Didie ke Ekeme Ndifiọk Bible Oro Ẹkabarede Ọfọn?

AKPASARADE usem oro ẹkedade ẹwet Bible ẹdi Hebrew, Aramaic, ye Greek. Ntre ata ediwak owo oro ẹyomde ndikot Bible ẹdikot enye oro ẹkabarede ẹsịn ke usem en̄wen.

Mfịn, idụhe n̄wed oro ẹkabarede nte Bible—ẹkabade ndusụk ikpehe Bible ẹsịn ke se iwakde ibe usem 2,400. Nsio nsio Bible ẹdu ke ediwak usem. Edieke nsio nsio Bible ẹdude ke usem mbufo, imọfiọk ke afo edima ndikot enye oro ẹkabarede ọfọn.

Edieke ọfiọkde ibọrọ mbụme oro ẹtienede mi, ọwọrọ ke ọyọfiọk Bible oro ẹkabarede ọfọn: Ẹkabarede Bible ke usụn̄ ifan̄? Nso inam ndusụk Bible ẹfọn ẹkan ndusụk? Ndien ntak anade enen̄ede ekpeme ke ini okotde ndusụk Bible?

Nsio Nsio Usụn̄ Oro Ẹkabarede Bible

Ẹkabade Bible ke nsio nsio usụn̄, edi ẹbahade mmọ ẹdọn̄ ke akpan ikpehe ita. Ẹkot kiet interlinear. Utọ Bible enye emi ọdọn̄ọ akpasarade usem oro ẹkewetde Bible ye ata ata usụn̄ oro ẹkabarede ikọ kiet kiet ke akpasarade usem emi.

Efen edi ndikabade se owo ekerede, m̀mê nte akpasarade usem Bible onyụn̄ an̄wan̄ade andikabade, ye ke usụn̄ oro andikabade ekerede ke mme owo ẹyema.

Ọyọhọ utọ Bible ita edi enye oro mme andikabade ẹdomode ndida ukem ukem. Mme andikabade Bible enye emi ẹdomo ndikabade se mme ikọ Bible ẹwọrọde nnennen nnennen ye ke ido oro ẹkesiwetde akpasarade usem Bible, ẹnyụn̄ ẹdomo ndinam enye emem utom ndikot.

 Ndi Ọfọn Ẹkabade Bible ke Ata Ata Usụn̄?

Ndusụk ini, ndikabade mme ikọ kiet kiet isiyakke ẹkabade se itien̄wed Abasi kiet kiet etịn̄de nnennen nnennen. Ntak-a? Ediwak ntak ẹdu. Se ntak iba mi:

1. Idụhe usem iba oro ẹdide ata ukem ukem. S. R. Driver emi edide Prọfesọ usem Hebrew ọdọhọ ke ‘nte ẹsibonde ikọ ke usem kiet kiet man enyene se ọwọrọde okpụhọde ye nte ẹsibonde ikọ ke mme usem en̄wen.’ Ntak edi oro ẹsidọhọde “kwa idụt kwa usem.” Prọfesọ Driver aka iso ete: “Ke ntre, nsio nsio usem ẹnyene nsio nsio usụn̄ oro ẹbonde ikọ.”

Edieke ẹkabarede ikọ kiet kiet ke Bible, utọ ukabade n̄wed oro idin̄wan̄ake owo, onyụn̄ akam ekeme ndiwọrọ n̄kpọ en̄wen, sia mîdụhe usem oro etiede ata ukem ukem nte usem Hebrew ye Greek oro ẹkedade ẹwet Bible. Kere ban̄a mme uwụtn̄kpọ oro ẹtienede mi.

