San̄a Kpere Abasi

Jehovah Ọdiọn̄ọ Ukeme Nnyịn

Leviticus 5:2-11

N̄WAN kiet emi ekesịnde idem okpono Abasi ọkọdọhọ ete, “Mmanam ofụri ukeme mi, edi osụk etie mi nte ke ntọn̄ọke-tọn̄ọ kan̄a.” Ndi Jehovah Abasi esidara ukeme emi ikọt esie ẹsịnde ẹnam n̄kpọ esie? Ndi enye esikere aban̄a ukeme ye idaha owo kiet kiet? Ndidụn̄ọde ndusụk uwa oro Ibet Moses ọkọdọhọde ẹwa, nte ẹwetde ke Leviticus 5:2-11, ayanam ifiọk ibọrọ mbụme emi.

²Ibet oro Abasi ọkọnọde Israel ọkọdọhọ ẹsiwa nsio nsio uwa ẹnọ imọ man ifen mme idiọkn̄kpọ mmọ. Se ẹtịn̄de mi idịghe n̄koinnam idiọkn̄kpọ. (Ufan̄ikọ 2-4) Ke ini owo ekedide edifiọk se enye akanamde, enye ekenyene ndika n̄kayarade ndudue esie nnyụn̄ n̄wa uwa usio-isop—oro edi, “uman . . . n̄kpri ufene, edide eyen erọn̄, onyụn̄ edide eyen ebot.” (Ufan̄ikọ 5, 6) Nso ke owo ekenyene ndinam edieke enye mîkenyeneke okụk ndidep eyenerọn̄ m̀mê eyenebot? Ndi Ibet ọkọdọhọ enye odụk isọn ọbọ eyenebot m̀mê eyenerọn̄? Mîdịghe ndi akana enye anam utom tutu enye ekeme ndidep mme n̄kpọ uwa mbemiso osiode isop idiọkn̄kpọ esie?

³Man owụt ke Jehovah enen̄ede ekere aban̄a mme owo, Ibet oro ọdọhọ ete: “Ndien edieke ubọk mîkemke enye ke eke n̄kpri ufene, yak enye ada mbomo n̄kuku iba, m̀mê nditọ ibiom iba, ọsọk Jehovah.” (Ufan̄ikọ 7) Ikọ oro, “edieke ubọk mîkemke enye” ọwọrọ “edieke enye mînyeneke okụk idep.” Mmọdo, edieke eyen Israel mîkekemeke ndinọ eyenerọn̄, Abasi ama enyịme ndibọ se enye ekenyenede—edide mbomon̄kuku iba m̀mê nditọ ibiom iba.

⁴Nso ke owo emi mîkenyeneke okụk ndidep ukpọk inuen iba ndida nnam uwa ekenyene ndinam? Ibet oro ọkọdọhọ ete: “Yak andidue ada Omer eti ndom-uyo kiet [oro edi, cup itiaita m̀mê usụkkiet] ke enọ esie, ke uwa idiọk ido.” (Ufan̄ikọ 11) Jehovah ama enyịme ndibọ se mme ọkpọikpọi ubuene ẹkenyenede, enyịme mmọ ẹnọ n̄kpọ oro mînyeneke iyịp man efen mme idiọkn̄kpọ mmọ. * Ke idụt Israel, ndidi ubuene ikakpanke owo ndisio isop idiọkn̄kpọ esie m̀mê ndinam emem ye Abasi.

⁵Nso ke ibet oro aban̄ade uwa usio-isop ekpep nnyịn aban̄a Jehovah? Ekpep nnyịn ke Jehovah edi Abasi mbọm, emi esinyụn̄ ekerede aban̄a ukeme mbon oro ẹtuakde ibuot ẹnọ enye. (Psalm 103:14) Enye oyom nnyịn inen̄ede isan̄a ikpere imọ inyụn̄ inam ufan ye imọ idem ekpededi imọsọn̄, idọdọn̄ọ, imenyene mme mfịna ke ubon m̀mê mme mfịna en̄wen. Edi ata n̄kpọ ndọn̄esịt ndifiọk ke Jehovah Abasi esinen̄ede enem esịt ndikụt nnyịn inamde n̄kpọ esie ke ofụri ukeme nnyịn.

[Ikọ Idakisọn̄]