Kpep N̄kpọ To Ikọ Abasi

Nso ke Abasi Aduak Aban̄a Isọn̄ Emi?

Ibuotikọ emi obụp mme mbụme emi ẹkemede ndidi emesibụp n̄ko onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Nso ke Abasi aduak aban̄a isọn̄ emi?

Isọn̄ edi ebietidụn̄ owo. Ke Abasi ama okobot mme angel ndidụn̄ ke heaven, enye ama obot isọn̄ ọnọ owo. (Job 38:4, 7) Ntak edi oro Jehovah ekesịnde akpa owo oro enye okobotde ke ediye paradise emi ẹkekotde Eden onyụn̄ ọnọ enye ye nditọ oro enye edibonde ifet ndidu uwem ke nsinsi ke isọn̄.—Genesis 2:15-17; kot Psalm 115:16.

In̄wan̄ Eden okodu ke ata ekpri itie ke isọn̄ emi. Akana Adam ye Eve ẹnyene nditọ. Nte mme owo ẹtọtde ke isọn̄, akana mmọ ẹdiọn̄ isọn̄ ẹnyụn̄ ẹnam enye edi paradise. (Genesis 1:28) Owo idisoboke isọn̄ emi tutu amama.—Kot Psalm 104:5.

2. Ntak emi isọn̄ mîdịghe paradise idahaemi-e?

Adam ye Eve ẹma ẹsọn̄ ibuot ye Abasi, ntre Abasi ama ebịn mmọ osio ke Eden. Nte ikasan̄ade itaba Paradise edi oro, ndien idụhe owo ndomokiet ke isọn̄ emi, emi ekemede ndinam ifiak inyene Paradise oro. Bible ọdọhọ ete: “Ẹmeyak isọn̄ ẹsịn idiọkowo ke ubọk.”—Job 9:24; kot Genesis 3:23, 24.

Edi Jehovah ifreke se enye akaduakde ọnọ owo, enye inyụn̄ ikemeke ndisu nsu. (Isaiah 45:18) Enye ayanam ubonowo ẹfiak ẹkedu ke Paradise nte enye akaduakde.—Kot Psalm 37:11.

3. Nso ke Abasi edinam man emem afiak odu ke isọn̄ emi?

Man emem afiak odu ke isọn̄ emi, ana Abasi ebem iso osobo mme idiọkowo efep. Mme angel Abasi ẹyesobo kpukpru mbon emi mîsụkke ibuot inọ Abasi ke ekọn̄ Armageddon. Ẹyekọbi Satan ke tọsin isua, edi mbon oro ẹmade Abasi ẹyebọhọ ẹnyụn̄ ẹdụn̄ ke obufa isọn̄.—Kot Ediyarade 16:14, 16; 20:1-3; 21:3, 4.

  4. Ini ewe ke ufen editre?

Ke isua tọsịn kiet oro Jesus edikarade, Jesus editie ke heaven ikara isọn̄ emi onyụn̄ anam enye akabade paradise. Enye oyonyụn̄ ọsọhi kpukpru idiọkn̄kpọ mbon oro ẹmade Abasi efep. Jesus oyosio udọn̄ọ, usọn̄, ye n̄kpa efep.—Kot Isaiah 11:9; 25:8; 33:24; 35:1.

Ini ewe ke Abasi edisio idiọkn̄kpọ ifep ke isọn̄ emi? Jesus ama ọnọ “idiọn̄ọ” oro edinamde ifiọk ke utịt ekpere. Nte n̄kpọ etiede idahaemi ke ererimbot etie nte ke ẹmọn̄ ẹkpan̄a ẹma, edi oro akam owụt ke nnyịn idu uwem ke “akpatre ini editịm n̄kpọ emi.”—Kot Matthew 24:3, 7-14, 21, 22; 2 Timothy 3:1-5.

5. Mmanie ẹdidu ke Paradise oro itịn̄de iban̄a mi?

Jesus ọkọdọhọ mme anditiene enye ẹnam mme owo ẹdi mbet imọ ẹnyụn̄ ẹkpep mmọ nte Abasi esinamde n̄kpọ ke ima. (Matthew 28:19, 20) Jehovah ke etịm ata ediwak owo idem ke ofụri ererimbot ndidu uwem ke isọn̄ emi ke obufa ererimbot esie. (Zephaniah 2:3) Ke ẹkpep mme owo nte ẹkpedide nti ebe ye nti ete, nti ibanndọ ye nti eka ke mme Ufọkmbono Obio Ubọn̄ Mme Ntiense Jehovah. Nditọ ke ẹtie kiet ye mme ete ye eka ẹkpep se iwụtde ke ini iso ọyọfọn.—Kot Micah 4:1-4.

Afo oyokụt mbon oro ẹmade Abasi ẹnyụn̄ ẹkpepde ndinam se inemde enye esịt ke Ufọkmbono Obio Ubọn̄.—Kot Mme Hebrew 10:24, 25.

Edieke oyomde ndifiọk n̄kpọ en̄wen, se ibuot 3 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.