San̄a Kpere Abasi

Afo Emekeme Ndinyene “Ifiọk Abasi”

JEHOVAH ABASI enịm n̄kpọuto ọnọ nnyịn, onyụn̄ oyom ikụt n̄kpọuto emi. N̄kpọuto enye emi idinọhọ nnyịn okụk, edi ekeme ndinam inyene n̄kpọ emi kpukpru okụk ke ererimbot emi mîkemeke ndidep—oro edi, emem, uyụhọ ye inem uwem. Ewe n̄kpọuto idedi emi? Edidem Solomon ama etịn̄ aban̄a n̄kpọuto emi ke Mme N̄ke 2:1-6.

Solomon ọdọhọ ke n̄kpọuto emi edi “ifiọk Abasi”—oro edi, akpanikọ aban̄ade Abasi ye mme uduak esie emi Bible anamde ifiọk. (Ufan̄ikọ 5) N̄kpọuto emi awak ikpehe.

Akpanikọ. Bible ọbọrọ mme mbụme emi: Nso idi enyịn̄ Abasi? (Psalm 83:18) Nso isitịbe ke ini owo akpade? (Psalm 146:3, 4) Ntak emi nnyịn idude ke isọn̄ emi-e? (Genesis 1:26-28; Psalm 115:16) Afo ekere ke ibọrọ mbụme emi ẹsọn̄ urua adan̄a didie?

Nti item. Bible eteme nnyịn mfọnn̄kan usụn̄ emi ikpodude uwem. Nso ke akpanam man ndọ fo ebịghi? (Ephesus 5:28, 29, 33) Ọkpọbọk didie nditọ fo man mmọ ẹwọrọ n̄kpọ? (Deuteronomy 6:5-7; Ephesus 6:4) Akpanam didie okop inemesịt? (Matthew 5:3; Luke 11:28) Afo ekere ke nti item emi Bible ọnọde mi ke mme n̄kpọ emi ẹsọn̄ urua adan̄a didie?

Anam ifiọk nte Abasi etiede ye mme edu esie. Bible edi akpan ebiet emi ikemede ndikụt akpanikọ aban̄ade Abasi. Ke uwụtn̄kpọ, Abasi etie didie? (John 1:18; 4:24) Ndi enye ekere aban̄a nnyịn? (1 Peter 5:6, 7) Nso idi ndusụk n̄wọrọnda edu esie? (Exodus 34:6, 7; 1 John 4:8) Afo ekere ke se Bible etịn̄de emi ọnọ nnyịn aban̄a Andibot ẹsọn̄ urua adan̄a didie?

“Ifiọk Abasi” enen̄ede edi n̄kpọuto eke spirit. Akpanam didie okụt n̄kpọuto emi? Mme N̄ke 2:4 esịn un̄wam ọnọ nnyịn ke afan̄ emi. Solomon emen ifiọk emi odomo ye “n̄kpọuto eke edịbede.” Kere emi ise: Isidịghe owo ke etetie, ke etetie, n̄kpọuto ọwọrọ ke ebiet emi enye ekesịnede edidụk enye ubọk. Ẹsisesịn idem ẹyom enye. Ntre ke onyụn̄ edi ye ifiọk Abasi. N̄kpọuto enye emi esịne ke Bible. Ndien man ikụt enye, oyom isịn ukeme idụn̄ọde iyom enye.

Solomon etịn̄ se ikpanamde man inyene “ifiọk Abasi.” Ikọ emi, ‘bọ ikọ mi,’ ye ‘sịn esịt,’ owụt ke ana inyenyịme Ikọ Abasi. (Ufan̄ikọ 1, 2) Ikọ emi ‘fiori kot,’ ‘ka iso yom,’ ye ‘ka iso dụn̄ọde yom,’ owụt ke ana isịn idem ikpep ifiọk Abasi inyụn̄ inam emi ke ofụri esịt. (Ufan̄ikọ 3, 4) Ọwọrọ man ikụt n̄kpọuto emi, oyom isịn idem ikpep Bible, inam emi ye eti esịt.—Luke 8:15.

Edieke nnyịn inamde emi, Jehovah ayanam se isụhọde. Mme N̄ke 2:6 ọdọhọ ke ‘Jehovah esinọ ọniọn̄.’ Ndien emi ọwọrọ ke Abasi kpọt ekeme ndinam nnyịn itịm ifiọk se ikpepde ke Bible. (John 6:44; Utom 16:14) N̄ko fiọk ete ke edieke odụn̄ọrede Ikọ Abasi ke ofụri esịt, ke eyenyene “ifiọk Abasi”—kpa n̄kpọuto emi ediforide uwem fo ke usụn̄ emi inua mîkemeke nditịn̄.—Mme N̄ke 2:10-21. *

Itie Bible emi okpokotde ke october:

◼ Mme N̄ke 1-21

[Ikọ Idakisọn̄]