Mme Ubon Christian—“Ẹben̄e Idem”

“Ẹben̄e idem, koro Eyen owo eyedi ke hour eke mbufo mîdorike enyịn.”—LUKE 12:40.

1, 2. Ntak emi ikpanamde item emi Jesus ọkọnọde ete ‘iben̄e idem’?

NSO iditịbe inọ fi ye ubon fo “ke ini Eyen owo edidide ke ubọn̄ esie” edibahade “mme owo kiet ye eken”? (Matt. 25:31, 32) Sia oro editịbede ke hour emi nnyịn mîdorike enyịn, enen̄ede oyom nnyịn inam item Jesus emi ọdọhọde ete ‘iben̄e idem’!—Luke 12:40.

² Ibuotikọ oro ekebemde iso ama eneme nte owo kiet kiet ke ubon ekemede ndin̄wam ofụri ubon ẹdu ke edidemede ẹnyụn̄ ẹda utom mmọ ke akpan n̄kpọ. Ẹyak ineme mme usụn̄ en̄wen emi ikemede ndin̄wam ubon nnyịn ọsọn̄ idem ke n̄kan̄ eke spirit.

Nam Enyịn Fo ‘Enen̄ede Ese’

3, 4. (a) Mme ubon Christian ẹkpekpeme idem ke nso? (b) Nso ke ndinam enyịn nnyịn ‘enen̄ede ese’ ọwọrọ?

³ Man mme ubon ẹben̄e idem ẹbet edidi Christ, inaha mmọ ẹyak n̄kpọ ndomokiet ọwọn̄ọde mmọ ọkpọn̄ mme n̄kpọ oro  ẹban̄ade utuakibuot akpanikọ. Ana mmọ ẹkpeme mbak n̄kpọ ẹdiwọn̄ọde ntịn̄enyịn mmọ. Sia ediwak ubon ẹduọde ke afia uma-inyene, kere ban̄a se Jesus eketịn̄de aban̄a nnyịn ndinam enyịn nnyịn ‘enen̄ede ese.’ (Kot Matthew 6:22, 23.) Kpa nte utuenikan̄ ekemede ndinam nnyịn ikụt usụn̄ inyụn̄ itre ndituak ukot nduọ ke usụn̄ isan̄ nnyịn, se nnyịn idade ndamban̄a “enyịn esịt” nnyịn ikụt ekeme ndinam nnyịn idu ke edidemede, idu uwem emi nnyịn mîdituakke ukot iduọn̄ọ.—Eph. 1:18.

⁴ Man enyịn owo etịm okụt n̄kpọ, ana enye ọfọn onyụn̄ ekeme ndiwụhọ ke se enye esede. Ukem oro ke edi ye enyịn esịt nnyịn. Nnyịn ndinyene ndamban̄a enyịn oro enen̄erede ese ọwọrọ ke nnyịn iwụk ekikere ke n̄kpọ kiet. Utu ke ndidu uwem oro owụhọde ke mme n̄kpọ obụkidem nnyụn̄ ntịmede esịt mban̄a mme n̄kpọ udu uwem oro ubon oyomde, nnyịn idikam iwụk enyịn nnyịn ke mme n̄kpọ eke spirit. (Matt. 6:33) Emi ọwọrọ ndiyụhọ ye n̄kpọ udu uwem oro inyenede inyụn̄ inịm utom Abasi akpa ke uwem nnyịn.—Heb. 13:5.

5. Didie ke n̄kaiferi kiet okowụt ke “enyịn” imọ owụhọ ke ndinam n̄kpọ Abasi?

⁵ Esinen̄ede ọfọn ke ini ẹkpepde nditọwọn̄ ẹnam enyịn mmọ enen̄ede ese! Kere ban̄a uwụtn̄kpọ n̄kaiferi kiet ke Ethiopia. Enye ama anam ọfọn ke ufọkn̄wed tutu ẹdọhọ enye edika ufọkn̄wed ntaifiọk ke mfọn ke enye ama okokụre sekọndri. Edi sia enyịn esie okowụhọde ke ndinam n̄kpọ Jehovah, enye ama esịn. Ibịghike ke oro ebede, ẹma ẹnọ enye utom emi ẹdisikpede enye euro 3,000 (n̄kpọ nte naira 630,000) ke ọfiọn̄—emi enen̄ede awak akan se ẹsikpede mme owo ke idụt oro. Edi “enyịn” eyenan̄wan oro okowụhọ ke utom usiakusụn̄. Enye ikenemeke kan̄a ye ete ye eka esie mbemiso esịnde utom oro. Ete ye eka esie ẹkeda didie se enye akanamde? Esịt ama enem mmọ etieti, mmọ ẹnyụn̄ ẹdọhọ enye ke imama enye tutu!

