Itie Mary ke Uduak Abasi

KE INI utom ukwọrọikọ Jesus, n̄wan kiet ama emenede uyo ke uyom otuowo ofiori ete: “Inemesịt edi eke owo emi idịbi esie akamande fi ye eba emi afo akawapde!” Edieke Jesus okpokoyomde ẹtuak ibuot ẹnọ eka imọ, ata eti ifet ekpekedi oro enye ndisịn udọn̄ nnọ utọ utuakibuot oro. Utu ke oro, enye ọkọbọrọ ete: “Baba, utu ke oro, Inemesịt akam edi eke mbon oro ẹkopde ikọ Abasi ẹnyụn̄ ẹkpemede ndinam enye!”—Luke 11:27, 28.

Jesus ikọnọhọ eka esie san̄asan̄a ukpono; enye ikonyụn̄ idehedei idọhọ mme mbet esie ẹnam ntre. Anam didie ndien ediwak mbon oro ẹtuakde ibuot ke ofụri esịt ẹsituakde ibuot ẹnọ Mary? Ẹyak ineme se Bible ekpepde aban̄a ndusụk ọsọ ukpepn̄kpọ oro ẹkpepde ẹban̄a eka Jesus.

‘Ọyọhọ ye Mfọn,’ ‘Ọfọn Ọnọ ke Otu Iban’

Angel Gabriel ama asian Mary se idide itie esie ke uduak Abasi. Enye ama ọkọm Mary ini oro ete: “Mmọkọm fi, afo emi ẹfọnde akwa mfọn, Jehovah odu ye afo.” (Luke 1:28) Usụn̄ en̄wen oro ẹkabarede ekọm oro edi: “Mmọkọm-o, afo emi ọyọhọde ye mfọn, Ọbọn̄ odu ye afo.” Esisịt ini ke oro ebede, Elizabeth ama ọkọm Mary ete: “Ọfọfọn ọnọ fi ke otu iban, onyụn̄ ọfọfọn ọnọ mfri idịbi fo!” (Luke 1:42) Nte kpukpru ikọ emi iwụtke ke akpana ẹnọ Mary san̄asan̄a ukpono?

Ke nditịm ntịn̄, iwụtke. Okposụkedi emi mme n̄kpọ emi ẹdude ke akam oro mbon Catholic ẹsibọn̄de ẹnọ Mary, Bible ke idemesie inọhọ ntak ndomokiet oro akpanade ẹbọn̄ akam ẹnọ enye.  Gabriel ye Elizabeth ẹketịn̄ ẹban̄a san̄asan̄a ifet oro Mary ekenyenede nte owo emi edimande Messiah, edi amaedi ndibọn̄ akam nnọ enye, utọ n̄kpọ oro idụhe ke N̄wed Abasi. Utu ke oro, ke ini mme mbet Jesus ẹkedọhọde enye ekpep mmimọ nte ẹkpebọn̄de akam, enye ọkọdọhọ mmọ ke ẹnyene ndibọn̄ akam nnọ Ete imọ. Ke nditịm ntịn̄, uwụtn̄kpọ akam Jesus oro ẹnen̄erede ẹdiọn̄ọ ọtọn̄ọ ntem: “Ete nnyịn emi odude ke heaven.”—Matthew 6:9.

Esịne ke Otu Mme Andikara

Ọsọ ukpepn̄kpọ en̄wen oro ẹkpepde ẹban̄a Mary edi ke enye edi “Ọbọn̄ An̄wan heaven” idahaemi. Akananam Bible inọhọ enye utọ udorienyịn̄ oro. Edi owụt ke enye enyene san̄asan̄a itie ke ukara Abasi ke heaven. Ewe itie idi oro?

