Ikpenyene Nneme ye Anie ke Obio Mme Spirit?

ATA ỌKPỌSỌN̄ ABASI esidọhọ mme edibotn̄kpọ eke spirit ẹnam ndusụk n̄kpọ. Ke uwụtn̄kpọ, enye ayak isọn̄ ọnọ Jesus Christ akara, onyụn̄ emek mme anam-akpanikọ angel ẹda usụn̄ ke editan̄a eti mbụk. (Ediyarade 14:6) Edi enye inamke ntre ye akam. Enye idọhọke owo ekededi ọbọrọ akam. Ana ibọn̄ akam inọ Abasi kpọt.

Jehovah edi “Andikop akam.” (Psalm 65:2) Enye esikpan̄ utọn̄ okop onyụn̄ ọbọrọ akam nnyịn. Kop se apostle John ekewetde mi ọnọ mme asan̄autom Jehovah aban̄a akam: “Se ededi oro nnyịn iben̄ede nte ekemde ye uduak esie, [Abasi] ọbiọn̄ utọn̄ ke eben̄e nnyịn. N̄ko, edieke nnyịn ifiọkde ite enye ọbiọn̄ utọn̄ ke se ededi oro nnyịn iben̄ede, nnyịn imọfiọk ite ke iyọbọ se nnyịn iben̄ede, sia nnyịn iben̄ede enye mme n̄kpọ emi.”—1 John 5:14, 15.

Mme anam-akpanikọ angel iyomke nnyịn inyene nneme ye mmọ m̀mê ibọn̄ akam inọ mmọ. Mmọ ẹdiọn̄ọ ẹnyụn̄ ẹbere ye ndutịm oro Abasi anamde aban̄a akam, emi esibuanade mmọ ndusụk ini. Didie? Ke ini prọfet Daniel ọkọbọn̄de akam ọnọ Jehovah aban̄a Jerusalem oro akanade ndon, Abasi  ọkọbọrọ akam Daniel oro ke ndidọn̄ angel Gabriel ọkọnọ enye etop ndọn̄esịt.—Daniel 9:3, 20-22.

Ndi Mme Akpan̄kpa Ẹsinọ Etop?

Ndi akpana idomo ndinyene nneme ye mme akpan̄kpa? Ediwak owo ẹsibụk nte ikenyenede nneme ye spirit mme akpan̄kpa. Ke uwụtn̄kpọ, obụp ekpo kiet amaaka ebịne mma kiet ke Ireland ọkọdọhọ ke imọ ima inyene nneme ye Fred, ebe mma oro, okoneyo emi ekebede. Edi Fred akakpa urua ifan̄ ke edem. Ekem obụp ekpo oro ama obụk se “Fred” eketịn̄de, mme n̄kpọ emi n̄wan Fred ekekerede ke imọ ikpọn̄ idiọn̄ọ. Emi akpakanam enye ọsọsọp ebiere nte ke Fred ke osụk ododu uwem ke obio mme spirit, ke okonyụn̄ oyom ndida esenowo oro nnyene nneme ye imọ. Edi utọ ubiere oro akpatuaha ye se Bible etịn̄de in̄wan̄-in̄wan̄ aban̄a se itịbede inọ mme akpan̄kpa.—Se ekebe ke idakisọn̄ emi.

Didie ndien ke ẹkeme ndinam utọ mbụk emi an̄wan̄a? Usụn̄ kiet emi mme demon ẹbian̄ade mme owo edi mmọ ndinam nte idi mme akpan̄kpa, nte ẹkenamde ke ini Fred akakpade. Nso inam mmọ ẹnam emi? Ẹsinam man ẹwọn̄ọde mme owo ẹkpọn̄ se Bible ekpepde ẹnyụn̄ ẹnam mmọ ẹtre ndibuọt idem nnyụn̄ mberi edem ke Jehovah. Ke akpanikọ, Satan ye mme demon ke ẹtụn mme owo usụn̄. Mmọ ẹsida “kpukpru utom odudu ye mme nsunsu idiọn̄ọ ye mme utịben̄kpọ ọkọrọ ye kpukpru idiọk abian̄a oro ẹbian̄ade mmọ eke ẹtakde.”—2 Thessalonica 2:9, 10.

Ke nditịm ntịn̄, mme obụp ekpo ye mme  nsan̄a mmọ ẹdu, emi ẹnen̄erede ẹnịm nte ke mmimọ inyene nneme ye mbon oro ẹkekpan̄ade. Ke akpanikọ, edieke mmọ ẹnyenede nneme ye owo ekededi, mmọ ẹnyene nneme ye mme spirit oro ẹbiọn̄ọde Jehovah. Ukem ntre, odu mbon oro ẹkerede ke mmimọ ituak ibuot inọ Abasi, edi mmọ ẹnam ndudue. Ẹma ẹnọ apostle Paul odudu spirit ewet ete: “Se mme idụt ẹwade ke mmọ ẹwa ẹnọ mme demon, iwaha inọ Abasi.”—1 Corinth 10:20, 21.