Ke leta oro apostle Paul ekewetde ọnọ mbon Ephesus, enye ekewet ikọ oro ẹkabarede ke ata ata usụn̄ ntem: “Ke esịt iren oro ẹdide nsa.” (Ephesus 4:14, The Kingdom Interlinear Translation of the Greek Scriptures) * Ikọ emi ọwọrọ nditụk m̀mê ndibian̄a owo ke ini ẹbrede nsa. Nte ededi, ikọ emi idiwọrọke n̄kpọ ke ata ediwak usem edieke ẹkabarede enye ke ata ata usụn̄. Ndikabade enye nte “abian̄a” enen̄ede an̄wan̄a.

Ke ini Paul ekewetde leta ọnọ ẹsọk mbon Rome, enye ama ewet ikọ Greek oro ọwọrọde ke ata ata usụn̄, “spirit ke ofụt.” (Rome 12:11, Kingdom Interlinear) Ndi ikọ emi enyene se ọwọrọde ke Ikọ Efịk? Se ikọ emi enen̄erede ọwọrọ edi “ẹnyene ifiopesịt ke spirit.”

Ke ọwọrọetop Ukwọrọikọ Jesus oro ke Obot, enye ama etịn̄ ikọ oro ẹsiwakde ndikabade ntem: “Ọfọfọn ọnọ mmọ eke ẹbuenede ke spirit.” (Matthew 5:3) Edi nte ẹkabarede ikọ emi ke ata ata usụn̄ ke ediwak usem itịmke in̄wan̄a. Ke ndusụk idaha, ndikabade ufan̄ikọ emi ke ata ata usụn̄ esikam etie nte ẹdọhọ ke “mmọ eke ẹbuenede ke spirit”  ẹnyene mfịna ibuot mîdịghe ke mmọ inen̄ekede inyene odudu ye iwụk. Nte ededi, ikọ Jesus emi ọwọrọ ke idịghe ediyụhọ udọn̄ obụkidem edinọ owo inemesịt, edi edi ndifiọk ke imoyom ndausụn̄ Abasi. (Luke 6:20) Ntre, ndikabade ikọ emi nte “mmọ oro ẹkerede ẹban̄a unana mmọ ke n̄kan̄ eke spirit” m̀mê “mbon oro ẹfiọkde ke akpana iyom Abasi” edi nnennen nnennen se Jesus eketịn̄de.—Matthew 5:3; The New Testament in Modern English.

2. Se ikọ ọwọrọde ekeme ndikpụhọde etiene se ẹtịn̄de ẹban̄a. Ke uwụtn̄kpọ, ikọ Hebrew oro ẹsiwakde ndida nnọ ubọk owo ekeme ndiwọrọ ata ediwak n̄kpọ. Etienede se ẹtịn̄de ẹban̄a, ikọ emi ekeme ndiwọrọ “odudu” m̀mê “ubọn̄.” (Deuteronomy 32:36; 2 Samuel 8:3) Ke nditịm ntịn̄, ẹkabade ikọ kiet emi ẹbe nsio nsio usụn̄ 40 ke New World Translation of the Holy Scriptures.

Sia ẹsikabarede ikọ ẹtiene se ẹtịn̄de ẹban̄a, mme andikakabade New World Translation  ẹma ẹda n̄kpọ nte nsio nsio Ikọmbakara 16,000 ẹkabade n̄kpọ nte ikọ Greek 5,500, ẹnyụn̄ ẹda se iwakde ibe nsio nsio Ikọmbakara 27,000 ẹkabade n̄kpọ nte ikọ Hebrew 8,500. * Ntak ẹkabarede ikọ ke nsio nsio usụn̄ ntem? Kọmiti oro ẹkekabarede New World Translation ẹma ẹkụt ke enen̄ede ọfọn ẹkabade mme ikọ kiet kiet ẹtiene se ẹtịn̄de ẹban̄a, utu ke ndikabade kpukpru mmọ ukem ukem. Kpa ye oro, mmọ ẹma ẹnen̄ede ẹsịn ukeme ẹkabade mme ikọ Hebrew ye Greek oro ẹdide ukem ukem ẹsịn ke Ikọmbakara ke ukem usụn̄ nte ẹkekeme.

