Mme Andikot N̄wed Nnyịn Ẹbụp Ẹte . . .

Ndi Ana Nnyene Ido Ukpono Emi Nsikade?

▪ Ndi afo etre ndika ufọkabasi sia ndiọi ido mme aka ufọkabasi ye eke mme etubom ufọkabasi ẹtekde fi esịt? Edieke edide ntre, ọwọrọ ke n̄ke French emi, “odụn̄-adiana ufọkabasi oyom usụn̄ ọkpọn̄ Abasi,” etịn̄ se isịnede fi ke esịt.

Ekeme ndidi afo amama Bible onyụn̄ oyom ukara ye mme owo ẹyak owo aka ufọkabasi ekededi emi enye amade. Edi afo emekeme ndikere, ‘Ndi Abasi osụk ọdọhọ ke ana owo enyene ufọkabasi emi enye akade mbemiso imọ inyịme utuakibuot esie?’

Ibio ibio ibọrọ edi, ih. Ntak emi idọhọde ntre? Ndien ndi ẹnyịme owo aka ufọkabasi ekededi?

Da Jesus ke uwụtn̄kpọ. Ndi ama odu ufọkabasi emi enye akakade? Ke ini Jesus ekedide eyenọwọn̄, enye ama esitiene ubon mmọ emi ẹkedide mme Jew ye mbon eken emi ẹkesikade temple ke Jerusalem aka do man okokpono Abasi nte ẹkediomide. (Luke 2:41-43) Ke ama okokpon, Jesus ama esitiene mme Jew eken okpono Abasi ke synagogue emi okodude ke obio mmọ. (Luke 4:14-16) Jesus ọkọdọhọ n̄wan emi ẹkesikade ido ukpono en̄wen ete: “Nnyịn ituak ibuot inọ se nnyịn ifiọkde.” (John 4:22) Ntem ke Jesus ekenen̄ede owụt ke ido ukpono imọ edi eke mme Jew.

Nte ini akakade, Jesus ama ọdọhọ ke sia mme Jew ẹsịnde imọ, ke Abasi esịn utuakibuot mmọ emi ẹma ẹkesabade. (Matthew 23:33–24:2) Kpa ye oro, enye ama owụt ke ana mbon emi ẹyomde ndikpono Abasi ke usụn̄ oro Abasi oyomde ẹnyene akpan ido ukpono emi mmọ ẹkade. Enye ọkọdọhọ mme mbet esie ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Akana mbet Christ esibuana ye mme mbet eken man enye ekeme ndiwụt mmọ utọ ima oro. Ke nditịm ntịn̄, Jesus ọkọdọhọ ke usụn̄ ido ukpono iba ẹdu. Enye ọkọdọhọ ke usụn̄ kiet “atatara onyụn̄ an̄wan̄a,” ndien ke enye ada owo “esịm nsobo.” Edi enye ama adian n̄ko ete: “Inuaotop emi adade owo esịm uwem afafaha usụn̄ esie onyụn̄ esịre, mme andikụt enye inyụn̄ iwakke.”—Matthew 7:13, 14.

Omokụt do, ke idịghe ufọkabasi ekededi ke owo akpaka. Bible ọdọhọ ikûdian idem ye mbon oro “[ẹnyenede] enyọn̄ enyọn̄ ido uten̄e Abasi edi [mîdụhe] uwem ekekem ye odudu esie,” onyụn̄ adian do ete, “wọn̄ọde kpọn̄ mmọ emi.” (2 Timothy 3:5) Edi nnyịn iyenen̄ede ibọ ufọn edieke idụn̄ọrede ifiọk inyụn̄ idian idem ye mbon oro ẹsan̄ade ke usụn̄ emi adade owo esịm uwem. Ẹsịn udọn̄ ẹnọ ẹnyụn̄ ẹn̄wam nnyịn idahaemi, ndien imodori enyịn ke eti ini iso.—Mme Hebrew 10:24, 25.

Nso ke afo edida ọfiọk m̀mê ewe ido ukpono isan̄a ke mfafaha usụn̄ oro? Ntak emi mûdụn̄ọkede ibọrọ emi Bible ọnọde ke ibuot 15 ke n̄wed Nso ke Bible Enen̄ede Ekpep? * N̄wed oro ayan̄wam fi ọfiọk ido ukpono emi Bible oyomde fi aka.

[Ikọ Idakisọn̄]