Kpebe Ime Jehovah ye Jesus

“Ẹbat ẹte ke ime Ọbọn̄ nnyịn ọwọrọ edinyan̄a.”​—2 PET. 3:15.

DIDIE KE AFO ỌKPỌBỌRỌ?

Didie ke Jehovah owụt ke imọ imenyene ime?

Ntak emi okoyomde Jesus eme ime ke anyan ini?

Nso ye nso ke ikeme ndinam man inen̄ede inyene ime nte Abasi?

1. Nso mbụme ke ndusụk mme anam-akpanikọ asan̄autom Abasi ẹsibụp?

 ANAM-AKPANIKỌ eyenete an̄wan emi ọkọyọde ediwak idomo ke ediwak isua ama obụp mbọm mbọm ete: “Ndi nyodu n̄kụt utịt?” Ndusụk mbon emi ẹnamde n̄kpọ Jehovah ke ediwak isua ẹsibụp ukem mbụme emi. Esinen̄ede ọdọn̄ nnyịn ndikụt usen emi Abasi edinamde kpukpru n̄kpọ ẹdi mbufa, onyụn̄ etre kpukpru mfịna oro isobode idahaemi. (Edi. 21:5) Okposụkedi emi inyenede ekese ntak ndinịm ke utịt editịm n̄kpọ Satan enen̄ede ekpere, ekeme ndisọn̄ ndinyene ime ntie mbet usen oro.

2. Mme mbụme ewe oro ẹban̄ade ime ke ẹdibọrọ ke ibuotikọ emi?

² Edi Bible ọdọhọ ke ana inyene ime. Ukem nte mme asan̄autom Abasi ke eset, nnyịn idibọ se Abasi ọn̄wọn̄ọde edieke inyenede ọkpọsọn̄ mbuọtidem inyụn̄ inyene ime itie ibet ini emi mme un̄wọn̄ọ emi ẹdisude. (Kot Mme Hebrew 6:11, 12.) Jehovah ke idemesie enyene ime. Enye ekpetre idiọkido ini ekededi, edi enye ebet nnennen ini. (Rome 9:20-24) Ntak emi enye enyenede ime ntre? Didie ke Jesus ekpebe ime Ete esie onyụn̄ enịm uwụtn̄kpọ ọnọ nnyịn? Nso ufọn ke idibọ edieke ikpebede ime Abasi? Ibọrọ mbụme emi ẹkeme ndin̄wam nnyịn inyene ime ye ọkpọsọn̄ mbuọtidem, idem edieke etiede nnyịn nte ke Jehovah anam ubịghi.

NTAK EMI JEHOVAH ENYENEDE IME?

3, 4. (a) Ntak emi Jehovah enyenede ime ke nte enye osude uduak esie kaban̄a isọn̄? (b) Didie ke Jehovah akanam n̄kpọ aban̄a nsọn̄ibuot oro ke Eden?

³ Jehovah enyene eti ntak ndinyene ime. Edi akpanikọ ke enye enyene odudu akan ke ofụri ekondo; kpa ye oro, nsọn̄ibuot oro ke Eden ama edemede  mme ata akpan mbụme. Jehovah enyene ime ke ofụri ini emi, sia enye ọfiọk ke ayada ini ndibọrọ mbụme oro ke mfọnmma usụn̄. Sia enye enen̄erede ọfiọk mme edinam ye mme edu owo ye eke mme angel, ke akpanikọ, enye anam n̄kpọ ke usụn̄ oro edinen̄erede ifọn ye nnyịn.—Heb. 4:13.

⁴ Jehovah okoyom nditọ Adam ye Eve ẹyọhọ isọn̄. Ke ini Satan akatapde Eve, Adam onyụn̄ ọsọn̄de ibuot ye Abasi, Abasi iketreke se Enye akaduakde. Idem ikenyekke enye, enye ikobụmekede inam ubiere, m̀mê ndinam se mîkpanamke nnyụn̄ nsion̄o idem n̄kpọn̄ ubonowo. Utu ke oro, enye ama osio usụn̄ edi ndida nnam se enye akaduakde aban̄a owo ye isọn̄. (Isa. 55:11) Man Jehovah osu uduak esie onyụn̄ owụt ke ukara imọ enen, enye emenyene akwa mfara ke idem ye ime, akam ebetde ke ediwak tọsịn isua man ndusụk ikpehe uduak esie ẹsu.