6, 7. Nso ke ana ‘itịn̄ enyịn ikpeme’?

⁶ Ikọ Jesus oro ẹwetde ke Matthew 6:22, 23 odụri owo utọn̄ aban̄a idiọkitọn̄ n̄ko. Jesus ikọdọhọke ke ukpụhọde enyịn ‘ndinen̄ede nse’ edi ‘nditre ndinen̄ede nse,’ edi ọkọdọhọ ke edi ‘idiọk’ enyịn. ‘Enyịn emi ọdiọkde’ esisịn esịt ke n̄kpọ owo, mîdịghe ọdiọk itọn̄. (Matt. 6:23) Jehovah ese didie edisịn esịt ke n̄kpọ owo m̀mê idiọkitọn̄? Bible ọdọhọ ete: “[Yak] ẹkûdedei ẹtịn̄ ẹban̄a use ye orụk mbubiam ido ekededi m̀mê idiọkitọn̄ [oro edi, edisịn esịt ke n̄kpọ owo] ke otu mbufo.”—Eph. 5:3.

⁷ Owo ekeme ndisọp n̄kụt ke owo en̄wen ọdiọk itọn̄, edi idisọpke ikụt ke imọ imọdiọk. Ntem, ọfọn inam item Jesus emi: “Ẹtịn̄ enyịn ẹkpeme idem ke kpukpru orụk edisịn esịt ke n̄kpọ owo.” (Luke 12:15) Emi oyom nnyịn idụn̄ọde idem nnyịn man ifiọk ebiet emi esịt nnyịn owụhọde. Mme ubon Christian ẹnyene ndinen̄ede n̄kere mban̄a ini ye okụk emi mmọ ẹbiatde ke unọ idem inemesịt, ke edinam ini nduọkodudu, ye ke edidep mme n̄kpọ obụkidem.

8. Didie ke ikeme ‘nditịn̄ enyịn n̄kpeme’ se idepde?

⁸ Iyomke ekere kpọt aban̄a m̀mê emenyene okụk ekem ndidep se oyomde. Kere n̄ko ban̄a mme n̄kpọ ntem: ‘Ndi nyenyene ini ndida n̄kpọ emi nnam n̄kpọ nnyụn̄ nse mban̄a enye? Edibịghi adan̄a didie mbemiso mfiọkde ndida enye nnam n̄kpọ edifọn edifọn?’ Mbufo mme uyen, ẹkûnịm kpukpru se mme asuanetop n̄kpọurua ẹtịn̄de ẹban̄a n̄kpọurua, ẹkûnyụn̄ ẹyom mbufa ọfọn̄ m̀mê mme n̄kpọ eken oro ẹsọn̄de urua. Ẹfara ke idem. Ẹkere n̄ko ẹban̄a nte edinyene n̄kpọ emi editụkde nte ubon mbufo ẹben̄ede idem ẹnọ edidi Eyen owo. Buọt idem ke un̄wọn̄ọ Jehovah emi: “Ndidehedei n̄kpọn̄ fi, ndinyụn̄ nsịnke fi.”—Heb. 13:5.

 Ẹbịne Mme Utịtmbuba Eke Spirit

9. Nso ke ndibịne mme utịtmbuba eke spirit ekeme ndinam nnọ ubon?

⁹ Usụn̄ en̄wen emi mme owo ke ubon ẹkemede ndisọn̄ọ mbuọtidem mmọ nnyụn̄ nnam ofụri ubon ẹsọn̄ idem ke n̄kan̄ eke spirit edi ndinịm mme utịtmbuba eke spirit nnyụn̄ mbịne mmọ. Ndinam ntre ayan̄wam mme ubon ẹse nte mmọ ẹnamde n̄kọri man ẹtetịm ẹnem Jehovah esịt ẹnyụn̄ ẹse se mmọ ẹdade ke akpan n̄kpọ.—Kot Philippi 1:10.

