Ndi Afo ke Ada Jehovah nte Udeme Fo?
Ndi Afo ke Ada Jehovah nte Udeme Fo?
“Ẹka iso . . . ndibem iso nyom obio ubọn̄ ye edinen ido esie, ndien ẹyedian kpukpru n̄kpọ emi ẹnọ mbufo.”—MATT. 6:33.
1, 2. (a) “Israel Abasi” oro ẹtịn̄de ẹban̄a ke Galatia 6:16 ada aban̄a mmanie? (b) “Esien Israel duopeba” oro ẹtịn̄de ẹban̄a ke Matthew 19:28 ẹda ẹban̄a mmanie?
KE INI okotde enyịn̄ oro Israel ke Bible, nso isidụk fi ekikere? Ndi esikere aban̄a Jacob eyen Isaac oro ẹkekpụhọde enyịn̄ ẹkot Israel? Mîdịghe ndi esikere aban̄a nditọ esie, idụt Israel eke eset? Nso kaban̄a Israel eke spirit? Ke ini ẹtịn̄de ẹban̄a Israel ke ndamban̄a usụn̄, enye esiban̄a “Israel Abasi,” owo 144,000, emi ẹdade edisana spirit ẹyet aran man ẹdi ndidem ye mme oku ke heaven. (Gal. 6:16; Edi. 7:4; 21:12) Edi kere ban̄a nte ẹtịn̄de ẹban̄a esien Israel 12 ke san̄asan̄a usụn̄ ke Matthew 19:28.
2 Jesus ọkọdọhọ ete: “Ke ini ẹdifiakde ẹbot mme n̄kpọ, ke ini Eyen owo osụhọrede etie ke ebekpo ubọn̄ esie, mbufo emi ẹtienede mi ẹyesụhọde n̄ko ẹtie ke ebekpo duopeba, ẹkpe ikpe ẹnọ esien Israel duopeba.” Ke ufan̄ikọ emi, “esien Israel duopeba” ẹdi mbon oro mme mbet Jesus emi ẹyetde aran ẹdikpede ikpe inọ, emi ẹnyenede idotenyịn nsinsi uwem ke Paradise ke isọn̄. Mmọ ẹyebọ ufọn utom itie oku emi owo 144,000 oro ẹdinamde.
3, 4. Nso eti uwụtn̄kpọ ke mme anam-akpanikọ mbon emi ẹyetde aran ẹnịm?
3 Mbon oro ẹyetde aran mfịn ẹda utom mmọ nte n̄kpọuto ukem nte mme oku ye nditọ Levi eset ẹkedade. (Num. 18:20) Mbon oro ẹyetde aran idorike enyịn ndibọ itie ndomokiet ke isọn̄ nte udeme mmọ. Utu ke oro, mmọ ẹdori enyịn nditiene Jesus Christ ndi ndidem ye mme oku ke heaven. Mmọ ẹyeka iso ẹnam n̄kpọ Jehovah do ke heaven, nte ikotde ke Ediyarade 4:10, 11 iban̄a mbon oro ẹyetde aran, emi ẹdude ke itie mmọ ke heaven.—Ezek. 44:28.
4 Ke ini mbon oro ẹyetde aran ẹsụk ẹdude ke isọn̄, mmọ ẹdu uwem oro owụtde ke Jehovah edi udeme mmimọ. Utom emi mmọ ẹnamde ẹnọ Abasi edi akakan n̄kpọ ọnọ mmọ. Mmọ ẹnyene mbuọtidem ke uwa ufak Christ ẹnyụn̄ ẹtiene enye kpukpru ini, ntem ke ‘ẹsịn idem ẹnam ikot eke ẹkekotde mmọ ye edimek eke ẹkemekde mmọ ẹnyene nsọn̄ọ.’ (2 Pet. 1:10) Idaha ye ukeme mmọ idịghe ukem. Kpa ye oro, mmọ idaha emi nte ntak ndinam esisịt ke utom Abasi. Utu ke oro, mmọ ẹnen̄ede ẹda edinam n̄kpọ Abasi nte akakan n̄kpọ, ẹnyụn̄ ẹnam ofụri se ẹkekeme. Ndien mmọ ẹnịm eti uwụtn̄kpọ ẹnọ mbon oro ẹdoride enyịn ndidu uwem ke Paradise isọn̄.
