“EUREKA!” ọwọrọ “Mmokụt!” Ke ini ediwak owo ẹkekade ndiyom gold ke n̄kpọ nte isua 150 emi ẹkebede ke California, ke U.S.A., ẹma ẹsikop mme owo ẹtịn̄de ikọ emi ke ini mmọ ẹdọkde isọn̄ ẹkekụt gold. Edi Charles Taze Russell ye Nditọ Ukpepn̄kpọ Bible eken ẹma ẹkụt n̄kpọ emi ọsọn̄de urua akan gold—ekedi akpanikọ Bible. Ama ọdọn̄ mmọ ndinam mbon en̄wen ẹfiọk akpanikọ emi.

Ke ini ndaeyo 1914, ediwak miliọn owo emi ẹdụn̄de ke ikpọ obio ẹma ẹsika ẹkese “Photo-Drama of Creation” emi ẹkesisiode ke hour itiaita. N̄ka Nditọ Ukpepn̄kpọ Bible eke Ofụri Ererimbot (I.B.S.A.) ẹkesio fim emi. Fim emi ama enyene uyo, enyene ndiye ndise, ọnọmbụk etịn̄ ikọ, ẹnyụn̄ ẹbre inem inem ikwọ. Mbụk fim emi ọtọn̄ọ ke ini Abasi ọkọtọn̄ọde ndibot n̄kpọ tutu esịm utịt tọsịn isua emi Jesus edikarade.—Edi. 20:4. *

Edi mbon emi ẹdụn̄de ke n̄kpri obio ye ke mme obio-in̄wan̄ ẹdisan̄a didie ise fim emi? Ke August 1914, I.B.S.A. ẹma ẹda nsio nsio ikpehe “Photo-Drama” ẹnam “Eureka Drama,” edi owo ikesịnke kpukpru se ikodude ke “Photo-Drama.” Mmọ ẹkeyom kpukpru mbon emi ẹyomde ndifiọk akpanikọ ẹtiene ẹse fim emi. “Eureka Drama” ekedi utọ ita onyụn̄ odu ke ediwak usem. Kpukpru se ọnọmbụk etịn̄de ye ikwọ okodu ke “Eureka X.” “Eureka Y” ama enyene kpukpru ikọ ọnọmbụk ye ikwọ, ẹfiak ẹsịn ndiye ndise slide. Ẹkenam “Eureka Family Drama” man ẹsise ke ufọk, ẹma ẹnyụn̄ ẹsịn ndusụk ikọ ọnọmbụk ye ikwọ n̄wedikwọ. Ukwak ubre usanikwọ ye n̄kpọ usio ndise slide emi mîsọn̄ke urua ẹma ẹdu n̄ko ini oro.

Sia owo mîkesikamake n̄kpọ usio ndise slide ise “Eureka X,” Nditọ Ukpepn̄kpọ Bible ẹma ẹsimen enye ẹkebre ẹnọ mme owo ke mme obio-in̄wan̄ ke mfọn ẹnyụn̄ ẹnam mmọ ẹkop etop Obio Ubọn̄. Ẹma ẹsibre “Eureka X” emi ẹkesikopde uyo uyo ke uwemeyo m̀mê ke okoneyo. Ẹkesida ikan̄ gas ẹbre slide “Eureka Y.” Nditọete ẹkedọhọ ke Enyọn̄-Ukpeme usem Finnish ẹte: “Imekeme ndiwụt mme owo ndise emi ke ebiet ekededi.” Mmọ ẹketịn̄ akpanikọ!

Nditọ Ukpepn̄kpọ Bible ikesikpehe okụk ibọ ikpọ ufọkmbre. Mmọ ẹkesika mme itie emi owo mîdibọhọ mmọ okụk utọ nte ufọkn̄wed, ufọkesop, itiembehe tren, ye akamba ufọtufọk owo. Ediwak ini, ẹkesisio slide emi ke an̄wa. Ẹma ẹsiyịri akamba afia ọfọn̄ ke n̄kpọ ẹda ẹsio. Anthony Hambuch ekewet ntem  ete: “Mme ọtọin̄wan̄ ẹma ẹsibon eto ẹnọ ediwak owo ẹtie ke in̄wan̄ mfri mmọ ẹse ndise emi.” Anthony Hambuch ye mbon emi ẹkesan̄ade ye enye ẹsio “Eureka Drama” ẹkesidọn̄ n̄kpọ usio slide mmọ, ekpatisan̄, tent, ye n̄kpọ utem udia mmọ ke ukpatn̄kpọ emi enan̄ odụride.

Ndusụk ini, mbon emi ẹkesisede “Eureka” ẹma ẹsiwak, ndusụk ini iwakke. Ke United States, owo 400 ẹma ẹka an̄wa ufọkn̄wed ke obio emi owo 150 ẹdụn̄de ẹkese fim emi. Ke ebiet en̄wen, ndusụk owo ẹma ẹsan̄a kilomita itiaita ẹkese “Eureka Drama,” ẹfiak ẹsan̄a kilomita itiaita ẹnyọn̄. Ke Sweden, mbọhọidụn̄ Charlotte Ahlberg ẹma ẹdi ekpri ufọk esie ẹdikpan̄ utọn̄ ẹkop drama emi. Se mmọ ẹkekopde “ama enen̄ede otụk” mmọ. Ke Australia, n̄kpọ nte owo 1,500 ẹma ẹkese drama emi ke itie emi ẹkesidọkde isọn̄ ẹsion̄o n̄kpọ ke obio kiet emi odude ata nsannsan. Enyọn̄-Ukpeme ọkọdọhọ ke ‘ndise ye se ẹketịn̄de ke drama oro ama enen̄ede enem nditọ ufọkn̄wed sekọndri, nditọ ufọkn̄wed ntaifiọk, ye mme prọfesọ.’ Ẹkesụk ẹmama “Eureka Drama” idem ke mme itie emi ẹkenyenede mme ufọk usio fim.

“Eureka Drama” ama an̄wam mbon emi ẹkesidọn̄de ẹkenọ utịn̄ikọ ẹnyụn̄ ẹtọn̄ọ mbufa otu emi ẹsikpepde Bible. Owo itịmke idiọn̄ọ ofụri ibat mbon emi ẹkesede “Eureka Drama,” edi ẹma ẹsise nsio nsio utọ “Eureka Drama” ediwak ini. Otu 86 ẹkesisan̄a ẹsio drama emi ẹwụt mme owo. Edi ke 1915, otu 14 kpọt ẹkesiwet se mmọ ẹnamde ẹnọ ẹsọk ibuot itieutom ke ubọk ke ubọk. Ke ntak emi, ibuot itieutom ikọdiọn̄ọke ofụri ibat owo oro ẹkesede “Eureka Drama.” Edi ekpri se ẹkewet ẹnọ ẹsọk mmọ owụt ke se ibede owo miliọn kiet ẹkese drama emi isua oro. N̄kpọ nte owo 30,000 ẹma ẹdọhọ ẹdikpep mmimọ Bible.

Okposụkedi etiede nte ke “Eureka Drama” ikenen̄ekede iwọrọ etop ke ererimbot, ediwak milion owo ke Australia, Argentina, South Africa, British Isles, India, ye Caribbean ẹma ẹse anana-mbiet fim emi. Ediwak mmọ ẹma ẹkụt akpanikọ Bible emi enen̄erede ọsọn̄ urua akan gold ẹnyụn̄ ẹdọhọ “Eureka!”