Jesus ama ọdọhọ ke ndusụk ke otu mme anam-akpanikọ mbet imọ ẹyekara ye imọ ke Obio Ubọn̄ imọ. (Luke 22:28-30) Jesus ayanam mbon oro ẹmekde do ẹdi “mme oku ẹnọ Abasi nnyịn, ndien mmọ ẹyekara isọn̄ nte ndidem.” (Ediyarade 5:10) Bible enen̄ede anam nnyịn ifiọk ke Mary esịne ke otu mbon oro ẹnọde akwa ifet emi. Isan̄a didie ifiọk emi?

N̄kọ emeti ke Jesus ama akakpa, Mary ama etiene mme mbet Jesus ye nditọeka esie ‘ọkọbọ ke akam.’ N̄kpọ nte owo 120 emi esịnede “ndusụk iban” ẹma ẹsop idem man ẹnam emi. (Utom 1:12-15) Bible ọdọhọ ke adan̄aemi “usọrọ Pentecost akakade iso, kpukpru mmọ ẹkedu ọtọkiet ke ubet kiet” ke ini ẹken̄wan̄ade edisana spirit Abasi ẹduọk mmọ, emi onyụn̄ ọnọ mmọ ukeme nditịn̄ ikọ ke mme usem esenidụt.—Utom 2:1-4.

Mary ndisịne ke otu mbon oro ẹkenọde edisana spirit mi owụt ke ẹma ẹmek enye ye iban eken oro ẹkebọde edisana spirit nditiene n̄kara ke Obio Ubọn̄ Jesus eke heaven. Ntre, nnyịn imenyene ntak ndinịm ke Mary etiene Jesus ada ubọn̄ idahaemi ke heaven. (Rome 8:14-17) Kere ban̄a ndusụk ifet oro enye ye mbon eken oro ẹtienede Jesus ẹkara ẹdinyenede ke ndisu uduak Abasi.

Ndinọ Mme Utịbe Utịbe Edidiọn̄

N̄wed Ediyarade ọdọhọ ke ẹyenam owo 144,000 ẹset ẹkeda ubọn̄ eke heaven man ẹkenam utom ye Jesus nte mme oku, mme ebiereikpe, ye ndidem. (Ediyarade 14:1, 4; 20:4, 6) Sia mmọ ẹdide mme oku, mmọ ẹyenam ofụri okopitem ubonowo ẹbọ ufọn uwa Jesus, ẹnam mmọ ẹfọn ẹma ke n̄kan̄ eke spirit, ke ido uwem, ye ke ikpọkidem. (Ediyarade 21:1-4) Nso akwa ifet ke edidi ntem ọnọ kpukpru mbon oro ẹsọn̄ọde ẹda ẹtuak ibuot ẹnọ Jehovah ndikụt utọ utịbe utịbe ini oro! *

Mary ama enyene itie, ndien ke onyụn̄ enyenyene ke ndisu uduak Jehovah. Odot ikpebe nsụhọdeidem, mbuọtidem, n̄kopuyo, ye nsịnifịk esie nte eka, idịghe nditetịn̄ mban̄a enye ndiyọ mme idomo. Odot inen̄ede ikpono enye ke ifet oro enye ekenyenede ndiman Messiah nnyụn̄ nnam ubonowo ẹbọ nsinsi edidiọn̄.

Nte ededi, ata akpan n̄kpọ oro ikpepde ito Mary edi nte ke enye ye mme anam-akpanikọ asan̄autom Abasi eken, ẹtuak ibuot ẹnọ Jehovah, ituakke inọ abasi en̄wen ekededi. Mary etiene mbon eken oro ẹtienede Christ ẹkara, emenerede uyo atan̄a ete: “Itoro ye ukpono ye edikara ẹnyene Enye emi etiede ke ebekpo [Jehovah Abasi] ẹnyụn̄ ẹnyene Eyenerọn̄ [Jesus Christ] ke nsinsi nsinsi.”—Ediyarade 5:13; 19:10.

[Ikọ Idakisọn̄]

[Se ẹwetde ke ikpọ abisi ke page 10]

Odot ikpebe nsụhọdeidem, mbuọtidem, ye n̄kopuyo Mary