5. Didie ke kpukpru Christian ẹkeme ndinyene Jehovah nte udeme mmọ, ndien ntak emi oro ekemede ndisọn̄?
5 Edide nnyịn idori enyịn ndika heaven m̀mê ndidu uwem mi ke isọn̄, ana nnyịn ‘ikan̄ idem nnyịn inyụn̄ imen eto ndutụhọ nnyịn ika iso itiene Christ.’ (Matt. 16:24) Ediwak miliọn owo oro ẹdoride enyịn ndidu uwem ke Paradise ke isọn̄ ke ẹtuak ibuot ẹnọ Abasi ẹnyụn̄ ẹtiene Christ kpasụk ntre. Mmọ isinyụn̄ inamke esisịt ke ini ẹdiọn̄ọde ke imekeme ndinam ekese. Ediwak mmọ ẹmenyịme ndidu mmemmem uwem ẹnyụn̄ ẹnam utom usiakusụn̄. Mbon eken ẹsin̄wana ẹnam usiakusụn̄ ndusụk ọfiọn̄ kpukpru isua. Edi mbon eken, kpa ye oro mîkemeke ndinam usiakusụn̄, ẹsinen̄ede ẹsịn idem ke utom ukwọrọikọ. Utọ mbon oro ẹtie nte Mary emi akamade n̄kpọ Abasi, emi ọkọduọkde Jesus enem-utebe aran. Jesus ọkọdọhọ ete: “Enye akanam eti n̄kpọ ke idem mi. . . . Enye akanam se enye ekemede.” (Mark 14:6-8) Ekeme ndidi idimemke nnyịn ndinam ofụri se ikemede, sia idude ke ererimbot oro Satan akarade. Edi, nnyịn imesin̄wana ọkpọsọn̄ inyụn̄ ibuọt idem ye Jehovah. Kere ban̄a akpan usụn̄ inan̄ emi isinamde oro.
Ndibem Iso Nyom Obio Ubọn̄ Abasi
6. (a) Didie ke ediwak owo ẹwụt ke ida uwem emi kpọt nte udeme mmimọ? (b) Ntak emi ọfọnde itie nte David?
6 Jesus ama ekpep mme mbet esie ete ẹbem iso ẹyom Obio Ubọn̄ ye edinen ido Abasi. Etie nte mbon ererimbot ẹsibem iso ẹyom mbubehe idemmọ sia mmọ ẹdide “mbon editịm n̄kpọ emi, emi uwem emi edide udeme mmọ.” (Kot Psalm 17:1, 13-15.) Ediwak owo ikereke iban̄a Andibot mmọ, mmọ ẹsisịn idem ẹyom ndidu inem inem uwem, nnyene nditọ, nnyụn̄ mbon n̄kpọ-akpa nnọ nditọ mmọ. Udeme mmọ edi ke uwem emi kpọt. David iketiehe ntre; enye okoyom ndinam eti enyịn̄ ye Jehovah, kpa nte eyen esie ọkọdọhọde ke ukperedem ete kpukpru owo ẹnam. (Eccl. 7:1) Ukem nte Asaph, David ama okụt ke ndinyene Jehovah nte Ufan enen̄ede ọfọn akan owo ndibem iso nyom ufọn idemesie ke uwem. Ama enem enye ndisan̄a ye Abasi. Mfịn ediwak Christian ẹda mme edinam eke spirit nte akpan n̄kpọ ẹkan utom idịbi udia mmọ.
