Nditiene Christ, Mfọnmma Adausụn̄

ẸSIWAK ndikpu mbon oro ẹtienede mme andikara emi ẹdide owo mfịn. Edi mbon emi ẹtienede ndausụn̄ Christ isikwe utọ edikpu oro. Jesus ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo.” (Matt. 11:28, 29) Ndausụn̄ Jesus esinọ owo nduọkodudu ye inemesịt. Enye enen̄ede ekere aban̄a mme usụhọde owo ye mbon emi ẹfịkde, ọdọhọ mmọ ẹmen mmemmem ọkpọnọ imọ ẹkọn̄ọ. Edi nso ibuana ke nditiene ndausụn̄ Jesus?

Apostle Peter ekewet ete: “Christ ama okụt ukụt ke ntak mbufo, onyụn̄ ọkpọn̄ uwụtn̄kpọ ọnọ mbufo man mbufo ẹkpetiene nde ikpat esie ketket.” (1 Pet. 2:21) Nditiene nde ikpat Jesus edi akpan n̄kpọ adan̄a didie? Da nte ke afo esịne ke otu mbon emi ẹyomde ndibe ebiet emi ẹbụkde mme bọmb ke isọn̄, ndien owo kiet kpọt ke otu mbufo ọfiọk nte ẹkemede ndisan̄a mbe mbak ẹdifịk bọmb. Ndi ukpetieneke nde ikpat esie ketket, idem esịnde ukot ke ebiet emi enye esịnde? Kpasụk ntre, adan̄a nte itienede uwụtn̄kpọ Jesus edibiere m̀mê iyenyene ifụre ke ini iso. Ndinam oro esịne ndikop nnyụn̄ nnam se enye ọdọhọde nnyụn̄ ndiana ye mbon emi ẹdade ke ibuot esie.

Kop Nyụn̄ Nam Item

Jesus ọkọdọhọ ke ekperede utịt Ukwọrọikọ esie Oro ke Obot ete: “Ẹyemen kpukpru owo eke ẹkopde ẹnyụn̄ ẹnamde ikọ mi emi ẹdomo ye owo ọniọn̄, emi ọbọpde ufọk esie odori ke enyọn̄ akamba itiat. Ndien edịm edep, ukwọ onyụn̄ edi, ofụm abara eberi ufọk oro edi enye iduọhọ, koro ẹbọpde enye ẹdori ke enyọn̄ akamba itiat.”—Matt. 7:24, 25.

Ntem, Jesus okokot owo eke okopde onyụn̄ anamde ikọ esie “owo ọniọn̄.” Ndi imesikop uyo ke ofụri esịt man iwụt ke imokpono inyụn̄ ida uwụtn̄kpọ Christ ke akpan n̄kpọ, mîdịghe ndi isima ndisat mme ewụhọ Jesus emi ẹmemde m̀mê emi ẹferede nnyịn ke idem inam? Jesus ọkọdọhọ ete: “[Ami nnanam] n̄kpọ eke enemde [Abasi] esịt kpukpru ini.” (John 8:29) Ẹyak idomo ndikpebe uwụtn̄kpọ oro.

Mme apostle ẹma ẹnịm eti uwụtn̄kpọ ke eyo mmọ nte ẹkpesụkde ibuot ẹnọ ndausụn̄ Christ. Peter ama ọdọhọ Jesus isan̄ kiet ete: “Sese! Nnyịn ima ikpọn̄ kpukpru n̄kpọ itiene fi.” (Mark 10:28) Mme apostle ẹma ẹnen̄ede ẹda ndausụn̄ Jesus ke akpan n̄kpọ tutu mmọ ẹnyịme ndikpọn̄ mme n̄kpọ eken man ẹtiene enye.—Matt. 4:18-22.

