KE September 6, 1926, eyen Japan kiet ke United States emi ekedide pilgrim (esenyịn oro asan̄ade-san̄a) ama afiak ọnyọn̄ obio mmọ akanam utom isụn̄utom. N̄kukụre owo emi ekesitobode Enyọn̄-Ukpeme ini oro, emi okonyụn̄ ọtọn̄ọde nditie ye mme owo n̄kpep Bible ke Kobe, ama ọkọkọm enye ke ini enye ọnyọn̄de edi. Nditọ Ukpepn̄kpọ Bible ẹma ẹnịm akpa mbono mmọ ke obio oro ke January 2, 1927. Owo 36 ẹkedụk, ndien owo 8 ẹkena baptism. Imọkọm Abasi ke owo ifan̄ emi ẹma ẹdụk esop, edi mmọ ẹdinam didie ikwọrọ ikọ inọ owo miliọn 60 ke Japan emi mîkọdiọn̄ọke Bible?

Ke May 1927, Nditọ Ukpepn̄kpọ Bible emi ẹkenen̄erede ẹyom mme owo ẹdiọn̄ọ akpanikọ ẹma ẹtọn̄ọ ndikot mme owo ẹdikop utịn̄ikọ Bible. Ẹkeyom ndinọ akpa utịn̄ikọ ke Osaka. Nditọete ẹma ẹwet n̄kpọ ẹbon ke mbenusụn̄ ẹnyụn̄ ẹdian ndusụk ke signboard. Mmọ ẹma ẹnọ n̄wedikot ẹsọk mme ọwọrọiso owo 3,000 ke obio oro, enyụn̄ ẹdeme n̄wedikot 150,000. Mmọ ẹma ẹwet n̄kpọ ẹban̄a utịn̄ikọ emi ke mme n̄wedmbụk n̄kpọntịbe Osaka emi mme owo ẹkekotde ẹkan ini oro ẹnyụn̄ ẹwet n̄ko ke tiket tren 400,000. Ke usen emi ẹkenọde utịn̄ikọ oro, ẹma ẹda ubomofụm iba ẹsuan n̄wedikot 100,000 ke ufụmenyọn̄. N̄kpọ nte owo 2,300 ke ẹkeyak ẹdụk Osaka Asahi Hall ẹkekop utịn̄ikọ emi ibuotikọ ekedide, “Obio Ubọn̄ Abasi Ekpere.” Edi ẹma ẹdọhọ owo tọsịn kiet ẹnyọn̄ọ sia ufan̄ mîkekemke kpukpru owo. Ke utịn̄ikọ ama okokụre, ediwak owo ẹma ẹnyọn̄ọ, edi owo 600 ẹma ẹsụhọde ẹtie ẹbụp mbụme, ẹma ẹnyụn̄ ẹnọ mmọ ibọrọ. Ke ọfiọn̄ ifan̄ emi ẹketienede, ẹma ẹnọ utịn̄ikọ ke Kyoto ye ke mme obio en̄wen ke edem usoputịn Japan.

Ke October 1927, Nditọ Ukpepn̄kpọ Bible ẹma ẹkot mme owo ẹdikop utịn̄ikọ ke Tokyo. Isan̄ enye emi, ẹma ẹfiak ẹkot ikpọ owo ke obio, esịnede adaibuot ukara, mbon ufọkmbet, ikpọ owo ufọkabasi, ye ikpọ mbonekọn̄. Ẹma ẹda n̄wedmbụk n̄kpọntịbe ẹkot mme owo, ẹdian n̄wedikot ke usụn̄, ẹnyụn̄ ẹnọ mme owo n̄wedikot 710,000 ke ubọk. Owo 4,800 ẹkeka ẹkekop utịn̄ikọ emi ke itie ita oro ẹkenọde ke Tokyo.

