Kpep N̄kpọ To Ikọ Abasi

Ntak Emi Abasi Ayakde Idiọkn̄kpọ ye Ndutụhọ Ẹdu?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Didie ke idiọkn̄kpọ ọkọtọn̄ọ?

Idiọkn̄kpọ ọkọtọn̄ọ mi ke isọn̄ ke ini Satan okosude akpa nsu. Angel emi akakabarede edi Satan mi ikọdiọkke ini Abasi okobotde enye. Enye ama ọfọn ama, edi ‘ikọsọn̄ọke ida ke akpanikọ.’ (John 8:44) Enye okoyom ẹmen utuakibuot emi ẹkpetuakde ẹnọ Abasi ẹtuak ẹnọ imọ. Satan ama osu nsu ọnọ Eve, onyụn̄ anam enye okop uyo imọ utu ke uyo Abasi. Adam ama etiene Eve ọsọn̄ ibuot ye Abasi. Se Adam akanamde emi anam mme owo ẹbọ ufen ẹnyụn̄ ẹkpan̄a.—Kot Genesis 3:1-6, 17-19.

Satan ọkọtọn̄ọ en̄wan ye ukara Abasi ke ini enye ọkọdọhọde Eve ọsọn̄ ibuot ye Abasi. Ata ediwak owo ẹdiana ye Satan ẹsịn ukara Abasi. Ntre, Satan edi “andikara ererimbot emi.”—Kot John 14:30; Ediyarade 12:9.

2. Ndi se Abasi okobotde ikọfọnke?

Mme owo ye mme angel emi Abasi okobotde ẹkpekekeme ndikop item esie ketket. (Deuteronomy 32:5) Ke ini Abasi okobotde owo, Enye ama ọnọ owo ifụre ndimek ndinam eti m̀mê idiọk. Ifụre emi anam nnyịn ikeme ndiwụt m̀mê imama Abasi.—Kot James 1:13-15; 1 John 5:3.

3. Ntak emi Abasi ayakde ndutụhọ odu?

Jehovah ọyọ nsọn̄ibuot owo ke ata ediwak isua idahaemi. Ntak-a? Man mme owo ẹkụt ke ukaraidem ifọnke. (Jeremiah 10:23) Ndien se iwọrọde owo ke ofụri isua 6,000 emi mmọ ẹkarade idem mi owụt ke emi edi akpanikọ. Mme andikara ikemeke nditre ekọn̄, ubiatibet, ufịk, ye udọn̄ọ.—Kot Ecclesiastes 7:29; 8:9; Rome 9:17.

Edi n̄kpọ ọyọfọn ye mbon emi ẹnyịmede Abasi akara mmimọ. (Isaiah 48:17, 18) Jehovah ọmọn̄ osio ukara owo efep ke mîbịghike. Ndien sụk mbon emi ẹnyịmede Abasi akara mmimọ ẹdidụn̄ ke isọn̄.—Isaiah 2:3, 4; 11:9; kot Daniel 2:44.

 4. Nso ufọn ke ime Abasi enyene?

Satan ọkọdọhọ ke owo ndomokiet idisọn̄ọke ida ikpono Jehovah ke ima. Ime Abasi ọnọ kpukpru nnyịn ifet ndiwụt m̀mê ida inọ ukara Abasi m̀mê ukara owo. Nte nnyịn idude uwem owụt owo emi idade inọ.—Kot Job 1:8-11; Mme N̄ke 27:11.

5. Nso ke ikpanam ndiwụt ke iyom Abasi akara nnyịn?

Edieke ituakde ibuot inọ Abasi nte Bible etemede, oro owụt ke iyom Abasi akara nnyịn. (John 4:23) Ukem nte Jesus, inaha nnyịn n̄ko isịn idem ke mbre ukara ye ekọn̄.—Kot John 17:14.

Satan ada odudu esie anam mme owo ẹdu ata idiọk uwem. Mme ufan ye mme iman nnyịn ẹkeme ndisak nnyịn mîdịghe ẹkọbọ nnyịn sia nnyịn mîtieneke mmọ idu utọ uwem emi. (1 Peter 4:3, 4) Ntre, nnyịn inyene ndibiere m̀mê iditiene mmọ m̀mê iditiene mbon emi ẹmade Abasi m̀mê iyonyụn̄ inịm nti ibet emi Abasi ọnọde nnyịn ke ima. Edieke inamde emi, iwụt ke Satan okososu ndidọhọ ke owo ndomokiet idikopke uyo Abasi.—Kot 1 Corinth 6:9, 10; 15:33.

Edieke oyomde ndifiọk n̄kpọ en̄wen, se ibuot 11 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode

[Ndise ke page 16]

Adam ekemek ndinam idiọkn̄kpọ

[Ndise ke page 17]

Se imekde ndinam owụt m̀mê iyom Abasi akara nnyịn