7. Nso edidiọn̄ ke eyenete kiet ọkọbọ ke ndibem iso nyom Obio Ubọn̄?
7 Kere ban̄a Jean-Claude, ke Central African Republic. Enye edi ebiowo, ọdọ n̄wan, onyụn̄ enyene nditọ ita. Imemke utom ndinyene utom ke idụt oro, ndien ediwak owo ẹsinam n̄kpọ ekededi mbak ẹdisio mmọ ke utom. Usen kiet, eteutom Jean-Claude ama ọdọhọ enye esinam utom okoneyo—ọtọn̄ọde ke ebe itiokiet mbubreyo, kpukpru usen ke urua. Jean-Claude ama ọdọhọ enye ke ana imọ ise iban̄a ubon imọ ke n̄kan̄ eke spirit n̄ko, ukem nte anade ise iban̄a mmọ ke n̄kan̄ eke obụk. Enye ama onyụn̄ ọdọhọ ke imọ imenyene mbiomo ndin̄wam esop. Nso ke eteutom ọkọbọrọ? “Edieke iso ọfọnde fi ndikam n̄kụt utom nnam, ana efre kpukpru n̄kpọ eken, esịnede n̄wan, nditọ, ye ofụri mfịna fo. Ana ada ofụri uwem fo anam utom fo—enye edi n̄kukụre n̄kpọ. Mek se oyomde: ufọkabasi m̀mê utom.” Nso ke afo akpakanam? Nte ededi, Jean-Claude ama ọfiọk ke edieke ẹsiode imọ ke utom, ke Abasi eyese aban̄a imọ. Ke imọ iyosụk inyene ekese ndinam ke utom Abasi, ndien ke Jehovah ọyọnọ ubon imọ mme n̄kpọ udu-uwem. Ntem, enye ama aka mbono esop ufọturua ke urua oro eketienede. Ke oro ebede, enye ama eben̄e idem ndika utom, idiọn̄ọke m̀mê iyenyene idem utom. Kpa ke ebe oro ẹkot enye ke urụk ukopikọ. Ẹma ẹsio eteutom oro ke utom, edi eyenete nnyịn osụk aka iso anam utom esie.
8, 9. Didie ke nnyịn ikeme ndikpebe mme oku ye nditọ Levi ke ndinyene Jehovah nte udeme nnyịn?
8 Ekeme ndidi ndusụk owo emi eketiede nte ẹmọn̄ ẹsio mmọ ke utom ẹma ẹkere ẹte, ‘Ndinam didie nnọ se inanade ubon mi?’ (1 Tim. 5:8) Edide afo omosobo utọ idaha oro m̀mê usoboke, anaedi afo omokụt ke uwem fo nte ke tutu amama Abasi idikpụhu fi edieke enye edide udeme fo, edieke onyụn̄ adade utom esie ke ata akpan n̄kpọ. Ke ini Jesus ọkọdọhọde mme mbet esie ete ẹka iso ndibem iso nyom obio ubọn̄, enye ama ọn̄wọn̄ọ ọnọ mmọ ete: “Ndien ẹyedian kpukpru n̄kpọ emi”—utọ nte se ẹdidiade, ẹdin̄wọn̄de, m̀mê ẹdisịnede—“ẹnọ mbufo.”—Matt. 6:33.
9 Kere ban̄a nditọ Levi, emi mîkọbọhọ udeme isọn̄. Sia edisana utuakibuot ekedide ata akpan n̄kpọ oro ebehede mmọ, akana mmọ ẹnyene mbuọtidem ke Jehovah, emi ọkọdọhọde mmọ ete, “Ami ndi udeme fo,” ọyọnọ mmimọ n̄kpọ udu-uwem. (Num. 18:20) Okposụkedi emi nnyịn mînamke utom ke ata temple nte mme oku ye nditọ Levi ẹkenamde, imekeme ndikpebe edu mmọ inyụn̄ inyene mbuọtidem ke Jehovah eyese aban̄a nnyịn. Etetịm oyom inyene mbuọtidem ke Abasi ekeme ndise mban̄a nnyịn idahaemi nnyịn inen̄erede ikpere utịt mme akpatre usen emi.—Edi. 13:17.
Ndibem Iso Nyom Edinen Ido Abasi
10, 11. Didie ke ndusụk owo ẹbuọt idem ke Jehovah ke se iban̄ade utom idịbi udia mmọ? Nọ uwụtn̄kpọ.
