KE INI ikọt Abasi ẹkekpọn̄de Babylon ẹnyọn̄ Jerusalem ke isua 537 mbemiso Christ, Jehovah ikoyomke n̄kpọ ndomokiet ọbiọn̄ọ mmọ ke usụn̄. Enye ọkọdọhọ mmọ ete: “Ẹdiọn̄ usụn̄ mme owo. Ẹkịbi ntan, ẹkịbi ntan ke ọkpọusụn̄. Ẹtan̄ mme itiat ẹsion̄o.” (Isa. 62:10) Kere nte ndusụk mme Jew ẹkenamde oro. Etie nte mbon oro ẹkesan̄ade iso ẹma ẹkịbi ntan ke ọkpọusun̄, oro edi, ẹda ntan ẹsịri itịghede ẹnyụn̄ ẹdiọn̄ mme itie oro mîfọnke. Oro ama an̄wam mbon eken oro ẹketienede mmọ ke edem ke isan̄ unyọn̄ Jerusalem.

Imekeme ndida emi ntịn̄ mban̄a usụn̄ oro owo asan̄ade tutu enye anam se ekebierede ndinam nnọ Abasi. Jehovah oyom mme asan̄autom esie ẹsan̄a ke usụn̄ emi ata ifụre ifụre. Enye ọdọhọ nnyịn ete: “Nam usụn̄ ukot fo ọdọnọ, nyụn̄ yak ofụri usụn̄ fo ọsọn̄ọ ada.” (N̄ke 4:26) Edide afo edi eyenọwọn̄ m̀mê ọmọtọn̄ọ ndikpon owo, anaedi omokụt ke eti item ke Abasi ọnọ nnyịn emi.

Ekeme ndidi emesikop mme owo ẹdọhọde ẹte: ‘Eyen oro edi ata eyen mfọniso’ m̀mê ‘Eyen oro ọdiọn̄ọ n̄wed n̄kwe kan̄a.’ Mme uyen isiwakke ndidọn̄ọ, ẹsifiọk n̄kpọ, ẹsinyụn̄ ẹnen̄ede ẹyom ndikụt unen. Odot nte Bible ọdọhọde ete: “Uyai n̄kparawa edi odudu mmọ.” (N̄ke 20:29) Uyen emi adade ifiọk ye odudu esie anam n̄kpọ Jehovah ekeme ndinam se enye ekebierede ndinam ke esop Jehovah onyụn̄ okop inemesịt.

Anaedi omokụt ke ẹnen̄ede ẹyom mme uyen ke ererimbot sia mmọ ẹkeme ndinam ediwak n̄kpọ. Edieke eyen Ntiense ọdiọn̄ọde n̄wed, etubom ufọkn̄wed, mme andikpep, m̀mê nditọ ufọkn̄wed mmọ ẹkeme ndidọhọ enye aka ufọkn̄wed ntaifiọk man edi n̄kpọ ke ererimbot emi. Mîdịghe, edieke ekpri eyenete ọdiọn̄ọde mbre mbuba, mme owo ẹkeme ndinam enye oyom ndikabade ndi àtá ke mbre  oro. Ndi akanam n̄kpọ ntem ọwọrọ fi m̀mê owo emi ọdiọn̄ọde? Nso idin̄wam Christian anam eti ubiere?

Se Bible ekpepde ekeme ndin̄wam owo asan̄a ke mfọnn̄kan usụn̄. Ecclesiastes 12:1 ọdọhọ ete: “Ti Akwa Andibot fi ke ini afo edide akparawa.” Nso idi mfọnn̄kan usụn̄ emi afo m̀mê uyen emi afo ọdiọn̄ọde ekemede ‘nditi Akwa Andibot’?

Kere se iketịbede inọ Eric * emi odude ke Edem Usoputịn Africa. Enye ama ama bọl etieti. Ke ini Eric ekedide isua 15, ẹma ẹmek enye esitiene ebre bọl ọnọ idụt mmọ. Oro ọkọwọrọ ke idibịghike, enye ayaka Europe ọkọbọ ukpep ndien ke enye ekeme ndikabade ndi àtá ebre bọl. Edi didie ke enye ‘eketi Akwa Andibot esie’ nte Bible etemede? Ndien nso ke ikeme ndikpep nto emi?

Eric ama ọtọn̄ọ ndikpep Bible ye Mme Ntiense Jehovah ke ini enye okosụk odude ke ufọkn̄wed. Enye ama edikụt ke Andibot ọmọn̄ ọsọp ọkọk kpukpru mfịna ubonowo, onyụn̄ okụt n̄ko ọfọn imọ ida ini ye odudu imọ inam uduak Abasi. Emi ama anam enye ebiere ke imọ ididịghe àtá ebre bọl. Enye ama ana baptism onyụn̄ enen̄ede esịn idem anam n̄kpọ Abasi. Enye ama edidi asan̄autom unamutom nte ini akakade, onyụn̄ aka Ufọkn̄wed Ukpep Bible Eke Nditọete Iren Emi Mîdọhọ Ndọ.

Ekpedi Eric ama enen̄ede esịn idem ke bọl, ekeme ndidi enye ọkpọkọwọrọ etop onyụn̄ enyene okụk. Edi enye ama okụt ke edumbet Bible emi enen: “Mme ọsọn̄urua n̄kpọ imọ owo edi ọkpọsọn̄ obio esie, mmọ ẹnyụn̄ ẹtie nte ibibene ukpeme ke ekikere esie.” (N̄ke 18:11) Ofụri akpanikọ edi oro, sia owo emi ekerede ke inyene eyekpeme imọ abian̄a idem. Mbon emi ẹsisịnde ibuot ẹsịn itọn̄ ẹyom inyene “[ẹsida] ediwak ubiak ẹnọmọ idemmọ.”—1 Tim. 6:9, 10.