10, 11. Mme utịtmbuba ewe ke mbufo ẹbịne nte ubon, ndien mme utịtmbuba ewe ke ẹkpema ndinịm ke ini iso?

¹⁰ Ndinịm ọkpọkọm n̄kpri n̄kpri utịtmbuba oro ata ediwak owo ke ubon ẹkemede ndisịm ekeme ndida ekese ufọn ndi. Da utịtmbuba edineme itie N̄wed Abasi eke usen ke usen nte uwụtn̄kpọ. Se owo kiet kiet etịn̄de ekeme ndin̄wam ibuot ufọk ọdiọn̄ọ adan̄a nte mmọ ẹnamde n̄kọri eke spirit. Utịtmbuba editie ọtọkiet n̄kot Bible ke ubon kpukpru ini esinam nditọwọn̄ ẹkeme ndinam n̄kọri ke nte ẹkotde n̄wed ye ke nte etop Bible an̄wan̄ade mmọ. (Ps. 1:1, 2) Ndien ndi ikpọfọnke inam n̄kọri ke nte isibọn̄de akam? Ndinen̄ede nsion̄o ndusụk ikpehe mbun̄wụm spirit ekeme ndidi ata eti utịtmbuba n̄ko ndibịne. (Gal 5:22, 23) Nso kaban̄a ediyom usụn̄ ndikere mban̄a mbon oro isobode ke an̄wautom? Ndidomo ndinam oro nte ubon ekeme ndin̄wam nditọwọn̄ ẹkpep ndinyene esịtmbọm, ndien enen̄ede etie nte emi ayanam ọdọn̄ mmọ ndidi mme asiakusụn̄ m̀mê mme isụn̄utom.

¹¹ Ntak mûnemeke ndusụk utịtmbuba  oro afo ye ubon fo ẹkemede ndibịne? Ndi mbufo ẹmekeme ndinịm utịtmbuba edidu mbịghi ke ini ẹkade ukwọrọikọ? Ndi ẹmekeme ndisịn ukeme man ẹkan ndịk edinọ ikọ ntiense ke urụk ukopikọ, ke efak, m̀mê ke mme itie mbubehe? Nso kaban̄a ediwọrọ n̄ka ebiet oro ẹyomde mme asuanetop Obio Ubọn̄? Ndi owo kiet ke ubon ekeme ndikpep obufa usem man ọkwọrọ eti mbụk ọnọ mbon oro ẹtode idụt en̄wen?

12. Nso ke ibuot ufọk akpanam man an̄wam ubon esie ọkọri ke n̄kan̄ eke spirit?

¹² Ibuot ufọk, se mme ikpehe oro ubon fo ekemede ndinam n̄kọri eke spirit. Ekem nịm mme akpan utịtmbuba oro ẹdin̄wamde mbufo ẹnam oro. Akpana mme utịtmbuba oro mbufo ẹnịmde ẹdi se mme idaha ye ukeme mbufo ẹkemede ndiyak mbufo ẹsịm. (N̄ke 13:12) Edi akpanikọ ke ndisịm eti utịtmbuba esida ini. Ntem ẹda ini oro ẹkpedade ẹse ekebe ndise ẹbịne mme utịtmbuba eke spirit. (Eph. 5:15, 16) Ẹnen̄ede ẹsịn ifịk man ẹsịm mme utịtmbuba oro ẹkenịmde ẹnọ ubon mbufo. (Gal. 6:9) Ubon oro ẹbịnede mme utịtmbuba eke spirit ẹyenam ‘kpukpru owo ẹkụt n̄kọri mmọ.’—1 Tim. 4:15.

Nịm Mbubreyo Utuakibuot Ubon Kpukpru Ini

13. Nso ukpụhọde ke ẹkenam ke ndutịm mbono esop eke urua ke urua, ndien nso mbụme ke ikpekere iban̄a?

¹³ Ata eti n̄kpọ emi edin̄wamde mme ubon “ẹben̄e idem” ẹnọ edidi Eyen owo edi akpan ukpụhọde oro ẹkenamde ke mme mbono esop eke urua ke urua ọtọn̄ọde ke January 1, 2009. Ẹma ẹtre ndisisop idem ke isio isio usen man ẹdụk se ẹkediọn̄ọde ini oro nte Ukpepn̄kpọ N̄wed Esop ẹnyụn̄ ẹmen enye ẹdian ye Ufọkn̄wed Utom Ukara Abasi ye Esoputom. Ẹkenam ukpụhọde emi man mme ubon Christian ẹkeme ndisọn̄ọ idaha mmọ ke n̄kan̄ eke spirit ke ndisio mbubreyo usen kiet ke urua nnịm nnọ utuakibuot ubon. Emi isua ifan̄ ẹma ẹkebe mi tọn̄ọ ẹkenam ukpụhọde oro, imekeme ndibụp idem nnyịn ite: ‘Ndi ke nda mbubreyo oro nnịm utuakibuot ubon m̀mê ukpepn̄kpọ idemmi? Ndi ami ke nda ini oro nnam se akanade ẹda ẹnam?’