5. Nso edidiọn̄ ke ime Jehovah ada edi?

⁵ Ntak en̄wen emi Jehovah emede ime edi man ediwak owo ẹkpenyene nsinsi uwem. Idem idahaemi, enye ke anam ndutịm man akpanyan̄a “akwa otuowo.” (Edi. 7:9, 14; 14:6) Jehovah ada utom ukwọrọikọ nnyịn okot mme owo ete ẹdikpep n̄kpọ ẹban̄a Obio Ubọn̄ esie ye ndinen edumbet esie. Etop Obio Ubọn̄ edi mfọnn̄kan mbụk oro ubonowo ẹkemede ndikop—ih, enye edi “eti mbụk.” (Matt. 24:14) Kpukpru owo oro Jehovah odụride ada ẹkabade ẹdi mme andibuana ke esop ofụri ererimbot emi mme ata ufan emi ẹmade se inende ẹnamde. (John 6:44-47) Edima Abasi nnyịn an̄wam utọ mme owo oro ẹnyene unyịme esie. Enye ke emek n̄ko mbon oro ẹditienede ẹkara ke Obio Ubọn̄ esie ke heaven osio ke otu ubonowo. Ke mmọ ẹma ẹkebọ itie mmọ ke heaven, mmọ ẹyen̄wam okopitem ubonowo ke isọn̄ ẹsịm mfọnmma ẹnyụn̄ ẹnyene nsinsi uwem. Mmọdo, okposụkedi emi Jehovah enyenede ime ebet, enye ke anam n̄kpọ man osu uduak esie, ndien emi edi ke ufọn nnyịn.

6. (a) Didie ke Jehovah ekenyene ime ke eyo Noah? (b) Didie ke Jehovah enyene ime ke eyo nnyịn?

⁶ Jehovah enyene ime kpa ye oro ẹsọn̄ọde enye enyịn idiọk idiọk, nte ikemede ndikụt ke nte enye akanamde n̄kpọ aban̄a idiọkido mbemiso Ukwọ. Oburobụt ido ye afai ẹma ẹyọhọ isọn̄ ini oro, “esịt [ama] onyụn̄ ayat” Jehovah ke ntak emi mme owo ẹkediọkde ntre. (Gen. 6:2-8) Enye ikọyọhọ oro ke nsinsi, ntre enye ama ebiere ndida Ukwọ nsobo ubonowo. Ke adan̄aemi “ime Abasi ekebetde ke eyo Noah,” Jehovah ama anam ndutịm man anyan̄a Noah ye ubon esie. (1 Pet. 3:20) Ke nnennen ini, Jehovah ama ọtọt Noah aban̄a ubiere esie onyụn̄ ọdọhọ enye ọkọn̄ ubom. (Gen. 6:14-22) Ke adianade do, Noah ekedi “ọkwọrọ edinen ido,” asian mme mbọhọidụn̄ esie nsobo oro akasan̄ade ekpere. (2 Pet. 2:5) Jesus ọkọdọhọ ke eyo nnyịn ebiet eyo Noah. Jehovah ebiere ini emi enye edidade utịt isọk idiọk editịm n̄kpọ emi. Idụhe owo emi ọfiọkde “usen ye hour” emi utịt oro edidide. (Matt. 24:36) Edi idahaemi, utom emi Abasi ọnọde nnyịn edi ndidụri mme owo utọn̄ nnyụn̄ nsian mmọ nte mmọ ẹkemede ndibọhọ.

7. Ndi Jehovah ọnuọn ndisu un̄wọn̄ọ esie? Nam an̄wan̄a.

⁷ Ime Jehovah iwọrọke ke enye awawan̄ ubọk etie ebet ini ekem. Nsa-o, nnyịn ikpadaha ime esie nte unana udọn̄ m̀mê ke enye ikereke iban̄a nnyịn! Edi ke nditịn̄ akpanikọ, ekeme ndisọn̄ nditi emi nte nnyịn idụkde idem akwa owo m̀mê isobode ndutụhọ ke idiọk editịm n̄kpọ emi. Idem ekeme ndimem nnyịn  mîdịghe imekeme ndikere ke Abasi ọnuọn ndisu un̄wọn̄ọ esie. (Heb. 10:36) Kûdedei ufre ke Abasi enyene nti ntak ndinyene ime ye nte ke enye ada ini emi anam n̄kpọ ke usụn̄ oro edifọnde ye mme asan̄autom esie oro ẹsọn̄ọde ẹda. (2 Pet. 2:3; 3:9) Kere ban̄a n̄ko nte Jesus ekenyenede ime nte Abasi.

