Ndi Ama Ọfiọk?

Ndi Jesus ama abuana n̄kpọ ye owo ekededi ke otu mme apostle esie 12?

▪ N̄wed Abasi ibọrọke ih m̀mê ihih. Edi mbụk mme Jew ye mme ntọt en̄wen ẹwụt ke Jesus ama abuana n̄kpọ ye ndusụk mmọ.

Mme andiwet Gospel ẹsiak enyịn̄ iban oro ẹkedade ẹse ke ini ẹkewotde Jesus ke eto. John 19:25 asiak inan̄ emi ke otu mmọ: “[Mary] eka Jesus ye eyeneka eka esie an̄wan; Mary n̄wan Clopas, ye Mary Magdalene.” Edieke imende ufan̄ikọ emi idomo ye ukem mbụk emi ke Matthew ye Mark, emi ekeme ndinam ifiọk ke Salome ekedi eyeneka eka Jesus. Ndien etie nte Salome ekedi n̄ko eka nditọ Zebedee. (Matthew 27:55, 56; Mark 15:40) Ọwọrọ ke nditọ esie, James ye John, emi ẹsiakde ke ebiet en̄wen ke Bible ẹkedi nditọ eyeneka eka Jesus. Jesus ama okot nditọeka iba emi, emi ẹkedide mme ọkọiyak mi, ete ẹdidi mbet imọ.—Matthew 4:21, 22.

Mbụk mme Jew ọdọhọ ke Clopas, m̀mê Alphaeus, emi ọkọdọde kiet ke otu iban oro ikasiakde ke John 19:25, ekedi eyeneka Joseph ebe eka Jesus. Edieke emi edide akpanikọ, ọwọrọ ke James eyen Alphaeus, kiet ke otu mme apostle 12, ekedi iman Jesus n̄ko.—Matthew 10:3.

John Andinịm Owo Baptism akabuana nso ye Jesus?

▪ Ndusụk owo ẹdọhọ ke eka eka John ye eka eka Jesus ẹkedi nditọeka. Mmọ ẹdọhọ ntem ke ntak emi owo mîkabakede Luke 1:36 nte enende. Ke uwụtn̄kpọ, King James Version ọdọhọ ke ufan̄ikọ oro ke eka Elizabeth, emi edide eka John, ye eka Mary, emi edide eka Jesus ẹkedi nditọeka.

Edi ke nditịm ntịn̄, akpasarade ikọ Greek ke ufan̄ikọ emi itịn̄ke n̄kpọ emi nnennen nnennen. N̄kukụre se enye ọdọhọde edi ke iban iba emi ẹkedi iman, idọhọke ke mme eka mmọ ẹkedi nditọeka. The Interpreter’s Dictionary of the Bible ọdọhọ ke “ikọ Greek oro ọwọrọ ata ediwak n̄kpọ tutu iyakke ẹdiọn̄ọ nte mmọ ẹkebuanade n̄kpọ.” M̀mọ̀n̄ ndien ke ẹda ekikere oro nte ke eka Jesus ye eka John ẹkedi nditọeka? The Catholic Encyclopedia ọbọrọ ete: “Ida kpukpru se itịn̄de iban̄a . . . ete ye eka Mary . . . ito mme n̄wed oro mîdịghe ubak edisana uwetn̄kpọ.”

Ntem, Jesus ye John ẹkedi nsannsan iman, idịghe ke mme eka mmọ ẹkedi nditọeka.