14. (a) Nso idi ata akpan uduak mbubreyo Utuakibuot Ubon m̀mê ukpepn̄kpọ idemowo? (b) Ntak emi edide akpan n̄kpọ ndisio mbubreyo nnịm nda n̄kpep n̄kpọ?

¹⁴ Ata akpan uduak mbubreyo Utuakibuot Ubon m̀mê ini ukpepn̄kpọ idemowo edi man owo etetịm asan̄a ekpere Abasi. (Jas. 4:8) Ima ibiat ini ikpep Bible kpukpru ini inyụn̄ inen̄ede ifiọk Andibot, itie ebuana nnyịn ye enye eyetetịm ọsọn̄. Nte inen̄erede isan̄a ikpere Jehovah, ntre ke edidọn̄ nnyịn ndima enye ‘ke ofụri esịt, ke ofụri ukpọn̄, ke ofụri ekikere, ye ke ofụri ukeme nnyịn.’ (Mark 12:30) Ke akpanikọ, emi ayanam enen̄ede ọdọn̄ nnyịn ndikop uyo Abasi nnyụn̄ n̄kpebe enye. (Eph. 5:1) Ke ntre, ndika iso nnyene mbubreyo Utuakibuot Ubon edi akpan n̄kpọ edieke anade in̄wam ubon nnyịn “ẹben̄e idem” ke n̄kan̄ eke spirit nte nnyịn ibetde “akwa ukụt” oro ẹketịn̄de ẹban̄a. (Matt. 24:21) Ana inam emi edieke iyomde ndibọhọ.

15. Nso utịp ke mbubreyo Utuakibuot Ubon enyene ke nte owo kiet ke ubon adade owo en̄wen?

¹⁵ Ndutịm Utuakibuot Ubon enyene uduak en̄wen n̄ko—ndinam kpukpru owo ke ubon ẹdiana kiet. Ndibiat ini ọtọkiet nneme n̄kpọ Abasi kpukpru urua esinen̄ede otụk nte owo kiet kiet ke ubon adade owo en̄wen. Ebe ye n̄wan ẹnen̄ede ẹdiana kiet didie ntem ke ini mmọ ẹkopde nsan̄a mmọ enemde esịt aban̄a n̄kpọuto eke spirit oro mmọ ẹtiede ntre ẹkụt! (Kot Ecclesiastes 4:12.) Mme ete ye eka ye nditọ oro ẹtuakde ibuot ọtọkiet ẹsidiana kiet ke ima, kpa “mfọnmma mbọbọ edidianakiet.”—Col. 3:14.

16. Tịn̄ nte nditọete iban ita ẹbọde ufọn edisio mbubreyo kiet nnịm n̄kpep Bible.

 ¹⁶ Kere ban̄a ufọn oro nditọete iban ita ẹbọde ẹto ndutịm edisio mbubreyo kiet nnịm nda n̄kpep Bible. Kpa ye oro mmọ mîbuanake n̄kpọ ye kiet eken, ebeakpa ita emi ẹdụkde idem n̄kani owo mi ẹdu ke obio kiet ẹnyụn̄ ẹdi ata ufan ke ediwak isua. Mmọ ẹma ẹbiere ndida mbubreyo kiet ntie kiet n̄kpep Bible sia ẹkeyomde nditetịm ndiana kiet nnyụn̄ n̄n̄wam kiet eken ke n̄kan̄ eke spirit n̄ko utu ke ndidi ikpîkpu ufan kpọt. Mmọ ẹketọn̄ọ ke ndikpep n̄wed oro “Bearing Thorough Witness” About God’s Kingdom. Kiet ke otu mmọ ọdọhọ ete: “Ini ukpepn̄kpọ emi esinem nnyịn tutu enye esibịghi akan hour kiet. Ima isidomo ndida enyịn ikike n̄kụt idaha emi nditọete nnyịn ẹkedude ke eyo mme apostle inyụn̄ itie ineme se ikpanamde edieke idude ke mme utọ idaha oro. Ekem idomo ndinam se ikekpepde ke nneme oro ke an̄wautom. Emi amanam utom edikwọrọ Obio Ubọn̄ ye edinam mbet enen̄ede enem nnyịn onyụn̄ on̄wụm ekese mfri idahaemi.” Ndutịm emi ọsọn̄ọ mmọ idem ke n̄kan̄ eke spirit onyụn̄ anam nti ufan ita emi ẹtetịm ẹdiana kiet. Mmọ ẹdọhọ ẹte: “Imama ndutịm emi tutu.”

