Mme Andikot N̄wed Nnyịn Ẹbụp Ẹte . . .

Ndi Kpukpru Christian Oro Ẹnamde Akpanikọ Ẹdika Heaven?

▪ Ediwak owo ẹkot ikọ Jesus emi ọnọde ndọn̄esịt mi: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Ndi ikọ Jesus emi ọwọrọ ke kpukpru mme anam-akpanikọ asan̄autom Jehovah Abasi ẹdika heaven ikodu uwem ke nsinsi ikop inemesịt?

Jesus ama etịn̄ ikọ emi anamde owo ekere n̄kpọ ete: “Baba owo kiet ikọdọkke ikodụk ke heaven ibọhọke enye oro okotode ke heaven osụhọde edi, kpa Eyen owo.” (John 3:13) Emi ọwọrọ ke mme anam-akpanikọ asan̄autom Abasi ke eset utọ nte Noah, Abraham, Moses, ye David ikakaha heaven. (Utom 2:34) M̀mọ̀n̄ ndien ke mmọ ẹdu? Ke nditịn̄ ibio ibio: Mme anam-akpanikọ asan̄autom Abasi emi ẹdu ke udi, ẹdede, ifiọkke n̄kpọ inyụn̄ ikopke ubiak. Mmọ ẹdisịne do tutu ekem ini emi ẹdinamde mme akpan̄kpa ẹset.—Ecclesiastes 9:5, 6; Utom 24:15.

Jesus edi akpa owo ke Bible emi etịn̄de aban̄a mme owo ndiset n̄kodu uwem ke heaven. Enye ama ọdọhọ mme apostle esie ke iyaka iketịm itie inọ mmọ ke heaven. (John 14:2, 3) Akpa ekedi oro ikọt Abasi ndikop utọ ikọ emi. Ekem apostle Paul ama edinam an̄wan̄a nte ke Jesus ama akakpa onyụn̄ eset aka heaven, ke enye ama ‘ọkọtọn̄ọ obufa odu-uwem usụn̄ ọnọ mme mbet esie,’ ndien emi ekedi usụn̄ emi akanam owo ndomokiet mîkaha.—Mme Hebrew 10:19, 20.

Ndi oro ọwọrọ ke kpukpru mme anam-akpanikọ asan̄autom Abasi emi ẹkedude ọtọn̄ọde ke ini oro ẹyeka heaven? Iwọrọke ntre, koro mbon emi ẹkade heaven ẹnyene utom emi mmọ ẹkade ndinam. Ke akpatre okoneyo emi Jesus okodude ye mme apostle esie, enye ama ọdọhọ mmọ ete ke mmọ “[ẹyetie] ke mme ebekpo ẹkpe ikpe” ke Obio Ubọn̄ imọ ke heaven. Ntre, utom mbon emi ẹkade heaven edi ndiketiene Jesus n̄kara.—Luke 22:28-30.

Mbon en̄wen n̄ko ẹyetiene mme apostle Jesus ẹnam utom emi. Apostle John ama okụt ke n̄kukụt nte Jesus adade ye mbon emi ẹsetde ẹka heaven, emi Bible ọdọhọde ke ẹdi ‘obio ubọn̄ ye mme oku, ndien ke mmọ ẹyekara isọn̄.’ (Ediyarade 3:21; 5:10) Owo ifan̄ ke enye okokụt? Mmọ iwakke kpa nte ibat mme andikara mîsiwakke ke idụt ekededi. Jesus, kpa Eyenerọn̄ Abasi, ayada ye owo 144,000 emi ‘ẹkedepde ẹsio ke otu ubonowo,’ akara.—Ediyarade 14:1, 4, 5.

Imọfiọk ke mme asan̄autom Abasi ọtọn̄ọde ke eset tutu esịm idahaemi ẹwak ebe 144,000. Edi an̄wan̄a ntak emi edide owo ifan̄ emi kpọt ẹset ẹka heaven koro enyene akpan utom emi mmọ ẹkade ndinam. Edieke okpoyomde ndibọp ufọk, ndi okpokot kpukpru mme ọbọp-ufọk emi ẹnen̄erede ẹdiọn̄ọ ubọp ufọk ẹdibọp ufọk ẹnọ fi? Baba. Okponyụn̄ okot owo ifan̄ etiene nte utom oro okponde eketre. Ntem n̄ko ke Abasi onyụn̄ anam, idịghe kpukpru mme anam-akpanikọ asan̄autom esie ke enye okot ẹditiene Christ ẹkara ke heaven.

Ukara eke heaven emi ayanam se Abasi akaduakde ọnọ ubonowo osu. Jesus ye owo 144,000 emi ẹditienede enye ẹkara ẹyekụt ẹte ke ẹnam ofụri isọn̄ akabade edi paradise emi ata ediwak mme asan̄autom Abasi ẹdidụn̄de ke inemesịt ke nsinsi. (Isaiah 45:18; Ediyarade 21:3, 4) Emi eyesịne kpukpru mbon emi Abasi edinamde ẹset.—John 5:28, 29.

Abasi ọyọnọ kpukpru mme asan̄autom esie—eke eset ye eke idahaemi—nsinsi uwem. (Rome 6:23) Ndusụk ẹdidu ke heaven ke nsinsi inam akpan utom, ke ini ata ediwak eken ẹdidude nsinsi uwem ke Paradise ke isọn̄ emi.