Se Ikpepde Ito Jesus

Nte Mme Angel ye Mme Demon Ẹtụkde Uwem Nnyịn

Jesus ama ododu ye Ete esie ke heaven “mbemiso ererimbot ekedide edidu.” (John 17:5) Ke ntre, enye etịm odot ndibọrọ mme mbụme oro ẹtienede mi.

Ndi mme angel ẹyom n̄kpọ ọfọn nnyịn?

▪ Jesus anam nnyịn ifiọk ke mme angel ẹnen̄ede ẹnyene udọn̄ ke idem mme owo. Enye ọkọdọhọ ete: “Idatesịt odu ke otu mme angel Abasi aban̄a anamidiọk kiet emi akabarede esịt.”—Luke 15:10.

Jesus ama owụt nte ke ẹnọ mme angel utom edise mban̄a mme udọn̄ eke spirit mme asan̄autom Abasi. Ntem, ke ini Jesus okodụride mme mbet esie utọn̄ aban̄a edinam mbon en̄wen ẹtuak ukot ẹduọn̄ọ, enye ama ọdọhọ ete: “Ẹkụt ẹte mbufo isịnke kiet ke otu n̄kpri owo emi ke ndek; koro ndọhọ mbufo nte mme angel mmọ ke heaven ẹsikụt iso Ete mi emi odude ke heaven kpukpru ini.” (Matthew 18:10) Ikọ Jesus ikọwọrọke nte ke mbet esie kiet kiet enyene san̄asan̄a angel emi esikpemede mmọ. Edi ikọ esie ọkọwọrọ nte ke mme angel ẹdiana kiet ye Abasi ẹnam utom ẹnyụn̄ ẹnen̄ede ẹnyene udọn̄ ke idem mme andibuana ke esop Christian.

 Didie ke Devil ekeme ndinam nnyịn n̄kpọ?

▪ Jesus ama odụri mme anditiene enye utọn̄ nte ke Satan esidomo ndikpan mme owo ndikpep akpanikọ mban̄a Abasi. Enye ọkọdọhọ ete: “Ke ebiet emi owo ekededi okopde ikọ obio ubọn̄ emi edi mîfiọkke se ọwọrọde, andidiọk edi editan̄ se ẹkesuande ke esịt esie.”—Matthew 13:19.

Jesus ama etịn̄ usụn̄ kiet emi Satan adade abian̄a mme owo ke ini enye ọkọnọde uwụtn̄kpọ aban̄a owo emi ọkọtọde wheat ke in̄wan̄ esie. Owo oro akada aban̄a Jesus, ndien wheat ẹkeda ẹban̄a mme Christian oro ẹdikarade ye Jesus ke heaven. Edi Jesus ama adian do ete ke asua ama edi “edisuan mbiet ọdọn̄ ke otu wheat” oro. Mbiet oro ẹda ẹban̄a mme Christian abian̄a. “Devil edi asua emi akadade mmọ edisuan.” (Matthew 13:25, 39) Ukem nte mbiet ẹkemede ndibiet wheat, mme Christian abian̄a ẹkeme ndibiet ata mme Christian. Mme ido ukpono emi ẹkpepde nsunsu ukpepn̄kpọ ẹnam mme owo ẹsọn̄ ibuot ye Abasi. Satan ada nsunsu ido ukpono anam mme owo ẹkûdi ufan Jehovah.

Nso ke ikeme ndinam mbak Satan idinam nnyịn n̄kpọ?

▪ Jesus okokot Satan “andikara ererimbot emi.” (John 14:30) Ke akam oro Jesus ọkọbọn̄de ọnọ Abasi, enye ama owụt nte ẹkemede ndikpeme nnyịn nsio ke ubọk Satan. Enye ọkọbọn̄ akam ọnọ Abasi aban̄a mme mbet esie ete: “[Kpeme] mmọ ke ntak andidiọk. Mmọ idịghe ubak ererimbot, kpa nte ami mmendịghe ubak ererimbot. Da akpanikọ nam mmọ ẹsana; ikọ fo edi akpanikọ.” (John 17:15-17) Ndifiọk Ikọ Abasi ekeme ndikpeme nnyịn mbak ererimbot emi Satan akarade mi idibiat nnyịn.

Didie ke mme angel ẹn̄wam nnyịn mfịn?

▪ Jesus ọkọdọhọ ete: “Ke utịt editịm n̄kpọ emi: mme angel ẹyewọrọ ẹka ẹkebahade ndiọi owo ẹsio ke otu nti owo.” (Matthew 13:49) Nnyịn idu uwem idahaemi ke “utịt editịm n̄kpọ” oro, ndien ediwak miliọn owo ke ẹnyịme eti mbụk Obio Ubọn̄ Abasi.—Matthew 24:3, 14.

Edi idịghe kpukpru mbon emi ẹtọn̄ọde ndikpep Ikọ Abasi ẹsinam se inemde enye esịt. Mme angel ẹda usụn̄ ke utom mme asan̄autom Jehovah, ndien mmọ ẹsibahade mbon oro ẹnen̄erede ẹma Abasi ẹkpọn̄ mbon oro mîyomke ndinam se mmọ ẹkpepde. Jesus ọkọdọhọ ke mbon oro Abasi amade “ẹdi mmọ oro ẹkopde ikọ ye eti esịt eke ọfọnde, ẹmụm ẹkama ẹnyụn̄ ẹn̄wụm mfri ke ime.”—Luke 8:15.

Edieke oyomde ndifiọk n̄kpọ efen, se ibuot 10 ke n̄wed emi, Nso ke Bible Enen̄ede Ekpep? oro Mme Ntiense Jehovah ẹsiode.

[Ndise ke page 16]

Mme angel ẹn̄wam ke nditan̄ mbon emi ẹnyenede eti esịt ndọn̄ ke esop Christian