Ntak ikpọbọn̄de akam inọ owo en̄wen ke ini idiọn̄ọde ke imekeme ndibọn̄ nnọ Akakan Andikara emi amade onyụn̄ ekerede aban̄a nnyịn-e? N̄kọ Bible ọsọn̄ọ ọnọ nnyịn ete: “Enyịn Jehovah [asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.”—2 Chronicle 16:9.

[Se ẹwetde ke ikpọ abisi ke page 9]

Ntak ikpọbọn̄de akam inọ owo en̄wen ke ini idiọn̄ọde ke imekeme ndibọn̄ nnọ Akakan Andikara emi amade onyụn̄ ekerede aban̄a nnyịn-e?

[Ekebe/Ndise ke page 8, 9]

Akpanikọ ye Abian̄a

AKPANIKỌ: SATAN EDI ATA OWO

“Satan ke idemesie ke oforo angel un̄wana.”—2 Corinth 11:14.

“Ẹnyene ikike, ẹnyụn̄ ẹdu ke ukpeme. Asua mbufo, kpa Devil, ke oyoyo nte ekpe eke okụnide, oyom owo eke enye editade.” —1 Peter 5:8.

“Owo emi akade iso ndinam idiọkn̄kpọ oto Devil, koro Devil anamde idiọkn̄kpọ toto ke editọn̄ọ.”—1 John 3:8.

“Ke ntre, ẹsụk idem ẹnọ Abasi; edi ẹbiọn̄ọ Devil, ndien enye eyefehe ọkpọn̄ mbufo.”—James 4:7.

“Devil . . . ekedi owotowo toto ke editọn̄ọ esie, enye ikonyụn̄ isọn̄ọke ida ke akpanikọ, koro akpanikọ mîdụhe enye ke esịt. Ke ini enye osude nsu, enye etịn̄ se isịnede enye ke esịt, koro enye edide osu nsu ye ete nsu.”—John 8:44.

ABIAN̄A: KPUKPRU MME AKPAN̄KPA ẸKA OBIO MME SPIRIT

“Ke ibibiak iso fo ke afo edidia udia tutu afo afiak ke ntan, sia ẹkesiode fi do. Koro afo edide ntan, oyonyụn̄ afiak ke ntan.”—Genesis 3:19.

“Koro mme odu-uwem ẹfiọkde ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet.” —Ecclesiastes 9:5.

“Nam kpukpru se ubọk fo okụtde ndinam ke ofụri odudu fo, koro baba utom, baba uduak, baba ifiọk, baba ọniọn̄ mîdụhe ke Udi, kpa ebiet emi afo akade.”—Ecclesiastes 9:10.

“Ibifịk esie ọwọrọ, enye afiak ke ntan; kpa ke usen oro mme ekikere esie ẹtak.”—Psalm 146:4.

AKPANIKỌ: MME ANAM-AKPANIKỌ ANGEL ẸKERE ẸBAN̄A NNYỊN

“Angel Jehovah adada akanade kpukpru mmọ eke ẹbakde enye, enye onyụn̄ anyan̄a mmọ.”—Psalm 34:7; 91:11.

“Nte kpukpru mmọ [mme angel] idịghe mme spirit emi ẹnamde utom ẹnọ mme owo, emi ẹsion̄ode ẹdọn̄ ndisan̄a utom nnọ mmọ eke ẹdidade edinyan̄a ẹnyene?”—Mme Hebrew 1:14.

“N̄kụt angel efen efede ke ufọt enyọn̄, enye onyụn̄ enyene nsinsi eti mbụk nditan̄a nte etop idatesịt nnọ mbon emi ẹdụn̄de ke isọn̄, ye kpukpru mme idụt ye esien ye usem ye obio, ọdọhọde ke ọkpọsọn̄ uyo ete: ‘Mbufo ẹbak Abasi ẹnyụn̄ ẹnọ enye ubọn̄.’”—Ediyarade 14:6, 7.

ABIAN̄A: JESUS EDI N̄KA YE ABASI

“Nyom mbufo ẹfiọk ẹte Christ edi ibuot ọnọ kpukpru irenowo; erenowo onyụn̄ edi ibuot ọnọ n̄wan; Abasi onyụn̄ edi ibuot ọnọ Christ.”—1 Corinth 11:3.

“Ke ẹma ẹkeyak kpukpru n̄kpọ ẹsịn enye ke idak, adan̄aoro Eyen n̄ko oyosụk idem ọnọ Enye emi akadade kpukpru n̄kpọ esịn enye ke idak, man Abasi ekpedi kpukpru n̄kpọ ọnọ kpukpru owo.”—1 Corinth 15:28.

“Ke ata akpanikọ ke ndọhọ mbufo nte, Eyen ikemeke ndinam baba n̄kpọ kiet ke odudu idemesie, ke mîbọhọke se enye okụtde nte Ete anamde.”—John 5:19.