Ke akpanikọ, ndikabade Bible idịghe edikabade mme ikọ akpasarade usem Bible ukem ukem ke ebiet ekededi oro mmọ ẹdude. Ana mme akabade n̄wed ẹda mbufiọk ẹbiere mme ikọ oro ẹdikabarede nnennen nnennen se idude ke akpasarade usem ke usụn̄ oro an̄wan̄ade owo. Ke adianade do, ana mmọ ẹkabade n̄wed nte ẹsitịn̄de ikọ ke usem oro mmọ ẹkabarede n̄wed ẹsịn.

Nso Kaban̄a Bible Oro Owo Akabarede nte Onyụn̄ An̄wan̄ade Enye?

Sia ndusụk mme akabade Bible ẹkabarede se mmọ ẹkerede m̀mê nte onyụn̄ an̄wan̄ade mmọ, se mmọ ẹkabarede ẹsikpụhọde ye se ẹkewetde ke akpasarade usem Bible. Didie? Mmọ ẹsisio n̄kpọ ke akpasarade usem Bible ẹfep mîdịghe ẹsesịn n̄kpọ. Utọ Bible emi ekeme ndinem sia enye mîsọn̄ke ndikot. Nte ededi, ndusụk ini, mbon oro ẹkabarede utọ Bible emi ẹsikpụhọ mme n̄kpọ mîdịghe ẹtre ndiwet se ikodude ke akpasarade usem man emem utom ndikot.

Se nte utọ Bible emi kiet, oro ẹkotde The Message: The Bible in Contemporary Language akabarede ọwọrọetop Akam Ọbọn̄ oro Jesus ekekpepde: “Ete nnyịn ke heaven, yarade se afo edide.” (Matthew 6:9) Bible oro ẹkabarede nnennen nnennen se Jesus eketịn̄de okot ete: “Ete nnyịn emi odude ke heaven, yak [“ikpono enyịn̄ fo,” m̀mê] ẹnam enyịn̄ fo asana.” Se n̄ko nte ndusụk Bible ẹkabarede John 17:26. Today’s English Version akabade akam oro Jesus ọkọbọn̄de ọnọ Ete esie ke okoneyo oro ẹkemụmde enye ntem ete: “Mmanam mmọ ẹfiọk fi.” Edi Bible oro ẹkabarede akam oro Jesus ọkọbọn̄de nnennen nnennen ọdọhọ ete: “Ami mmonyụn̄ nnam mmọ ẹfiọk enyịn̄ fo.” Ndi omokụt nte ndusụk mme akabade Bible mîyakke mme owo ẹfiọk ke Abasi enyene enyịn̄, ye nte ke akpana ẹkot ẹnyụn̄ ẹkpono enyịn̄ oro?

Kpeme Se Okotde!

Nte ẹkabarede ndusụk Bible iyakke mme owo ẹfiọk ibet ido uwem oro ẹkewetde ke akpasarade N̄wed Abasi. Ke uwụtn̄kpọ, The Message: The Bible in Contemporary Language akabade 1 Corinth 6:9, 10 ete: “Ndi mbufo ifiọkke ke owo ikpodụhe uwem ntem? Ndiọi owo oro mîyomke ndifiọk Abasi iditieneke idu ke obio ubọn̄ esie. Mbon oro ẹnamde n̄kpọ ye kiet eken ke idiọk usụn̄, ẹdan̄de idan̄ ke idiọk usụn̄, ẹbiatde isọn̄ ye kpukpru se idude ke esịt idotke ndidi nditọ obio ubọn̄ Abasi.”

