Ntak Emi Jesus Mîkesịnke Idem ke Mbubehe Ukara?

DA ENYỊN ikike se se itịbede ke isua 32 E.N. Eyo okụt. Mme owo ẹnenen̄ede ẹfiọk Jesus, kpa Messiah emi ẹken̄wọn̄ọde, ke ntak emi enye ọkọkde mme owo udọn̄ọ onyụn̄ akam anamde mme akpan̄kpa ẹset. Mfịn, enye anam uten̄e odoro ediwak tọsịn owo ke ntak ikpọ idiọn̄ọ emi enye anamde ye ikọ Abasi emi enye ekpepde. Idahaemi, enye abahade otuowo emi biọn̄ ọdọn̄de obon ke ediwak n̄kpri otu. Enye ọbọn̄ akam ọnọ Jehovah onyụn̄ ọnọ kpukpru mmọ udia ke utịbe utịbe usụn̄ ẹdia ẹyụhọ. Ekem enye atan̄ mbubek oro osụhọde man n̄kpọ ndomokiet okûtak. Nso ke mme owo oro ẹnam ẹban̄a emi?—John 6:1-13.

Ọfọn, ke mmọ ẹma ẹkekụt mme utịben̄kpọ oro Jesus anamde ye nte enye adade mbufiọk ese aban̄a otuowo oro onyụn̄ ọnọde mmọ udia, mmọ ẹbiere ke Jesus edidi ata eti edidem. (John 6:14) Se mmọ ẹnamde ikpaha owo idem. Ti ete ke mmọ ẹma ẹnen̄ede ẹyom eti andikara; idụt en̄wen akakara edima obio emana mmọ ke ọkpọsọn̄ ubọk. Ntre, mmọ ẹma ẹdomo ndinyịk Jesus etiene esịn idem ke mbubehe ukara. Ye emi ke ekikere, se se Jesus akanamde.

John 6:15 ọdọhọ ete: “Ke Jesus ọfiọkde ete mmọ ẹyom ndimụm imọ nnịm ke edidem, enye afiak ọnyọn̄ ke obot sụk enye ikpọn̄.” Se Jesus ekebierede ama ana ata in̄wan̄-in̄wan̄. Enye ama ọsọn̄ọ esịn ndisịn idem ke mbubehe ukara idụt mmọ. Idaha esie emi ikpụhọkede. Enye ọkọdọhọ ke mme anditiene imọ ẹnyene ndinam kpa ntre. (John 17:16) Ntak emi enye mîketieneke isịn idem ke mbubehe ukara?

Ntak Emi Jesus Ekemekde Ndida San̄asan̄a?

Mme edumbet N̄wed Abasi ẹkenen̄ede ẹnam Jesus ebiere nditre ndisịn idem ke mbubehe ukara ererimbot emi. Ẹyak ineme iba kpọt.

“Owo [amakara] owo tutu ọnọ enye unan.” (Ecclesiastes 8:9, NW) Bible ọdọhọ ke ukara owo etie ntre. Ti ete ke Jesus ama ododu nte spirit ata anyan ini ke heaven mbemiso ekedide isọn̄ edidu nte owo. (John 17:5) Ntre, enye ama ọfiọk ke ọkpọkọm owo enyene eti esịt nte enyenyene ke mme owo inyeneke ukeme ndikara ata ediwak owo edifọn edifọn; Abasi ikonyụn̄ ibotke owo man anam ntre. (Jeremiah 10:23) Jesus ama ọfiọk ke ukara efen—idịghe ukara owo—edikọk mfịna ubonowo.

“Ofụri ererimbot esịne ke idak odudu andidiọk.” (1 John 5:19) Ndi ikọ oro akpa fi idem? Akpa ediwak owo. Mmọ ẹsikere ẹban̄a nti owo emi ẹsidụkde ukara ke ntak emi ẹyomde ndinam ererimbot emi ọfọn, ifụre onyụn̄ odu. Edi ọkpọkọm ẹtịme nte ẹtetịme, idem andikara oro anamde akpanikọ akan ikemeke ndisọn̄ odudu n̄kan owo emi Jesus okokotde “andikara ererimbot emi.” (John 12:31; 14:30) Ntak edi oro Jesus ọkọdọhọde andikara kiet ete: “Obio ubọn̄ mi idịghe ubak ererimbot emi.” (John 18:36) Jesus ekenyene ndidi Edidem ukara Abasi eke heaven. Edieke Jesus ekpeketienede esịn idem ke mbubehe ukara, enye ikpọkọsọn̄ọke ida inọ ukara Ete esie.