17. Nso ye nso ẹdinam mbubreyo Utuakibuot Ubon enyene ufọn?

¹⁷ Afo ndien-e? Didie ke afo ọbọ ufọn edisio mbubreyo nnịm nnọ utuakibuot ubon m̀mê ukpepn̄kpọ idemfo? Edieke ẹnamde emi ntomo ntomo, owo idibọhọ ufọn emi ẹkpebọde ẹto ndutịm emi. Owo kiet kiet ke ubon ekpenyene ndiben̄e idem nnọ ukpepn̄kpọ oro ke ini oro ẹkenịmde. Owo ikpayakke n̄kpri n̄kpọ ẹtịmede se ẹkpenamde mbubreyo oro. Ke akande oro, ẹkpenyene nditetịn̄ enyịn mmek se ẹdikpepde man etịm odot ye ubon mbufo. Nso ke ẹkpenam man mme ini ukpepn̄kpọ oro enem? Ẹda mme usụn̄ unọ ukpep oro ẹdotde ẹnyụn̄ ẹnịm enye ukpono ukpono ye emem emem.—Jas. 3:18. *

‘Ẹtaba Idap’ Ẹnyụn̄ “Ẹben̄e Idem”

18, 19. Ndifiọk ke Eyen owo ọmọn̄ ọsọp edi okpotụk fi ye ubon fo didie?

¹⁸ Nte mme idaha ererimbot emi ẹkade-ka iso ndidiọk ke eyo nnyịn emi owụt ke mme akpatre usen idiọk ererimbot Satan emi ẹma ẹtọn̄ọ ke 1914. Armageddon enen̄ede ekpere. Ibịghike ọmọn̄ ekem ini Eyen owo ndidi ndinam se Jehovah ekebierede ndinam mme idiọkowo. (Ps. 37:10; N̄ke 2:21, 22) Ndi afo ndifiọk emi ikpotụkke fi ye ubon fo?

¹⁹ Ndi afo ke anam item oro Jesus ọkọnọde ete anam enyịn fo ‘enen̄ede ese’? Ke adan̄aemi mbon ererimbot emi ẹyomde inyene, uwọrọetop, m̀mê odudu, ndi ubon fo ke ẹbịne mme utịtmbuba eke spirit? Ndi ndutịm mbubreyo Utuakibuot Ubon mbufo m̀mê ini ukpepn̄kpọ idemowo enyene ufọn ọnọ fi? Ndi afo ke ọbọ ufọn emi ẹkenamde enye ẹnọ? Nte ikenemede ke ibuotikọ oro ekebemde iso, nte mbufo ke ẹnam se N̄wed Abasi etemede mbufo nte ebe, n̄wan, m̀mê eyen, ke ntem ẹn̄wamde ofụri ubon ‘ẹtaba idap’? (1 Thess. 5:6) Edieke edide ntre, mbufo ‘ẹyeben̄e idem’ ẹnọ edidi Eyen owo.

[Ikọ Idakisọn̄]

Nso ke Afo Ekekpep?

• Tịn̄ nte mme ubon Christian ẹkemede ‘ndidu ke mben̄eidem’ ke . . .

ndinam enyịn mmọ ‘enen̄ede ese.’

ndinịm nnyụn̄ mbịne mme utịtmbuba eke spirit.

ndinịm mbubreyo Utuakibuot Ubon kpukpru ini.

[Mme Mbụme Ukpepn̄kpọ]

[Ndise ke page 13]

Enyịn oro “enen̄erede ese” ayanam nnyịn ifep mme n̄kpọ etabi ererimbot