“Mme Odudụn̄” Ẹdiana Kiet Ẹtuak Ibuot Ẹnọ Abasi
“Mme Odudụn̄” Ẹdiana Kiet Ẹtuak Ibuot Ẹnọ Abasi
“Mbon esenidụt ẹdidi mme ọtọin̄wan̄ mbufo ye mme ọdiọn̄ vine mbufo. Ndien amaedi mbufo, ẹdikot mbufo mme oku Jehovah.”—ISA. 61:5, 6.
DIDIE KE AFO ỌKPỌBỌRỌ?
Ndusụk owo ẹda didie mbon esenidụt, edi nso ke Bible ekpep nnyịn aban̄a emi?
Nso ikot ke ẹnọ mme owo ke kpukpru idụt?
Ntak emi ẹkemede ndidọhọ ke nnyịn imọtọn̄ọ ndikụt nte ererimbot emi owo ndomokiet mîdidịghe owo esenidụt editiede?
1. Didie ke ndusụk owo ẹda mbon esenidụt, edi ntak emi oro mîfọnke?
NTE ẹkewụtde ke ibuotikọ oro ekebede, mme owo imaha isenowo, m̀mê mbon esenidụt. Mmọ ẹkeme ndikere ke mmimọ imọfọn n̄kpọ ikan mbon emi. Edi ifọnke ndikere ntre. Idụhe owo emi ọfọnde n̄kpọ akan owo en̄wen. Ekpri n̄wed emi ẹkotde The Races of Mankind ọdọhọ ete: “Mme owo ẹto nsio nsio orụk, edi kpukpru mmọ ẹdi nditọeka nte Bible etịn̄de.” Kpa ye emi nditọeka ẹkemede ndinen̄ede n̄kpụhọde ye kiet eken, mmọ ẹsụk ẹdi nditọeka.
2, 3. Jehovah ese didie mbon esenidụt?
2 Idụhe ebiet emi esenowo mîdụhe ke ererimbot emi. Isenowo ẹma ẹdụn̄ ke idụt Israel eset, emi Ibet ediomi akanamde ẹdi san̄asan̄a inyene Jehovah Abasi. Okposụkedi emi isenowo emi mîketieneke idi san̄asan̄a inyene, nditọ Israel ẹkenyene ndikpono nnyụn̄ nnam n̄kpọ ye mmọ ke eti usụn̄. Ata eti uwụtn̄kpọ emi nnyịn ikpekpebede edi emi. Ikpanaha ata mme Christian ẹnam asari. Ntak-a? Apostle Peter ọkọdọhọ ete: “Ke akpanikọ mmokụt nte Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.
3 Isenowo emi ẹkedụn̄de ke idụt Israel ẹma ẹdia ufọn idụt oro. Se apostle Paul eketịn̄de ke ediwak isua ẹma ẹkebe owụt nte Jehovah esede mbon esenidụt. Enye okobụp ete: “Nte enye edi Abasi mme Jew ikpọn̄? Nte enye idịghe eke mbon idụt n̄ko? Ih, edi eke mbon idụt n̄ko.”—Rome 3:29; Joel 2:32.
4. Ntak emi ẹkemede ndidọhọ ke esenowo idụhe ke “Israel Abasi”?
4 Obufa ediomi anam esop mme Christian oro ẹyetde aran ada itie idụt Israel eset emi ekenyenede ndidi san̄asan̄a inyene Abasi. Ntem, ẹkot esop mme Christian oro ẹyetde aran “Israel Abasi.” (Gal. 6:16) Ndien Paul ọkọdọhọ ke enye edi esop “emi Greek m̀mê Jew, edina mbobi m̀mê unana edina mbobi, esenowo m̀mê owo Scythia m̀mê ofụn m̀mê amanaisọn̄ mîdụhe ke enye, edi [ke] Christ edi kpukpru n̄kpọ onyụn̄ odu ke kpukpru owo.” (Col. 3:11) Ke ntre, owo ikenyeneke ndise owo ndomokiet ke esop Abasi nte owo esenidụt.
