Ndi Odu Eke Edide Ntak Idiọkn̄kpọ?

“N̄KADIA ubọk udia kiet ye devil.” Etubom ekọn̄ Esop Edidiana Mme Idụt emi akanamde utom ke Rwanda eketịn̄ ikọ emi ndiwụt nte eketiede imọ ke idem ke ini mmimọ mîkekemeke nditre nsobo ofụri orụk ke idụt oro ke 1994. Kop se owo en̄wen emi okokụtde se iketịbede ke Rwanda etịn̄de mi aban̄a utọ ibak ibak usụn̄ oro ẹkewotde mme owo do. Enye ọdọhọ ete: “Edieke owo osụk ọsọn̄de esịt ọdọhọ ke Satan idụhe, yak enye ọwọn̄ọde edi udi ofụri owo ke Rwanda.” Ndi Devil enen̄ede edi ntak utọ ibak emi?

Ediwak owo inịmke ke enyene owo emi enyịn owo mîkemeke ndikụt, emi edide ntak ofụri afai ye ibak ke ererimbot emi. Mmọ ẹsikere ke idiọkido emi ikadade imana esinam mme owo ẹnam ibak ye afai. Ndusụk ẹdọhọ ke mme imọ owo ye mme enyene-odudu ke ererimbot ẹdịbe ẹda mme owo ẹnam se mmọ ẹmade ke ediwak isua idahaemi man ẹmen ererimbot emi ẹkara. Ndien enyene mbon en̄wen emi ẹdọhọde ke ukara edi ntak ndiọi n̄kpọ ye ndutụhọ oro ikụtde.

Afo ekere didie? Ntak emi idiọkn̄kpọ, ibak, ye ndutụhọ ẹyọhọde ke ererimbot kpa ye ofụri ukeme emi ẹsịnde nditre mmọ? Ntak emi mme owo ẹsịnde idem ke n̄kpọ emi ẹkemede ndisobo mmọ kpa ye emi ẹdụride mmọ utọn̄ ediwak ini? Ndi enyene eke onụkde mmọ ẹsịn ke n̄kpọ emi? Anie enen̄ede akara ererimbot emi? Ibọrọ mbụme emi ekeme ndikpa fi idem.