Kpep N̄kpọ To Ikọ Abasi

Ntak Emi Akpayakde Abasi Ekpep Fi N̄kpọ?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi akpayakde Abasi ekpep fi n̄kpọ?

Abasi enyene eti mbụk ọnọ ubonowo. Eti mbụk emi odu ke Bible. Bible etie nte leta emi edima Ete nnyịn ke heaven ewetde ọnọ nnyịn.—Kot Jeremiah 29:11.

2. Nso idi eti mbụk oro?

Ubonowo ẹyom eti ukara. Ke otu kpukpru mbon oro ẹkarade nnyịn, idụhe eke ekemede nditre afai, ukwan̄ikpe m̀mê ufịk, udọn̄ọ, m̀mê n̄kpa. Edi Abasi ọmọn̄ anam inyene eti ukara. Ukara emi oyosio kpukpru se inamde owo okụt ndutụhọ. Ndi oro idịghe eti mbụk?—Kot Daniel 2:44.

3. Ntak emi enen̄erede oyom ayak Abasi ekpep fi n̄kpọ?

Abasi ọmọn̄ ososobo kpukpru mbon emi ẹnamde owo okụt ndutụhọ ke isọn̄ emi. Mbemiso oro, enye ke ekpep ata ediwak sụn̄sụn̄ mbon isọn̄ nte ima akpan̄wamde mmọ ẹdu eti uwem. Bible an̄wam mme owo ndifiọk nte ẹkpeyọde mme mfịna uwem, nte ẹkpekopde ata inemesịt, ye nte ẹkpenemde Abasi esịt.—Kot Zephaniah 2:3.

  4. Anie enyene Bible?

N̄kpri n̄wed 66 ẹdu ke Bible. Ndien n̄kpọ nte owo 40 ẹkewet mme n̄wed emi. Moses ekewet akpa n̄wed ition ke otu emi ke n̄kpọ nte isua 3,500 emi ẹkebede. Apostle John ewet akpatre ke se ibede isua 1,900 idahaemi. Edi mme andiwet Bible ẹkewet ekikere Abasi idịghe ekikere idemmọ. Ntre, Bible edi N̄wed Abasi.—Kot 2 Timothy 3:16; 2 Peter 1:21.

Nnyịn imọfiọk ke Bible edi N̄wed Abasi koro enye etịn̄ nnennen nnennen se iditịbede ke ini iso. Idụhe eke ekpekemede ndinam emi. (Isaiah 46:9, 10) N̄ko, Bible enen̄ede etịn̄ mme edu Abasi in̄wan̄-in̄wan̄ ọnọ nnyịn. Enye enyene odudu ndikpụhọde mme owo nnam mmọ ẹdu eti uwem. Emi anam ata ediwak owo ẹnịm ke Bible edi Ikọ Abasi.—Kot Joshua 23:14; 1 Thessalonica 2:13.

5. Nso ke akpanam man Bible an̄wan̄a fi?

Ẹkenen̄ede ẹdiọn̄ọ Jesus nte andikpep Ikọ Abasi. Okposụkedi emi ata ediwak owo emi enye ọkọkwọrọde ikọ ọnọ ẹkemehede ye N̄wed Abasi, okosụk oyoyom enye anam ndusụk n̄kpọ an̄wan̄a mmọ. Ntre, Jesus ama esikot nsio nsio itie ke N̄wed Abasi onyụn̄ anam “mmọ ẹfiọk se N̄wed Abasi ọwọrọde.” Se ikpehe emi, “Kpep N̄kpọ To Ikọ Abasi” edisinamde edi oro man Ikọ Abasi an̄wan̄a fi.—Kot Luke 24:27, 45.

Iwakke se isiduaide owo idem nte Abasi ndikpep owo se idide uduak uwem. Edi ekeme ndidi ndusụk owo idinemke esịt ndikụt fi okotde Bible. Kûyak emi anam idem emem fi. Edieke oyomde ndinyene nsinsi uwem, ana ọfiọk Abasi.—Kot Matthew 5:10-12; John 17:3.

Edieke oyomde ndifiọk n̄kpọ efen, se ibuot 2 ke n̄wed Nso ke Bible Enen̄ede Ekpep? oro Mme Ntiense Jehovah ẹsiode.