Mme colporteur (mme asiakusụn̄) ẹkenen̄ede ẹda iso ke ndikwọrọ etop Obio Ubọn̄ Abasi nnọ mme owo ke ufọk mmọ. Matsue Ishii ama esịne ke otu mbon emi ẹkebemde iso ẹdi colporteur ke Japan. Enye ye Jizo ebe esie ẹma ẹkwọrọ ikọ ke ata ediwak itie ke idụt oro, ọtọn̄ọde ke Sapporo ke edere edere tutu ke Sendai, Tokyo, Yokohama, Nagoya, Osaka, Kyoto, Okayama, ye Tokushima. Enye ye akamba eyenete an̄wan kiet emi ekekerede Sakiko Tanaka ẹkesisịne ewụra mbon Japan emi ẹkotde kimono ini ekededi emi mmọ ẹkade ndikwọrọ ikọ nnọ ikpọ owo ukara. Akwa owo ukara kiet ama ọdọhọ mmọ ẹnọ imọ n̄wed The Harp of God ye Deliverance 300 ikọdọn̄ ke itie ubonn̄wed ke nsio nsio ufọk-n̄kpọkọbi.

Katsuo Miura ye Hagino an̄wan esie ẹma ẹbọ Sista Ishii mme n̄wed ẹkot ẹnyụn̄ ẹdiọn̄ọ ke se ikotde edi  akpanikọ. Mmọ mbiba ẹma ẹna baptism ke 1931 ẹnyụn̄ ẹtọn̄ọ utom usiakusụn̄. Haruichi Yamada, Tane an̄wan esie, ye ediwak iman mmọ ẹma ẹkpep akpanikọ mbemiso 1930. Haruichi Yamada ye Tane an̄wan esie ẹma ẹtọn̄ọ utom usiakusụn̄, ndien eyen mmọ an̄wan emi ekekerede Yukiko ama aka akanam utom ke Bethel ke Tokyo.

Moto ama esisọn̄ urua etieti ini oro, usụn̄ ikonyụn̄ ifọnke. Oro akanam Kazumi Minoura ye n̄kparawa emi ẹkesan̄ade ye enye ẹnam utom usiakusụn̄ ẹnyene moto emi okonyụn̄ edide ufọk. Moto emi ikenyeneke engine. Ẹkekot enye ẹdian Jehu emi ekesiwatde chariot idat idat. Nte ini akade, Jehu ama edidi edidem Israel. (2 Ndi. 10:15, 16) Ikpọ Jehu ita okodu. Moto emi ama ọniọn̄ esisịt akan mita 2, okpon ekpere ndisịm mita 2, onyụn̄ okon̄ ekpere ndisịm mita 2. Esịt esie ama okpon ekem se mme asiakusụn̄ itiokiet ẹnade. N̄kọk itieutom Japan ẹma ẹnam n̄kpri Jehu  11 n̄ko emi ẹkesiyịride ke enan̄ukwak ẹwat, ndien owo iba ẹkesina ke esịt. Kiichi Iwasaki, emi eketienede anam Jehu emi ọdọhọ ntem ete, “Ima isịn batri moto ke Jehu kiet kiet inyụn̄ ifụk tent ke enyọn̄; ẹkesida batri oro ẹdomo ikan̄.” Mme asiakusụn̄ ẹma ẹnam un̄wana esịm nsio nsio itie ke Japan, ẹdọdọk ẹsọsụhọde, ẹto edere edere ẹka usụk usụk Japan.

Ikumatsu Ota emi ekedide asiakusụn̄ ọkọdọhọ ete: “Ke ini idụkde obio, ima isiwat Jehu nnyịn ikenịm ke mbeninyan̄ m̀mê ke an̄wa. Ikesibem iso ika ibịne ikpọ owo ke obio, utọ nte ọbọn̄ obio, mbemiso ikade ufọk mme owo ikọnọ n̄wed. Ke ima ikodụk kpukpru ufọk ke obio, ima isikpọn̄ do ika obio en̄wen.”

Ini emi Nditọ Ukpepn̄kpọ Bible 36 oro ẹkenịmde akpa mbono mmọ ke Kobe, utom ukwọrọikọ ọkọtọtọn̄ọ. (Zech. 4:10) Ke isua ition kpọt ama ekebe, ke 1932, mme asiakusụn̄ ye mme asuanetop 103 ke Japan ẹma ẹwet se mmọ ẹkenamde ẹnọ n̄kọk itieutom, ẹnyụn̄ ẹtịn̄ ke ima inịm n̄wed emi awakde ebe 14,000. Mfịn, ẹkwọrọ ikọ ke ebiet emi mme owo ẹsiwakde ke nsio nsio itie ke Japan. Mme asuanetop emi ẹkperede ndisịm owo 220,000 ke ẹnam mme owo ẹkụt un̄wana ke Japan.—Oto Itieutom Ubon N̄kani N̄kpọ Nnyịn ke Japan.