5, 6. (a) Nso mbụme ke ẹkeme ndibụp mban̄a Isaiah 61:5, 6? (b) Mmanie ẹdi “mme oku Jehovah” ye “mbon esenidụt” oro Isaiah etịn̄de aban̄a? (c) Nso utom ke otu mbiba emi ẹnam?
5 Edi owo ekeme ndibụp m̀mê nso kaban̄a ntịn̄nnịm ikọ oro odude ke Isaiah ibuot 61 emi osude ke esop Christian mfịn. Ufan̄ikọ 6 etịn̄ aban̄a mbon emi ẹdidide “mme oku Jehovah.” Edi ufan̄ikọ 5 etịn̄ aban̄a “mbon esenidụt,” emi ẹdidianade ye “mme oku” emi ẹnam utom. Nso ke ntịn̄nnịm ikọ emi ọwọrọ?
6 “Mme oku Jehovah” emi ẹdi mme Christian emi ẹyetde aran, emi ẹnyenede udeme ke “akpa ediset ke n̄kpa.” Mmọ “ẹyedi mme oku Abasi ye Christ, ẹyenyụn̄ ẹkara nte ndidem ye enye ke isua tọsịn kiet.” (Edi. 20:6) Ke adianade do, odu mme anam-akpanikọ Christian emi ẹnyenede idotenyịn ndidu uwem ke isọn̄. Okposụkedi emi mmọ ẹdianade ye mbon emi ẹdikade heaven ẹnam n̄kpọ Abasi, mmọ ẹtie nte mbon esenidụt sia mmọ mîsịneke ke otu “Israel Abasi.” Mmọ ẹkop inemesịt ndin̄wam “mme oku Jehovah” nnam utom nte “mme ọtọin̄wan̄” ye “mme ọdiọn̄ vine.” Mmọ ke ẹkwọrọ ikọ ẹnyụn̄ ẹkpep mme owo akpanikọ, ke ntem, ẹn̄wam mbon oro ẹyetde aran ndinọ Abasi ubọn̄. Ke nditịm ntịn̄, mme Christian oro ẹyetde aran ye “mme erọn̄ en̄wen” ẹsika ẹkeyom mbon emi ẹnyenede esịt akpanikọ, emi ẹkpenyụn̄ ẹmade ndikpono Abasi ke nsinsi, ẹkpep mmọ ndinam emi.—John 10:16.
“MME ODUDỤN̄” NTE ABRAHAM
7. Didie ke mme Christian mfịn ẹbiet Abraham ye mme an̄am-akpanikọ asan̄autom Abasi eken ke eset?
7 Nte iketịn̄de ke ibuotikọ emi ekebede, ata mme Christian ẹdi mbon esenidụt m̀mê mme odudụn̄ ke ererimbot Satan. Mmọ ẹnyụn̄ ẹtie nte Abraham ye mme anam-akpanikọ asan̄autom Abasi eken ke eset, emi ẹkedọhọde ke “[ẹdi] isenowo ye mme odudụn̄ ke isọn̄.” (Heb. 11:13) Edide ididu ke heaven m̀mê ke isọn̄, nnyịn imetiene inyene ifet ndidi ufan Jehovah nte Abraham ekedide. James ọkọdọhọ ete: “Abraham ọbuọt idem ye Jehovah, ndien ẹbat oro ẹnọ enye ke edinen ido, ẹnyụn̄ ẹkot enye ‘ufan Jehovah.’”—Jas. 2:23.
8. Nso ke Abasi ọkọn̄wọn̄ọ ọnọ Abraham, ndien didie ke Abraham akada un̄wọn̄ọ emi?
8 Abasi ama ọn̄wọn̄ọ ke iyada Abraham ye ubon esie idiọn̄ kpukpru mme ubon ke isọn̄, idịghe idụt kiet kpọt. (Kot Genesis 22:15-18.) Kpa ye emi un̄wọn̄ọ Abasi emi ekenyende ndisu ke ata ini iso, Abraham ama enyene mbuọtidem ke enye oyosu. Ke ofụri isua 100, ekedi Abraham odụn̄ mi ọwọrọ okodụn̄ ko. Ndien enye iketreke ndidi ufan Jehovah ke ofụri ini emi.