DIDIE KE JESUS ENỊM ETI UWỤTN̄KPỌ IME?

8. Nso ke Jesus ekenyene ime ọyọ?

⁸ Jesus ke anam uduak Abasi, ndien enye enen̄ede okop inemesịt ndinam emi ke anana-ibat isua idahaemi. Ke ini Satan ọkọsọn̄de ibuot, Jehovah ama ebiere ndinam ikpọn̄-ikpọn̄ edibon Eyen esie edi isọn̄ nte Messiah. Kere se oro ọkọwọrọde ọnọ Jesus—enye ekenyene ndibet ke ediwak tọsịn isua tutu ini oro ekem. (Kot Galatia 4:4.) Enye ikawan̄ke-wan̄ ubọk itie ibet ini oro, edi ama aka iso anam utom emi Ete esie ọkọnọde enye. Ke ini enye ekedide isọn̄, enye ama ọdiọn̄ọ ke ẹma ẹtetịn̄ ẹnịm ke Satan enyene ndiwot imọ. (Gen. 3:15; Matt. 16:21) Enye ama enyene ime, osụhọde idem anam uduak Abasi, kpa ye oro ndinam uduak Abasi akanamde enye okop ọkpọsọn̄ ubiak. Enye ekedi akakan Uwụtn̄kpọ nsọn̄ọnda. Enye ikekereke iban̄a idemesie ye itie esie nte Eyen Abasi, ndien nnyịn ikpenyene ndikpebe enye.—Heb. 5:8, 9.

9, 10. (a) Nso ke Jesus anam ke adan̄aemi enye enyenede ime ebet Jehovah anam uduak esie? (b) Didie ke ikeme ndikpebe Jesus?

⁹ Ke Jesus ama ekeset ke n̄kpa, ẹma ẹnọ enye odudu ke heaven ye ke isọn̄. (Matt. 28:18) Enye ada odudu emi anam uduak Jehovah ke ini emi Jehovah enịmde. Jesus ama enyene ime ebet ke ubọk nnasia Abasi tutu ke 1914 man ẹda mme asua esie ẹnịm nte udoriukot esie. (Ps. 110:1, 2; Heb. 10:12, 13) Enye ọmọn̄ ọsọsọp anam n̄kpọ man osobo editịm n̄kpọ Satan. Edi idahaemi, Jesus ke enyene ime an̄wam mme owo man ada mmọ aka “obube mmọn̄ uwem.”—Edi. 7:17.

¹⁰ Ndi emi owụt fi nte ekemede ndikpebe Jesus? Imenen̄ede idiọn̄ọ ke Jesus ekesidu ke mben̄eidem ndinam se ededi emi Ete esie oyomde enye anam, edi enye ama enyịme ndibet tutu ekem ini emi Abasi oyomde ẹnam n̄kpọ. Ke emi itiede ibet utịt idiọk editịm n̄kpọ Satan emi, enen̄ede oyom ikpebe ime Jesus, ikûnam n̄kpọ ube ndausụn̄ Abasi, ikûnyụn̄ utre ndinam n̄kpọ Abasi ke ntak mmemidem. Didie ke ikeme ndikpebe ime Abasi?

DIDIE KE N̄KEME NDIKPEBE IME ABASI?

11. (a) Nso ebuana idu ke ufọt ime ye mbuọtidem? (b) Ntak emi nnyịn inyenede nti ntak ndinyene ọkpọsọn̄ mbuọtidem?

¹¹ Idem mbemiso Jesus ekedide isọn̄, mme prọfet ye mme anam-akpanikọ asan̄autom Abasi eken ẹma ẹwụt nte mme anana-mfọnmma owo ẹkemede ndinyene ime. Mbuọtidem mmọ ama enyene ebuana ye ime mmọ. (Kot James 5:10, 11.) Edieke mmọ mîkpekenen̄ekede inịm se Jehovah eketịn̄de ọnọ mmọ—oro edi, edieke mmọ mîkpekenyeneke mbuọtidem—ndi mmọ ẹkpekenyene ime ẹbet Abasi osu mme un̄wọn̄ọ esie? Mmọ ẹma ẹsiwak ndiyọ enyene-ndịk m̀mê n̄kpọsọn̄ idomo sia mmọ ẹma ẹnyene mbuọtidem ke Abasi oyosu mme un̄wọn̄ọ esie. (Heb. 11:13, 35-40) Nnyịn imakam inyene ekese ntak ndinen̄ede nnyene mbuọtidem, koro idahaemi Jesus edi “Andinam mbuọtidem nnyịn ọfọn ama.” (Heb. 12:2) Enye ama osu ntịn̄nnịm ikọ onyụn̄ ayarade mme uduak Abasi ke usụn̄ oro anamde inyene nti ntak ndinyene mbuọtidem.