10 Jesus ama ọdọhọ mme mbet esie n̄ko ete ‘ẹka iso ẹbem iso ẹyom edinen ido Abasi.’ (Matt. 6:33) Emi ọwọrọ ndida edumbet emi Jehovah enịmde aban̄a se inende ye se ikwan̄ade ndu uwem utu ke ndida eke owo. (Kot Isaiah 55:8, 9.) Afo emekeme nditi nte ke ini edem, ke ndusụk owo ẹma ẹsitọ un̄wọn̄ m̀mê ẹnyam un̄wọn̄ ye sika, ẹkpep mbon efen ekọn̄, mîdịghe ẹbot ẹnyụn̄ ẹnyam mme n̄kpọekọn̄. Ke ẹma ẹkedi ẹdifiọk akpanikọ, ata ediwak mmọ ẹma ẹkpụhọ utom mmọ ẹnyụn̄ ẹdot ndina baptism.—Isa. 2:4; 2 Cor. 7:1; Gal. 5:14.
11 Andrew edi kiet ke otu mmọ. Ke ini enye ye n̄wan esie ẹkekpepde n̄kpọ ẹban̄a Jehovah, mmọ ẹma ẹbiere ndinam n̄kpọ esie. Andrew ama ama utom esie etieti, edi enye ama ọkpọn̄ utom oro. Ntak-a? Koro enye akanam utom ye esop emi mîdaha san̄asan̄a onyụn̄ ebiere ndibem iso nyom edinen ido Abasi. Ke ini Andrew ọkọkpọn̄de utom, enye ekenyene nditọ iba ye okụk emi edidade enye ọfiọn̄ ifan̄ kpọt. Owo ama ekeme ndikere ke enye ekebiet nditọ Levi emi mîkenyeneke udeme. Enye ama ọbuọt idem ke Abasi, onyụn̄ ọtọn̄ọ ndiyom utom. Ke ẹma ẹkefiak ẹtie ẹse se iketịbede, enye ye ubon esie ẹkeme ndisọn̄ọ ke ubọk Jehovah imụhọke. (Isa. 59:1) Sia ẹkedude mmemmem uwem, Andrew ye n̄wan esie ẹma ẹkam ẹnyene ifet ndinam utom uyọhọ ini. Andrew ọdọhọ ete: “Esidu ini emi isitịmerede esịt iban̄a okụk, ufọkidụn̄, nsọn̄idem, ye usọn̄. Edi Jehovah esin̄wam nnyịn kpukpru ini. . . . Imekeme nditịn̄ ke ofụri esịt nte ke ndinam n̄kpọ Jehovah edi akakan ye mfọnn̄kan n̄kpọ oro owo ekemede ndinam.” *—Eccl. 12:13.
12. Nso edu ke oyom man ẹnịm mme edumbet Abasi akpa? Nọ mme uwụtn̄kpọ n̄kann̄kụk.
12 Jesus ọkọdọhọ mme mbet esie ete: “Edieke mbufo ẹnyenede mbuọtidem eke ekpride nte n̄kpasịp mustard, mbufo ẹyedọhọ obot emi ẹte, ‘Wụhọde mi kowụhọ ko,’ ndien enye oyowụhọde, n̄kpọ ndomokiet idinyụn̄ isọn̄ke ikan mbufo.” (Matt. 17:20) Ndi afo ekpekeme ndinịm mme edumbet Abasi akpa edieke emi akpanamde n̄kpọ ọsọn̄ ye afo? Edieke mûtịmke ufiọk m̀mê ekpekeme ndinam emi, neme ye mbon en̄wen ke esop. Nte eyịghe mîdụhe, eyenen̄ede enem fi ndikop ifiọkutom mmọ.