Edi ndi Jesus ọkọdọhọ ke mme anditiene imọ inyeneke mbubehe ndomokiet ye ukara owo? Baba, enye ama ekpep mmọ nte ẹkpedade eti ibuot ẹnọ Abasi se inyenede Abasi, ẹnyụn̄ ẹnọ ukara ererimbot se inyenede mmọ.

Jesus Ama Okpono Ukara

Ke ini Jesus okosụk ekpepde mme owo n̄kpọ ke temple, mme andibiọn̄ọ ẹma ẹdomo enye man ẹmụm enye ke ikọinua ke ndibụp enye m̀mê ọfọn mme owo ẹkpe tax. Edieke Jesus ọkpọkọdọhọde ihih, ẹkpekeda ke enye ọsọn̄ ibuot ye ukara ndien ekeme ndidi oro akpakanam  mbon oro ẹkefịkde, emi ẹketiede-tie ẹbet ndiwọrọ ke ọkpọnọ mbon Rome, ẹsọn̄ ibuot ye ukara. Edi edieke Jesus okpokonyụn̄ ọdọhọde ih, ediwak owo ẹkpekekere ke enye enyịme ufịk oro ukara ekefịkde mmimọ. Ibọrọ Jesus ama enen̄ede owụt eti ibuot. Enye ọkọdọhọ ete: “Ẹnọ Caesar mme n̄kpọ eke ẹnyenede Caesar, edi ẹnọ Abasi mme n̄kpọ eke ẹnyenede Abasi.” (Luke 20:21-25) Ntre, mme anditiene enye ẹnyene ndikop uyo nnọ Abasi ye Caesar—oro edi, ukara ererimbot.

Ukara anam ukeuke emem odu. Mmọ ẹnyene unen ndidọhọ mbio obio ẹnam akpanikọ, ẹkpe tax, ẹnyụn̄ ẹnịm mbet. Nso uwụtn̄kpọ ke Jesus ekenịm ke ndinọ “Caesar mme n̄kpọ eke ẹnyenede Caesar”? Ete ye eka esie ẹma ẹsinịm mbet, idem ke ini ekenen̄erede ọsọn̄ ndinam ntre. Ke uwụtn̄kpọ, Joseph ye Mary an̄wan esie emi akasan̄ade ye idịbi ẹma ẹto ebiet oro mmọ ẹkedụn̄de ẹsan̄a kilomita 150 ẹka Bethlehem ke ini emi ukara Rome ọkọdọhọde ẹkesịn enyịn̄ ke n̄wed. (Luke 2:1-5) Jesus ama onyụn̄ enịm mbet ukem nte mmọ, tutu akam ekpe tax emi mîkobiomoke enye ndikpe. (Matthew 17:24-27) Enye ama enen̄ede ekpeme mbak edibiat ibet ukara. (Luke 12:13, 14) Imekeme ndidọhọ ke Jesus ama okpono ndutịm ukara okposụkedi emi enye mîkesịnke idem ke mbubehe ukara. Edi nso ke ikọ Jesus ọkọwọrọ ke ini enye ọkọdọhọde ete ẹnọ “Abasi mme n̄kpọ eke ẹnyenede Abasi”?

Nte Jesus ọkọnọde “Abasi Mme N̄kpọ Eke Ẹnyenede Abasi”

Ẹma ẹbụp Jesus ini kiet m̀mê ewe edi n̄kponn̄kan ewụhọ ke ofụri ibet emi Abasi ọkọnọde owo. Christ ọkọbọrọ ete: “‘Afo  enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’” (Matthew 22:37-39) Jesus ekekpep ete ke amaedi ndinọ “Abasi mme n̄kpọ eke ẹnyenede Abasi,” ke akpa n̄kpọ emi inyenede ndinọ Enye edi ima—emi esịnede edisọn̄ọ nda ọyọhọ ọyọhọ ye enye ke ofụri esịt.

