San̄a Kpere Abasi

Ebiereikpe Emi Esinamde Se Inende Kpukpru Ini

Genesis 18:22-32

EDINEN IKPE. Unana utụk. Unana asari. Ndi afo umaha utọ nti edu oro? Nnyịn isimaha ẹtụk nnyịn. Edi edinen ikpe iwakke ke ererimbot mfịn. Nte ededi, odu Ebiereikpe emi odotde ẹbuọt idem—enye edi Jehovah Abasi. Enye esinam se inende kpukpru ini. Genesis 18:22-32 ọsọn̄ọ emi ke nneme oro Abraham ekenemede ye Jehovah. *

Ke ini Jehovah akasiande Abraham ke imọ imọn̄ ikese nte n̄kpọ etiede ke Sodom ye Gomorrah, Abraham ama okop ndịk aban̄a se iditịbede inọ ndinen owo ekededi oro ẹdude do, emi ekesịnede Lot eyen eyeneka esie. Abraham ama ekpe Jehovah ubọk ete: “Nte afo oyonyụn̄ osobo edinen owo ye mme idiọk? Ndusụk edinen owo aba ye duop ẹdu ke obio oro: nte afo . . . udunyụn̄ udahakedo unọ ebiet oro, uban̄a edinen owo aba ye duop eke ẹdude ke esịt?” (Ufan̄ikọ 23, 24) Abasi ama ọdọhọ ke imọ idisoboke obio oro edieke ndinen owo 50 kpọt ẹdude. Abraham ama afiak ekpe Abasi ubọk utịm ikotion, osụhọde ibat oro sụn̄sụn̄ ekesịm duop. Ke ofụri utịm ikotion oro, Abasi ama ọdọhọ ke imọ idisoboke obio oro edieke ibat ndinen owo oro enye asiakde ẹdude.

Ndi Abraham akafan̄a n̄kpọ ye Abasi? Nsa ọbọn̄ mbon! Ntan̄idem enye oro ikpọn̄ ekpefri ifiom. Nte Abraham eketịn̄de ikọ ama enen̄ede owụt uten̄e ye nsụhọdeidem. Enye okokot idemesie “ntan ye ntọn̄.” Enye ama ọdọhọ ukpono ukpono ikanan̄ ete “mbọk.” (Ufan̄ikọ 27, 30-32) N̄ko-n̄ko, ikọ Abraham okowụt mbuọtidem oro enye ekenyenede ke Jehovah esikpe edinen ikpe. Abraham ama akpan̄a “nsa” ofụri utịm ikaba ke Abasi idisoboke ndinen owo ye ndiọi owo. Ete-ekpụk emi ekenyenede mbuọtidem mi ama ọdọhọ ke “Ebiereikpe ofụri ererimbot” ‘edinam se inende.’—Ufan̄ikọ 25.

Ndi se Abraham eketịn̄de ama enen? Idịghe kpukpru se enye eketịn̄de ekenen. Enye ikenenke ndikere ke ndinen owo duop ẹma ẹdu ke Sodom ye Gomorrah. Edi enye ama enen̄ede enen ke ndidọhọ ke tutu amama Abasi “[idisoboke] edinen owo ye mme idiọk.” Ke ini Abasi okosobode ndiọi obio oro ke akpatre, angel ama an̄wam edinen Lot ye nditọ esie iban iba ẹbọhọ.—2 Peter 2:7-9.

Nso ke mbụk emi ekpep nnyịn aban̄a Jehovah? Jehovah ndikasian Abraham ke imọ imọn̄ ikese mme obio oro ọwọrọ ke enye okoyom Abraham etịn̄ ekikere esie. Ekem, enye ama enyene ime akpan̄ utọn̄ okop nte Abraham ufan esie eketịn̄de se ikefịghede enye ke esịt. (Isaiah 41:8) Emi enen̄ede ekpep nnyịn ke Jehovah edi Abasi emi osụhọrede idem, emi okponode onyụn̄ ọnọde mme asan̄autom esie ke isọn̄ uku. Mmọdo, enen̄ede odot inyene ọyọhọ mbuọtidem ke Jehovah, kpa Ebiereikpe emi esinamde se inende kpukpru ini.

[Ikọ Idakisọn̄]

[Ndise ke page 24]

Abraham ama ekpe Jehovah ubọk aban̄a Sodom ye Gomorrah