Ndiwụt Esịtekọm Mban̄a Mme N̄kpọ Eke Spirit Oro Jehovah Ọnọde
13. Edieke isịnde idem ke utom Jehovah, nso mbuọtidem ke idinyene kaban̄a udia eke spirit?
13 Edieke adade ifet oro enyenede ndinam n̄kpọ Jehovah ke akpan n̄kpọ, emekeme ndinyene mbuọtidem ke enye ọyọnọ fi se inanade fi ke n̄kan̄ eke obụkidem ye ke n̄kan̄ eke spirit, ukem nte enye ọkọnọde nditọ Levi. Kere ban̄a David. Okposụkedi emi enye ekesịnede ke abaitiat, enye ama enịm ke Abasi ọyọnọ se inanade imọ. Nnyịn n̄ko imekeme ndiberi edem ke Jehovah idem ke ini etiede nte idotenyịn idụhe. Ti ete ke ekedi ke ini Asaph ekedide “akwa edisana ebiet Abasi,” ke se enye eketịmerede esịt aban̄a ekedin̄wan̄a enye. (Ps. 73:17) Kpasụk ntre, oyom ika ibịne Enye emi esibọkde nnyịn ke n̄kan̄ eke spirit. Ntem ke nnyịn iwụt esịtekọm iban̄a ifet oro inyenede ndinam n̄kpọ Abasi ke idaha ekededi oro idude. Ntre ke nnyịn inyụn̄ ida Jehovah nte udeme nnyịn.
14, 15. Didie ke ikpanam n̄kpọ edieke ẹsịnde un̄wana ke ndusụk itie N̄wed Abasi, ndien ntak-a?
14 Afo esinam n̄kpọ didie ke ini Jehovah, Andinọ un̄wana eke spirit, esisịnde un̄wana ke “mme ntotụn̄ọ n̄kpọ Abasi” oro ẹdude ke Bible? (1 Cor. 2:10-13) Apostle Peter ama enịm ata eti uwụtn̄kpọ ọnọ nnyịn ke nte enye akanamde n̄kpọ ke ini Jesus ọkọdọhọde mme andikpan̄ utọn̄ nnọ enye ete: “Ibọhọke mbufo ẹta obụkidem Eyen owo ẹnyụn̄ ẹn̄wọn̄ iyịp esie, mbufo inyeneke uwem ke esịt mbufo.” Ediwak mbet emi ẹkedade ikọ esie ke ata ata usụn̄ ẹma ẹbụp ẹte: “Ikọ emi odoro owo ndidien; anie ekeme ndikpan̄ utọn̄?” Mmọ ẹma “ẹfiak ẹbịne mme n̄kpọ emi mmọ ẹkekpọn̄de ke edem.” Edi Peter ama ọdọhọ ete: “Ọbọn̄, nnyịn idinyọn̄ ibịne anie? Afo enyene ikọ nsinsi uwem.”—John 6:53, 60, 66, 68.
15 Se Jesus eketịn̄de aban̄a edita obụkidem imọ ye edin̄wọn̄ iyịp imọ ikenen̄ekede in̄wan̄a Peter. Edi apostle oro ama eberi edem ke Abasi ọyọnọ un̄wana eke spirit. Ke ini un̄wana eke spirit enen̄erede ayama ke ndusụk n̄kpọ, ndi afo emesidomo ndidiọn̄ọ mme ntak N̄wed Abasi oro anamde ẹnam ukpụhọde oro? (N̄ke 4:11) Mbon Beroea eyo mme apostle ẹma ẹbọ ikọ Abasi “ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê mme n̄kpọ emi ẹdi ntre.” (Utom 17:11) Edieke ekpebede mmọ, emi ayanam fi etetịm owụt esịtekọm aban̄a ifet oro enyenede ndinam n̄kpọ Jehovah, ndida enye nte udeme fo.
Ndidọ Ndọ ke Ọbọn̄ Ikpọn̄-Ikpọn̄
16. Nte ekemde ye 1 Corinth 7:39, didie ke Abasi ekeme ndidi udeme nnyịn?
16 Usụn̄ en̄wen emi mme Christian ẹdidade ẹsịn uduak Abasi ke esịt mmọ edi ke ndinam item Bible oro ọdọhọde ẹdọ ndọ “ke Ọbọn̄ ikpọn̄-ikpọn̄.” (1 Cor. 7:39) Ediwak owo ẹmek nditre ndidọ ndọ utu ke ndibiat ibet Abasi emi. Abasi esinen̄ede ama utọ mbon oro. Nso ke David akanam ke ini enye ekekerede ke idi ikpọn̄ ye ke imọ inyụn̄ inyeneke un̄wam ndomokiet? Enye ọkọdọhọ ete: “Ntịn̄ mfịna mi nnọ [Abasi]; ntịn̄ nnanenyịn mi nnọ enye, ke ini spirit mi akpade mba ke esịtidem mi.” (Ps. 142:1-3) Ekeme ndidi ama etie prọfet Jeremiah ke idem ntre n̄ko; enye ikọdọhọ ndọ edi ama ọsọn̄ọ ada anam n̄kpọ Abasi ke ediwak isua. Afo emekeme ndikpep uwụtn̄kpọ esie nte ẹnemede ke ibuot 8 ke n̄wed oro Ikọ Emi Abasi Adade Jeremiah Etịn̄ Ọnọ Nnyịn.