Ndi imekeme ndima owo iba ntre? Ndi imekeme ndisọn̄ọ nda ye Jehovah Abasi ye ukara esie eke heaven inyụn̄ isọn̄ọ ida ye ukara ererimbot emi? Jesus ke idemesie ọkọnọ edumbet emi ete: “Baba owo kiet ikemeke ndidụk ufụn nnọ eteufọk iba; koro eyedi enye ayasua kiet onyụn̄ ama enye eken, mîdịghe enye ayadiana ye kiet onyụn̄ esịn enye eken ke ndek.” (Matthew 6:24) Jesus eketịn̄ aban̄a ndisọn̄ọ nda ye Abasi m̀mê ye inyene, edi enye ama enen̄ede enịm ke edumbet emi abuana n̄ko ndisịn idem ke mbubehe ukara—mme anditiene enye emi ẹkedude ke eyo mme apostle ẹkenịm ntre n̄ko.

Mbịghi-n̄kan n̄wed oro odude ọdọhọ ke mme anditiene Christ emi ẹkedude ke eset ikesịnke idem ke mbubehe ukara. Sia mmọ ẹketuakde ibuot ẹnọ Enye emi Christ akatuakde ibuot ọnọ, mmọ ikenyịmeke ndita un̄wọn̄ọ edisọn̄ọ nda ye Rome ye akwa edidem esie, edidụk ekọn̄, ye edikama itie ke ukara. Emi ama anam ẹsua mmọ akpatre usua. Ndusụk ini mme asua mmọ ẹma ẹsidori mmọ ikọ ẹte ke mmọ ẹsasua ubonowo. Ndi ikọ oro ekedi akpanikọ?

Ata Mme Christian Ẹma Mme Owo

Ti se Jesus eketịn̄de aban̄a udiana n̄kponn̄kan ewụhọ Abasi—“Afo enyene ndima mbọhọidụn̄ fo nte idemfo.” An̄wan̄a ke idụhe ata  anditiene Christ emi enyenede unen ndisua ubonowo. Jesus ama ama mme owo, anam utom ọkpọsọn̄ ke ibuot mmọ, idem an̄wamde mmọ ke mme mfịna uwem emi.—Mark 5:25-34; John 2:1-10.

Edi ẹkenen̄ede ẹfiọk Jesus kaban̄a nso? Owo ikesikotde enye Ọkọkudọn̄ọ, Andinọ Tọsịn Owo Udia, owo ikakam ikotke enye Andinam Mme Owo Ẹset—okposụkedi emi edide enye ama anam kpukpru mme utịbe utịbe n̄kpọ emi. Edi mme owo ẹkekot enye Andikpep, ndien oro ama enen. (John 1:38; 13:13) Jesus ama ọdọhọ ke akpan ntak oro imọ ikedide isọn̄ ekedi man idikpep mme owo iban̄a Obio Ubọn̄ Abasi.—Luke 4:43.

Ntak edi oro ata mme anditiene Christ ẹsịnde idem ẹnam ukem utom oro Eteufọk mmọ akanamde ke ini enye okodude ke isọn̄, oro edi, ndikpep mme owo eti mbụk oro aban̄ade Obio Ubọn̄ Abasi. Jesus Christ owụk kpukpru ata mme Christian ete ẹkpep mme owo ke ofụri ererimbot ẹban̄a Obio Ubọn̄ Abasi. (Matthew 24:14; 28:19, 20) Mfọnmma ukara eke heaven oro ayakara ofụri edibotn̄kpọ Abasi nte ekemde ye ibet ima. Enye ayanam uduak Abasi, ayakam etre ndutụhọ ye n̄kpa. (Matthew 6:9, 10; Ediyarade 21:3, 4) Ntak edi oro Bible ọdọhọde ke etop Christ edi “eti mbụk”!—Luke 8:1.