Mbọk men itien̄wed emi domo ye ata nnennen usụn̄ oro ẹkabarede ikọ emi ke New World Translation: “Kamse! Nte mbufo ifiọkke ite mme anam ukwan̄ido ididaha  obio ubọn̄ Abasi inyene? Ẹkûyak ẹtụn mbufo usụn̄. Mbon use, mme okpono ndem, mme esịn efịbe, iren oro ẹnịmde ndida nyụhọ oburobụt udọn̄ idan̄, irenowo emi ẹdan̄de ye irenowo, mme inọ, mbon idiọkitọn̄, mme akpammịn, mme osụn̄i isụn̄i, ye mbon n̄kanubọk ididaha obio ubọn̄ Abasi inyene.” Omokụt ke akpa Bible oro isiakke-siak mme orụk ndiọi n̄kpọ oro apostle Paul ọdọhọde nnyịn ikûnam.

Ndusụk owo ẹkabade Bible ẹtiene se mmọ ẹnịmde ke akpanikọ. Ke uwụtn̄kpọ, Today’s English Version, oro ẹsiwakde ndikot Good News Bible, akabade se Jesus ọkọdọhọde mme anditiene enye ntem ete: “Ẹbe ke mfafaha inuaotop ẹdụk, koro inuaotop emi adade owo aka hell atatara, onyụn̄ emem utom ndisan̄a ke usụn̄ oro adade owo aka do, ndien mme andisan̄a ke usụn̄ oro ẹwak.” (Matthew 7:13) Mme andikakabade ẹkesịn “hell” ke itien̄wed emi, okposụkedi se ikodude ke itien̄wed oro edide “nsobo.” Ntak mmọ ẹkenamde emi? Etie nte mmọ ẹkeyom mme owo ẹnịm ke owo idisoboke-sobo ndiọi owo, edi ke ẹditotụhọde mmọ ke nsinsi. *

Nte Edisan̄ade Ọfiọk Bible Oro Ẹkabarede Ọfọn

Ẹkewet Bible ke usem oro an̄wan̄ade mme usụhọde owo, utọ nte mme ọtọin̄wan̄, mme ekpemerọn̄, ye mme ọkọiyak. (Nehemiah 8:8, 12; Utom 4:13) Ke ntre, akpana Bible oro ẹkabarede ọfọn an̄wan̄a mbon oro ẹnyenede eti esịt, inamke n̄kpọ m̀mê nso orụk owo ke mmọ ẹdi m̀mê mmọ ẹnyụn̄ ẹdụn̄ ke m̀mọ̀n̄. Ke adianade do, Bible oro ẹkabarede ọfọn ẹkpenyene:

◼ Ndikabade nnennen nnennen se Abasi ọkọnọde spirit ẹda ẹwet.—2 Timothy 3:16.

◼ Ndikabade ikọ N̄wed Abasi ke ata ata usụn̄ edieke ẹkemede.

◼ Ndikabade se ikọ ọwọrọde edieke edikabade ke ata ata usụn̄ mîdin̄wan̄ake owo m̀mê edinamde enye ọwọrọ n̄kpọ en̄wen.

◼ Ndikabade ikọ nte ẹsitịn̄de, anam enye an̄wan̄a owo man mme owo ẹma ndikot.

Nte utọ Bible oro odu? Ediwak miliọn owo oro ẹsikotde magazine emi ẹma ndikot New World Translation. Ntak-a? Koro mmọ ẹnyịme ke kọmiti oro ẹkekabarede Bible emi ẹma ẹnam eti utom. Kọmiti oro ẹkewet ke ebemiso ikọ akpa nsiondi New World Translation Ikọmbakara ete: “Nnyịn ikabakede N̄wed Abasi nte nnyịn ikerede m̀mê nte onyụn̄ an̄wan̄ade nnyịn. Imodomo ndikabade enye ke ata ata usụn̄ nte ikekeme, imonyụn̄ idomo ndidọn̄ mme ebetọ ikọ akpasarade usem Bible edieke orụk ikọ oro ẹdude ke Ikọmbakara, ama akam edi an̄wan̄a owo, inyụn̄ iwọrọke n̄kpọ en̄wen.”