17. Didie ke eyenete an̄wan kiet oro mîdọhọ ndọ esikan ndobo?
17 Eyenete an̄wan kiet ke United States ọdọhọ ete: “Akananam mbiereke ke ndidọhọ ebe. Mmeben̄e idem ndidọ ebe ini ekededi oro n̄kụtde owo eke odotde. Eka mi emi mînịmke ke akpanikọ ama odomo ndikpek mi ndọ owo ekededi oro obụpde mi ndọ. Mma mbụp enye m̀mê enye eyenyịme ke imọ idi ntak edieke ndọ oro abiarade. Nte ini akakade enye ama okụt ke mmenyene eti utom, ke mma nse mban̄a idem mi, nnyụn̄ n̄kop inemesịt. Enye ikakpakke mi aba.” Eyenete an̄wan emi esikop ndobo ndusụk ini. Enye ọdọhọ ete: “Ini oro, mmesidomo ndibuọt idem ye Jehovah. Akananam enye ikpọn̄ke mi.” Nso in̄wam enye ọbuọt idem ke Jehovah? “Akam esinam mi nda Abasi nte ata owo nnyụn̄ ndiọn̄ọ ke ndụhe ikpọn̄. Andikon̄ N̄kan ke ofụri ekondo ke akpan̄ utọn̄ ọnọ mi, ntre ntak emi mmen̄kpadiaha ukpono nnyụn̄ n̄kop inemesịt?” Sia eyenete an̄wan emi ọfiọkde ke “inemesịt odu ke ndinọnọ akan ke ndibọbọ,” enye ọdọhọ ete: “Mmesidomo ndisịn idem n̄n̄wam mbon en̄wen, nnyụn̄ ndorike enyịn ndibọ n̄kpọ. Mma n̄kere nte, ‘Nso ke n̄kpananam man n̄n̄wam owo emi?’ Esịt esidat mi etieti.” (Utom 20:35) Ke akpanikọ, enye ada Jehovah nte udeme esie, ndien enye ke okop idatesịt ndinam n̄kpọ Abasi.
18. Didie ke Jehovah ekeme ndinam fi edi udeme esie?
18 Ke idaha ekededi oro odude, afo emekeme ndida Abasi nte udeme fo. Nte afo anamde oro, afo eyesịne ke otu ikọt esie oro ẹkopde inemesịt. (2 Cor. 6:16, 17) Oro ekeme ndinam fi edi udeme Jehovah, nte mme owo ẹkedide ke eset. (Kot Deuteronomy 32:9, 10.) Kpasụk nte Israel ekedide inyene Abasi ke otu mme idụt, Abasi ekeme ndimek fi nte inyene esie onyụn̄ ada ima ese aban̄a fi.—Ps. 17:8.
[Ikọ Idakisọn̄]
^ ikp. 11 Se Awake! eke November 2009, page 12-14.
Didie ke Afo Ọkpọbọrọ?
Didie ke afo ekeme ndida Jehovah nte udeme fo
• ke ndibem iso nyom Obio Ubọn̄ Abasi ye edinen ido esie?
• ke ndiwụt esịtekọm mban̄a udia eke spirit?
• ke ndinam ewụhọ Abasi oro ọdọhọde ẹdọ ndọ ke Ọbọn̄ ikpọn̄-ikpọn̄?
[Mme Mbụme Ukpepn̄kpọ]
[Se ẹwetde ẹban̄a ndise ke page 13]
Jehovah esidi udeme nnyịn ke ini inamde utom esie edi akakan n̄kpọ ọnọ nnyịn
[Nndise ke page 15]
Uwụtn̄kpọ Jeremiah esịn udọn̄ ọnọ nnyịn