Bere ye Mbon Oro Ẹdade ke Ibuot Christ

Esisịt ini mbemiso Jesus akakpade, enye ama etịn̄ usụn̄ en̄wen emi ikemede nditiene ndausụn̄ esie. Enye ọkọdọhọ ete: “Owo eke enyịmede owo ekededi emi ndọn̄de, enyịme mi n̄ko.” (John 13:20) Ke nditịm ntịn̄, Jesus ọkọdọhọ ke mbon emi ẹyetde aran, emi ẹdade ke ibuot imọ, ẹdi “nditọete” imọ. (Matt. 25:40) Ke Jesus ama ekeset ọnyọn̄ heaven, ẹma ẹmek “nditọete” esie ẹte ẹnam utom emi enye akpanamde, ẹdi mme isụn̄utom “emi [ẹdade] ke ibuot Christ” ẹben̄e  mbon en̄wen ẹte ẹfiak ẹditie ke emem ye Jehovah Abasi. (2 Cor. 5:18-20) Nnyịn ndinyịme ndausụn̄ Christ abuana ndisụk ibuot nnọ “nditọete” esie.

Ọfọn idụn̄ọde nte isinamde n̄kpọ iban̄a item N̄wed Abasi oro ẹdade mme n̄wed nnyịn emi ẹkọn̄ọde ke Bible ẹnọ. Ẹsiti nnyịn mme ikọ Christ ke ini ikpepde Bible inyụn̄ idụkde mme mbono esop. (2 Pet. 3:1, 2) Nnyịn isiwụt ke imenen̄ede iwụt esịtekọm iban̄a udia eke spirit emi ke ndidia mmọ kpukpru ini. Edi ikpanam n̄kpọ didie edieke ẹnọde item ẹban̄a n̄kpọ kiet ediwak ini? Ke uwụtn̄kpọ, Ikọ Abasi eteme mme Christian ete ẹdọ ndọ “ke Ọbọn̄ ikpọn̄-ikpọn̄.” (1 Cor. 7:39) Ẹneme n̄kpọ emi ke ini ke ini ẹbe isua ikie ke Enyọn̄-Ukpeme. Nditọete Christ ẹwụt ke imama inyụn̄ ikere iban̄a nsọn̄idem eke spirit nnyịn ke ndimịn̄ nsio nsio ibuotikọ mban̄a item oro ye mme item oro ẹdade odudu Abasi ẹnọ. Nditịn̄ enyịn nnam se ẹtide nnyịn emi edi usụn̄ kiet ndiwụt ke nnyịn ke itiene mfọnmma Adausụn̄ nnyịn, Jesus Christ.

Mme N̄ke 4:18 ọdọhọ ke “usụn̄ ndinen owo ebiet nyayama un̄wana emi akade-ka iso ayama tutu esịm ufọt uwemeyo.” Ke akpanikọ, ndausụn̄ oro Jesus ọnọde akaka iso, ituakke-tuak ida. Usụn̄ en̄wen emi ikemede ndibere ye “nditọete” Christ edi ke ndinyene mbuọtidem ke mme ukpụhọde oro “ofụn emi anamde akpanikọ onyụn̄ enyenede ọniọn̄” anamde ke nte akpanikọ emi odude ke Ikọ Abasi an̄wan̄ade nnyịn.—Matt. 24:45.

Iwụt n̄ko ke imosụk ibuot inọ “nditọete” Christ ke ndibere ye mme esenyịn oro ẹmekde ke esop Christian. Apostle Paul ọkọdọhọ ete: “Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot ẹnọ mmọ, koro mmọ ẹkpemede ukpọn̄ mbufo.” (Heb. 13:17) Ke uwụtn̄kpọ, ebiowo ekeme ndisịn udọn̄ nnọ nnyịn man ikụt ufọn edinịm utuakibuot ubon kpukpru urua mîdịghe eteme nnyịn mme n̄kpọ oro ikpanamde ọfọn ke utom ukwọrọikọ nnyịn. Esenyịn oro asan̄ade-san̄a ekeme ndida N̄wed Abasi nnọ nnyịn item mban̄a uwem nnyịn nte mme Christian. Nnyịn ndinyịme ndinam mme utọ item oro owụt ke nnyịn ke itiene Jesus nte Adausụn̄ nnyịn.

Ererimbot inyeneke nti mme adausụn̄. Edi enen̄ede enem nditiene ima ima ndausụn̄ oro Christ ọnọde! Yak idomo nte ikekeme ndikop uyo nnọ Adausụn̄ nnyịn inyụn̄ idiana ye mbon emi enye adade anam n̄kpọ mfịn.

[Mme Ndise ke page 27]

Ndi afo amanam item N̄wed Abasi oro ọdọhọde nnyịn ikûdian idem utịn̄e utịn̄ẹ ye mmọ eke mînịmke ke akpanikọ?