Mme Ntịn̄nnịm Ikọ Oro Ẹban̄ade Messiah

MME Jew ẹma ẹtie ẹbet edidi Messiah ke mmọ ẹma ẹkefiọk se Isaiah ye mme prọfet eken ẹkewetde ẹban̄a Enye. Ke akpanikọ, ke eyo Jesus, ediwak mme Jew ‘ẹketie ke idotenyịn’ ẹbet edidi Messiah. (Luke 3:15) Odot itịm ifiọk ke mme ntịn̄nnịm ikọ Bible ẹtịn̄ ekese n̄kpọ ẹban̄a Messiah. Idụhe owo ndomokiet oro ekpekekemede nditịn̄ utọ ntịn̄nnịm ikọ oro m̀mê ndinam mmọ ẹsu Jesus ke idem.

Mme Ntịn̄nnịm Ikọ Oro Ẹban̄ade Emana Messiah. Isaiah ama etịn̄ ke n̄wan oro mîfiọkke erenowo ediman Messiah, m̀mê Christ. Ke apostle Matthew ama eketịn̄ aban̄a utịbe utịbe usụn̄ oro Jesus akamanade, enye ama adian do ete: “Ofụri n̄kpọ emi ekenen̄ede ọwọrọ man okposu se Jehovah akadade prọfet esie etịn̄, ete: ‘Sese! N̄wan oro mîfiọkke erenowo oyoyomo onyụn̄ aman eyeneren.’”  (Matthew 1:22, 23; Isaiah 7:14) Isaiah ama etịn̄ n̄ko ete ke Christ edito ubon David, onyụn̄ asiak Jesse, kpa ete David nnennen nnennen. Ke akpanikọ, Jesus okoto ubon David. (Matthew 1:6, 16; Luke 3:23, 31, 32) Ntem, mbemiso Jesus akamanade, angel Gabriel ama asian Mary eka Jesus ete: “Abasi ọyọnọ enye ebekpo ete esie David.”— Luke 1:32, 33; Isaiah 11:1-5, 10; Rome 15:12.

Mme Ntịn̄nnịm Ikọ Oro Ẹban̄ade Uwem Messiah. Ke synagogue ke Nazareth, Jesus ama okot ntịn̄nnịm ikọ Isaiah uyo ọwọrọ, esịnede mme ikọ emi: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene.” Enye ama ọdọhọ ke ntịn̄nnịm ikọ emi osu imọ ke idem, ete: “Mfịn emi itien̄wed Abasi oro mbufo ẹsụk ẹkopde do omosu.” (Luke 4:17-21; Isaiah 61:1, 2) Isaiah ama etịn̄ n̄ko aban̄a nte Jesus edifọnde ido, editiede ifụre ifụre, edinyụn̄ osụhọrede idem ke ini anamde n̄kpọ ye mbon oro ẹyomde ẹkọk mmimọ udọn̄ọ. Matthew ewet ete: “Ediwak owo ẹnyụn̄ ẹtiene enye, ndien enye ọkọk kpukpru mmọ udọn̄ọ, edi enye ọsọn̄ọ owụk mmọ ete ẹkûyarade imọ; man osu se ẹketịn̄de ebe ke prọfet Isaiah . . . ‘Enye iditọhọke utọk, idinyụn̄ ifiorike n̄kpo . . . Enye idinuakke nnyanyan̄a eke obụn̄ọde.’”—Matthew 8:16, 17; 12:10-21; Isaiah 42:1-4; 53:4, 5.

Mme Ntịn̄nnịm Ikọ Oro Ẹban̄ade Ndutụhọ Messiah. Isaiah ama etịn̄ ete ke ata ediwak owo ke Israel idinịmke Messiah ke akpanikọ, edi nte ke enye ayakabade edi “itiat iduọ” ọnọ mmọ. (1 Peter 2:6-8; Isaiah 8:14, 15) Ndien ke akpanikọ, kpa ye ediwak utịben̄kpọ oro Jesus akanamde, mme owo ikọbuọtke “idem ye enye, man ikọ prọfet Isaiah osu emi enye ọkọdọhọde ete: ‘Jehovah, anie ọkọbuọt idem ke mme n̄kpọ emi nnyịn ikokopde?’” (John 12:37, 38; Isaiah 53:1) Ntak kiet oro mme Jew mîkenịmke ke Jesus edi Messiah ekedi ukwan̄ ekikere oro ediwak mmọ ẹkenyenede nte ke Messiah ọyọsọsọp ọbọ mbon Rome ukara onyụn̄ afiak ọtọn̄ọ obio ubọn̄ David ke isọn̄. Ata ediwak mme Jew ikenịmke ke Jesus edi Messiah sia enye ọkọbọde ufen onyụn̄ akpade. Edi ke akpanikọ, Isaiah ama etetịn̄ ke Messiah ọyọbọ ufen mbemiso akabade edi Edidem.