9, 10. (a) Siak mme usụn̄ emi ikemede ndikpebe Abraham. (b) Nso ikot ke nnyịn ikeme ndinọ mme owo?
9 Abraham ama aka iso ama Jehovah onyụn̄ okpono enye kpa ye emi enye mîkọfiọkke ini emi un̄wọn̄ọ emi edisude. Enye okowụk ntịn̄enyịn ke un̄wọn̄ọ emi, iyomke nsinsi itieidụn̄ ke idụt ndomokiet. (Heb. 11:14, 15) Enen̄ede ọfọn ikpebe Abraham, idu mmemmem uwem; ikûkere ke ndinyene ediwak n̄kpọ, n̄wọrọ etop, nnyụn̄ nnyene eti ubọkutom edi akpan n̄kpọ akan ke uwem. Ufọn ndiyom ndidu se mme owo ẹkotde ata uwem ke ererimbot emi edide ọmọn̄ ebebe efep mi-e? Ufọn ndima ererimbot emi odude ke ibio ini mi-e? Kpa nte ekedide ye Abraham, se ididude ke ini iso ọfọn akan se idude idahaemi. Nnyịn iyom ndinyene ime ntie mbet ini emi mme un̄wọn̄ọ Abasi ẹdisude.—Kot Rome 8:25.
10 Jehovah ke osụk okokot mme owo ẹdibọ edidiọn̄ emi otode mfri Abraham. Ndien “mme oku Jehovah” emi ẹyetde aran ye mme erọn̄ en̄wen emi ẹtiede nte “mbon esenidụt” ke ẹtiene ẹnọ ikot emi ke se ibede usem 600 ke ofụri ererimbot.
MA KPUKPRU OWO
11. Nso ke Solomon ọkọdọhọ mbon esenidụt ẹnam?
11 Ke ini ẹkeyakde temple ẹnọ Abasi ke isua 1026 M.E.N., Solomon ama ọdọhọ ke mme owo ke kpukpru idụt ẹyetiene ẹditoro Jehovah man ekekem ye se Jehovah ọkọn̄wọn̄ọde ọnọ Abraham. Enye ọkọdọhọ ntem ke akam ofụri esịt emi enye ọkọbọn̄de: “Ndien, n̄ko, amaedi owo esenidụt emi mîdịghe kiet ke otu ikọt fo Israel, emi otode anyan idụt edi ke ntak enyịn̄ fo (koro mmọ ẹyekop ẹban̄a akwa enyịn̄ fo ye ọkpọsọn̄ ubọk fo ye edinyanade ubọk fo), ndien enye edi edibọn̄ akam ese ufọk emi, afo nyụn̄ tie ke heaven, kpa akpan ebietidụn̄ fo, kop, nyụn̄ nam kpukpru se owo esenidụt emi eben̄ede fi; man kpukpru owo ke isọn̄ ẹkpefiọk enyịn̄ fo ẹnyụn̄ ẹbak fi kpa nte ikọt fo Israel ẹnamde.”—1 Ndi. 8:41-43.
12. Ntak emi ndusụk owo ẹdade Mme Ntiense Jehovah nte “mbon esenidụt”?
12 Esenowo edi owo emi ọkpọn̄de idụt m̀mê obio esie okodụn̄ ke idụt m̀mê obio enwen. Mme Ntiense Jehovah ẹtie nte isenowo. Mmọ ẹdụn̄ ke nsio nsio idụt ke ererimbot, edi mmọ ẹda ẹnọ Obio Ubọn̄ Abasi kpọt ye Edidem esie Jesus Christ. Ke ntem, mmọ isisịnke idem ke mbubehe ukara, kpa ye emi mme owo ẹsidọhọde ke oro ifọnke.
