San̄a Kpere Abasi

‘Ubọn̄ Fo Ọyọsọn̄ọ Ada’

2 SAMUEL 7:1-16

TOTO ke eset, ẹdorode ediwak mme andikara ẹfep ke ifụm ukara. Ẹsisịn n̄wed ẹsio ndusụk ẹnyụn̄ ẹda odudu ẹdorode mbon en̄wen ẹfep. Nso kaban̄a Jesus Christ, Edidem Obio Ubọn̄ Abasi eke heaven? Ndi n̄kpọ ekededi ekeme ndibiọn̄ọ enye ndikara nte Edidem oro Abasi emekde? Ẹkeme ndikụt ibọrọ ke se Jehovah eketịn̄de ọnọ Edidem David eke Israel eset, emi ẹwetde ke 2 Samuel ibuot 7.

Ntọn̄ọ ntọn̄ọ ibuot n̄wed oro ọdọhọ ke bụt anam David sia enye nte ikpîkpu edidem odụn̄de ke ediye ufọk ubọn̄ edi ekebe ediomi Abasi odu ke ataya. * David ọdọhọ ke iyom ndibọp ufọk, m̀mê temple, oro odotde nnọ Jehovah. (Ufan̄ikọ 2) Edi idịghe David edibọp ufọk emi. Jehovah ada prọfet Nathan asian David ke eyen esie edibọp temple emi.—Ufan̄ikọ 4, 5, 12, 13.

Jehovah ama se David enen̄erede oyom ndinam. Abasi anam ediomi ye David ete ke imọ iyanam owo ke ubon esie adaha ada emi edikarade ke nsinsi, ke ntak emi David eketen̄ede imọ, man onyụn̄ osu uduak Esie. Nathan etịn̄ un̄wọn̄ọ Abasi emi ọnọ David ete: “Ufọk fo ye ubọn̄ fo ẹdisọn̄ ẹda ke iso fo ke nsinsi: ebekpo fo oyowụhọ ke nsinsi.” (Ufan̄ikọ 16) Anie ke ediomi emi edisu ke idem—emi edikarade ke nsinsi?—Psalm 89:20, 29, 34-36.

Jesus eyen Nazareth okoto ubon David. Angel eketịn̄ ntem ke ini ọkọtọtde emana Jesus: “Jehovah Abasi ọyọnọ enye ebekpo ete esie David, ndien enye ayakara ufọk Jacob nte edidem ke nsinsi, obio ubọn̄ esie idinyụn̄ inyeneke utịt.” (Luke 1:32, 33) Ntre ediomi oro ẹkenamde ye David okosu Jesus Christ ke idem. Ntem, idịghe mme owo ẹkemek enye ada ukara, edi un̄wọn̄ọ Abasi ọnọ enye unen ndikara ke nsinsi. Ẹyak iti ke un̄wọn̄ọ Abasi isitreke ndisu.—Isaiah 55:10, 11.

Enyene akpan n̄kpọ iba oro 2 Samuel ibuot 7 ekpepde nnyịn. Akpa, nnyịn imekeme ndinyene mbuọtidem ke baba n̄kpọ m̀mê owo kiet ikemeke ndikpan Jesus Christ ndikara. Ntem, imekeme ndinen̄ede nnịm ke enye ayanam se ukara esie aduakde ndinam, oro edi, ndinam uduak Abasi ọyọhọ ọyọhọ ke isọn̄ kpa nte ẹnamde ke heaven.—Matthew 6:9, 10.

Ọyọhọ iba, mbụk emi ekpep nnyịn ata eti n̄kpọ aban̄a Jehovah. Ti ete ke Jehovah ama okụt onyụn̄ ama se David akaduakde ndinam. Enem ndifiọk ke Jehovah okụt onyụn̄ ama nte isịnde ifịk ituak ibuot inọ enye. Ke ndusụk idaha, mme n̄kpọ oro nnyịn mîkemeke ndinyan̄a, utọ nte udọn̄ọ m̀mê usọn̄, ẹkeme ndibiọn̄ọ nnyịn ndinam ofụri se ikpamade ndinam ke utom Abasi. Edieke edide ntre, akpakam nnyịn ibọ ndọn̄esịt ndifiọk ke Jehovah okụt udọn̄ oro inyenede ndituak ibuot nnọ enye ke ofụri esịt.

[Ikọ Idakisọn̄]