KE 1923, mme owo ẹma ẹyọhọ ufọk emi ẹsisiode fim ẹnyụn̄ ẹbre ikwọ ke São Paulo ke Brazil. George Young ama ọtọn̄ọ ndinọ utịn̄ikọ ke edinem uyo esie, ndien owo ama akabade esịn ke usem Portuguese. Owo 585 emi ẹkedude ke ufọk oro ẹma ẹnen̄ede ẹkpan̄ utọn̄. Ẹma ẹsio mme itie N̄wed Abasi ke usem Portuguese ke ndise slide. Ke ẹma ẹkekụre utịn̄ikọ, ẹma ẹdeme ekpri ediye n̄wed emi ẹkotde Millions Now Living Will Never Die! ẹnọ owo 100. Ndusụk ẹkedi ke Ikọmbakara, ke usem German, ye ke usem Italian. Ẹma ẹnen̄ede ẹma utịn̄ikọ oro! Etop utịn̄ikọ oro ama asuana. Ke usen iba ẹbede, mme owo ẹma ẹfiak ẹkeyọhọ ufọk oro ke mbubreyo man ẹkop utịn̄ikọ en̄wen. Edi utom nnyịn eketie didie ke Brazil mbemiso ini oro?

Ke 1867, Sarah Bellona Ferguson ye ubon esie ẹma ẹkpọn̄ United States ẹka Brazil. Ke 1899, Sarah ama enịm ke imokụt akpanikọ ke ini enye okokotde mme n̄wed Ikọ Abasi emi ekpri eyeneka esie ekemende ke United States edi Brazil. Sia enye ekesimade ndikot n̄wed nnyịn, enye ama otobo Enyọn̄-Ukpeme Ikọmbakara. Se enye okokotde ama enem enye tutu enye ewet Brọda C. T. Russell ọdọhọ ke imokụt ke “idụhe ebiet emi owo odude emi akpanikọ mîkemeke ndisịm enye.”

Sarah Ferguson ama esisịn ukeme ekpep mme owo akpanikọ Bible, edi ama esikere m̀mê anie edin̄wam imọ, ubon imọ, ye mbon eken emi ẹnyenede eti esịt ke Brazil. Ke 1912, ibuot itieutom nnyịn ke Brooklyn ẹma ẹdọhọ enye ke owo ọmọn̄ ada ediwak tract emi ẹkotde Where Are the Dead? ke usem Portuguese edi São Paulo. Enye ọkọdọhọ ke 1915 ke idem ama esikpa imọ ndikop ke ediwak Nditọ Ukpepn̄kpọ Bible ẹdọhọ ke ẹmọn̄ ẹdada mmimọ ẹka heaven. Enye ama ewet obụp ete: “Nso kaban̄a Brazil ye ofụri South America? . . . Edieke mbufo ẹkerede nte South America okponde, ẹyekụt ke idọk ke okpokpon.” Ke akpanikọ, idọk ama onyụn̄ okpon!

 Ke n̄kpọ nte 1920, n̄kparawa itiaita emi ẹtode Brazil ẹma ẹdụk mbono esop ifan̄ ke New York City ke ini ẹkesụk ẹdiọn̄de nsụn̄ikan̄ ekọn̄ mmọ. Ke ini mmọ ẹkefiakde ẹnyọn̄ Rio de Janeiro, mmọ ẹma ẹtịn̄ mbufa n̄kpọ oro mmọ ẹkekpepde ke Bible ẹnọ mme owo. Ikebịghike, ke March 1923, George Young, emi ekedide akaisan̄ ido ukpono, m̀mê esenyịn oro asan̄ade-san̄a, ama ekesịm Rio de Janeiro, onyụn̄ okụt mbon emi ẹmade Ikọ Abasi. Enye ama anam ndutịm man ẹkabade mme n̄wed nnyịn ẹsịn ke usem Portuguese. Ikebịghike Brọda Young ama aka São Paulo, emi owo 600,000 ẹkedụn̄de ini oro. Enye ama ọnọ utịn̄ikọ do, onyụn̄ edeme ekpri ediye n̄wed oro iketịn̄de iban̄a ke ntọn̄ọ. Enye ekewet ete: “Sia mmekenyeneke eke an̄wamde mi, n̄kesida n̄wedmbụk n̄kpọntịbe n̄kot mme owo ẹdikop utịn̄ikọ mi.” Enye ọdọhọ ke utịn̄ikọ imọ ekedi akpa utịn̄ikọ emi I.B.S.A., n̄ka Nditọ Ukpepn̄kpọ Bible emi ibet Brazil enyịmede, ẹketọtde ke n̄wedmbụk n̄kpọntịbe. *

Enyọn̄-Ukpeme Ikọmbakara eke December 15, 1923 ama etịn̄ aban̄a Brazil, ete: “Ke ini itide ke ẹketọn̄ọ ukwọrọikọ ke Brazil ke June 1, ndien ke n̄wed nnyịn ikodụhe ke usem mmọ ini oro, imokụt ke Ọbọn̄ ọdiọn̄ utom nnyịn.” Enyọn̄-Ukpeme oro ama ọdọhọ n̄ko ke utịn̄ikọ iba oro Brọda Young ọkọnọde ke São Paulo esịne ke otu utịn̄ikọ 21 oro ẹkenọde ọtọn̄ọde ke June 1 esịm September 30, ndien ke owo 3,600 ẹkekop mme utịn̄ikọ emi. Etop Obio Ubọn̄ ama ọtọn̄ọ ndisuana ke Rio de Janeiro. Ndien ke ufan̄ ọfiọn̄ ifan̄ kpọt, ẹma ẹsuan n̄wed nnyịn emi awakde ebe 7,000 ke usem Portuguese! Ẹma ẹnyụn̄ ẹtọn̄ọ ndikabade Enyọn̄-Ukpeme ke usem Portuguese ọtọn̄ọde ye nsiondi eke November-December 1923.

George Young ama aka ekese Sarah Ferguson, ndien ẹma ẹwet se iketịbede ke Enyọn̄-Ukpeme ẹte: “Eyenete an̄wan emi ama ọwọrọ edida ke ufọtufọk, ikemeke ndisioro uyo. Enye ama omụm Brọda Young ubọk, enen̄ede ese enye iso, onyụn̄ obụp ete: ‘Ndi akaisan̄ ido ukpono ke nda enyịn mi n̄kụt emi?’” Ikebịghike, eyenete an̄wan emi ye ndusụk nditọ esie ẹma ẹna baptism. Ke nditịm ntịn̄, enye eketetie ebet baptism emi ke isua 25! Enyọn̄-Ukpeme eke August 1, 1924, ọkọdọhọ ke owo 50 ẹkena baptism ke Brazil, ndien ediwak mmọ ẹkena ke Rio de Janeiro.

Idahaemi isua 90 ama ekebe mi, idịghe-di se ẹbụpde ẹte, “Nso kaban̄a Brazil ye ofụri South America?” Se ibede Mme Ntiense Jehovah 760,000 ke ẹkwọrọ eti mbụk ke Brazil. Ndien ẹkop etop Obio Ubọn̄ Abasi ke usem Portuguese, Spanish, ye ediwak usem eken emi ẹsemde ke South America. Se Sarah Ferguson ọkọdọhọde ke 1915 ama enen, ‘Idọk okosụk okpokpon.’—Oto Itieutom Ubon N̄kani N̄kpọ Nnyịn ke Brazil.