12. Nso ke ikpanam man isọn̄ọ mbuọtidem nnyịn?

 ¹² Nso idi ndusụk n̄kpọ emi ikemede ndinam man isọn̄ọ mbuọtidem nnyịn, emi okponyụn̄ anam nnyịn inen̄ede inyene ime? Akpan n̄kpọ kiet edi ndinam item Abasi. Ke uwụtn̄kpọ, kere ban̄a ntak emi enyenede ndinịm Obio Ubọn̄ Abasi nte akpa n̄kpọ ke uwem fo. Ndi emekeme ndinen̄ede nsịn ukeme nnam item oro odude ke Matthew 6:33? Oro ekeme ndiwọrọ ndidu ke an̄wautom mbịghi m̀mê ndinam mme ukpụhọde ke uwem fo. Kûda edidiọn̄ emi Jehovah ọdiọn̄de fi ke ekpri n̄kpọ. Ekeme ndidi enye an̄wam fi ọtọn̄ọ obufa ukpepn̄kpọ Bible mîdịghe ọnọ fi “emem Abasi emi akande kpukpru ekikere.” (Kot Philippi 4:7.) Ama ekere aban̄a mme ufọn emi ọbọde ke ndinam item Jehovah, ọyọfiọk ke ọfọn enyene ime.—Ps. 34:8.

13. Nso uwụtn̄kpọ ke ikeme ndinọ mban̄a edinen̄ede nnyene mbuọtidem ye ime?

¹³ N̄kpọ emi onyụn̄ etie nte nditọ n̄kpọ ke in̄wan̄, nse mban̄a, nnyụn̄ ndọk. Kpukpru ini emi ọtọin̄wan̄ enyenede ekese idọk, enye esinen̄ede enyene mbuọtidem nditọ n̄kpọ isua en̄wen. Edi enye enyene ndinyene ime ntie mbet ini idọk oro, edi oro idikpanke enye nditọ n̄kpọ, enye akam ekeme nditọ n̄kpọ ke in̄wan̄ oro okponde akan eke isua oro ekebede. Enye enyene mbuọtidem ke iyọdọk. Kpasụk ntre, nte nnyịn ikpepde item Jehovah, inamde enye, inyụn̄ ibọde mme ufọn, nnyịn iyọdọdiọn̄ ibuọt idem ke Jehovah. Kpa ntre ke mbuọtidem nnyịn edikọri onyụn̄ emem nnyịn utom nditie mbet mme edidiọn̄ oro ifiọkde ke ẹyedi.—Kot James 5:7, 8.

14, 15. Oyom ise ndutụhọ ubonowo didie?

¹⁴ N̄kpọ en̄wen oro ekemede ndinam nnyịn inyene ime edi ndikere nte ikpesede ererimbot ye mme ọkpọkpọ idaha nnyịn. Domo ndise n̄kpọ nte Jehovah  esede. Ke uwụtn̄kpọ, kere ban̄a nte enye esede ndutụhọ ubonowo. Ndutụhọ oro esịmde ubonowo abiak enye ke ata anyan ini, edi oro ibiakke enye tutu enye etre ndinam se inende. Enye ama ọnọ ikpọn̄-ikpọn̄ edibon Eyen esie edi “man [edibiat] utom Devil” onyụn̄ etre kpukpru ndutụhọ oro Satan adade ọsọk ubonowo. (1 John 3:8) Se idude edi ke ndutụhọ emi edidi ke ibio ini, edi Abasi editre enye ke nsinsi. Kpasụk ntre, utu ke ndiyak idiọkido ukara Satan akan nnyịn ubọk m̀mê anam nnyịn inana ime iban̄a ini emi utịt edidide, ẹyak inyene mbuọtidem ke mme n̄kpọ oro enyịn mîkwe emi ẹdidude ke nsinsi. Jehovah emenịm akpan ini emi enye editrede idiọkido, ndien enye edinam ntre ke ata nnennen ini.—Isa. 46:13; Nah. 1:9.