Ẹmịn̄ New World Translation ofụri ofụri m̀mê ubak ubak ebe usem 60 onyụn̄ awak ebe idem 145,000,000! Dọhọ Mme Ntiense Jehovah ẹnọ fi Edikabade eke Obufa Ererimbot man etiene okụt ke idemfo ufọn oro edibọde ke ndikot Bible oro ẹkabarede ọfọn.

Nti nditọ ukpepn̄kpọ Bible ẹyom ndifiọk etop oro Abasi ọkọnọde spirit ẹda ẹwet, nnyụn̄ nda se mmọ ẹkpepde nsịn ke edinam. Edieke afo edide utọ owo oro, oyom enyene Bible oro ẹkabarede ọfọn. Ke akpanikọ, ọfọn enyene eti Bible.

[Mme Ikọ Idakisọn̄]

[Se ẹwetde ke ikpọ abisi ke page 21]

Bible emi mme andikabade ẹkabarede se mmọ ẹkerede, m̀mê nte onyụn̄ an̄wan̄ade mmọ ekeme ndinem sia enye mîsọn̄ke ndikot. Nte ededi, ndusụk ini, mbon oro ẹkabarede utọ Bible emi ẹsikpụhọ mme n̄kpọ mîdịghe ẹtre ndiwet se ikodude ke akpasarade usem man emem utom ndikot

[Se ẹwetde ke ikpọ abisi ke page 22]

Ẹmịn̄ New World Translation ofụri ofụri m̀mê ubak ubak awak ebe usem 60 onyụn̄ awak ebe idem 145,000,000!

[Ekebe/Ndise ke page 20]

NTE ẸKEKABAREDE BIBLE KIET KE ESET

Idịghe mfịn ke mme owo ẹtọn̄ọ ndikabade Bible nte mmọ ẹkerede, m̀mê nte onyụn̄ an̄wan̄ade mmọ. Mme Jew eset ẹma ẹkabade N̄wed Abasi Usem Hebrew nte mmọ ẹkekerede, m̀mê nte okonyụn̄ an̄wan̄ade mmọ ẹsịn ke usem Aramaic. Okposụkedi edikabade emi mînenke, enye owụt nte ndusụk itie N̄wed Abasi akan̄wan̄ade mme Jew, emi onyụn̄ an̄wam mme akabade n̄wed ẹfiọk se ndusụk n̄kpọsọn̄ ufan̄ikọ Bible ẹwọrọde. Ke uwụtn̄kpọ, edikabade emi ọdọhọ ke “nditọ Abasi” oro ẹtịn̄de ẹban̄a ke Job 38:7 edi “otu mme angel.” Enye ọdọhọ n̄ko ke ikọ Hebrew oro etịn̄de n̄kpọ aban̄a Nimrod ke Genesis 10:9 ọwọrọ “andibiọn̄ọ” m̀mê “enye emi ọbiọn̄ọde,” iwọrọke “ke iso.” Ẹkeda edikabade emi ẹfiọk mme ikọ Bible, owo ikadaha enye nte Bible.

[Ndise]

IKPEHE KIET KE “BIBLIA POLYGLOTTA” EMI WALTON AKAKABAREDE OKỤRE KE 1657, JOB 38:1-15

Bible usem Hebrew (oro ẹkabarede ikọ kiet kiet ẹsịn ke usem Latin)

Ukem itie N̄wed Abasi oro mme Jew ẹkekabarede nte an̄wan̄ade mmọ ẹsịn ke usem Aramaic

[Ndise ke page 19]

IKPEHE KIET KE “THE KINGDOM INTERLINEAR TRANSLATION OF THE GREEK SCRIPTURES,” EPHESUS 4:14

Se ẹwetde ke ufien owụt nte ẹkabarede ikọ kiet kiet. Nnasia owụt nte ẹkabarede se ikọ ọwọrọde

[Ebiet Ẹdade Ndise Ẹto ke page 18]

Background: Shrine of the Book, Israel Museum, Jerusalem