Messiah ama etịn̄ ntịn̄nnịm ikọ aban̄a idemesie ke n̄wed Isaiah ete: “N̄kayak edem mi nnọ mmọ eke ẹyịbide . . . ndịpke iso mi mfehe bụt ye etap.” Matthew etịn̄ se iketịbede ke ini ẹkekpede ikpe Jesus ete: “Mmọ ẹfiari enye etap ke iso ẹnyụn̄ ẹtọn̄ọ enye ita. Mmọ eken ẹmia enye ufia ke iso.” (Isaiah 50:6; Matthew 26:67) Isaiah ekewet ete: “Enye onyụn̄ osụhọde idem esie enịm, inyụn̄ itatke inua esiemmọ.” Ntem, ke ini Pilate okobụpde Jesus n̄kpọ aban̄a ikọ oro mme Jew ẹkedoride enye, Jesus “[ikọbọrọke] enye ndomo ikọ kiet, esịn idem akpa andikara etieti.”—Isaiah 53:7; Matthew 27:12-14; Utom 8:28, 32-35.

Mme Ntịn̄nnịm Ikọ Oro Ẹban̄ade N̄kpa Messiah. Ntịn̄nnịm ikọ Isaiah ama aka iso osu ke ini Jesus akakpade ye ke enye ama ekeset. Isaiah ọkọdọhọ ete: “Mmọ ẹnịm udi esie ye mme idiọk owo, edi enye odu ye owo inyene ke n̄kpa esie.” (Isaiah 53:9) Didie ke ntịn̄nnịm ikọ oro etiede esen esen mi okosu? Ẹkekọn̄ Jesus ke ufọt mbon n̄wo iba. (Matthew 27:38) Ekem Joseph emi ekedide imọ owo emi okotode Arimathea ama emen okpo Jesus obụk ke obufa udi oro enye okotụn̄de. (Matthew 27:57-60) Ke akpatre, n̄kpa Jesus ama osu kiet ke otu n̄wọrọnda ntịn̄nnịm ikọ Isaiah. Isaiah okokot Messiah ‘edinen owo emi adade ifiọk esie anam ikọ asana ediwak  owo; onyụn̄ obiom mme idiọk ido mmọ.’ Ke akpanikọ, n̄kpa Jesus ama afak kpukpru mbon oro ẹnamde akpanikọ osio ke ufụn idiọkn̄kpọ.—Isaiah 53:8, 11; Rome 4:25.

Mme Ntịn̄nnịm Ikọ Oro Ẹdisude

Man ẹda N̄wed Abasi ẹwụt ke Jesus edi Messiah, mme apostle ye Jesus ke idemesie ẹma ẹsikot ndien ndien ẹto ntịn̄nnịm ikọ Isaiah ẹkan mme n̄wed Bible eken. Nte ededi, n̄wed Isaiah ikedịghe n̄kukụre n̄wed oro eketịn̄de se iditịbede ke ini iso. Ediwak ntịn̄nnịm ikọ eken oro ẹdude ke N̄wed Abasi Usem Hebrew ẹsu Jesus n̄ko ke idem, ndusụk ẹdisu ke Obio Ubọn̄ esie, mmọ eken ẹwụt nti n̄kpọ oro Obio Ubọn̄ oro edinamde ke ini iso. * (Utom 28:23; Ediyarade 19:10) Ndi mme owo ẹma ẹnen̄ede ẹnịm ke mme ntịn̄nnịm ikọ emi ẹyesu? Jesus ọkọdọhọ mme Jew oro ẹkekpan̄de utọn̄ ẹnọ enye ete: “Ẹkûkere ẹte n̄kedi ndibabiat Ibet m̀mê ikọ mme prọfet [oro edi, N̄wed Abasi Usem Hebrew]. N̄kedịghe ndibabiat, edi ndinam enye osu; koro ndọhọ mbufo ke akpanikọ nte edi mmemmem n̄kpọ enyọn̄ ye isọn̄ ndibe mfep akan n̄kpri-n̄kan abisi kiet m̀mê ubak abisi kiet ke Ibet ndibe mfep ke usụn̄ ekededi ndien kpukpru n̄kpọ idaha itie.”—Matthew 5:17, 18.

Jesus n̄ko ama owụt ke se itịbede inọ imọ ye se iditịbede ke ini iso ẹsu mme ntịn̄nnịm ikọ Bible. (Daniel 9:27; Matthew 15:7-9; 24:15) Ke adianade do, Jesus ye mme mbet esie ẹma ẹtịn̄ ẹban̄a mme n̄kpọ oro ẹditịbede ke ini iso, esịnede ediwak oro nnyịn ikụtde ẹtịbede mfịn. Ibuotikọ oro etienede eyeneme mme n̄kpọ emi ye mme ntịn̄nnịm ikọ en̄wen ke Bible oro ẹdisude ke ini iso.

[Ikọ Idakisọn̄]

[Ndise ke page 4]

‘N̄wan oro mîfiọkke erenowo ayaman eyeneren’

[Ndise ke page 5]

‘N̄kedịpke iso mi mfehe bụt’