13. (a) Didie ke ikeme nditre ndida mbon en̄wen nte mbon esenidụt? (b) Ndi Jehovah ama oyom owo ndomokiet edi owo esenidụt? Nam an̄wan̄a.
13 Ẹsiwak ndida nte mbon esenidụt ẹnamde n̄kpọ ndiọn̄ọ mmọ. Ẹkeme ndida usem, ido edinam, nte mmọ ẹtiede, ye idem nte mmọ ẹsịnede n̄kpọ ndiọn̄ọ mmọ. Edi se kpukpru owo ke ererimbot ẹdade ẹbiet kiet eken edi akpan n̄kpọ akan kpukpru n̄kpọ oro ẹsiakde mi. Ke nditịm ntịn̄, mme ukpụhọde emi ẹsinam ẹda owo nte owo esenidụt. Ndien edieke nnyịn mîdọn̄ke enyịn ke mme ukpụhọde emi, nnyịn ididaha owo nte esenowo. Edieke ofụri ererimbot emi ekpedide idụt kiet ndien andikara kiet onyụn̄ odu, owo ikpadaha owo ndomokiet nte owo esenidụt. Jehovah okoyom kpukpru owo ẹdiana kiet nte ubon kiet ke idak ukara kiet, oro edi, ukara esie. Ndi mme owo ẹkeme nditre ndida mbon en̄wen nte mbon esenidụt ke ererimbot idahaemi?
14, 15. Nso ke Mme Ntiense Jehovah ẹdiana kiet ẹnam?
14 Uma-idem ye asari okpon etieti ke ererimbot emi, ntre esinen̄ede enem mme owo ndikụt mbon emi ẹmade kpukpru owo. Imọfiọk ke imemke utom nditre asari. Ted Turner, andikọtọn̄ọ itieutom usuanetop CNN, etịn̄ aban̄a utom esie ye mme enyene-ifiọk owo emi ẹtode nsio nsio idụt. Enye ọdọhọ ete: “Se n̄kokụtde ke ini n̄kosobode ye mbon emi ama akpa mi idem. N̄kadaha aba mbon emi ẹtode idụt en̄wen nte ‘mbon esenidụt,’ edi nte ke kpukpru nnyịn ito ekondo kiet. Mma ntọn̄ọ ndida ikọ oro ‘esen’ nte idiọk ikọ, nnyụn̄ nnọ ewụhọ nte owo ndomokiet ke itieutom mi, edide anam utom m̀mê eneme nneme, okûdọhọ ke owo edi owo esenidụt.”
15 Mme Ntiense Jehovah ẹdi n̄kukụre mbon emi ẹsede mme owo ke ofụri ererimbot nte Abasi esede. Sia ẹkpepde ndise n̄kpọ nte Jehovah esede, emi anam mmọ ẹkpụhọde nte mmọ ẹsede ẹnyụn̄ ẹdade mme owo. Mmọ isuaha mbon obio en̄wen, inyụn̄ ikereke ke utọ mbon oro isinamke n̄kpọ Abasi ndien ke owo ikemeke ndibuọt idem ye mmọ. Esinenem mmọ ndikụt nsio nsio owo emi ẹnyenede nsio nsio ukeme. Ndi akanam emetie ekere aban̄a utọ akwa n̄kpọ emi Mme Ntiense Jehovah ẹnamde mi onyụn̄ ekere aban̄a ufọn emi afo adiade ke nditiene nnam ntre?
ERERIMBOT EMI OWO ESENIDỤT MÎDIDỤHE
16, 17. Uwem editie didie ye afo ke ini Ediyarade 16:16 ye Daniel 2:44 ẹdisude?