¹⁵ Ke mme akpatre usen afanikọn̄ editịm n̄kpọ emi, imekeme ndisobo mme n̄kpọ emi ẹnen̄erede ẹdomo mbuọtidem nnyịn. Utu ke ndiyat esịt edieke nnyịn m̀mê owo nnyịn okụtde ndutụhọ ke ntak afai, oyom ibiere ndibuọt idem ofụri ofụri ke Jehovah. Nnyịn idi mme anana-mfọnmma owo, ntre imemke utom ndinam oro. Edi ti se Jesus akanamde, nte ẹwetde ke Matthew 26:39.—Kot.

16. Nso ke ana ifep ndinam ke ini oro osụhọde mi?

¹⁶ N̄kpọ oro ekemede ndinam owo etre ndinyene ime edi ndinyene edu edidọhọ yak ise ise m̀mê eyetịbe. Nso ke oro ọwọrọ? Ọfọn, owo emi mînịmke ke utịt ekpere ekeme ndikere ke ana inam ndutịm idem imọ ndusụk n̄kpọ itịbeke nte Jehovah ọkọdọhọde. Ke usụn̄ en̄wen, enye ekeme ndikere ete, ‘Nyese ise m̀mê Jehovah ayanam se enye ọkọdọhọde.’ Do, enye ekeme ndidomo ndinam enyịn̄ nnọ idemesie ke ererimbot emi, ndiyom ndinyene ekese okụk utu ke ndinịm Obio Ubọn̄ Abasi akpa, m̀mê ndibuọt idem ke ufọkn̄wed ntaifiọk man idu edinem uwem idahaemi. Edi ndi idịghe unana mbuọtidem edi emi? Ti ete ke Paul eketeme nnyịn ete idi mme andikpebe mme anam-akpanikọ asan̄autom Abasi oro ẹkebọde un̄wọn̄ọ Jehovah “[oto] ke mbuọtidem ye ime.” (Heb. 6:12) Jehovah idiyakke idiọk editịm n̄kpọ emi ebịghi akan nte ekpebịghide, nte ekemde ye uduak esie. (Hab. 2:3) Kan̄a ke emi, ana ifep edu nnam-se-n̄kemede ke utom Jehovah. Utu ke oro, ana idu ke edidemede inyụn̄ isịn ifịk ikwọrọ eti mbụk, emi ọnọde owo idatesịt oro mînyeneke mbiet idahaemi.—Luke 21:36.

NSO EDIDIỌN̄ KE IME ADA EDI?

17, 18. (a) Nso ifet ke inyene ke adan̄aemi inyenede ime itie ibet? (b) Nso edidiọn̄ ke inyene ke ndinyene ime idahaemi?

¹⁷ Edide imanam n̄kpọ Abasi ke ọfiọn̄ ifan̄ m̀mê ke ata ediwak isua, iyom ndinam n̄kpọ esie ke nsinsi. Ime ayan̄wam nnyịn iyọ tutu inyene edinyan̄a, inamke n̄kpọ m̀mê idibet ebịghi adan̄a didie. Jehovah ọnọ nnyịn ifet idahaemi ndiwụt ọyọhọ mbuọtidem ke mme ubiere esie nnyụn̄ nnyịme ndibiom ukụt ke ntak enyịn̄ esie, edieke oyomde inam ntre. (1 Pet. 4:13, 14) Abasi ke ọnọ nnyịn n̄ko ukpep oro ekemede ndin̄wam nnyịn inyene ime oro oyomde man inyene edinyan̄a.—1 Pet. 5:10.

¹⁸ Jesus enyene kpukpru odudu ke heaven ye ke isọn̄, ndien idụhe n̄kpọ oro ekemede ndiwamade fi mbọ enye ke ubọk—ibọhọke afo ke idemfo. (John 10:28, 29) Ufọn idụhe ndikop ndịk mban̄a ini iso m̀mê n̄kpa. Ẹyenyan̄a mbon oro ẹnyenede ime ẹyọ tutu esịm utịt. Ntre, ana ikụt ite ke nnyịn iyakke ererimbot emi atap nnyịn onyụn̄ anam nnyịn itre ndiberi edem ke Jehovah. Utu ke oro, ana ibiere ndikọri ke mbuọtidem nnyụn̄ nda ini oro Abasi emede ime nnam n̄kpọ ọniọn̄ ọniọn̄.—Matt. 24:13; kot 2 Peter 3:17, 18.

[Mme Mbụme Ukpepn̄kpọ]

[Mme ndise ke page 21]

Ime Abasi ayanam fi owụk ntịn̄enyịn ke mme n̄kpọ Obio Ubọn̄ onyụn̄ ọbọ mme edidiọn̄!