Ke ntre, edieke afo oyomde ata mme anditiene Jesus Christ ke isọn̄ mfịn, afo edisan̄a didie ọfiọk mmọ? Ndi mmọ ẹyesịn idem ke mbubehe ukara ererimbot emi? Mîdịghe ndi mmọ ẹda akpan utom oro Jesus akanamde nte akpan utom mmọ—oro edi, edikpep mme owo ye edikwọrọ mban̄a Obio Ubọn̄ Abasi?

Ndi akpama ndikpep n̄kpọ en̄wen mban̄a Obio Ubọn̄ Abasi ye nte enye ekemede nditụk uwem fo idahaemi? Mbọk sobo ye Mme Ntiense Jehovah ke edem mbufo mîdịghe ka ikpehe Intanet emi, www.watchtower.org.

[Ekebe/Mme ndise ke page 24, 25]

Ndi Mme Ntiense Jehovah Ẹsin̄wam Obio?

Mme Ntiense Jehovah isisịnke idem ke mbubehe ukara. Edi mmọ ẹnen̄ede ẹsịn idem ẹn̄wam mme owo emi ẹtode kpukpru orụk ẹnyụn̄ ẹdude ke kpukpru idaha ke obio mmọ. Kere ban̄a n̄kpọ ifan̄ emi:

◼ Mme Ntiense Jehovah ẹdi otu mme anamutom unyịmesịt emi ẹbede miliọn itiaba; mmọ ẹsida se ibede biliọn hour kiet ye ubak ẹkpep mme owo se isịnede ke Bible ẹnyụn̄ ẹn̄wam mmọ ẹtre ndiọi edu ye ndiọi edinam, ẹnam ubon mmọ ẹkop inemesịt, ndien ke ntem ẹfori uwem mmọ.

◼ Mmọ ẹmịn̄ ẹnyụn̄ ẹsuan mme n̄wed ke unana ekọmurua ke se ibede usem 500, esịnede mme usem emi owo mîmịn̄ke n̄wed en̄wen.

◼ Mmọ ẹnọ mme owo ukpep nte ẹkpetịn̄de ikọ an̄wan̄wa, ndien emi an̄wam ediwak miliọn owo ẹfiọk nditịn̄ ikọ in̄wan̄-in̄wan̄ ye ke usọ.

◼ Mmọ ẹsinịm ufọkn̄wed emi ẹkpepde nte ẹkotde n̄wed ẹnyụn̄ ẹwetde n̄kpọ, emi an̄wamde ata ediwak owo ke ofụri ererimbot ẹfiọk nte ẹkotde n̄wed ẹnyụn̄ ẹwetde n̄kpọ.

◼ Mmọ ẹtịm se ibede Kọmiti Ubọpufọk Eke Ikpehe ke Ikpehe 400 ye se ibede Mme Otu Ubọp Ufọkmbono Obio Ubọn̄ 250 man ẹkpep mme anamutom unyịmesịt usọ ubọpn̄kpọ man mmọ ẹkpebọp mme itie ubọ ukpep Bible. Ke ufan̄ isua duop emi ẹbede, ẹmebọp mme ufọk utuakibuot, m̀mê mme Ufọkmbono Obio Ubọn̄, oro ẹwakde ẹbe 20,000.

◼ Mmọ ẹsinọ mbon oro oto-obot afanikọn̄ ọnọmọde ke ofụri ererimbot n̄kpọ un̄wam, ndien mmọ ẹsin̄wam Mme Ntiense ye mbon oro mîdịghe Mme Ntiense. Ke ufan̄ isua iba tọn̄ọ akwa oyobio ọkọnọmọ United States ndien ndien ke ndondo emi, mme anamutom unyịmesịt emi ẹdide Mme Ntiense ẹma ẹfiak ẹbọp se ibede Ufọkmbono Obio Ubọn̄ 90 ye ufọkidụn̄ 5,500.

[Ndise ke page 23]

Ke ini mme owo ẹkenyịkde Jesus ẹte etiene esịn idem ke mbubehe ukara, enye ama “afiak ọnyọn̄ ke obot sụk enye ikpọn̄”