyụn̄ anam mme akpan̄kpa ẹset, man owụt se Obio Ubọn̄ Abasi edinamde inọ ubonowo.—Matt. 11:4, 5.

13. Nso ke Jesus ekekpep aban̄a akam?

¹³ Utu ke Jesus ndikoyom ẹtoro imọ ke kpukpru ukwọrọikọ ye udọn̄ọ oro imọ ikọkọkde, enye ama enịm ata eti uwụtn̄kpọ ke ndisụhọde idem nnọ Jehovah kpukpru itoro. (John 5:19; 11:41-44) Jesus ama ekpep n̄ko ata akpan n̄kpọ oro ikpọbọn̄de akam iben̄e. Ke ini ibọn̄de akam, akpana iben̄e ite yak ‘ẹnam enyịn̄ Abasi, Jehovah, asana,’ yak edinen ukara  Abasi edisio ibak ibak ukara Satan efep, man ‘uduak Abasi ada itie ke isọn̄ nte edide ke heaven.’ (Matt. 6:9, 10) Jesus ama ọdọhọ nnyịn inam n̄kpọ itiene akam emi, ke ‘ndibem iso nyom obio ubọn̄ ye edinen ido Abasi.’—Matt. 6:33.

14. Okposụkedi emi Jesus ekedide mfọnmma, ntak emi akanade enye esịn ifịk man anam se Abasi ọkọdọn̄de enye?

¹⁴ Nte ekekperede ini Jesus ndikpa man awa uwem esie, idem ama etetịm etịmede enye ke ntak ikpọ mbiomo oro enye ekenyenede ndibiom. Akana enye ọyọ idomo onyụn̄ akpa ibak ibak n̄kpa man uduak Ete esie osu, onyụn̄ anam enyịn̄ ete esie asana. Ke ayakde usen ition Jesus ndikpa, enye ama ọbọn̄ akam ete: “Ukpọn̄ mi etịmede ke emi, ndien nso ke ndidọhọ? Ete, nyan̄a mi sio ke hour emi. Nte ededi, ntak edi oro nsịmde hour emi.” Ke Jesus ama eketịn̄ ikọ emi ama nte owo, enye ikekereke iban̄a idemesie, edi akakam ekere se inen̄ede idi akpan n̄kpọ, onyụn̄ ọbọn̄ akam ete: “Ete, nọ enyịn̄ fo ubọn̄.” Ndien Jehovah ama ọbọrọ enye ke ebe oro ete: “Mma nnọ enye ubọn̄, nyonyụn̄ ntọn̄ọ ntak nnọ enye ubọn̄.” (John 12:27, 28) Ih, Jesus ama eben̄e idem ndisọn̄ọ nda nyọ akakan idomo emi akanam ẹdomode owo. Imenen̄ede inịm ke Jesus ndikokop nte Ete esie etiede ke heaven etịn̄ mme ikọ emi ama enen̄ede ọsọn̄ọ enye idem nte ke imọ iyekeme ndinam ẹdiọn̄ọ ke Jehovah enyene unen ndikara, n̄ko ke ukara esie enen. Ndien enye ama onyụn̄ anam oro!

Ufọn Emi N̄kpa Jesus Enyenede

15. Ntak emi Jesus ọkọdọhọde, “Okụre,” mbemiso enye akakpade?

¹⁵ Nte Jesus ọkọkọn̄ọde ke eto ndutụhọ amian̄a ndiduọk akpatre ibifịk, enye ama ọdọhọ ete: “Okụre!” (John 19:30) Nso ikpọ n̄kpọ ke Abasi akan̄wam Jesus anam ntem! Abasi ama an̄wam enye ke ofụri isua ita ye ubak, tọn̄ọ ke ini emi enye akanade baptism tutu esịm ini emi enye akakpade. Ke Jesus ama akakpa, ata idiọk unyekisọn̄ ama etịbe, ndien akwa owoekọn̄ Rome emi ekesede aban̄a ediwot Jesus ama ọdọhọ ete: “Ke akpanikọ owo emi ekedi Eyen Abasi.” (Matt. 27:54) Anaedi akwa owoekọn̄ emi ama okụt ẹsakde Jesus nsahi ke ntak emi enye ọkọdọhọde ke idi Eyen Abasi. Kpa ye ofụri ndutụhọ oro, Jesus ama ọsọn̄ọ ada onyụn̄ owụt ke Satan edi ata idiọk osu nsu. Satan ama amia ata ye kpukpru mbon emi ẹdade ẹnọ ukara Abasi, ete: “Kpukpru se owo enyenede ke owo edinọ ke ibuot uwem esie.” (Job 2:4) Jesus ndikọsọn̄ọ nda owụt ke Adam ye Eve ẹkpekekeme ndibe ekpri idomo oro ẹkedomode mmọ. Akpan n̄kpọ en̄wen edi nte ke uwem ye n̄kpa Jesus ẹnọ Jehovah ubọn̄ ẹnyụn̄ ẹwụt ke ukara Esie enen. (Kot Mme N̄ke 27:11.) Ndi n̄kpa Jesus enyene ufọn en̄wen? Ih, enyene.