Ediwak uyen ẹkop inemesịt sia ẹnamde utom uyọhọ ini, n̄kpọ inyụn̄ itịmekede mmọ. Eric ọdọhọ ete: “Nnam utom uyọhọ ini idahaemi, nnyụn̄ ndụk nsan̄a ye mme asan̄autom Jehovah emi ẹnamde ukem utom emi. Ata mbon emi owo okpodụkde nsan̄a ẹdi emi, ndien mmọkọm Jehovah ke ndikowụt mi n̄kukụre usụn̄ emi ekemede ndinam owo okop inemesịt onyụn̄ okụt unen.”

Nso kaban̄a fi? Utu ke ndiyom ndidi n̄kpọ ke ererimbot emi, ndi ikpakam ifọnke anam utom usiakusụn̄ man “usụn̄ fo” enen ke enyịn Jehovah?—Se ekebe emi, “ Ndinyene Se Ufọkn̄wed Ntaifiọk Mîkemeke Ndinọ.”

Ke ini ebe ye n̄wan kiet ẹkekade n̄kọk itieutom Mme Ntiense Jehovah ke United States, mmọ ẹma ẹkụt nte nditọete emi ẹnamde n̄kpọ Jehovah do ẹkopde inemesịt. Nte ini akakade, eyenete an̄wan oro ekewet ete: “Ikekere ke se isinyụn̄ inamde ke esop ekem.” Enye ye ebe esie ẹma ẹbiere nditre ndusụk n̄kpọ, n̄kabade nda ini oro nnam n̄kpọ Abasi.

Ama ọsọn̄ ebe ye n̄wan oro ndinam ukpụhọde. Edi usen kiet, mmọ ẹma ẹtie ẹkere se itie N̄wed Abasi usen oro akaban̄ade. Itien̄wed usen oro okoto John 8:31 emi ọdọhọde ete, “Edieke ikọ mi odude ye mbufo, mbufo ẹdi mbet mi ke akpanikọ.” Itien̄wed emi ama anam mmọ ẹkere ẹte: “Ọfọn ndiyak ndusụk n̄kpọ atak nnyịn man ikeme ndinen̄ede nnam n̄kpọ Abasi.” Mmọ ẹma ẹnyam akamba ufọk mmọ, ẹsana mme n̄kpọ oro ẹkemede ndibiọn̄ọ mmọ ndinam n̄kpọ Abasi ẹyak, ẹnyụn̄ ẹka ẹken̄wam esop kiet emi ẹkeyomde un̄wam. Mmọ ẹdi mme asiakusụn̄ idahaemi, ẹsinyụn̄ ẹtiene ẹbọp Ufọkmbono Obio Ubọn̄ ẹnyụn̄ ẹnam utom unyịmesịt ke mbono district. Mmọ ẹse didie se mmọ ẹnamde emi? Mmọ ẹdọhọ ẹte: “Idem enen̄ede akpa nnyịn ndikụt nte inen̄erede ikop idatesịt ke ntak emi iyakde n̄kpọ atak nnyịn man inam se esop Abasi ẹtemede.”

Solomon ekewet ete: “Yak enyịn fo ese nnennen, ih, wụk nyayama enyịn fo se iso fo nnennen.” (N̄ke 4:25) Nso ke emi ọwọrọ? Ọwọrọ ke ana ika iso isan̄a ke usụn̄ emi edinọde nnyịn ifet ndinam ekese ke utom Jehovah. Ikpanaha iyak n̄kpọ ndomokiet anam nnyịn ikpọn̄ se ikebierede ndinam nnọ Abasi.

Ekere ke nso ke ekeme ndinam nnọ Abasi?  Emekeme ndinam utom uyọhọ ini. Mîdịghe emekeme ndiwọrọ n̄ka esop emi ẹnyenede akamba efakutom, edi mme asuanetop iwakke. Edieke afo edide erenowo, emekeme ndiwọrọ n̄ka esop emi ẹyomde-yom mbiowo m̀mê mme asan̄autom unamutom. Emekeme ndinyene nneme ye esenyịn circuit mbufo man ọfiọk m̀mê eyekeme ndinam emi. Edieke oyomde ndika n̄kan̄wam esop emi oyomde usụn̄ ọkpọn̄ edem mbufo, emekeme ndibụp enye m̀mê enyene esop emi ẹyomde un̄wam. *

Yak ifiak ineme se idude ke Isaiah 62:10. Ekeme ndidi ndusụk mme Jew ẹma ẹnen̄ede ẹsịn idem ẹdiọn̄ usụn̄ oro man edi se ikọt Abasi ẹsan̄ade ẹnyọn̄ obio mmọ. Edieke edide enyene se osụk esịnde idem oyom ndinam nnọ Abasi, kûyak idem emem fi. Abasi ayan̄wam fi anam se aduakde emi. Ka iso kpe Jehovah ubọk ete owụt fi nte akpatan̄de mme n̄kpọ emi ẹkemede ndibiọn̄ọ fi nsion̄o ke usụn̄ fo. Nte ini akade, oyokụt nte enye an̄wamde fi ‘anam usụn̄ fo ọdọnọ.’—N̄ke 4:26.