16 Ibịghike, kpukpru idụt ẹyen̄wana akpatre ekọn̄ ye ukara Abasi ke Armageddon. (Edi. 16:14, 16; 19:11-16) Ke se ikande isua 2,500 emi ẹkebede, Abasi ama ọnọ prọfet Daniel odudu spirit ndiwet se iditịbede inọ ukara owo emi ẹbiọn̄ọde uduak Abasi. Enye ekewet ete: “Ke eyo ndidem oro, Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”—Dan. 2:44.
17 Kere nte uwem editiede ye afo ini oro! Adan̄a obio, kpa se isinamde mme owo ẹda owo nte esenowo, ididụhe aba. Ẹdikabade ida nsio nsio iso, uduot idem, idet, ye mme n̄kpọ eken emi ẹnamde nnyịn ikpụhọde ye kiet eken nte utịbe utịbe usụn̄ emi Abasi obotde nnyịn ke uduot ke uduot. Utọ inem inem ini iso emi ekpenyene ndinam kpukpru nnyịn ika iso itoro inyụn̄ ikpono Jehovah Abasi, kpa Andibot nnyịn, adan̄a nte ikekeme.
18. Nso n̄kpọ iwụt ke Mme Ntiense Jehovah idaha kiet eken nte mbon esenidụt?
18 Ndi kpukpru owo ke ererimbot ẹkeme ndida kpukpru owo nte nditọeka mmọ? Ih, ẹkeme ndida. Ndien imenen̄ede inịm ke emi eyetịbe ke ini iso. Idem idahaemi, Mme Ntiense Jehovah isidaha nditọete mmọ emi ẹtode idụt en̄wen nte mbon esenidụt. Ke uwụtn̄kpọ, ke ndondo emi, ẹtọ n̄kpri n̄kpri n̄kọk itieutom mmọ ẹdian kiet man ẹnam emem utom ọnọ mmọ ndise mban̄a utom edikwọrọ eti mbụk Obio Ubọn̄. (Matt. 24:14) Idịghe adan̄a obio ke ẹkeda ẹbiere nte ẹkpenamde n̄kpọ emi, ibọhọke ke mme ebiet emi ibet obio oyomde ẹnam ntre. N̄kpọ en̄wen edi emi ndiwụt ke Jesus Christ, Edidem emi Jehovah emekde, ke an̄wam mme owo ẹtre asari, ndien enye ke idemesie ọmọn̄ “okụre edikan esie” ke mîbịghike.” —Edi. 6:2.
19. Nso ke edisana usem akpanikọ an̄wam mme owo ẹnam?
19 Mme Ntiense Jehovah ẹto nsio nsio idụt ẹnyụn̄ ẹsem nsio nsio usem, edi mmọ ẹsịn ifịk ẹnam edisana usem adian mmọ kiet. Mmọ ẹdiana ke usụn̄ emi n̄kpọ ndomokiet mîkemeke ndidian̄ade mmọ. (Kot Zephaniah 3:9.) Kpa ye emi mmọ ẹtode nsio nsio ebiet ke ererimbot, mmọ ẹdi ubon kiet; mmọ inyụn̄ idịghe ubak idiọk ererimbot emi. Ubon emi adianade kiet mi owụt nte obufa ererimbot editiede, nte ke owo ndomokiet ididịghe owo esenidụt. Kpukpru owo emi ẹdidude ini oro ẹyenyịme ke ofụri esịt ye se n̄wed oro The Races of Mankind etịn̄de: “Mme owo ẹto nsio nsio orụk, edi kpukpru mmọ ẹdi nditọeka nte Bible etịn̄de.”
[Mme Mbụme Ukpepn̄kpọ]
[Se ẹwetde ke ikpọ abisi ke page 28]
Ndi ọdọn̄ fi ndikụt ini emi adan̄a obio mîdidụhe aba, emi owo ndomokiet mîdidịghe owo esenidụt?
[Ndise ke page 25]
Ndi oyowụk ntịn̄enyịn ke mme un̄wọn̄ọ Abasi kpa nte Abraham okowụkde?
[Ndise ke page 27]
Jehovah idaha owo ndomokiet nte owo esenidụt