16, 17. (a) Mme ntiense Jehovah oro ẹkedude uwem mbemiso Jesus ekedide isọn̄ ẹkenam didie ẹnyene eti idaha ke iso Abasi? (b) Nso utịp ke Jehovah ọkọnọ Eyen esie ke ndinam akpanikọ, ndien nso ke Ọbọn̄ nnyịn Jesus Christ aka iso ndinam?

¹⁶ Ediwak owo ẹma ẹsikpono Jehovah mbemiso Jesus ekedide isọn̄. Mmọ ẹma ẹnyene eti idaha ke iso Abasi, ndien ẹma ẹn̄wọn̄ọ ndinam mmọ ẹset. (Isa. 25:8; Dan. 12:13) Edi nso ikanam edisana Abasi, Jehovah, ọn̄wọn̄ọ ndidiọn̄ mme anana-mfọnmma owo ke utọ usụn̄ oro? Bible anam an̄wan̄a ete: “Abasi okosio [Jesus Christ] enịm nte uwa ndida nsio isop ebe ke edibuọt idem ke iyịp esie. Emi ekedi man ẹwụt edinen ido esie, koro enye ama efen mme  idiọkn̄kpọ emi ẹkenamde ke ini edem ke adan̄aemi Abasi ekemede ime; man enye okpowụt edinen ido esie ke ini emi, enye okponyụn̄ enen ke ini abatde owo eke enyenede mbuọtidem ke Jesus ke edinen.”—Rome 3:25, 26. *

¹⁷ Jehovah ama anam Jesus eset ekenyene itie emi okponde akan se enye ekenyenede mbemiso enye ekedide isọn̄. Idahaemi, Jesus edi owo eke spirit emi mîkemeke ndikpa. (Heb. 1:3) Sia Ọbọn̄ nnyịn Jesus Christ edide Akwa Oku ye Edidem, enye aka iso an̄wam mme anditiene enye ẹwụt edinen ido Abasi. Esịt enen̄ede enem nnyịn koro Ete nnyịn eke heaven, Jehovah, edi andidiọn̄ kpukpru mbon emi ẹwụtde edinen ido esie, emi ẹnyụn̄ ẹnamde akpanikọ ukem nte Eyen esie.—Kot Psalm 34:3; Mme Hebrew 11:6.

18. Nso ke idineme ke ibuotikọ oro etienede?

¹⁸ Toto ke eyo Abel, mbon oro ẹkenamde akpanikọ ẹnọ Jehovah ẹma ẹsinyene eti itie ebuana ye enye ke ntak emi mmọ ẹkebuọtde idem ke Mfri oro ẹken̄wọn̄ọde. Jehovah ama ọfiọk ke Eyen imọ ayanam akpanikọ, ndien ke n̄kpa esie eyekeme ndifụk “idiọkn̄kpọ ererimbot.” (John 1:29) N̄kpa Jesus enyene ufọn ọnọ mme owo mfịn n̄ko. (Rome 3:26) Nso ufọn ke uwa ufak Christ enyene ọnọ fi? Se idinemede edi oro ke ibuotikọ oro etienede.

[Mme Ikọ Idakisọn̄]

Didie ke Afo Ọkpọbọrọ?

• Didie ke ẹkeneni ẹban̄a edinen ido Abasi?

• Nso ke baptism Jesus akada aban̄a?

• Nso ufọn ke n̄kpa Jesus enyene?

[Mme Mbụme Ukpepn̄kpọ]

[Ndise ke page 9]

Ndi ọmọdiọn̄ọ se baptism Jesus akadade aban̄a?