Kpep Nditọ Fo

Se Ikanamde Ẹma Dorcas

IDỤHE eke mîyomke ẹma imọ. Ndi emesiyom ẹma fi?— * Bible etịn̄ aban̄a mma kiet emi mme owo ẹkemade etieti. Enye ekekere Dorcas.

Dorcas okodụn̄ ke Joppa, emi ekperede Inyan̄ Mediterranean. To do sịm Jerusalem edi n̄kpọ nte kilomita 56 kpọt. Dorcas ekedi kiet ke otu mbet Jesus.

Ndi ọmọfiọk se ikanamde mme owo ẹma Dorcas ntre?— Bible ọdọhọ ke enye ama esinam nti n̄kpọ esinyụn̄ ọnọ mme owo n̄kpọ. Ndien etie nte enye ama esikịm ndiye ọfọn̄ ọnọ mme ebeakpa. Enye ama esinyụn̄ ọkwọrọ aban̄a ata Abasi, Jehovah, kpa nte Jesus ekesinamde.

Ọmọfiọk ata idiọk n̄kpọ emi etịbede ọnọ Dorcas?— Enye ọdọn̄ọ tutu akpa. Mme ufan  esie ẹfụhọ etieti. Ntre, mmọ ẹdọn̄ mme owo ẹkekot apostle Peter emi odude n̄kpọ nte kilomita 16 ẹte ọsọsọp edi. Ke Peter edide edisịm, enye ọdọk ufọkenyọn̄ emi ẹnịmde okpo Dorcas. Iban ke ẹtua ke ẹseme, ẹnyụn̄ ẹwụt Peter mme ọfọn̄ emi Dorcas ekekịmde ọnọ mmọ.

Ekem Peter ọdọhọ kpukpru owo ke ubet oro ẹwọn̄ọ. Enye ye mme apostle eken ẹma ẹsinam mme utịben̄kpọ, edi akananam owo mmọ ndomokiet inamke owo eset. Afo ekere ke nso ke Peter anam idahaemi?—

Peter ọtọn̄ọ ọdọn̄ ekpere akpan̄kpa onyụn̄ ọbọn̄ akam ọnọ Jehovah. Ekem enye ọdọhọ Dorcas adaha ada, ndien enye adaha ada. Peter anyan ubọk omụm enye, emenede enye ke enyọn̄. Ekem Peter okot mme ebeakpa oro ye mmọ eken onyụn̄ ayak enye ọnọ mmọ. Ndi ọmọfiọk adan̄a nte esịt enemde mmọ?—

Nso ke ekpep oto mbụk Dorcas emi? N̄kpọ kiet emi ekemede ndikpep edi nte ke edieke esin̄wamde mme owo, ke mmọ ẹyema fi. Edi owo emi edimade fi ikan inyụn̄ iti fi edi Abasi. Abasi idifreke nti n̄kpọ emi afo anamde ọnọ mme owo. Ndien enye iditreke ndinọ fi utịp—oro edi nsinsi uwem ke obufa ererimbot esie emi inemesịt edikponde.

Kot ke Bible fo

Utom 9:36-43

Ediyarade 21:3-5

[Ikọ Idakisọn̄]